Taano ta Dapat na ‘Dumanan an Tanga’?
AN MADONONG na si Hadeng Salomon sa suanoy na Israel nagtao kan sadol na ini: “Dumani an tanga.” Taano ta sinabi nia ini? Ano an manonodan niato sa mga tanga?
Idinugang ni Salomon: “Helinga an mga ugale [kan tanga] asin magin ka madonong. Minsan iyan mayo nin kapitan, opisyal o hade, inaandam kaiyan an pagkakan kaiyan minsan sa tig-initan; tinipon kaiyan an pagkakan na ikabubuhay kaiyan minsan sa panahon nin pag-ani.” (Talinhaga 6:6-8) An mga tataramon na iyan kan suanoy nagpapahayag nin mga katotoohan na nadiskobre nin mga naturalista sa modernong aldaw.
An parataram nin talinhaga na si Agur nagpaparisa na an mga tanga “natural na madonong.” (Talinhaga 30:24, 25) Siyempre, an kadonongan ninda bakong bunga nin intelihenteng pangangatanosan kundi resulta kan natural na mga tendensia na itinao sa sainda kan Kaglalang. Huli sa natural na tendensia, halimbawa, an mga tanga nagtitipon kan pagkakan kaiyan sa tamang panahon.
An mga tanga makangangalas an pagkaorganisar. Pambihira an pakikokooperar asin pag-atento sa mga katrabaho, tinatabangan ninda an nakolgan o pagal nang mga tanga pabalik sa istaran. May natural sindang tendensia na mag-andam para sa ngapit asin ginigibo ninda an gabos na mapupuwede sa pag-otob sa saindang mga trabaho.
An natural na gawe kan tanga nagpaparisa na an mga tawo maninigong magplano para sa ngapit asin magin mahigos. Aplikado ini sa eskuwelahan, sa trabaho, asin sa espirituwal na mga aktibidad. Kun paanong an tanga nakikinabang sa kahigosan kaiyan, boot man nin Dios na an mga tawo ‘magkamit nin karahayan sa gabos nindang hinigosan.’ (Eclesiastes 3:13, 22; 5:18) Arog nin sibot na mga tanga, an tunay na mga Kristiano mahigos na nagtatrabaho sa bilog na aldaw. Saindang ‘ginigibo sa bilog nindang makakaya an nakua kan saindang kamot na gibohon,’ bakong huli ta nagbabantay an among, kundi huli sa pagkasadiosan asin sa kamawotan na magin mahigos, mabungang mga trabahador.—Eclesiastes 9:10; ikomparar an Talinhaga 6:9-11; helingon man an Tito 2:9, 10.
Magigin nanggad kitang maogma kun kita ‘dumuman sa tanga’ asin iaplikar an nanonodan niato dian. Asin mapapasatuya an pinakadakulang kaogmahan kun mahigos niatong ootobon an kabotan ni Jehova Dios, na ipinahayag sa Biblia.