An Angat na Pagsunod sa Saiyang mga Gira

“Huli ta si Cristo nagtios para sa saindo asin winalatan kamo nin personal na halimbawa, tangani na kamo sumunod sa saiyang mga gira.”—1 PEDRO 2:21, Phillips.

1, 2. (a) Ano an puwedeng magin dakulang angat, asin taano ta interesado digdi an mga Kristiano? (b) Anong mga hapot an pinalalataw digdi?

KAMO daw nakalakaw na sa sarong baybayon o sa may niyebeng oma asin naaling kan mga gira nin saro na naenot sa saindo na naglakaw dian? Kamo daw tibaad puminili nin sarong grupo nin mga gira asin prinobaran na sundan iyan, na itinatangod dian an saindong lakad sa pinakaeksaktong mahihimo nindo? Kun iyo, nadiskobre nindo na iyan bakong pasil. Sa katunayan, an maingat na pagsunod sa gira nin iba—magsalang sa literal o sa piguratibo—tunay na angat. Pero, sa pag-apod sa satong sadiri na Kristiano, ipinarisa niato an satong kamawotan na gumibo kaiyan, an maingat na sumunod sa mga gira ni Cristo.

² Andam daw kamong gibohon an kinakaipuhan na paghihingoa tanganing mapangganang maatubang an angat na ini? Orog pa kaiyan, determinado daw kamong gibohon iyan, ano man an mangyari? Kun iyo, an lubos na pakasabot sa mga kadepisilan sa pagsunod sa literal na mga gira gigibohon kamong orog na mapanggana sa pagsunod sa piguratibong mga gira ni Cristo.

Makanood na Sumunod

3. Taano an pagsunod sa gira nin iba ta tibaad sa primero garo lawi?

³ An gabos may napapalaen na lakaw. Halimbawa, an lakwat kan lakad nin laen-laen na tawo laen-laen man, siring man an anggulo kan pagtongtong nin saro. An saiyang mga moro puwedeng diretso, o puwede iyan na tumagilid palaog o paluwas, anggulo na tibaad mas risa sa sarong bitis kisa sa saro. Namimidbid daw nindo an angat? Tanganing maingat na makasunod sa gira nin iba, kaipuhan na isunod nindo an saindong lakwat nin lakad asin posisyon nin bitis sa saiya. Sa primero ini magigin garo baga lawi, pero iyan kaipuhan na gibohon. Mayo nin ibang paagi.

4. Taano ta espesyal na angat an pagsunod sa gira ni Jesus?

⁴ An lakaw ni Cristo, sa piguratibong pagtaram, pambihira, ta sa tahaw kan saiyang mga katemporanyo sia sana an tawong sangkap, “saro na dai nakakamidbid nin kasalan.” (2 Corinto 5:21) Huling an mga tawo sa kanaturalan bakong sangkap na mga parakasala, an paglakaw sa mga gira ni Jesus bakong iyo an saindang normal na lakaw. Ini ipinagirumdom ni Pablo sa mga Kristiano sa Corinto, na sinasabi: “Huli ta kamo makalaman pa. Huli ta mantang igwa nin pag-imon asin pasuruhay dian sa saindo, bako daw na kamo makalaman asin bako daw na kamo naglalakaw nin siring sa mga tawo?” An mga tendensia sa pag-imon asin pasuruhay, na “mga gibo nin laman,” normal sa mga tawong bakong sangkap, alagad ta si Jesus naglakaw sa pagkamoot, asin “an pagkamoot bakong maimon, . . . dai napaaanggot.” Kaya an paglakaw sa gira ni Cristo nagtatao nin angat na mas dakula kisa kun kita pinasusunod sana sa gira nin sarong tawong bakong sangkap.—1 Corinto 3:3; 13:4, 5; Galacia 5:19, 20; helingon man an Efeso 5:2, 8.

5, 6. (a) Taano an dakol ta dai nakasunod sa gira ni Cristo, na nagmotibar ki Pablo na itao an anong hatol? (b) Paano dinadagka an mga tawo na lumakaw sa gira ni Cristo ngonyan, na may anong mga resulta para sa sainda?

⁵ Apuwera sa pagkabakong sangkap, an ignoransia sa kabotan nin Dios puwede man na makaolang sa saro sa paglakaw sa mga gira ni Cristo. Kaya sinadol ni Pablo an mga Kristianong taga-Efeso na dai “maglakaw siring sa paglakaw kan mga nasyon sa pagigin daing kamanungdanan kan saindang isip, mantang sinda nasa kadikloman sa isip, asin suhay sa buhay na gikan sa Dios, huli sa saindang kamangmangan, huli sa katagasan kan saindang puso.”—Efeso 4:17, 18.

