Siring sa mga Mansanas na Bulawan
MGA mansanas—makawiliwili nanggad iyan kapwa sa mata asin sa pangnamit! Ginagamit kan Biblia an masiram na prutas na ini sa nakapahihiro sa kaisipan na pag-aagid kan iyan magsabi: “Siring sa mga mansanas na bulawan sa mga inukit na pirak an tataramon na itinaram sa tamang kapanahonan kaiyan.” (Talinhaga 25:11) Ano an boot sabihon kan mga tataramon na ini?
An “mga mansanas na bulawan sa mga inukit na pirak” puwedeng mangahulogan nin inukit na bagay, arog baga nin inukit na bandehadong pirak na igwang prutas na bulawan sa ibabaw. Mantang an naenot na mga bersikulo sa kapitulong ini nagsasambit nin pagdolok sa sarong hade, an bersikulong ini puwedeng nanonongod sa mga regalo na itinatao sa sarong poon—bulawan na mga dekorasyon na may korteng mga mansanas na ibinugtak sa mga bandehadong pirak. (Talinhaga 25:6, 7) May kahangahangang kagayonan nanggad!
Igwa nin nakakaagid na kagayonan sa angay, kagalanggalang, napapanahon na mga tataramon, baga man nakasurat o itinaram. Iyan magayon, nakapakokosog, asin kapakipakinabang sa dakol na paagi. An ipinasabong nin Dios na mga laog kan Biblia nangorognang siring sa magayon na “mga mansanas na bulawan sa mga inukit na pirak.”
Arog kan pagkailustrar kan madonong na mga tataramon ni Hadeng Salomon sa Talinhaga 25:11, saiyang “hinanap . . . an kawiliwiling mga tataramon asin an pagsurat kan tamang mga tataramon nin katotoohan.” (Eclesiastes 12:10; Talinhaga 25:1) Pakalihis nin mga siglo, nagsurat an Kristianong apostol na si Pablo: “An gabos na Kasuratan ipinasabong nin Dios asin kapakipakinabang.” (2 Timoteo 3:16) Iyo, an Biblia naglalaman nin kapakipakinabang na sadol, mga hula, naglaladawan na tataramon, asin katotoohan na may labi-labing kinang asin gayon na nalalabihan nanggad kaiyan an mga ginibo kan pinakamarahay na mga trabahador. Saro pa, an siisay man na nagkakamit nin kadonongan hale sa Tataramon nin Dios, an Biblia, nakakukua nin daing kaagid sa halagang rogaring asin puwedeng magkaigwa kan paglaom sa buhay na daing sagkod.—Talinhaga 4:7-9; Juan 17:3.