Kun Igwang mga Parahabon na Armado

SA Ikoyi, sarong eksklusibong haraning banwaan sa Solnopan na Aprika, an mga mansion nagin mga kuta. An dakol igwa nin mga kudal na tres metros an langkaw, na sa ibabaw may mga mapanas na batbat, garanggasangon na mga salming, o pinurupot na matarom na alambre. May mga guardia sa darakulang trangka na sinegurado nin mga barat, rehas, kadena, asin kandado. May rehas an mga bintana. May trangkang batbat na nagseseparar kan mga kuartong torogan sa ibang kabtang kan harong. Sa banggi, an darakulang ayam​—mga Alsatian asin Rottweiler—​pinaluluwas sa saindang mga laoman. Nawawara an diklom huli sa maliwanag na mga ilaw, asin an de komputer na mga sistema sa pagmaan maluway sana an tanog kun mayo nin nanlalaog.

Mayo nin nagduduwaduwa sa pangangaipo na gibohon na ligtas sa peligro an saindang harong. An mga titulo sa diaryo nag-aagrangay: “Mga Parahabon na Armado Sinamsaman an Komunidad”; “Daing Kontrol an mga Aking Parahabon”; asin “Pagkakubhan, ta Nananalakat an mga Gang sa Kalsada [sa Sarong Banwaan].” Ini an situwasyon sa dakol na nasyon. Siring sa ihinula kan Biblia, kita totoong nabubuhay sa delikadong mga panahon.​—2 Timoteo 3:1.

An bilang nin mga krimen, kabale na an armadong paghabon, naglalangkaw sa bilog na globo. Paorog nang paorog na an mga gobyerno dai kaya o habong protehiran an saindang sadiring mga siudadano. Sa nagkapirang nasyon an mga pulis, na daog sa bilang asin daog sa badil, kulang nin kakayahan na magresponde sa mga naghahagad nin tabang. An kadaklan na miron nag-aalangan na makilabot.

An mga biktima, na dai nang pagsarig sa tabang magsalang kan mga pulis o publiko, iyo na sana an nagdedepensa kan saindang sadiri. An sarong Kristianong magurang sa kongregasyon sa sarong nagpoprogresong nasyon nagsabi: “Kun mag-alarma ka, babaldadohon o gagadanon ka kan mga parahabon. Lingawan mo na an paghagad nin tabang sa iba. Kun may magtabang, marahay, alagad dai mo paglaoman o hagadon iyan huli ta an pagpatabang tibaad makadagdag sana sa problema.”

Proteksion Asin an Tataramon nin Dios

Minsan ngani an mga Kristiano bakong kabtang kan kinaban, sinda yaon sa kinaban. (Juan 17:​11, 16) Kaya kapareho kan iba, sinda naggigibo nin rasonableng mga probisyon para sa saindang seguridad. Pero, bakong arog kan dakol na dai naglilingkod ki Jehova, an banwaan nin Dios naghahanap nin proteksion oyon sa itinotogot kan Kristianong mga prinsipyo.

Sa kabaliktaran, an mga tawo sa nagkapirang nasyon sa Aprika naggagamit nin mahika sa paghihingoang protehiran an saindang sadiri na dai habonan. Tibaad guroton nin sarong albularyo an pupulsohan, daghan, o likod nin sarong parokyano. Dangan igwa nin bolong na may mahika na ipinapahid sa lugad, nag-oorasyon, asin sinasabi na an tawong iyan protektado na sa pagsalakay nin mga parahabon. An iba nagbubugtak nin mga anting-anting o bolong na may mahika sa saindang harong, na naniniwala na papangyayarihon kan siring na “seguro” na bayaan sinda kan mga parahabon na dai inaano.

An tunay na mga Kristiano dai nakikilabot sa ano man na klase nin mahika. Kinokondenar kan Biblia an gabos na porma nin espiritismo, asin tama sana nanggad, huli ta paagi sa siring na mga gibo an mga tawo puedeng magkaigwa nin koneksion sa mga demonyo, na iyo mismo an mga nagpapalakop nin kadahasan digdi sa daga. (Genesis 6:​2, 4, 11) An Biblia sayod na nagsasabi: “Dai ka maggibo nin mahika.”​—Levitico 19:26.

May mga tawo na naghihingoang marhay na kamtan an seguridad paagi sa pag-armas sa sadiri nin mga badil. Pero isinasaboot na gayo kan mga Kristiano an mga tataramon ni Jesus, na nagsabi: ‘An minabingat nin espada sa espada man magagadan.’ (Mateo 26:52) An banwaan nin Dios ‘dinaragopdop an saindang mga espada na magin mga tarom nin arado’ asin dai nagbabakal nin mga badil tanganing protehiran an saindang sadiri na dai habonan o salakayon.​—Miqueas 4:3.

