“Banal na Paglilingkod na May Kakayahan na Mangatanosan”

“Idolot nindo an saindong mga hawak na siring sa buhay na atang, banal, maaako nin Dios, sarong banal na paglilingkod na may kakayahan na mangatanosan.” ​—ROMA 12:1.

1, 2. Paano nakakaagid sa pagigin eksperto sa sarong bagong lenguahe an pag-adal na iaplikar an mga prinsipyo sa Biblia?

PRINOBARAN na daw nindong mag-adal nin sarong bagong lenguahe? Kun iyo, daing duwa-duwa na maoyon kamo na iyan depisil na gibohon. Total, an kalabot labi pa sa pag-adal sana nin bagong mga termino. An ekspertong paggamit nin lenguahe naghahagad man nin pagigin eksperto sa gramatika kaiyan. Dapat nindong masabotan kun paano konektado sa kada saro an mga termino asin kun paano iyan pinag-iiriba tanganing makaporma nin kompletong mga ideya.

² Kapareho iyan kan pagkua niato nin kaaraman sa Tataramon nin Dios. An kalabot labi pa sa pag-adal sana nin piniling mga teksto sa Kasuratan. Dapat man niatong pag-adalan an gramatika kan Biblia, sabi ngani. Dapat niatong masabotan kun paano konektado sa kada saro an mga teksto asin kun paano iyan nagseserbing mga prinsipyo na ikakaaplikar sa pan-aroaldaw na buhay. Sa siring puede kitang magin “lubos na may kakayahan, andam nanggad para sa lambang marahay na gibo.”​—2 Timoteo 3:17.

3. Mapadapit sa paglilingkod sa Dios, anong pagkaliwat an nangyari kan 33 C.E.?

³ Sa irarom kan areglo sa kodigo kan Mosaikong Pagboot, an kaimbodan puedeng ipaheling, sa dakulang kabtang, paagi sa estriktong pagsunod sa klarong mga susundon. Alagad kan 33 C.E., hinale ni Jehova an Pagboot, na garo baga ‘ipinako iyan sa hariging pasakitan’ na pinaggadanan sa saiyang Aki. (Colosas 2:​13, 14) Pakatapos kaidto, an banwaan nin Dios dai tinawan nin kadakoldakol na lista nin mga atang na dapat idolot asin mga susundon na dapat kuyogon. Imbes, sinabihan sinda: “Idolot nindo an saindong mga hawak na siring sa buhay na atang, banal, maaako nin Dios, sarong banal na paglilingkod na may kakayahan na mangatanosan.” (Roma 12:1) Iyo, an mga Kristiano dapat na maghingoa, sa saindang bilog na puso, kalag, isip, asin kosog sa paglilingkod sa Dios. (Marcos 12:30; ikomparar an Salmo 110:3.) Alagad ano an boot sabihon kan pagdolot nin “banal na paglilingkod na may kakayahan na mangatanosan”?

4, 5. Ano an kalabot sa paglilingkod ki Jehova paagi sa satong kakayahan na mangatanosan?

⁴ An fraseng “kakayahan na mangatanosan” trinadusir hale sa termino sa Griego na lo·gi·kosʹ, na an kahulogan “rasonable” o “intelihente.” An mga lingkod nin Dios hinahagadan na gamiton an saindang konsensia na sinanay sa Biblia. Imbes na ibasar an saindang mga desisyon sa kadakol na dati nang haman na mga susundon, dapat na maingat na turotimbangon nin mga Kristiano an mga prinsipyo sa Biblia. Kaipuhan na masabotan ninda an “gramatika” kan Biblia, o kun paano konektado sa kada saro an laen-laen na prinsipyo kaiyan. Sa siring, makagigibo sinda nin timbang na mga desisyon paagi sa saindang kakayahan na mangatanosan.

