An mga Paghokom nin Dios Kaipuhan na Ipahayag
“Tumindog ka patin itaram mo sa sainda an gabos na ipinagboot ko sa saimo. Dai ka matakot huli sa sainda.”—JEREMIAS 1:17.
1. Paano an mga Saksi ni Jehova ‘pinaliwanag an saindang ilaw’ sa Nazi Alemania?
“AN PAGLAMAG sa mga Saksi ni Jehova sa Kahadean kan Pagkatunaw [Nazi Alemania] nagkaigwa nin lugar sa tahaw nin ibang mga panahon nin pagbalo sa saindang kasaysayan.” (Holocaust Studies Annual, Volume II—The Churches’ Response to the Holocaust) An Daily News nin South Africa kan Hulyo 15, 1939, nagsabi man manongod sa mga Saksing Aleman: “Kapareho nin liwanag na noarin man dai nagpipirawpitaw, an sadit na grupong ini nin Kristianong mga lalaki asin babae marigon na naninindogan sa saindang pagtubod, sarong dai nahahaleng problema kan Hade sa Munich [si Adolf Hitler] asin buhay na patotoo sa saiyang pagkamagagadanon.” An mga tataramon na ini nagpapagirumdom sato na si Jesus nagsabi na an saiyang mga parasunod magigin “ilaw nin kinaban” asin kaipuhan na paliwanagon an saindang ilaw sa kinaban, ano man an mangyari.—Mateo 5:11, 12, 14-16.
2, 3. Anong halimbawa nin daing takot na paghuhulit an nangyari sa Sri Lanka?
2 An saro pang bareta, hale sa riniribok nin teroristang Sri Lanka, nagsasaysay manongod sa sarong hoben na Saksing Tamil, si David Gunaratnam, na, parehong-pareho ki Jeremias, daing takot na naghulit sa mga autoridad militar. Dinakop sia kaiba nin ibang hoben na mga lalaki tanganing imbestigaron. An bareta nagsasabi: “An mga opisyal asin mga soldados naghangang gayo sa mahiwas na kaaraman kan tawong ini, asin labi pa kaiyan, sa saiyang risang sinseridad, partikularmente kan sia magsabi, ’Asin kun makakaatubang ko an siisay man na inaapod na terorista, ihuhulit ko man sa sainda an mga bagay na ini.’”
3 Kan banggi man sanang idto kinidnap sia sa saiyang harong nin mga terorista, na nagsahot sa saiya nin pagtabang sa hukbo. Nag-insister sia sa saiyang neutralidad asin sinabi na sia naghuhulit sana kan mensahe kan Kahadean nin Dios. “Gibohon nin Dios an ginigibo ko asin ipagpapadagos ko iyan. Naghuhulit ako sa siisay man na gustong maghinanyog.” An mapusong Saksing ini binadil asin ginadan kan mga terorista, na nabayaan an hoben na balo asin omboy na lalaki.—Ikomparar an Gibo 7:51-60.
4. Anong paglamag sa mga Saksi ni Jehova na aprobado kan klero an nangyari sa sarong nasyon sa Latin America?
4 Gikan sa sarong nasyon sa Latin America, na an paglamag sa mga Saksi ni Jehova aprobado asin kinokonsinte nin pirang klerong Katoliko asin Presbiteriano, an baretang ini: “May limang Saksi ni Jehova sa garison . . . Sinda parateng pinagpupukpuk asin isinisiblag na dai pinapakakan. Pinadudusahan sinda kan politikal na opisyal na namamahala sa pagdodoktrina sa samong yunit ta sinda naghuhulit sa ibang soldados. Sinabi nia na sa gabos na relihiyosong nagkokontra, an mga Saksi ni Jehova an pinakapeligroso.”