Paano man an pag-areglo nin armadong mga guardia para sa seguridad? Minsan ngani ini sarong bagay na pagdedesisyonan nin personal, girumdomon na an siring na areglo nagpapagamit nin badil sa iba. Ano an lalaoman nin sarong among sa mga guardia kun may lumaog na mga parahabon? Lalaoman daw nia na babadilon kan mga guardia an parahabon kun kinakaipuhan tanganing protehiran an mga tawo asin an mga rogaring na ginuguardiahan?

An paninindogan nin mga Kristiano sa pagsayuma sa mahika asin mga armas bilang mga kasangkapan sa pagprotehir tibaad garo baga mangmang sa pagheling kan mga dai midbid an Dios. Minsan siring, sinisierto sa sato kan Biblia: “An nagtitiwala ki Jehova iingatan.” (Talinhaga 29:25) Minsan ngani pinoprotehiran ni Jehova an saiyang banwaan sa kabilogan, dai sia nag-iinterbenir sa gabos na kamugtakan tanganing protehiran an saiyang mga lingkod na dai mahabonan. Si Job pambihira kafiel, pero tinogotan nin Dios na samsamon kan mga tulisan an mga hayop ni Job, na ikinagadan kan mga bantay. (Job 1:​14, 15, 17) Tinogotan man nin Dios si apostol Pablo na makaeksperyensia nin “mga pag-alaman sa mga tulisan.” (2 Corinto 11:26) Minsan siring, tinotokdoan nin Dios an saiyang mga lingkod na mamuhay sono sa mga prinsipyo na nakaiina sa peligro na sinda habonan. Sinasangkapan man nia sinda nin kaaraman na nakatatabang sa sainda kun ano an gigibohon kun igwang magprobar na maghabon sa paagi na makaiina sa posibilidad na sinda kolgan.

Pag-ina sa Peligro na Kamo Habonan

An madonong na tawo nagsabi kaidtong haloy na an nakaagi: “An kadakolan kan mayaman dai nagpapatorog sa saiya.” (Eclesiastes 5:12) Sa ibang pagtaram, an mga dakol an pagsadiri tibaad mahadit nin labi-labi na mawaran kan saindang mga rogaring kaya dai sinda napapatorog sa pagparahadit manongod kaiyan.

Kaya an sarong paagi na mainaan bako sanang an kahaditan kundi siring man an peligro na kamo habonan iyo na likayan an pagtipon nin kadakol na mamahalon na rogaring. An pinasabngan na apostol nagsurat: “An gabos na nasa kinaban​—an horot kan laman asin an horot kan mga mata asin an pagpaabaw-abaw kan kaya sa buhay—​bakong gikan sa Ama, kundi gikan sa kinaban.” (1 Juan 2:16) An iyo man sanang mga pagmawot na nagpapahiro sa mga tawo na bumakal nin mamahalon na mga bagay an nagpapahiro sa iba na maghabon. Asin “an pagpaabaw-abaw kan kaya sa buhay” puedeng makaakit sa mga may tendensiang manalakat.

Apuera sa pagdanay na simple sana, an saro pang proteksion na kamo dai habonan iyo an pagpaheling na kamo tunay na Kristiano. Kun kamo nagpapaheling nin pagkamoot sa iba, onesto sa saindong pakikiibaiba, asin aktibo sa Kristianong ministeryo, puede kamong magkaigwa nin reputasyon sa komunidad bilang sarong marahay na tawo, saro na maninigo sa paggalang. (Galacia 5:​19-​23) An siring na Kristianong reputasyon mas makakaprotehir nanggad kisa sa armas.

Kun May Lumaog na mga Parahabon na Armado

Pero ano an maninigo nindong gibohon kun makalaog sa saindong harong an mga parahabon asin komprontaron kamo? Girumdomon na an saindong buhay mas mahalaga kisa sa mga rogaring. Si Cristo Jesus nagsabi: “Dai ka magtumang sa maraot na tawo; kundi an siisay man na tumampal sa saimo sa too mong pisngi, itao mo pa sa saiya an sa ibong. Asin kun boot nin sarong tawo na . . . masadiri an saimong pan-irarom na gubing, pabayaan mo man an saimong pan-ibabaw na gubing na mapasaiya.”​—Mateo 5:​39, 40.

Madonong na hatol ini. Maski ngani bakong obligado an mga Kristiano na itao sa mga kriminal an impormasyon manongod sa mga kayamanan, an mga parahabon mas posibleng magin madahas kun marisa ninda na kamo nanlalaban, dai nakikikooperar, o nanloloko. An dakol sa sainda, “mantang nawaran na kan gabos na pagmate sa moral,” madaling maprobokar nin maisog, maringis na gawe-gawe.​—Efeso 4:19.

