“Pagsimbag sa Maimbod na Paagi”
SA Sermon sa Bukid, sinambit ni Jesus an “Pagboot asin an Mga Propeta.” An ikatolong kabtang kan Hebreong Kasuratan iyo an mga Isinurat, kairiba an patulang mga libro, siring kan Salmo asin Talinhaga. (Mateo 7:12; Lucas 24:44) An mga ini man, naglalaman kan kadonongan nin Dios.
Bilang halimbawa, pinatanidan kan mga talinhaga an mga hokom sa suanoy na Israel: “Sia na nagsasabi sa marumpot: ’Matanos ka,’ kababaldean sia kan mga tawo, idedenunsiar sia kan mga nasyon. Alagad idtong mga nagsasagwe sa saiya magigin marahay, asin magkakaigwa sinda nin bendisyon nin karahayan. Hahadokan nia an mga ngabil kan nagsisimbag sa maimbod na paagi.”—Talinhaga 24:24-26.
Kun an sarong hokom magpadara sa raga impluwensia huli sa suhol o nepotismo asin ipahayag na matanos an marumpot, maheheling kan iba na bako siang angay sa saiyang katongdan. Tara, minsan an mga miembro kan Hentil na “mga nasyon“ na nakadangog kan siring na hudisyal na pagbalga magpapaheling nin pagmenus! Sa ibong na lado, kun mapusong sasagweon kan hokom an marumpot na tawo asin magsimbag sa maimbod na paagi sa kinakapotan na kaso, maaako nia an paggalang asin pagkamoot kan mga tawo. An kadaklan na tawo mapahihirong magmawot “nin bendisyon nin karahayan“ para sa saiya. Siring kan dugang pang sinabi kan talinhaga: “Hahadokan nia an mga ngabil kan nagsisimbag sa maimbod na paagi.”
An siring na hadok nangangahulogan nin mutuwal na paggalang—sa pag-oltanan kan nagsasadol asin kaidtong nakaheheling kan saiyang maimbod na pagsagwe. Tibaad minsan an sarong sinasagwe mismo maghihimate sa paborableng paagi asin magpapahayag nin pagkamoot sa hokom. Sinasabi kan Talinhaga 28:23: “Sia na nagsasagwe sa sarong tawo makanonompong nin orog na pag-oyon pakatapos kisa sa saiya na putik na nag-oomaw paagi kan saiyang dila.” An mga naglilingkod bilang kamagurangan sa kongregasyon ngonyan maninigo kun siring na lumikay na togotan an pakikatood o relasyon sa pamilya na gamiton sa salang paagi an saindang paghusgar. Paagi sa maimbod na pagtatao nin kinakaipuhan na sadol, aakoon kan kamagurangan an paggalang kan kongregasyon.