⁶ Paagi sa paghuhulit kan Kahadean, an mga tawo ngonyan sinasadol na pumondo sa paglakaw sa normal nindang paagi, na mangmang sa mga katuyohan nin Dios, nasa kadikloman sa isip, na pinahihiro nin matagas na puso na naghahanap nin mga pasohan na daing kamanungdanan. Sinasadol sinda na sumunod sa sangkap na halimbawa ni Cristo, “maglakaw sa pakisumaro sa saiya,” sa siring “dinadara an lambang kaisipan sa pagkabihag tanganing iyan magin makinuyog ki Cristo.” (Colosas 2:6, 7; 2 Corinto 10:5) An mga andam na atubangon an angat na ini makosog sa saindang pagtubod. Mantang sinda natotood na maglakaw arog kan paglakaw ni Cristo, iyan luway-luway na nagigin mas pasil para sa sainda.

7. Ano an kasiertohan niato na, minsan ngani iyan parateng sarong angat, posible an pagsunod sa gira ni Jesus?

⁷ Alagad, iyan parateng sarong angat. Dakula an pagkakalaen nin sangkap na linalang asin nin bakong sangkap na linalang. Kaya an bakong sangkap na mga linalang kaipuhan na gumibo nin dakulang mga pagliliwat sa paghihingoa na makasunod sa sangkap na halimbawa. An iba, tibaad huli sa erensia o palibot, mas nadedepisilan na sumunod sa Kristianong pamumuhay kisa iba. Alagad sinisierto sato ni Jehova na an siisay man na talagang boot na maghingoa makagigibo kaiyan. “Igwa ako kan kosog para sa gabos na bagay huli sa saiya na nagtatao nin kapangyarihan sa sako,” sabi ni apostol Pablo. (Filipos 4:13; helingon man an 2 Corinto 4:7; 12:9.) Totoo man iyan sa gabos na Kristiano.

Mag-atento

8, 9. (a) Taano ta kaipuhan an dai nababangang atension asin pagkonsentrar nin igo kun sinusundan an gira nin iba? (b) An pagsunod sa anong hatol sa Biblia maolang sato na makasuway sa gira ni Jesus?

⁸ Dai kita makasusunod sa literal na mga gira na dai binabantayan an satong tinotongtongan. Kun magbaragbarag an satong mata—na nagheheling sa mga nangyayari sa palibot niato o sa iba pang bagay—dai mahahaloy mapapasala an tongtong niato. Kun dai kita magtatao nin dai nababangang pag-atento asin magkokonsentrar nin igo, mapapasuway kita sa gira na maninigo niatong sundan. Kaya, kaipuhan na danay na magbantay, nangorogna kun an biglang mga ribok o iba pang dai linalaoman na istorbo tibaad makaparayo kan satong isip sa gibohon.—Ikomparar an Job 18:10, 11.

⁹ Sa piguratibong paagi, ini totoo man sa mga nagsusunod sa mga gira ni Jesus. Pinatanidan ni Jesus an saiyang mga parasunod na mag-ingat sa sainda man sana, ta tibaad an saindang puso “manganaan nin kapasloan asin nin kaburatan asin mga paghadit sa buhay.” (Lucas 21:34) Ginagamit ni Satanas an mga istorbong ini sa aroaldaw tanganing haleon niato an satong mata sa mga gira ni Jesus. Listo siang dakopon kita paagi sa pag-aprobetsar sa dai linalaoman na mga kamugtakan, arog baga nin pagtumang, helang, o pagtios sa pinansial. Tanganing maseguro na “dai nanggad kita ikaanod,” kaipuhan na kita “magtao nin orog kisa dating atension sa mga bagay na satong nadangog,” sa ibang pagtaram, itorohok nin orog kisa kasuarin pa man an satong mata sa mga gira ni Cristo.—Hebreo 2:1; helingon man an 1 Juan 2:15-17.

Dai Sumuway

10. (a) Ano an peligro kun nagkakakurus an laen-laen na grupo nin gira? (b) Sa espirituwal na sentido, taano ta an resulta nin pagsunod sa salang gira?