⁵ Boot daw sabihon kaini na an mga Kristiano mayo nin ano man na pagboot? Bako nanggad. An Kristianong Griegong Kasuratan malinaw na nagbabawal nin idolatriya, seksuwal na inmoralidad, paggadan, pagputik, espiritismo, salang paggamit nin dugo, asin laen-laen na iba pang kasalan. (Gibo 15:​28, 29; 1 Corinto 6:​9, 10; Kapahayagan 21:8) Pero, labing marhay kisa hinagad sa mga Israelita, dapat niatong gamiton an satong kakayahan na mangatanosan na adalan asin iaplikar an mga prinsipyo sa Biblia. Siring nanggad sa pagsabot sa sarong bagong lenguahe, nagkakaipo ini nin panahon asin paghihingoa. Paano daw mapatatalubo an satong kakayahan na mangatanosan?

Pagpatalubo sa Saindong Kakayahan na Mangatanosan

6. an kalabot sa pag-adal kan Biblia?

⁶ Enot, dapat kitang magin galagang mga estudyante sa Biblia. An ipinasabong na Tataramon nin Dios “kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan.” (2 Timoteo 3:16) Maninigo na dai kita perming maglaom na an simbag sa sarong problema makukua sa saro sanang bersikulo sa Biblia. Imbes, puedeng kaipuhan kitang mangatanosan sa nagkapirang teksto na nagtatao nin liwanag sa sarong partikular na situwasyon o problema. Kakaipuhanon na gumibo kita nin mahigos na paghanap sa kaisipan nin Dios dapit sa bagay. (Talinhaga 2:​3-5) Nangangaipo man kita nin pakasabot, huli ta “an tawong may pakasabot iyo an saro na magkakaigwa nin marahay na paggiya.” (Talinhaga 1:5) Puedeng pagsuruwayon nin mapagsabot na tawo an indibiduwal na mga kabtang nin sarong bagay dangan mansayon an koneksion kaiyan sa kada saro. Siring sa sarong puzzle, pinag-iiriba nia an mga piesa tanganing maheling nia an bilog na retrato.

7. Paano an mga magurang makapangangatanosan sa mga prinsipyo sa Biblia mapadapit sa pagdisiplina?

⁷ Halimbawa, yaon an bagay dapit sa pagigin mga magurang. An Talinhaga 13:24 nagsasabi na an ama na namomoot sa saiyang aki “nagsisiyasat sa saiya na may pagdisiplina.” Kun ini sana an satong hehelingon, puedeng ikaaplikar nin sala an tekstong ini tanganing ipangatanosan an maisog, daing kontrol na pagpadusa. Pero, an Colosas 3:21 nagtatao nin nagbabalanseng sadol: “Kamong mga ama, dai nindo pagpaanggoton an saindong mga aki, tanganing dai sinda panluyahan nin boot.” An mga magurang na naggagamit kan saindang kakayahan na mangatanosan asin pinag-ooyon an mga prinsipyong ini dai magdidisiplina sa paaging puedeng apodon na “abusado.” Tatrataron ninda an saindang mga aki na may init, pagsabot, asin dignidad. (Efeso 6:4) Kaya, sa pagigin mga magurang o sa ano pa man na ibang bagay na may napapalabot na mga prinsipyo sa Biblia, mapatatalubo niato an satong kakayahan na mangatanosan paagi sa pagturotimbang sa gabos na konektadong bagay. Sa paaging ini, mamamansayan niato an “gramatika” kan mga prinsipyo sa Biblia, kun ano an boot nin Dios asin kun paano gigibohon iyan.