Motibasyon Asin Reaksion
5. Arog kan nangyari ki Jeremias, ano an parateng nasa likod kan paglamag sa mga Saksi?
5 Iyo, kun paanong si Jeremias pinaglamag kan relihiyoso asin politikal na mga namomoon kan saiyang kaaldawan, an mga Saksi ni Jehova napapaatubang man sa pagtumang kan iyo man sanang mga elementong ini sa bilog na kinaban. Ano an nagmomotibar sa mga gaweng ini? Minsan ngani an mga Saksi iyo an grupong pinakamatoninong asin pinakamakinuyog sa ley sa arin man na komunidad, ibinibilang kan saindang mga kaiwal na peligroso an Tataramon nin Dios, huli ta ikinaaanggot asin isinisikwal ninda an mensahe kaiyan manongod sa Kahadean nin Dios. An saindang dai nakikikompromisong paghuhulit asin mga prinsipyo nagbubuyagyag kan kapasloan asin panloloko kan politikal, komersial, asin relihiyosong mga elemento kan palakaw ni Satanas.—Juan 15:18, 19; 1 Juan 5:19.
6. Ano an reaksion nin mga Saksi ni Jehova sa paglamag?
6 Pero, sa ibong nin pagkabilanggo, mga pagpukpuk, asin minsan kagadanan, an mga Saksi ni Jehova sa bilog na kinaban minagawe na kapareho ni Jeremias kan suanoy. Mantang nagpapaheling nin pagkamoot asin taktika, ipinagpapadagos nindang ihulit an bakong popular na mga paghokom nin Dios sa mga nasyon. (2 Timoteo 2:23-26) Aram ninda na dapat sindang kumuyog sa Dios bilang Poon imbes na sa mga tawo. (Gibo 4:19, 20; 5:29) Nagigirumdoman ninda an hatol ni Pablo sa mga Kristianong Hebreo, arin na baga, an magtagal sa pag-otob kan kabotan nin Dios. Sa siring maheheling ninda an kaotoban kan panuga, buhay na daing katapusan. Kaya, arog ni Pablo asin Jeremias, maninigo kitang makapagsabi: “Ngonyan bako kita an klase na minasibog sa kalaglagan, kundi an klase na may pagtubod sa ikapagdadanay na buhay kan kalag.”—Hebreo 10:35-39.
Ibinubuyagyag kan Modernong Jeremias an Kakristianohan
7. Paano an mga Saksi sa ika-20 siglo nag-arog sa halimbawa kan maimbod na mga propeta ni Jehova na isinugo sa Israel asin Juda?
7 Kun paanong si Jehova daing ontok na isinugo an saiyang mga propeta sa Israel asin Juda, isinugo man nia an saiyang mga saksi na orootrohon an mensahe manongod sa saiyang nagdadangadang na paghokom. (Jeremias 7:25, 26; 25:4, 8, 9) Nangorogna poon kan nakapababagsik sa espirituwal na taon nin 1919, an linahidan na natatada kan mga tugang ni Cristo daing takot na nag-atubang kan mga paghokom nin Dios, mapuwersang mga mensahe nin kapahamakan, sa Kakristianohan. (Ikomparar an Jeremias 11:9-13.) Kan taon na idto ilinuwas an magasin na The Golden Age. Sa nag-aging mga taon asin sa naliwat na mga titulo kaiyan, Consolation (1937) asin Awake! (1946), ibinuyagyag kaiyan an relihiyosong mga kaputikan nin Kakristianohan asin an palsipikadong Kristianismo kaiyan.
8, 9. (a) Taano an mga iglesya ta dininunsiar kan 1926?(b) Anong kapahamakan an ihinula para sa sainda?