¹⁰ Sa matawong baybayon, tibaad may nagkapirang grupo ni mga gira sa basang baybay, asin an ibang gira tibaad umagi sa mga gira na sinusundan niato. An dakol na grupo nin gira tibaad, kisuerra sa pan-ibabaw, parareho. Napakahalagang seguradohon na tama sinusundan niato! Ta tibaad kita madaya na pumasiring sa salang direksion. Sa espirituwal na sentido, ini puwedeng magkaigwa nin seryosong resulta. An peligro sa pagsunod sa gira na garo tama alagad sa katotoohan bako ipinaheheling sa talinhaga na nagpapatanid: “Igwa nin dalan na matanos sa pagheling nin tawo, alagad an sagkodan kaiyan iyo an mga dalan nin kagadanan.”—Talinhaga 16:25.

11. Anong patanid an itinao ni Pablo sa enot na mga Kristiano, na nagtatao nin halimbawa kiisay ngonyan?

¹¹ Huli sa tunay nanggad na peligrong ini, si Pablo napahirong patanidan an saiyang mga tugang sa enot na Kristianong kongregasyon: “Ako nagngangalas na kamo madalion na minabulag sa Saro na nag-apod sa saindo paagi sa dai na maninigong kabootan kan Cristo pasiring sa laen na maogmang bareta. . . . Igwa nin nagkapira na nanriribok sa saindo asin boot na raoton an maogmang bareta manongod kan Cristo. . . . An siisay man na nagpapahayag sa saindo bilang maogmang bareta nin bagay na lihis sa inako na nindo, sumpaon nindo sia.” (Galacia 1:6-9) Sa pag-arog sa halimbawa ni Pablo, an Namamahalang Grupo kan mga Saksi ni Jehova ngonyan nagpapatanid sato manongod sa mga apostata asin falsong mga tugang na garo baga nagbubugtak nin palsipikadong gira. An tunay na mga Kristiano dai magugustong sumuway sa dalan na ibinugtak para sa sainda ni Cristo sa paggiya nin Dios.—Salmo 44:18.

12. (a) Paano makatatabang sato an 2 Timoteo 1:13 na makalikay na madaya sa pagsunod sa palsipikadong gira? b) Ano an nagpapamidbid sa laen na maogmang bareta?

¹² Paagi sa pag-atento sa mga midbidan kan mga gira ni Cristo, nalilikayan niato an malagalag. An tamang kaaraman manongod ki Jesus, manongod sa saiyang mga katokdoan, manongod sa pagpunsionar kan Kristianong kongregasyon minatabang sato na mamidbid an “arogan nin marahay na mga tataramon” na nagpoprotehir sato tumang sa mga ‘nanraraot sa maogmang bareta manongod kan Cristo.’ (2 Timoteo 1:13) An ibang klaseng maogmang bareta daa—sa katunayan, palsipikadong mga gira—dai nakatatama sa arogan na iyan nin katotoohan. Rinaraot ninda iyan, na pinalilibog iyan. Imbes na linawon an pundamental na mga katotoohan asin prinsipyo kan Biblia, kinokontra ninda iyan. Imbes na dagkahon kita sa mas dakol na aktibidad sa paglilingkod ki Jehova, sinda nangangatanosan apabor sa pagluya. An saindang mensahe bakong positibo asin dai nagpapamuraway sa ngaran asin organisasyon ni Jehova; iyan negatibo, naghahanap nin sala, asin mapagtatsar. Tunay nanggad, bako ini an gira na gusto niatong sundan.

Papagdanayon an Tamang Rikas

13. Paano napapalabot an rikas kun sinusundan niato an gira nin iba?

¹³ Kun kita naglalakaw, an lakwat kan satong lakad sa sarong kabtang depende sa rikas kan satong paglakaw. Sa kadaklan, mientras na mas marikas an satong lakaw, mas halakwat man an satong lakad; mientras na mas maluway an satong paglakaw, mas halipot man an lakad. Kaya, mas pasil na sumunod sa literal na gira nin saro kun ibabagay niato an satong rikas sa saiya. Siring man, tanganing mapangganang makalakaw sa piguratibong gira kan satong Poon, si Jesu-Cristo, kaipuhan na papagdanayon niato an saiyang rikas.

14. (a) Sa anong mga paagi na tibaad dai kita makadungan ki Jesus? (b) Taano ta kamangmangan an pagprobar na enotan an “maimbod asin madonong na oripon”?