8. Paano niato malilikayan an pagkaigwa nin estrikto, dogmatikong mga punto-de-vista kun manongod sa aling-alingan?

⁸ An ikaduwang paagi na mapatatalubo niato an satong kakayahan na mangatanosan iyo na likayan an pagkaigwa nin estrikto, dogmatikong mga punto-de-vista. An mabaskog na punto-de-vista nakaoolang sa pagtalubo kan satong kakayahan na mangatanosan. Horophoropa an bagay dapit sa pag-aling-aling. An Biblia nagsasabi: “An bilog na kinaban namumugtak sa kapangyarihan kan maraot.” (1 Juan 5:19) Boot daw sabihon kaini na an gabos na libro, pelikula, o programa sa telebisyon na pinapaluwas kan kinaban maraot asin sataniko? An siring na punto-de-vista bako nanggad na makatanosan. Siempre, tibaad pagmarahayon nin iba na biyong lumikay sa telebisyon, mga pelikula, o sekular na mga babasahon. Diretso ninda iyan, asin dai sinda maninigong tatsaran huli kaiyan. Pero dai man ninda maninigong hingoahon na impluwensiahan an iba na magkaigwa nin kaparehong estriktong paninindogan. An Sosyedad nagpupublikar nin mga artikulo na nagtatao nin mga prinsipyo sa Biblia na maninigong magpangyari sa sato na magin madonong na mapamili sa satong pagpaharohayahay o pag-aling-aling. An paglihis sa giyang ini asin pagbalad kan satong sadiri sa inmoral na kaisipan, makuring kadahasan, o espiritismo na yaon sa dakol na aling-alingan kan kinaban na ini bako nanggad na madonong. Tunay nanggad, an madonong na pagpili nin aling-alingan naghahagad na gamiton niato an satong kakayahan na mangatanosan na iaplikar an mga prinsipyo sa Biblia tanganing magkaigwa nin malinaw na konsensia sa atubangan nin Dios asin nin mga tawo.​—1 Corinto 10:​31-33.

9. Ano an boot sabihon kan “lubos na pagmansay”?

⁹ An dakol na aling-alingan ngonyan malinaw na bakong angay para sa mga Kristiano.a Kaya maninigo niatong patoodon an satong puso na ‘ikaongis an maraot’ tanganing dai kita magin arog kan nagkapira kaidtong enot na siglo na “nawaran na kan gabos na pagmate sa moral.” (Salmo 97:10; Efeso 4:​17-19) Tanganing makapangatanosan sa siring na mga bagay, nangangaipo kita nin “tamang kaaraman asin lubos na pagmansay.” (Filipos 1:9) An termino sa Griego na trinadusir na “pagmansay” nangangahulogan nin “sensitibong pagsabot sa moral.” An termino nanonongod sa literal na mga sentido nin tawo, arog nin pagheling. Kun manongod sa pag-aling-aling o ano man na ibang bagay na naghahagad nin personal na desisyon, an satong moral na sentido maninigong nakapokus tanganing maheling niato bako sanang an klarong marhay, malinaw kun arin an marahay asin maraot na mga isyu kundi pati man an mga bagay na alanganon. Kadungan kaiyan, maninigo niatong likayan an pag-aplikar nin mga prinsipyo kan Biblia sa bako nang makatanosan na pagpasobra asin pag-insistir na iyan man an dapat na gibohon kan gabos niatong tugang.​—Filipos 4:5.

10. Paano niato masasabotan an personalidad ni Jehova na ipinaheling sa Salmo 15?

¹⁰ An ikatolong paagi na mapatalubo an satong kakayahan na mangatanosan iyo na kuanon an kaisipan ni Jehova asin itanom iyan nin hararom sa satong puso. Sa saiyang Tataramon, ihinahayag ni Jehova an saiyang personalidad asin mga pamantayan. Sa Salmo 15, halimbawa, satong mababasa an dapit sa klase nin tawo na iniimbitaran ni Jehova na magin bisita sa saiyang tolda. An siring na tawo naggigibo nin katanosan, nagtataram kan katotoohan sa saiyang puso, maimbod sa saiyang mga panuga, asin dai nan-aaprobetsar sa iba. Mantang binabasa an salmong ini, hapota an saindong sadiri, ‘Ilinaladawan daw kan mga kualidad na ini an sakong sadiri? Iimbitaran daw ako ni Jehova na magin bisita sa saiyang tolda?’ An satong mga kakayahan nin pagmansay naparirigon mantang kita nakakaoyon sa mga dalan asin kaisipan ni Jehova.​—Talinhaga 3:​5, 6; Hebreo 5:14.

