Nagigirumdoman daw Nindo?

Naogma daw kamo sa pagbasa sa dai pa sana nahahaloy na mga luwas kan An Torrengbantayan? Kun iyo, magigin interesante para sa saindo na girumdomon an mga minasunod:

◻ Ano an kahulogan kan termino sa Griego na pa·rou·si’a na ginamit sa Mateo 24:​3, 27, 37, 39?

An Expository Dictionary of New Testament Words ni Vine nagsasabi: “An PAROUSIA . . . nangangahulogan kapwa nin pag-abot asin nin kasunod na presensia kaiba.” Huli kaini, iyan bako sanang an oras nin pag-abot kundi sarong presensia na minalawig poon sa pag-abot padagos.​—8/15, pahina 11.

◻ Paano ‘pinahalipot an mga aldaw na iyan’ tanganing may “laman” na makaligtas kan enot na siglo, asin paano iyan mangyayari sa mas dakulang sokol? (Mateo 24:22)

Kan 66 C.E., an mga Romano dai linalaoman na pinahalipot an saindang pagsalikop sa Jerusalem, na nagtogot na may Kristianong “laman” na makadulag. Kaagid kaiyan, linalaoman ta na an maabot na pagsalakay sa Dakulang Babilonya sa ano man na paagi pahahalipoton. Sa siring an linahidan na mga Kristiano asin an saindang kairiba makaliligtas sa posibleng kalaglagan.​—8/15, pahina 18-​20.

◻ Ano an maninigo na magin reaksion niato kun an saro magpoon na makikabtang sa mga emblema sa Memorial o pumondo na sa paggibo kaiyan?

Dai kaipuhan na mahadit an ibang mga Kristiano. Si Jesus nagsabi: “Ako an marahay na pastor, asin midbid ko an sakong mga karnero.” Siring sa iginagarantiya, midbid ni Jehova an talagang mga pinili nia bilang espirituwal na mga aki. (Juan 10:14; Roma 8:​16, 17)​—8/15, pahina 31.

◻ Ano an pangenot na katuyohan kan Ley ni Moises?

Sa pangenot, itinokdo kaiyan sa mga Israelita an saindang pangangaipo sa Mesiyas, na mabalukat sa sainda sa saindang makasalan na kamugtakan. (Galacia 3:24) An Ley nagtokdo man nin diosnon na takot asin pagkuyog, asin tinabangan kaiyan an Israel na magdanay na siblag sa maraot na mga gibo kan mga nasyon sa palibot. (Levitico 18:​24, 25)​—9/1, pahina 9.

◻ Ano an katuyohan kan bagong tipan? (Jeremias 31:​31-34)

Iyan para sa pagpaluwas nin sarong nasyon nin mga hade asin saserdote na mabendisyon sa bilog na katawohan. (Exodo 19:6; 1 Pedro 2:9; Kapahayagan 5:​10)​—9/1, pahina 14, 15.

◻ Taano ta maninigo niatong gibohon an abilidad sa paghagad nin tawad?

An paghagad nin tawad puedeng makatabang na mainaan an kolog na dara nin pagkabakong sangkap, asin puedeng paomayan kaiyan an nadanyaran na mga relasyon. An kada paghagad niato nin tawad sarong leksion sa kapakumbabaan asin pinatotood kitang magin orog na sensitibo sa mga pagmate nin iba.​—9/15, pahina 24.

◻ Saro daw na makasaysayan na katunayan an Delubyo sa bilog na globo kaidtong kaaldawan ni Noe?

Iyo. Manonompongan sa bilog na kinaban an suanoy na mga kasaysayan na nagsasabi dapit sa sarong baha sa bilog na globo, poon sa Amerika del Norte asin Sur sagkod sa Australia. An lakop na pagkaigwa kan temang ini nakadadagdag nin patotoo sa bagay na talagang nangyari an sarong Delubyo sa bilog na kinaban, siring kan ibinareta sa Biblia. (Genesis 7:​11-​20)​—9/15, pahina 25.