¹⁴ An dai pakikidungan ki Cristo puwedeng mangahulogan nin arin man sa duwang bagay. Magsalang kita mas marikas, na inienotan an “maimbod asin madonong na oripon” na ginagamit ni Jesus sa pag-otob sa katuyohan ni Jehova, o mahuri kita sa pagsunod sa paggiya kan ‘oripon’ na iyan. (Mateo 24:45-47) Bilang halimbawa kan naeenot, may mga Kristiano kan mga nakaagi na nalangkag manongod sa doktrinal o organisasyonal na mga pagliliwat o pagpakarhay na sa paghona ninda kaipuhan asin atrasado na. Huling may hinanakit sa paghona na atrasado an mga bagay, huminale sinda sa banwaan ni Jehova. Kanigoan na kamangmangan asin kanigoan kahalipot kan pananaw! Parate na an mismong ikinaaanggot ninda sa huri liniwat—sa itinalaan na panahon ni Jehova.—Talinhaga 19:2; Eclesiastes 7: 8, 9.

15. Paano si Hadeng David asin si Jesus marahay na halimbawa sa pagpapadanay nin tamang rikas?

¹⁵ An dalan nin kadonongan halaton na humiro si Jehova imbes na probaran na magdikta kun gurano karikas maninigong mangyari an mga bagay. An suanoy na si Hadeng David nagtao nin tamang halimbawa. Nagsayuma siang makipagkasapakat tumang ki Hadeng Saul sa pagprobar na kuanon an pagkahade bago umabot an itinalaan na panahon ni Jehova na itao iyan sa saiya. (1 Samuel 24:1-15) Siring man, “an Aki ni David,” si Jesus, nakaaram na kaipuhan siang maghalat na lubos na lumaog sa saiyang langitnon na paghade. Aram nia an hula na aplikado sa saiya: “Tumukaw ka sa sakong too sagkod na ibugtak ko an saimong mga kaiwal na tongtongan kan saimong mga bitis.” Kaya kan an sarong grupo nin mga Judio gustong ‘kuanon sia nin pirit tanganing gibohon siang hade,’ si Jesus listong naghale. (Mateo 21:9; Salmo 110:1; Juan 6:15) Pakalihis nin mga 30 taon, sono sa Hebreo 10:12, 13, si Jesus naghahalat pa sa saiyang paghade. An totoo, sia naghalat nin haros 19 siglo bago sia patukawon bilang may diretsong Hade sa Kahadean nin Dios kan iyan patindogon kan 1914.

16. (a) Iilustrar kun paano kita tibaad magin man maluway kisa maninigo. (b) Ano an katuyohan kan pagpapasensia ni Jehova, asin paano niato maninigong likayan na abusohon an pagpapasensiang iyan?

¹⁶ Alagad an dai pakapagdanay sa tamang rikas puwede man na mangahulogan nin pagluya, na nahuhuri. Kaya, kun ipinaririsa kan Tataramon nin Dios na kaipuhan na gibohon an mga pagliliwat sa satong buhay, kita daw minahirong dai nin pag-atraso? O nangangatanosan daw kita na mantang an Dios mapasensia, puwede niatong idigson an siring na mga pagliliwat, sa paglaom na tibaad iyan mas pasil na? Totoo, si Jehova mapasensia. Alagad ini bakong tanganing kita magin pabaya sa paggibo kan kinakaipuhan na mga pagliliwat. Imbes, “sia mapasensia sa saindo huli ta habo nia na an siisay man malaglag kundi boot nia na an gabos makapagsolsol.” (2 Pedro 3:9, 15) Kaya mas marahay nanggad na arogon an salmista na nagsabi: “Naghumari ako, asin dai ako nag-atraso sa pag-otob sa saimong mga togon.”—Salmo 119:60.

17. Ano an koneksion kan pagdadanay sa tamang rikas paghuhulit kan Kahadean, na minagiya sato na ihapot sa sato man sana an anong hapot?

¹⁷ Puwede man na mapalabot sa pagkahuri an paghuhulit kan Kahadean. Sono sa Mateo 25, si Jesus naghohokom ngonyan sa katawohan, na isinisiblag an “mga karnero” sa “mga kanding.” Ini sa kadaklan nagigibo paagi sa paghuhulit kan “maogmang baretang ini kan kahadean.” (Mateo 24:14; 25:31-33; Kapahayagan 14:6, 7) An panahon na itinao tanganing matapos an pagbubulagbulag na ini limitado. (Mateo 24:34) Mantang madali nang matapos an panahon, malalaoman niato na parikason ni Jesus an gibohon. Sa paggibo kaiyan, sia minahiro bilang instrumento nin Dios, na, sa pagtaram manongod sa gibong pagtitipon, nanunuga: “Ako mismo, si Jehova, maparikas kaiyan sa kapanahonan kaiyan.” (Isaias 60:22) Bilang mga katabang nin Dios, na maingat na nagsusunod sa gira kan saiyang Aki, rinirikasan daw niato an paghuhulit kan Kahadean sagkod sa itinotogot kan satong pisikal na kamugtakan asin Makakasuratan na mga paninimbagan? An mga report sa paglilingkod nagpaparisa na ginigibo iyan nin minilyon na Saksi ni Jehova!