11. Paano “linilihisan [kan mga Fariseo] an hustisya asin an pagkamoot nin Dios”?

¹¹ Sa mismong bagay na ini na labi-labi an pagkukulang kan mga Fariseo. Aram kan mga Fariseo an teknikal na estruktura kan Pagboot pero dai nakakamansay sa “gramatika” kaiyan. Kaya nindang sumambit nin kadakoldakol na detalye sa Pagboot, pero dai ninda nasabotan an Personalidad na nasa likod kaiyan. Sinabihan sinda ni Jesus: “Itinatao nindo an ikasampulo kan yerbabuena asin kan ruda asin kan gabos na iba pang gugulayon, alagad linilihisan nindo an hustisya asin an pagkamoot nin Dios!” (Lucas 11:42) Huli sa saindang estriktong isip asin matagas na puso, dai nagamit kan mga Fariseo an saindang kakayahan na mangatanosan. An saindang pabarubagong pangangatanosan nahayag kan tatsaran ninda an mga disipulo ni Jesus huli sa pagpukit nin mga ohoy asin pagkakan kan mga tipasi sa aldaw nin Sabbath; pero, paghaloyhaloy kan aldaw man sanang idto, dai sinda nakamate nin pagkolog nin konsensia kan sinda magpakanang gadanon si Jesus!​—Mateo 12:​1, 2, 14.

12. Paano kita magigin orog na kaoyon ki Jehova bilang Persona?

¹² Boot niatong mapalaen sa mga Fariseo. An satong kaaraman sa Tataramon nin Dios dapat na makatabang sato na magin orog na kaoyon ki Jehova bilang Persona. Paano niato magigibo ini? Pakabasa nin sarong kabtang kan Biblia o literatura na basado sa Biblia, an iba natabangan nin paghorophorop sa mga hapot na arog kaini, ‘Ano an itinotokdo sako kan impormasyon na ini dapit ki Jehova asin sa saiyang mga kualidad? Paano ko ikapaheheling an mga kualidad ni Jehova sa sakong relasyon sa iba?’ An paghorophorop sa siring na mga hapot nagpapatalubo sa satong kakayahan na mangatanosan asin nagpapangyari sato na magin “mga paraarog sa Dios.”​—Efeso 5:1.

Mga Oripon nin Dios Asin ni Cristo, Bakong nin mga Tawo

13. Paano an mga Fariseo guminaweng siring sa moral na mga diktador?

¹³ Dapat na togotan nin kamagurangan an mga nasa irarom kan saindang pangangataman na gamiton an saindang kakayahan na mangatanosan. An mga miembro kan kongregasyon bakong mga oripon nin mga tawo. “Kun sagkod ngonyan ako nagpapaogma sa mga tawo,” an isinurat ni Pablo, “ako bakong oripon ni Cristo.” (Galacia 1:10; Colosas 3:​23, 24) Sa kabaliktaran, boot kan mga Fariseo na maniwala an mga tawo na orog na importanteng kamtan an pag-oyon nin mga tawo kisa nin Dios. (Mateo 23:​2-7; Juan 12:​42, 43) An mga Fariseo ginibo an saindang sadiri na moral na mga diktador na naggibo kan saindang sadiring mga susundon dangan hinusgaran an iba sono sa kun gurano karahay kan saindang pag-otob. An mga nagsusunod sa mga Fariseo luminuya sa paggamit kan saindang konsensia na sinanay sa Biblia, na nagigin nang mga oripon nin mga tawo.

14, 15. (a) Paano ikapaheheling kan kamagurangan an saindang sadiri na mga katabang kan aripompon? (b) Paano maninigong resolberan kan kamagurangan an mga bagay na kalabot an konsensia?