◻ Ano an kalabot sa pagigin mapag-istimar? (Roma 12:13)

An “pagkamapag-istimar” trinadusir hale sa Griegong termino na kompuesto nin duwang orihinal na termino na nangangahulogan “pagkamoot” asin “estranghero.” Huli kaini, an pagkamapag-istimar sa pundamental nangangahulogan “pagkamoot sa mga estranghero.” Alagad an kalabot dian labi pa sa pagkamoot na basado sa prinsipyo, na ipinaheheling huli sa pakamate nin obligasyon. Iyan basado sa tunay na pagmamahal, kapadangatan, asin pakikikatood.​—10/1, pahina 9.

◻ Ano an argumento ni Pablo mapadapit sa pag-agom asin pagigin daing agom sa saiyang enot na surat sa mga taga-Corinto, kapitulo 7?

An pag-agom lehitimo asin, sa irarom nin nagkapirang kamugtakan, marahay para sa nagkapira. Pero an pagigin daing agom dai maninigaran na may bentaha para sa Kristianong lalaki o babae na gustong maglingkod ki Jehova na pinakakadikit an disturbo.​—10/15, pahina 13.

◻ Paano an magurang sa kongregasyon “nagsusustento sa mga sadiri nia”? (1 Timoteo 5:8)

An sarong magurang sa kongregasyon maninigong ‘magsustento sa mga sadiri nia’​—an saiyang agom pati an saiyang mga aki—​sa materyal, espirituwal, asin emosyonal na paagi.​—10/15, pahina 22.

◻ Paano si Jehova nagtatao nin karangahan sa saiyang mga lingkod?

An banal na espiritu nin Dios naghihiro bilang “pararanga.” (Juan 14:​16, nota sa ibaba) An saro pang paagi na dian an Dios nagtatao nin karangahan iyo an Biblia. (Roma 15:4) An Dios nakaaaram kan satong indibiduwal na mga pangangaipo asin magagamit kita na makaranga sa lambang saro, siring na si Pablo naranga paagi sa bareta ni Tito manongod sa mga taga-Corinto. (2 Corinto 7:​11-​13)​—11/1, pahina 10, 12.

◻ Ano an ipinaririsa kan paglaladawan ni Pablo ki Jehova bilang “an Ama nin maboot na mga pagkaherak,” na manonompongan sa 2 Corinto 1:3?

An nombre sa Griego na trinadusir na “maboot na mga pagkaherak” hale sa sarong termino na nagpapahayag nin kamondoan sa pagsakit nin iba. Sa siring ilinaladawan ni Pablo an maboot na mga saboot nin Dios para sa gabos Niang fiel na lingkod na nagtitios nin kahorasaan.​—11/1, pahina 13.

◻ Ano an nagibo kan pag-ayuno kan mga Israelita sa taonan na Aldaw nin Pagtubos? (Levitico 16:​29-​31; 23:27)

An pag-otob sa pag-ayuno nagpahiro sa banwaan nin Israel na orog nindang mamatean an saindang pagkamakasalan asin an pangangaipo nin pagbalukat. Paagi kaiyan ipinahayag ninda an kamondoan para sa saindang mga kasalan asin pagsolsol sa atubangan nin Dios.​—11/15, pahina 5.

◻ Ano an ipinaririsa kan pagboot sa mga hoben: “Girumdoma, ngonyan, an saimong Kaharohalangkaweng Kaglalang”? (Eclesiastes 12:1)

An sarong autoridad nagsasabi na an termino sa Hebreo na trinadusir na “girumdomon” sa parate ipinaririsa “an kapadangatan kan isip asin an paghiro na kaiba kan pakagirumdom.” Kaya bako sanang pag-isip-isip manongod ki Jehova an kahulogan kan paghimate sa pagboot na ini. Iyan may kalabot na paghiro, paggibo kan ikinaoogma nia.​—12/1, pahina 16.