Isikwal an Sobrang Pagkompiar, Labanan an Panluluya nin Boot

18. Taano ta tibaad magsobra sa pagkompiar an saro, asin paano nagpapatanid an Biblia manongod sa peligrong ini?

¹⁸ Mientras na mas haloy kitang naghihingoa sa pagsunod sa gira nin saro, orog man kitang natotood sa saiyang lakaw. Alagad, kun kita magigin kontento na sa sadiri, dai mahahaloy mapapasala an lakad niato. Kaya, kun nagsusunod sa piguratibong gira ni Jesus, kaipuhan na midbidon niato an peligro nin sobrang pagkompiar, na daing pag-iingat na nagsasarig sa sadiri niatong kosog asin mga abilidad, na naghohona na eksperto na kita sa saiyang sangkap na lakaw. An eksperyensia ni Pedro na nasusurat sa Lucas 22:54-62 nagseserbing napapanahon na patanid. Idinodoon man kaiyan an katotoohan kan 1 Corinto 10:12, na nagsasabi: “Mag-ingat an siisay man na naghohona na nagtitindog na dai sia mapukan.”

19. (a) Ano an nangyayari sa lambang Kristiano sa panapanahon? (Santiago 3:2) (b) Ano an maninigong magin punto-de-vista niato sa mga tataramon ni Pablo sa Roma 7:19, 24?

¹⁹ Huli sa dai pagkasangkap, an lambang Kristiano mapapasala an lakad sa panapanahon. An pagkasala tibaad kadikit sana, na haros dai risa nin iba. O iyan tibaad risang gayong pagkasala na iyan maheheling nin gabos. Arin man digdi, nakararanga nanggad na magirumdoman an sadiosan na pag-admitir ni Pablo: “Huli ta an marahay na minamawot ko dai ko ginigibo, kundi an maraot na hinahaboan ko iyo an ginigibo ko. Herak man sa sako!” (Roma 7:19, 24) Siyempre an mga tataramon na ini dai maninigong ibilang na sarahotan sa paggibo nin maraot. Imbes, iyan nagpapakosog sa debotadong mga Kristiano na nakikipaglaban sa pagkabakong sangkap, na tinatabangan sundan magpadagos sa saindang paghihingoa na atubangon an angat na maglakaw sa sangkap na gira ni Jesus.

20. (a) Paano an Talinhaga 24:16 nakatatabang sato sa satong pakikiumbasan para sa buhay? (b) Kita maninigong magin determinado na gibohon an ano?

²⁰ “An matanos puwedeng mapukan sagkod sa makapito, asin sia siertong matindog,” sabi kan Talinhaga 24:16. Sa satong pakikiumbasan sa buhay, mayo nin siisay man na maninigong mapahirong magdemetir. An paorumbasan na ini garo maraton, paorumbasan sa pakatagal, bakong sanggatos na yardang pareha. An pinakasadit na pagkasala sa tongtong nin sarong parapareha sa gabos na probabilidad puwedeng makapadaog sa saiya. Pero an paradalagan sa maraton, dawa pa sia mapukan, may panahon na bumuhat asin tapuson an paorumbasan. Kaya kun huli sa personal na pagkasala nin lakad kamo mapakurahaw, “Herak man sa sako!” girumdoma na may panahon pa kamong bumuhat. May oportunidad pa kamong makidungan sa saindong Poon, si Jesu-Cristo. Dai nin dahelan na madesesperar! Dai nin dahelan na sumuko! Magin determinado, sa tabang nin Dios, na mapangganang atubangon an angat na ‘sumunod sa gira ni Jesus.’—1 Pedro 2:21.

Taano an mga Kristiano ta dapat na

◻ makanood na sumunod?

◻ magtao nin dai nababangang pag-atento?

◻ girumdomon an arogan nin katotoohan?

◻ papagdanayon an tamang rikas?

◻ isikwal an sobrang pagkompiar?

◻ labanan an panluluya nin boot?

[Ritrato sa pahina 18]

Paagi sa pagtorohok kan saiyang mata sa pasohan, an matanos siertong mabuhat