8 Halimbawa, an The Golden Age kan Oktubre 11, 1922, ipinagdenunsiar an falsong relihiyon sa mga tataramon na ini: “An gabos na paghihingoa kan mga organisasyon nin denominasyonal na iglesya, kan saindang mga klero, kan saindang mga namomoon asin mga kaalyado, na iligtas asin patindogon liwat an areglo nin mga bagay sa daga . . . kaipuhan na masudya, huli ta iyan bakong kabtang kan kahadean kan Mesiyas. Na al kontraryo, kaidtong Guerra Mundial [I] an klero kan laen-laen na denominasyon na ini kan iglesya dai nagmaimbod sa Kagurangnan na Jesu-Cristo sa bagay na ini, na sinda nakisaro nin sala sa dakulang negosyo asin sa darakulang politiko tanganing suportaran an Guerra Mundial.’
9 An pagdenunsiar nagpadagos: “Orog pa nindang isinikwal an Kagurangnan asin an saiyang kahadean saka ipinaheling an saindang katraydoran paagi sa boluntad na pakikisaro sa organisasyon ni Satanas asin mapusong pagpaisi sa kinaban na an Liga de Naciones iyo an politikal na kapahayagan kan kahadean nin Dios digdi sa daga.” Ultimo yaon an mensahe nin “kapahamakan,” o paghokom: “May nagdadangadang ngonyan asin madali nang bumagsak sa mga nasyon kan daga, sono sa mga tataramon ni Cristo Jesus, na dakulang panahon nin ‘kahorasaan na daing kaagid poon kan kapinonan kan kinaban sagkod ngonyan, dai, ni mangyayari pa giraray.’”
10. Anong pagdenunsiar an ginibo kan 1926?
10 An gibohon ni Jeremias pinahiwas paagi sa paggamit nin ibang mga publikasyon, arog baga kan magasin na An Torrengbantayan, mga pulyeto, asin libro. Halimbawa, kan 1926 an librong Deliverance may mapuwersang pagbubuyagyag kan nakadadayang mga katokdoan nin Kakristianohan. Sa pahina 203 iyan nagsasabi: “An falsong mga doktrina daing kontrol na ilinaog [sa apostatang Kakristianohan] asin isinalida sa katotoohan. Kabilang digdi an mga doktrina kan trinidad, inmortalidad nin gabos na kalag, daing sagkod na padusa sa mga maraot, banal na diretso kan klero asin banal na diretso nin mga hade sa pagsakop. Pag-abot nin panahon si Maria, an ina kan omboy na si Jesus, ginibong dios; asin ipinasamba sia bilang ina nin Dios.”
An Nakababangang Kakristianohan Pinatanidan
11, 12. (a) Paano ibinuyagyag an bakong neutral na paninindogan kan klero? (b) Anong patanid an itinao kan grupong Jeremias?
11 An iyo man sanang libro ibinuyagyag an pakikikabtang kan klero sa mga guera, na sinasabi: “An klero kan laen-laen na eklesiastikong mga palakaw na ini binibendisyonan an mga hukbo na isinusugo kan komersial asin politikal na mga elemento, asin itinatao ninda an saindang bendisyon minsan saen na lado nakikilaban an mga hukbong ini. An klero gabos nagsasagin namimibi sa iyo man sanang Dios para sa bendisyon sa nagraralaban na hukbo sa man-ibang-ibong na lado.” (Ikomparar an Jeremias 7:31.) Dangan ipinarisa an nagdadangadang na paghokom: “An gabos na elementong ini na minakompuwesto sa naheheling na kabtang kan organisasyon ni Satanas tinitipon asin pinagsasararo sa dakulang ralaban nin Armagedon.”—Kapahayagan 16:14-16.
12 Kapareho kaidtong kaaldawan ni Jeremias, na an mga namomoon nagsabi na sinda ligtas asin may pakipagkatoninongan sa Dios, “an eklesiastikong mga namomoon na ini nagsasabi na sinda ligtas, na kaipuhan sana sindang apodon sa ngaran ni Cristo, mantang padagos sindang nagkakawat sa kalayo kan Diablo. Binubuta ninda an saindang sadiri sa tunay na situwasyon paagi sa pagbudbud nin baybay sa saindang mata saka sa mata kan saindang kapwa.” (Deliverance, pahina 270) An pagdaya ninda sa sadiri ibinuyagyag kan maigot na mga Estudyante sa Biblia, an apod kaidto sa mga Saksi ni Jehova.—Mateo 7:21-23.