¹⁴ An Kristianong kamagurangan sa kongregasyon ngonyan nakakaaram na an aripompon sa pangenot dai maninimbag sa sainda. An lambang Kristiano dapat na magpasan kan saiyang sadiring pasan. (Roma 14:4; 2 Corinto 1:24; Galacia 6:5) Ini an maninigo. Totoo nanggad, kun an mga miembro kan aripompon magigin oripon nin mga tawo, na nagkukuyog sana huli ta binabantayan, ano an saindang gigibohon kun mayo an mga tawong iyan? Si Pablo igwa nin dahelan na maggayagaya manongod sa mga taga-Filipos: “Sa paagi na kamo danay na nagkuyog, bako sanang sa panahon kan sakong presensia, kundi orog pa sa panahon kan sakong pagkawara, padagos kamong maghingoa na makamtan an saindong kaligtasan na may takot asin pagtakig.” Sinda tunay nanggad na mga oripon ni Cristo, asin bakong ni Pablo.​—Filipos 2:12.

¹⁵ Kaya sa mga bagay na kalabot an konsensia an kamagurangan dai naggigibo nin mga desisyon para sa mga nasa irarom kan saindang pangangataman. Saindang ipinaliliwanag an mga prinsipyo sa Biblia na kalabot sa sarong bagay dangan tinotogotan an kalabot na mga indibiduwal na gamiton an saindang sadiring mga kakayahan na mangatanosan sa paggibo nin desisyon. Ini sarong seryosong paninimbagan, pero ini bagay na an indibiduwal mismo an dapat na magpasan.

16. Anong sistema sa paghusay nin mga problema an yaon sa Israel?

¹⁶ Horophoropa an panahon na naggamit si Jehova nin mga hokom sa paggiya sa Israel. An Biblia nagsasabi sa sato: “Kan mga aldaw na idto mayo nin hade sa Israel. An tama sa saiyang mga mata iyo an ginigibo kan lambang saro.” (Hokom 21:25) Alagad nagtao nanggad si Jehova nin mga paagi na makakua nin giya an saiyang banwaan. An kada siudad igwa nin kamagurangan na lalaki na puedeng magtao nin maygurang na tabang sa mga hapot asin problema. Dugang pa, an mga saserdoteng Levita naghiro bilang sarong puersa sa ikararahay paagi sa pag-edukar sa mga tawo sa mga pagboot nin Dios. Kun maglataw an nangorogna kadepisil na mga problema, an halangkaw na saserdote puedeng makihumapot sa Dios paagi sa Urim asin Tummim. An Insight on the Scriptures nagkokomento: “An indibiduwal na nag-aprobetsar sa mga probisyon na ini, na nagkamit nin kaaraman sa pagboot nin Dios asin nag-aplikar kaiyan, igwa nin madonong na giya para sa saiyang konsensia. An paggibo nia ‘kan tama sa saiyang mga mata’ sa siring na kamugtakan dai magbubunga nin maraot. Tinogotan ni Jehova an banwaan na magpaheling nin boluntad o bakong boluntad na kaisipan asin dalan.”​—Tomo 2, pahina 162-3.b

17. Paano ikapaheheling kan kamagurangan na sinda naghahatol oyon sa mga pamantayan nin Dios imbes na sa sainda mismo?

¹⁷ Arog kan mga hokom asin saserdoteng Israelita, an kamagurangan sa kongregasyon nagtatao nin maygurang na tabang sa mga problema asin nagtatao nin mahalagang hatol. Kun beses, sinda ‘nagsasagwe pa ngani, nagtutuyaw, nagsasadol, sa bilog na pakatios asin abilidad sa pagtotokdo.’ (2 Timoteo 4:2) Ginigibo ninda iyan oyon sa mga pamantayan nin Dios, bakong sa sainda mismo. Epektibo nanggad ini kun an kamagurangan nagtatao nin halimbawa asin naghihingoang aboton an puso!

