Nalingawan Na daw Sinda?

NAKADALAW na daw kamo sa sarong daan na sementeryo, arog kaini sa Tewkesbury, Inglaterra, asin namangno an nagtutupas na mga lapida na haros para na an mga ngaran? Sa parate garo baga an mga nagadan kaidtong nakaaging tolong henerasyon o labi pa, an mga lolohon sa tuhod asin mas gurang pa, nalingawan na. An totoo, an Biblia nagsasabi: “Huli ta an buhay nakakaaram na sinda magagadan; alagad kun dapit sa mga gadan, mayo man lamang sinda nin pakaaram, ni may bayad pa man sinda, huli ta an pakagirumdom sainda nalingawan na.” Iyan daw nangangahulogan na pati an Dios nakalingaw na sa sainda?—Eclesiastes 9:5.

Ipinaheling ni Jesus na bakong siring kan sia magsabi: “Dai kamo magngalas kaini, huli ta an oras maabot na an gabos na nasa mga lolobngan nin girumdoman makadadangog kan saiyang tingog asin maruluwas, idtong naggiribo nin marahay sa pagkabuhay liwat sa buhay, idtong naggiribo nin maraot sa pagkabuhay liwat sa paghokom.” Kaya, an mga gadan mabuwelta paagi sa pagkabuhay liwat pasiring sa oportunidad na mabuhay sagkod lamang sa sarong lininig na paraisong daga.—Juan 5:28, 29; Kapahayagan 21:3, 4.

Tunay na si Jehova Dios, an Burabod nin dinamikong kosog, na tatao kan ngaran kan binilyon na planeta, bitoon, asin galaksia, dai magkakaproblema sa paggirumdom sa personalidad asin nagin buhay kan binilyon na tawo na nagadan sa bilog na kasaysayan nin katawohan. Kun siring, an mga gadan, minsan pa tibaad nalingawan na kan saindang mga gikan, dai nalilingawan nin Dios.—Isaias 40:26.