13. Ano an nangyari kan 1931, asin taano idto ta maninigo?
13 Sa pag-agi nin panahon, an mga Estudyante sa Biblia orog pang nagin konektado ki Jeremias kan, kaidtong 1931, sa sarong kombension sa Columbus, Ohio, E.U.A., ipinaisi na an sono sa Bibliang ngaran para sa mapusong grupong ini nin mga Kristiano maninigong “mga Saksi ni Jehova.” (Isaias 43:10-12) An ngaran na iyan nabantog kaidtong ikawalong siglo B.C.E. kan itao iyan ni Jehova sa Israel. Kaya, pakalihis nin mga sanggatos na taon, kan si Jeremias maglingkod na propeta, sia saksi man ni Jehova. (Jeremias 16:21) Si Jesus man, kan sia pumadigdi sa daga bilang Judio, saksi kan saiyang Ama, si Jehova. (Juan 17:25, 26; Kapahayagan 1:5; 3:14) Kun siring, tama sana na sa itinalaan na panahon nin Dios, an saiyang banwaan sa katapustapusi makuwalipikar para sa ngaran na ini na itinao nin Dios—“mga Saksi ni Jehova.”—Juan 17:6, 11, 12.
Ibinuyagyag an Kakristianohan
14. Paano ibinuyagyag an Kakristianohan sa nakaaging 70 taon?
14 Sa nag-aging pitong dekada, kadungan kan pagbalangibog kan mamuraway na paglaom sa nagdadangadang na Kahadean ni Jehova, ilinakop nin mga Saksi ni Jehova sa bilog na kinaban an baha nin pagdenunsiar asin paghokom. Sa ginatos na milyon na prangka, epektibong mga babasahon na basado sa Biblia, ibinuyagyag ninda an Kakristianohan bilang an pinakamakosog na puwersa sa relihiyosong patotot, an “Dakulang Babilonya,” na kinokondenar sa Kapahayagan kapitulo 17 asin 18. (Helingon an “Babylon the Great Has Fallen!” God’s Kingdom Rules!, pahina 576-615, na ipinublikar kan 1963 kan Watchtower Bible and Tract Society of New York, Inc.)
15. Paano ibinuyagyag an Kakristianohan kan 1955?
15 Kan 1955 an mga Saksi ni Jehova nagwaras nin minilyon na kopya kan pulyetong Christendom or Christianity—Which One Is “the Light of the World“? Rinibo an direktang itinao sa klero nin Kakristianohan. Asin ano an isinabi kan pulyetong iyan sa sainda? Sa estilo ni Jeremias, iyan nagsabi: “Sa ibong kan saiyang mga bentaha na nagpaasenso sa saiya sa ekonomiko, mental asin militar, dai napatunayan kan Kakristianohan na sia ‘an ilaw kan kinaban.’ Taano ta dai? . . . Dai nia ihinuhulit o inootob an Kristianismo [kan Biblia].” Dangan pinalataw kaiyan an hapot: “An pagbuyagyag daw sa falsong mga relihiyon paglamag sa mga miembro kaiyan? Iyan daw bakong Kristianong pagkapanatiko?”