18. Taano ta nangorognang epektibo na aboton kan kamagurangan an mga puso?

¹⁸ An puso iyo an “makina” kan satong Kristianong aktibidad. Kaya an Biblia nagsasabi: “Gikan dian an mga burabod nin buhay.” (Talinhaga 4:23) An kamagurangan na pinupukaw an puso makanonompong na paagi kaiyan an mga nasa kongregasyon namomotibar na gibohon an bilog nindang makakaya sa paglilingkod sa Dios. Magboboluntad sinda, na dai na perming kaipuhan na sadolon nin iba. Habo ni Jehova nin napipiritan na pagkuyog. Naghahanap sia nin pagkuyog na naggigikan sa pusong pano nin pagkamoot. Madadagka kan kamagurangan an siring na minomotibar nin pusong paglilingkod paagi sa pagtabang sa mga nasa aripompon na pataluboon an saindang kakayahan na mangatanosan.

Pagpatalubo “kan Kaisipan ni Cristo”

19, 20. Taano ta importante na pataluboon niato an kaisipan ni Cristo?

¹⁹ Siring sa nasabi, bakong igo na maaraman sana an mga pagboot nin Dios. “Papangyarihon mong ako makasabot,” an pakimaherak kan salmista, “tanganing maotob ko an saimong pagboot asin maotob ko iyan sa bilog na puso.” (Salmo 119:34) Ihinahayag ni Jehova sa saiyang Tataramon an “kaisipan ni Cristo.” (1 Corinto 2:16) Bilang saro na naglingkod ki Jehova paagi sa saiyang kakayahan na mangatanosan, si Jesus nagwalat sato nin sangkap na modelo. Nasabotan nia an mga pagboot asin prinsipyo nin Dios, asin iinaplikar nia iyan nin daing kanawayan. Paagi sa pag-adal sa saiyang halimbawa, satuyang ‘lubos na masasabotan sa isip kun ano an lakbang asin laba asin langkaw asin rarom, asin maaaraman an pagkamoot kan Cristo na minalampas sa kaaraman.’ (Efeso 3:​17-19) Iyo, an satong nanonodan sa Biblia manongod ki Jesus labing marhay sa akademikong kaaraman sa payo; nagtatao iyan sato nin malinaw na ladawan kun arog sa ano mismo si Jehova.​—Juan 14:​9, 10.

²⁰ Kaya, mantang inaadalan niato an Tataramon nin Dios, mamamansayan niato an kaisipan ni Jehova dapit sa mga bagay-bagay asin makakaabot kita sa timbang na mga desisyon. Mangangaipo ini nin paghihingoa. Dapat kitang magin galagang mga estudyante kan Tataramon nin Dios, na ginigibo an satong sadiri na madaling maimpluwensiahan kan personalidad asin mga pamantayan ni Jehova. Garo kita nag-aadal nin bagong gramatika. Pero, an mga naggigibo kaiyan magsusunod sa sadol ni Pablo na “idolot [an saindang] mga hawak na siring sa buhay na atang, banal, maaako nin Dios, sarong banal na paglilingkod na may kakayahan na mangatanosan.”​—Roma 12:1.

[Mga Nota sa Ibaba]

Ano an Saindong Nanodan?

◻ Anong pagkaliwat manongod sa paglilingkod sa Dios an nangyari kan 33 C.E.?

◻ Paano niato mapatatalubo an satong kakayahan na mangatanosan?

◻ Paano matatabangan kan kamagurangan an mga nasa aripompon na magin mga oripon nin Dios asin ni Cristo?

◻ Taano ta maninigo niatong pataluboon an “kaisipan ni Cristo”?

[Retrato sa pahina 23]

An kamagurangan nagtatabang sa iba na gamiton an saindang kakayahan na mangatanosan