Lubos daw Nindong Sinusunod si Jehova?

“AN MGA matanos garo sadang na leon na tiwala.” (Talinhaga 28:1) Sinda naggigibo nin pagtubod, tiwalang nagsasarig sa Tataramon nin Dios, asin mapuso na nagpapadagos sa paglilingkod ki Jehova sa atubang nin ano man na peligro.

Mantang an mga Israelita yaon sa Sinai pakaligtasan sainda ni Jehova sa kaoripnan sa Egipto kan ika-16 na siglo B.C.E., duwang lalaki an nangorognang nagpaheling na sinda tiwala nanggad siring sa mga leon. Ipinaheling man ninda an kaimbodan ki Jehova sa irarom nin masakit na mga kamugtakan. Saro sa mga lalaking ini an Efraimita na si Josue, an katabang ni Moises na dai nahaloy ninombrahan na magin saiyang kasalihid. (Exodo 33:11; Bilang 13:​8, 16; Deuteronomio 34:​9; Josue 1:​1, 2) An saro pa si Caleb, an aki ni Jefone kan tribo ni Juda.​—Bilang 13:​6; 32:12.

Si Caleb maimbod asin maigot na inotob an kabotan ni Jehova. An saiyang halawig na buhay nin maimbod na paglilingkod sa Dios nagpangyari saiya na sabihon na sia “lubos na nagsunod ki Jehova.” (Josue 14:8) “Ako biyong maimbod sa KAGURANGNAN, na sakong Dios,” an sabi kan The New American Bible. Si Caleb “maimbod na nagkuyog,” o “maimbod na inotob an katuyohan [ni],” Jehova Dios. (Today’s English Version; The New English Bible) Sa ibang pagkasabi, ipinahayag ni Caleb: “Ako . . . nagsunod sa KAGURANGNAN kong Dios nin bilog na puso.” (New International Version) Kumusta man kamo? Lubos daw nindong sinusunod si Jehova?

An Pag-espiya sa Daga

Imahinara an saindong sadiri na kaiba kan mga Israelita pakapaluwasa sainda ni Jehova sa kaoripnan sa mga taga-Egipto. Helinga kun paano an propetang si Moises maimbod na nagkukuyog sa itinao nin Dios na mga instruksion. Iyo, asin risaha an pagsarig ni Caleb na si Jehova kaiba kan Saiyang banwaan.

Ini an ikaduwang taon pakatapos kan pagluwas hale sa Egipto, asin an mga Israelita nagkakampo sa Cades-barnea sa kapatagan nin Paran. Nakaposisyon sinda sa linderos kan Dagang Panuga. Sa pagboot nin Dios, si Moises masobol nin 12 espiya sa Canaan. Sinasabi nia: “Tukad kamo digdi sa Negeb, asin kaipuhan kamong tumukad sa mga kabukidan. Asin kaipuhan nindong helingon kun ano an daga asin an mga tawo na nag-eerok dian, kun baga sinda makokosog o maluluya, kun baga sinda kakadikit o dakol; asin kun ano an daga na saindang inierokan, kun baga iyan marahay o maraot, asin kun ano an mga siudad na saindang inierokan, kun baga iyan sa mga kampamento o sa mga kuta; asin kun ano an daga, kun baga iyan mataba o tagiltil, kun baga iyan may mga kahoy o mayo. Asin kaipuhan na magmapuso kamo asin kumua kamo nin pirang bunga kan daga.”​—Bilang 13:​17-20.

An 12 lalaki nagpoon sa saindang peligrosong pagbaklay. An saindang ekspedisyon naghaloy nin 40 aldaw. Sa Hebron nakaheheling sinda nin darakulaon na mga lalaki. Sa kababan kan Escol, narisa ninda an pagigin mabunga kan daga asin nagdesisyon na magdara kan pirang bunga kaiyan. Magabaton nanggad an sarong bagikoy nin ubas na kaipuhan na iyan buligan nin duwang lalaki sa sarong pasanan!​—Bilang 13:​21-25.