16. Pagkapanatiko daw an pagbuyagyag kan mga Saksi sa Kakristianohan? Ipaliwanag.
16 An simbag: “Bako; ta kun iyo si Jesu-Cristo panatikong paralamag sa mga Judio, . . . asin an gabos na propeta ni Jehova kan suanoy na mga panahon [kaiba si Jeremias] bago ki Jesus mga paralamag asin panatiko, huli ta sinda gabos ibinuyagyag an falsong relihiyon nin apostatang mga Judio asin kan paganong mga nasyon.” Tunay na, tanganing an tunay na mga Kristiano magin “ilaw nin kinaban,” kaipuhan na ibuyagyag an espirituwal na “kadikloman.” (2 Corinto 6:14-17) Ini dai nangangahulogan na inaatake an mga indibiduwal kundi, imbes, an palakaw na nakabibihag sa sainda. Kaya, pinagbotan ni Jehova si Jeremias: “Hagkosan mo an saimong habayan, asin tumindog ka patin itaram mo sa sainda an gabos na ipinagboot ko sa saimo. Dai ka matakot huli sa sainda . . . Asin sierto na matumang sinda sa saimo, alagad ta dai sinda manggagana saimo, huling ‘ako nasa saimo,’ an sabi ni Jehova, ‘tanganing iligtas ka.’”—Jeremias 1:17, 19.
An Gibohon ni Jeremias Natatapos Na
17, 18. (a) Paano ipinagpapadagos nin mga Saksi ni Jehova an saindang gibohon ni Jeremias sa nakakaagi pa sanang mga taon? (b) Anong hatol an itinao sa mga may sadiosan na puso?
17 Ininaan daw nin puwersa kan mga Saksi ni Jehova an paghokom nin Dios? Totoo, nabubuhay kita sa panahon na an pagkritika sa ibang relihiyon dai ibinibilang na tama. Minsan siring, an mga babasahon kan mga Saksi ni Jehova nagpapahayag kan mensahe nin paghokom sa Kakristianohan na arog kan dati. Halimbawa, sa nakaaging apat na taon an mga Saksi ni Jehova nag-imprenta nin 32 milyones na kopya kan librong Puwede Kamong Mabuhay Sagkod Lamang sa Paraiso Digdi sa Daga, sa 76 na tataramon. An librong ini nagtatao kan simbag sa dakol na napapanahon na hapot, arog baga kan “Ano an Nangyayari sa Pagkagadan? “Taano ta Tinogotan nin Dios an Karatan?” asin “Pagmidbid sa Tunay na Relihiyon.” Alagad iyan nagtatao man nin malinaw na patanid manongod sa pankinaban na imperyo nin falsong relihiyon.
18 Sa kapitulo 25, na may titulong “Para sa Kinaban ni Satanas, o Para sa Bagong Palakaw nin Dios?” iyan nagsasabi: “Sa Biblia an falsong relihiyon irenerepresentar na sarong ‘dakulang patotot,’ o parapasambay, na igwang ngaran na ‘Dakulang Babilonya.’ . . . Asin sarong katotoohan na sa bilog na kasaysayan an relihiyon danay na salak sa politika, na parateng nagdidikta kun ano an gigibohon nin mga gobyerno.” Kun siring, ano an irenerekomendar kan libro na dapat na gibohon? Iyan naghahapot: “Gusto daw nindong magin kabtang kan kinaban ni Satanas? O kamo daw para sa bagong palakaw nin Dios? Kun kamo para sa bagong palakaw nin Dios, magigin kamong siblag sa kinaban, kaiba na an falsong relihiyon. Susunodon nindo an pagboot: ‘Lumuwas kamo saiya [Dakulang Babilonya], banwaan ko.’ (Kapahayagan 18:4 )”
19. Paano nindo ikapaheheling na an tingog kan modernong Jeremias dai luminuya sa huring panahon na ini?
19 An mapuwersang mensaheng ini nin pagsiblag asin paghokom malinaw man sa librong Worldwide Security Under the “Prince of Peace,” na ipinublikar kan 1986 (sais milyones na kopya sa 25 tataramon). Ibinuyagyag kaiyan an klero nin Kakristianohan huli sa ‘paghulit sa mga hobenes na makipaglaban’ kan Guerra Mundial I. Iyan nagpapadagos: “An Kakristianohan nagpapadagos na kaiwal kan Kaharohalangkaweng Dios sagkod sa panahon na ini. Tunay na mayo saiya an banal na proteksion, asin huli sa mahalagang dahelan na ini an saiya mismong pag-eksister nagdadanay na daing katiwasayan.” (Helingon an pahina 30-2.) An tingog kan modernong Jeremias dai luminuya! Minsan ngani naghihingoa an klero asin mga politiko na papondohon an paghuhulit kan mga paghokom nin Dios, an saiyang maimbod na mga saksi nagpapadagos, determinado na tapuson an gibong pagpapatanid.—Jeremias 18:18.
