LEKSIYON 55
Suportaran an Saindong Kongregasyon
Sa bilog na kinaban, minilyon na tawo an maugmang nagsasamba ki Jehova sa rinibong mga kongregasyon. Nagpapasalamat sinda sa mga instruksiyon asin paggiya na naaako ninda, asin maugma nindang sinusuportaran an kongregasyon sa dakul na paagi. Arog man daw kaiyan an namamatian mo sa saindong kongregasyon?
1. Ano an nagkapirang paagi na magagamit mo an saimong panahon asin kusog para suportaran an saindong kongregasyon?
Gabos kita may maitatabang sa kongregasyon. Halimbawa, igwa daw sa saindong kongregasyon nin mga may edad na o may kamatian? Puwede mo daw sindang alalayan para makaatender sa mga pagtiripon? O puwede mo daw sindang tabangan sa iba pang praktikal na paagi, arog kan pagsaod o iba pang gibuhon sa harong? (Basahon an Santiago 1:27.) Puwede man kitang magboluntaryong magtabang sa paglinig asin pagmentenar kan Kingdom Hall. Dai kita pinipirit na gibuhon an mga bagay na iyan. Huli sa pagkamuot sa Diyos asin sa satong mga tugang, ‘gikan sa buot na ipinepresentar ta an satong sadiri.’—Salmo 110:3.
Masusuportaran kan bawtisadong mga Saksi an saindang kongregasyon sa iba pang mga paagi. An mga brother na nakakaabot sa kahagadan kan Bibliya puwedeng magtabang sa kongregasyon bilang mga ministeryal na lingkod o elder. Tanganing urog na masuportaran an gibuhon na paghuhulit, puwedeng maglingkod an mga brother asin sister bilang mga payunir. An ibang Saksi man puwedeng makatabang paagi sa pagboluntaryo sa gibuhon na pagtugdok nin mga lugar nin pagsamba o pagbalyo sa sarong kongregasyon na nangangaipo nin tabang sa iba pang mga paagi.
2. Paano ta magagamit an satong materyal na mga pagsasadiri para suportaran an satong kongregasyon?
‘Matatawan ta nin onra si Jehova paagi kan satong mahahalagang pagsadiri.’ (Talinhaga 3:9) Ibinibilang tang pribilehiyo an pagdonar nin kuwarta asin iba pang pagsadiri para suportaran an satong kongregasyon asin an pambilog na kinaban na paghuhulit. (Basahon an 2 Corinto 9:7.) An satong mga donasyon ginagamit man sa pag-ayuda sa mga tinamaan nin kalamidad. Dakul an regular na ‘nagtatagama nin idodonar.’ (Basahon an 1 Corinto 16:2.) Puwede kitang magdonar asin maghulog sa mga donation box sa satong mga lugar nin pagsamba o puwede man kitang magdonar online sa donate.jw.org. Tinatawan kita ni Jehova nin oportunidad na ipahiling an satong pagkamuot sa saiya paagi sa kun paano ta ginagamit an satong materyal na mga pagsadiri.
ARAMON PA
Aramon pa an pira sa mga paagi na masusuportaran mo an saindong kongregasyon.
3. Puwede tang gamiton an satong materyal na mga pagsadiri
Namumutan ni Jehova asin ni Jesus an mga maugmang nagtatao. Halimbawa, kinomendaran ni Jesus an sarong pobreng babaying balo na igwa nin kadikiton na kuwarta pero naghinguwang magdonar. Basahon an Lucas 21:1-4, dangan pag-ulayan an mga hapot na ini:
Kaipuhan daw na dakula an kantidad kan satong donasyon para mapaugma si Jehova?
Ano an namamatian ni Jehova asin ni Jesus pag gikan sa buot kitang nagdodonar?
Para maaraman kun paano ginagamit an satong mga donasyon, i-play an VIDEO. Dangan pag-ulayan an hapot na ini:
Paano ginagamit an mga donasyon para sa kapakinabangan kan mga kongregasyon sa bilog na kinaban?
4. Puwede kitang magboluntaryong tumabang
Kan mga panahon kan Bibliya, maigot na nagtabang an mga nagsasamba ki Jehova sa pagmentenar kan saindang lugar nin pagsamba. Pero bako lang pagdonar nin kuwarta an kalabot diyan. Basahon an 2 Cronica 34:9-11, dangan pag-ulayan an hapot na ini:
Paano nagtabang an lambang Israelita sa pag-asikaso kan harong ni Jehova, o sa saindang lugar nin pagsamba?
Para maaraman kun paano inaarog kan mga Saksi ni Jehova an halimbawang iyan sa Bibliya, i-play an VIDEO. Dangan pag-ulayan an mga hapot na ini:
Taano ta mahalaga na pirming malinig asin mentenado an satong Kingdom Hall?
Ano an mga puwede mong gibuhon para makatabang?
5. Puwedeng hinguwahon kan mga brother na magin kuwalipikado para sa dagdag na mga responsabilidad
Dinadagka kan Kasuratan an mga Kristiyanong lalaki na maghinguwa para mas lubos na masuportaran an kongregasyon. Para mahiling an sarong halimbawa, i-play an VIDEO. Dangan pag-ulayan an hapot.
Sa video, ano an ginibo ni Ryan para mas lubos na masuportaran an kongregasyon?
Ipinapaliwanag kan Bibliya kun ano an mga kuwalipikasyon para sa mga brother tanganing makapaglingkod sinda bilang mga ministeryal na lingkod asin elder. Basahon an 1 Timoteo 3:1-13, dangan pag-ulayan an mga hapot na ini:
Ano an mga kuwalipikasyon para sa mga naghihinguwang magin ministeryal na lingkod o elder?
Ano man an inaasahan na mahiling sa saindang mga pamilya?—Hilingon an bersikulo 4 asin 11.
Pag hinihinguwa kan mga brother na maabot an mga kuwalipikasyon na iyan, paano nakikinabang an bilog na kongregasyon?
TIBAAD MAY MAGHAPOT: “Sain hali an pondo kan mga Saksi ni Jehova?”
Ano an isisimbag mo?
SUMARYO
Pinapahalagahan na marhay ni Jehova an satong mga paghihinguwa na suportaran an satong kongregasyon paagi kan satong panahon, kusog, asin materyal na mga pagsadiri.
Rebyu
Paano ta magagamit an satong panahon asin kusog para suportaran an kongregasyon?
Paano ta magagamit an satong materyal na mga pagsadiri para suportaran an kongregasyon?
Sa anong mga paagi gusto mong suportaran an kongregasyon?
HILINGON MAN
Aramon kun taano ta dai na hinahagad nin Diyos sa saiyang mga parasamba na magtao nin ikapu.
“Ano an Sinasabi kan Bibliya Manungod sa Pagtao nin Ikapu?” (Artikulo sa jw.org/bcl)
May iinaasignar an Bibliya na nagkapirang papel para sa bawtisadong mga lalaki. Pero paano kun sarong bawtisadong babayi an kaipuhan na mag-asikaso kan mga papel na ini?
“An Pagkapayo sa Laog kan Kongregasyon” (An Torrengbantayan, Pebrero 2021)
Bistuhon an pira sa makusog an buot na mga Saksi na nagsasakripisyong marhay para ihatod an mga publikasyon sa mga kapwa ninda parasamba.
Aramon kun sain hali an pondo na ginagamit para sa satong mga gibuhon asin an dakulang pagkakaiba kaiyan sa ibang mga relihiyon.
“Sain Hali an Pondo Para sa Gibuhon kan Mga Saksi ni Jehova?” (Artikulo sa jw.org/bcl)