Pagbalik sa kampamento kan mga Israelita, an mga espiya nagbareta: “Luminaog kami sa daga na saimong sinobolan samo, asin iyan totoong nagbobolos nin gatas asin tangguli, asin ini an bunga kaiyan. Alagad, an katunayan iyo na an mga tawo na nag-eerok sa daga makokosog, asin an nakukutaan na mga siudad darakulang marhay; asin naheling man niamo duman an mga aki ni Anac. An mga Amalequita nag-eerok sa daga nin Negeb, asin an mga Heteo patin mga Jebuseo saka an mga Amorreo nag-eerok sa mga kabukidan, asin an mga Cananeo nag-eerok sa may dagat asin sa may tampi kan Jordan.” (Bilang 13:​26-29) An sampulong espiya bakong andam na akoon an pagboot nin Dios asin magmartsa pasiring sa Dagang Panuga.

“Si Jehova Nasa Sato”

Alagad, may pagtubod ki Jehova Dios, an daing takot na espiyang si Caleb nagsasadol: “Magturukad na tolos kita, asin siertong masasadiri ta iyan, huli ta siertong madadaog ta iyan.” Alagad an sampulong espiya nakisuhay na nagsasarabing an mga nag-eerok sa Canaan makokosog kisa mga Israelita. An matatakton asin daing pagtubod na mga espiya minansay an saindang sadiri na siring sana sa mga lokton kun ikokomparar.​—Bilang 13:​30-33.

“Si Jehova nasa sato. Dai kamo matakot sa sainda,” an sadol ni Caleb asin Josue. An saindang mga tataramon dai dinarangog. Kan an mga tawo nagsarabing dadaraklagon sinda nin mga gapo, an Dios nangoltanan asin sinentensiahan an mga paragumodgumod: “Dai kamo makalalaog sa daga na isinumpa kong paeerokan ko saindo, apuwera ki Caleb na aki ni Jefone asin ki Josue na aki ni Nun. Asin an saindong mga omboy . . . ilalaog ko nanggad, asin sinda makamimidbid nanggad kan daga na saindong isinikwal. . . . Asin an saindong mga aking lalaki magigin mga pastor sa kapatagan sa apat na polong taon, . . . sagkod na an saindong mga bangkay magkaturunaw sa kapatagan. Sa bilang kan mga aldaw na saindong ipinag-espiya sa daga, apat na polong aldaw, sarong aldaw para sa sarong taon, sarong aldaw para sa sarong taon, maninimbag kamo sa saindong mga kalapasan sa laog nin apat na polong taon.”​—Bilang 14:​9, 30-34.

Nagdanay na Maimbod Pakalihis nin mga Taon

Nagdadalagan an 40 taon nin sentensia, asin nagkakagaradan an kapag-arakian nin mga paragumodgumod. Pero si Caleb asin si Josue nagdadanay na maimbod sa Dios. Sa kapantayan nin Moab, si Moises asin an Halangkaw na Saserdoteng si Eleazar binilang an mga lalaking nasa edad nin pagsosoldados na 20 anyos asin paitaas. Nginangaranan nin Dios an sarong lalaki hale sa lambang tribo nin Israel na paniniwalaan kan pagbaranga kan Dagang Panuga. Si Caleb, Josue, asin Eleazar kabilang sa sainda. (Bilang 34:​17-29) Minsan ngani 79 anyos na, si Caleb makosog pa, maimbod, asin mapuso.