20. Taano ta ipagpapadagos nin mga Saksi ni Jehova an pagpaisi kan mga paghokom ni Jehova sa mga nasyon?
20 Asin taano ta dapat na matapos an gibong ini? Huli ta si Jehova, an nabubuhay na Soberanong Kagurangnan kan uniberso, may pakikipagkuwenta sa mga nasyon asin sa saindang mga relihiyon. Kun paanong hinapot ni Jehova an madayang Juda asin Jerusalem, aplikado man sa Kakristianohan ngonyan an hapot: “Dai daw ako maninigong makipagkuwenta huli sa mismong mga bagay na ini?’ an sabi ni Jehova. ‘O sa nasyon na arog kaini dai daw maninigong bumalos an sakuyang kalag?’” Kun siring, an mga Saksi ni Jehova magpapadagos na sumongko sa mga tawo kan mga nasyon na dara an mensahe na makolog sa mayoriya bilang paghokom na bakong popular alagad nakaoogmang bareta para sa minoriya—an maogmang bareta kan Kahadean nin Dios.—Jeremias 5:9, 29; 9:9; Gibo 8:4, 12.
21. Sa ibong nin ihinulang kapahamakan, anong dakulang gibohon an nasa atubangan kan mga naghihinanyog sa gibohon ni Jeremias? (Salmo 37:9, 11, 18, 19, 28, 29)
21 Minsan ngani si Jeremias parateng inaapod na parabalangibog nin kapahamakan, totoo man na an saiyang mensahe nagtao nin paglaom sa mga Judio. (Jeremias 23:5, 6; 31:16, 17) Siring man, minsan ngani ipinaiisi kan mga Saksi ni Jehova an nagdadangadang na “dakulang kahorasaan,” kaiba an paghokom nin Dios sa Armagedon, ibinabalangibog man ninda an mga bendisyon kan “bagong kalangitan asin sarong bagong daga” na magbubunga kan pagbabalik nin hustisya asin Paraiso sa planetang ini, kaiba an buhay na daing katapusan. (Mateo 24:21, 22; Kapahayagan 16:16; 21:1-4) Kun siring, ngonyan na an panahon na dangogon an mensahe nin paghokom ni Jehova asin sumuportar sa pagtapos sa dakulang gibohon ni Jeremias.—Ikomparar an Jeremias 38:7-13.
Nagigirumdoman daw Nindo?
◻ Kapareho ni Jeremias, paano pinaglalamag an mga Saksi ni Jehova?
◻ Taano ta nagpapadagos sa paghuhulit an mga Saksi?
◻ Paano pinahiwas an gibohon ni Jeremias?
◻ Anong bago pa sanang mga halimbawa an nagpapaheling na dai nagliwat an pagdenunsiar?
◻ Sa ibong kan mensahe nin kapahamakan, ano man na paglaom an itinatao?
[Ritrato sa pahina 9]
Pag-abot nin panahon, si Maria ginibong dios asin ipinasamba sia bilang an “Ina nin Dios”
[Ritrato sa pahina 10]
Kan 1931 inako kan mga Estudyante sa Biblia an ngaran na “mga Saksi ni Jehova” sa saindang kombension sa Columbus, Ohio
[Ritrato sa pahina 11]
An mga Saksi ni Jehova sa bilog na kinaban nag-aarog sa halimbawa ni Jeremias