Si Samuel nag-iistar sa sarong edipisyo nin mga apartment. Sinirrahan kan mga parahabon an edipisyo asin sinalakat saro-saro an mga apartment. Si Samuel nakadangog nin mga putok nin badil, mga pinto na rinaraot, asin mga tawong nagkukururahaw, naghihiribi, asin nagtatarangis. Imposibleng makadulag. Sinabi ni Samuel sa saiyang agom asin tolong aking lalaki na lumuhod sa salog, iitaas an saindang kamot, magpirong, asin maghalat. Kan umabot an mga parahabon, kinaolay sinda ni Samuel na nakaduko, ta aram nia na kun hehelingon nia sinda sa lalauogon, puedeng isipon ninda na mamimidbid nia sinda sa huri. “Dagos kamo,” an sabi nia. “Kuana an ano man na gusto nindo. Libre kamong mangua nin ano man na bagay. Mga Saksi ni Jehova kami, asin dai kami malaban sa saindo.” Ikinabigla ini kan mga parahabon. Kan sumunod na sarong oras o labi pa, 12 gabos na armadong lalaki an nag-abot na grupo-grupo. Maski ngani hinabon ninda an mga alahas, kuarta, asin mga kasangkapan na elektroniko, an pamilya dai binugbog o tinigbas na arog kan iba pang yaon sa edipisyo. An pamilya ni Samuel nagpasalamat ki Jehova para sa saindang buhay.

Ipinaheheling kan halimbawang ini na pag-abot sa kuarta asin materyal na mga bagay, an mga biktima nin paghabon na dai nanlalaban puedeng makaina sa posibilidad na sinda kolgan.a

Kun minsan an pagpatotoo nin sarong Kristiano puedeng magin depensa tanganing dai kamo kolgan. Kan laogon nin mga parahabon an harong ni Ade, sinabihan nia sinda: “Aram kong masakit an buhay nindo, kaya yaon kamo sa linyang ini nin trabaho. Bilang mga Saksi ni Jehova, nagtutubod kami na maabot an aldaw na an gabos magkakaigwa nin igong kakanon para sa saiyang sadiri asin sa saiyang pamilya. An gabos mamumuhay na may katoninongan asin kaogmahan sakop kan Kahadean nin Dios.” Nainaan kaiyan an pagkaagresibo kan mga parahabon. An saro sa sainda nagsabi: “Pasensia na kamo kun linaog mi an harong nindo, alagad dapat nindong masabotan na kami nagugutom.” Maski ngani kinua ninda an mga rogaring ni Ade, dai ninda sia inano o an saiyang pamilya.

Pagdadanay na Kalmado

Bakong pasil na kumalma sa sarong peligrosong situwasyon, nangorogna kun an pangenot na katuyohan kan mga parahabon takoton an saindang mga biktima na sumunod. Makatatabang sa sato an pamibi. An satong paghagad nin tabang, minsan ngani silensio asin halipot, madadangog ni Jehova. Sinisierto sa sato kan Biblia: “An mga mata ni Jehova nakatorohok sa mga matanos, asin an saiyang mga talinga nagdadangog sa saindang mga pag-agrangay.” (Salmo 34:15) Dinadangog kita ni Jehova asin puede nia kitang tawan nin kadonongan na kalmadong atubangon an ano man na situwasyon.​—Santiago 1:5.

Apuera sa pamibi, an saro pang tabang sa pagigin kalmado iyo an determinaran nin patienot kun ano an gigibohon o dai nindo gigibohon kun kamo habonan. Siempre, imposibleng maaraman nin patienot kun ano an magigin situwasyon nindo. Pero, marahay na may nasa isip na kamong mga prinsipyo, kun paanong madonong na may nasa isip na kamong mga prosedimiento sa pagrayo sa peligro enkaso yaon kamo sa sarong edipisyo na nasosolo. An pag-isip nin patienot nakatatabang sa saindo na magdanay na kalmado, dai mataranta, asin makarayo sa danyos.

An pagmansay nin Dios dapit sa paghabon malinaw an pagkasabi: “Ako, si Jehova, namomoot sa hustisya, naoongis sa paghabon kaibanan na an karatan.” (Isaias 61:8) Pinasabngan ni Jehova an saiyang propeta na si Ezequiel na ilista an paghabon bilang sarong magabat na marhay na kasalan. (Ezequiel 18:18) Pero, ipinaheheling man kan libro man sanang iyan sa Biblia na maheherakon na patatawadon nin Dios an tawo na nagsosolsol asin iinuuli an hinabon.​—Ezequiel 33:​14-​16.

Sa ibong kan pamumuhay sa kinaban na pano nin krimen, an mga Kristiano naggagayagaya sa paglaom na buhay sa irarom kan Kahadean nin Dios, na mawawara na an paghabon. May labot sa panahon na iyan, an Biblia nanunuga: “[An banwaan nin Dios] totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda; huli ta an mismong ngoso ni Jehova nin mga hukbo iyo an nagtaram kaiyan.”​—Miqueas 4:4.

[Nota sa Ibaba]