Kan bilangon ni Moises asin Aaron an mga tawo sa Sinai bago sinda may pagkatakot na nagsayumang lumaog sa daga nin Canaan, an mga parapakilaban na lalaki nin Israel may bilang na 603,550. Pakalihis nin apat na dekada sa kapatagan, igwa na sana nin mas dikit na hukbo nin 601,730. (Bilang 1:​44-46; 26:51) Alagad, sa pangengenot ni Josue asin kaiba an maimbod na si Caleb sa saindang mga hukbo, an mga Israelita luminaog sa Dagang Panuga asin perming nakapandadaog. Siring sa perming linalaoman ni Josue asin Caleb, ginagana ni Jehova an mga ralaban para sa saiyang banwaan.

Sa pagbalyo sa Salog nin Jordan kaiba an mga parapakilaban nin Israel, an gurang nang si Josue asin Caleb nagpasan kan sadiri nindang mga pasan sa suminunod na mga pakilalaban. Minsan siring, pakapakipaglaban nin anom na taon, kadakol pang daga an dai nasasadiri. Pahahaleon ni Jehova an mga nag-eerok pero ngonyan sia nagboboot na an daga barangaon paagi sa pabunotan sa mga tribo nin Israel.​—Josue 13:​1-7.

Sia Lubos na Nagsunod ki Jehova

Bilang beterano nin kadakol na ralaban, si Caleb uminatubang ki Josue na nagsasabi: “Apat na polong taon ako kan si Moises na lingkod ni Jehova isobol ako hale sa Cades-barnea sa pag-espiya sa daga, asin ako nagdatong sa pagtao saiya nin tataramon siring sa nasa sakong puso. Asin an sakong mga tugang na tuminukad kaiba ko pinaluya an puso kan banwaan; alagad kun para sa sako, ako lubos na nagsunod ki Jehova na sakong Dios.” (Josue 14:​6-8) Iyo, si Caleb lubos na nagsunod ki Jehova, na maimbod na naggigibo kan kabotan nin Dios.

“Kaya,” idinugang pa ni Caleb, “si Moises suminumpa sa aldaw na idto, na nagsasabi, ‘An daga na binatayan kan saimong bitis magigin saimo asin sa saimong mga aki bilang pamana sagkod sa panahon na daing katapusan, huli ta lubos mong sinunod si Jehova na sakong Dios.’ Asin ngonyan uya si Jehova pinapagdanay akong buhay, siring sa saiyang ipinanuga, sa apat na polo may limang taon na ini poon kan ipanuga ini ni Jehova ki Moises kan an Israel naglakaw sa kapatagan, asin ngonyan uya ako walong polo may limang taon na. Alagad ako ngonyan makosog pa siring kan aldaw na isinobol ako ni Moises. Kun ano an kosog ko kaidto, iyo man ngonyan sa pakilaban, kapwa sa pagluwas asin sa paglaog. Asin ngonyan itao mo nanggad sako ining kabukidan na sa aldaw na idto ipinanuga ni Jehova, huli ta nadangog mo mismo kan aldaw na idto na an mga Anaquim yaon duman asin an darakulang siudad na nakukutaan. Posible na si Jehova masasakaibanan ko, asin pahahaleon ko nanggad sinda, siring sa ipinanuga ni Jehova.” Inako ngonyan ni Caleb an Hebron bilang mana.​—Josue 14:​9-15.

An gurang nang si Caleb nag-ako kan pinakamagabat na asignasyon​—an lugar na iniistaran nin darakulaon na lalaki. Alagad bako ining depisilon para sa 85 anyos na parapakilaban na ini. Pag-abot nin panahon an mariringis na nag-eerok sa Hebron nagkadaraog. Si Otniel, na aki kan ngohod na tugang ni Caleb asin sarong hokom sa Israel, sinakop an Debir. An duwang siudad dai nahaloy inistaran nin mga Levita, asin an Hebron nagin siudad na pailihan para sa mga dai tinutuyong nakagadan.​—Josue 15:​13-19; 21:​3, 11-16; Hokom 1:​9-15, 20.

Dayaday na Sunodon nin Lubos si Jehova

Si Caleb asin si Josue bakong sangkap na mga tawo. Alagad, maimbod nindang ginibo an kabotan ni Jehova. An saindang pagtubod dai nanluya durante kan 40 taon nin kasakitan sa kapatagan na bunga kan dai pagkuyog kan Israel sa Dios. Kapareho nanggad, an modernong mga lingkod ni Jehova dai tinotogotan an ano man na makaolang sa saindang paglilingkod sa ikaoomaw nin Dios. Sa pakaaram na may pag-iiwal an organisasyon nin Dios asin ni Satanas na Diablo, sinda marigon, dayaday na naghihingoang paoyonan sa gabos na bagay an saindang langitnon na Ama.

Halimbawa, an dakol sa banwaan ni Jehova itinaya an buhay sa karingisan asin minsan sa kagadanan sa pagselebrar kan Pamanggihan kan Kagurangnan, o Memorial kan kagadanan ni Jesu-Cristo. (1 Corinto 11:​23-26) Dapit sa bagay na ini an sarong Kristiana na napreso sa kampo de konsentrasyon nin Nazi durante kan Guerra Mundial II nagbareta:

“An gabos sinabihan na dapat nasa labahan pag-alas 11 n.b. Sa eksaktong alas 11 n.b. kami tiripon na, may bilang na 105. Surusuan kaming nagtitindog pabilog, na sa tahaw [may] sarong tongtongan na may maputing tela na namumugtakan kan mga emblema. Sarong kandila an nagliliwanag sa kuwarto, ta an ilaw na de koryente tibaad magpahamak samo. Namatean niamo na garo kami an kagurang-guranging mga Kristiano sa mga pantson sa irarom nin daga. Idto sarong solemneng okasyon. Ipinahayag giraray niamo an samong odok na panuga sa samong Ama na gamiton an bilog niamong kosog para sa pagbindikar sa Saiyang banal na ngaran, na manindogan na maimbod para sa Teokrasya.”

Sa ibong kan mga pagbalo bilang pinaglalamag na mga lingkod ni Jehova, makapananarig kita sa kosog na itinatao nin Dios na paglingkodan sia na may kapusoan asin tawan nin onra an saiyang banal na ngaran. (Filipos 4:13) Mantang kita naghihingoa na paoyonan si Jehova, marahay para sa sato na girumdomon si Caleb. An saiyang halimbawa sa lubos na pagsunod ki Jehova nakaakit na gayo sa sarong soltero na luminaog sa pambilog na panahon na paghuhulit kan 1921. Nagsurat sia:

“Minsan ngani an pagigin payunir nangahulogan kan pagbaya sa sakong komportableng trabaho sa sarong modernong imprentahan sa Coventry [Inglaterra], mayo nin pagbasol. An sakong pagdusay iyo na an nagdesisyon sa bagay; an sakong buhay dusay sa Dios. Nagirumdoman ko si Caleb, na luminaog sa Dagang Panuga kaiba ni Josue asin manongod saiya isinabi, ‘Sia lubos na nagsunod ki Jehova.’ (Josue 14:8) Iyan an para sa sako kawiliwiling kaisipan. Aram ko na an paglingkod ki Jehova nin ‘lubos’ mahimo sa sakong dusay na buhay na orog na mahalaga; matao ini sako nin mas dakol na oportunidad na makaprodusir kan bunga na tanda nin sarong Kristiano.”

Si Caleb siertong binendisyonan sa saiyang maimbod na pagsunod nin lubos ki Jehova, na dayaday na naghihingoang gibohon an banal na kabotan. Arog sa saiya, an iba nagkaigwa nin dakulang kagayagayahan asin mayaman na mga bendisyon sa paglilingkod sa Dios. Iyan man logod an saindong magin eksperyensia bilang tawo na nagpapadagos na lubos na nagsusunod ki Jehova.

[Ritrato sa pahina 26]

Si Caleb asin Josue maimbod ki Jehova sa irarom nin pagbalo. Iyo man daw kamo?