Papagdanayon an Saindong Kompiansa na Marigon Sagkod sa Katapusan

IMAHINARA an sarong sadit na eroplano na naglalayog pasiring sa masakit na mga kamugtakan nin panahon. Dai na namamaanan kan piloto an mga tinatandaanan sa daga. Napalilibotan sia nin mahibog na mga panganoron. Mayo na siang naheheling sa luwas kan saiyang pansangga sa doros, pero nakaseseguro sia na matatapos nia nin ligtas an saiyang biahe. Ano an dahelan kan saiyang kompiansa?

Igwa sia nin eksaktong mga instrumento na nagpapangyari sa saiya na maglayog sa mga panganoron asin madiklom na daga. Sa saiyang agihan, nangorogna harani sa aeropuerto, ginigiyahan sia sa elektronikong paagi nin naggigiyang mga senyal, asin nakakaradyo sia sa mga nagdidirehir sa trapiko nin mga eroplano na yaon sa daga.

Sa kaagid na paagi, puede niatong atubangon na may kompiansa an ngapit, minsan ngani nag-oorog na mamondo an mga kamugtakan sa kinaban aroaldaw. An biahe niato sa maraot na palakaw na ini tibaad mas haloy kisa sa linaoman nin nagkapira, alagad makasasarig kita na kita nasa tamang dalan asin nasa tamang panahon. Taano ta makasisierto nanggad kita? Huli ta igwa kita nin giya na nagpapangyari sa sato na mamansayan an dai naheheling nin tawo.

An Tataramon nin Dios ‘liwanag sa satong dalan,’ asin iyan “mapagtitiwalaan, nagpapadonong sa daing kabatidan.” (Salmo 19:​7; 119:​105) Siring sa naggigiyang mga senyal na nagpaparisa kan inaagihan kan piloto, sinasabi nin eksakto kan Biblia an mga mangyayari sa ngapit asin itinatao sa sato an malinaw na mga instruksion tanganing masierto na kita makaabot na ligtas sa satong padudumanan. Minsan siring, tanganing makinabang sa paggiya nin Dios, kaipuhan na kita magtiwala dian.

Sa saiyang surat sa mga Hebreo, sinadol ni Pablo an mga Kristianong Judio na ‘pangaptan ninda nin masarig an kompiansa na nasa sainda sa kapinonan na marigon sagkod sa katapusan.’ (Hebreo 3:14) An pagtiwala puedeng matanyog kun an pangangapot niato dian dai ‘pasarigon.’ Kaya minalataw an hapot na, Paano daw niato mapagdadanay an satong kompiansa ki Jehova na marigon sagkod sa katapusan?

Gibohon an Saindong Pagtubod

Bago an sarong piloto makalayog paagi sa mga instrumento, na biyong nagdedepende sa saiyang mga instrumento asin sa mga nagdidirehir na nasa daga, kaipuhan nia an igong pagtotokdo asin dakol na oras na paglayog. Sa kaagid na paagi, kaipuhan na padagos na gibohon nin Kristiano an saiyang pagtubod tanganing mapagdanay an kompiansa nia sa paggiya ni Jehova, nangorogna kun minalataw an masakit na mga kamugtakan. Si apostol Pablo nagsurat: “Huli ta yaon sa samo an espiritu nin pagtubod na kapareho kan nasusurat: ‘Naggibo ako nin pagtubod, kun siring ako nagtaram,’ kami man naggigibo nin pagtubod asin kun siring kami man nagtataram.” (2 Corinto 4:13) Sa siring, kun kita nagtataram manongod sa maogmang bareta nin Dios, satuyang ginigibo asin pinaririgon an satong pagtubod.

Si Magdalena, na nag-apat na taon sa sarong kampo de konsentrasyon kaidtong ikaduwang guerra mundial, nagpapaliwanag kan halaga kan paghuhulit: “Tinokdoan ako kan sakong ina na tanganing mapagdanay an makosog na pagtubod, kaipuhan na magmakolog sa espirituwal na ikararahay nin iba. Nagigirumdoman ko an sarong pangyayari na nag-iilustrar kan samong saboot. Pakaluwas mi sa kampo de konsentrasyon sa Ravensbrück, kami mag-ina nakaabot sa samong harong sarong Biernes. Pakalihis nin duwang aldaw, pag-Domingo, uminiba kami sa mga tugang sa paghuhulit sa harong-harong. Ako marigon na nagtutubod na kun kita makonsentrar sa pagtabang sa iba na magtiwala sa mga panuga nin Dios, an mga panuga man na iyan magigin mas tunay para sa sato.”​—Ikomparar an Gibo 5:42.

An pagpapadanay sa satong kompiansa na marigon sagkod sa katapusan naghahagad nin espirituwal na aktibidad sa ibang langtad. An personal na pag-adal saro pang marahayon na gibo na nagpapakosog sa pagtubod. Kun aarogon niato an mga taga-Berea asin mahigos na sisiyasaton an Kasuratan aroaldaw, tatabangan kita kaiyan na “magkaigwa kan biyong kasiertohan kan paglaom sagkod sa katapusan.” (Hebreo 6:​11; Gibo 17:11) Totoo, an personal na pag-adal nagkakaipo nin panahon asin determinasyon. Posible na iyan an dahelan na pinatanidan ni Pablo an mga Hebreo manongod sa peligro nin pagigin “burod,” o buntol maghiro, sa siring na mga bagay.​—Hebreo 6:12.

An buntol na kaisipan puedeng magkaigwa nin maraot na mga resulta sa dakol na kabtang nin buhay. Nagkomento si Salomon na “paagi sa pagbaba kan mga kamot nagtotoro an harong.” (Eclesiastes 10:18) Dai mahahaloy an oran mapoon na tumoro sa atop na dai inaasikaso. Kun ibaba niato an satong mga kamot sa espirituwal na paagi asin dai niato mapagdanay an satong pagtubod, tibaad makalaog an mga pagduda. Sa ibong na lado, an regular na paghorophorop asin pag-adal sa Tataramon nin Dios mapakosog asin maprotehir sa satong pagtubod.​—Salmo 1:​2, 3.

Pagparigon sa Pagtiwala Paagi sa Eksperyensia

Siempre, nanonodan nin piloto paagi sa eksperyensia saka paagi sa pag-adal na mapagtitiwalaan an saiyang mga instrumento. Kaagid kaiyan, an satong kompiansa ki Jehova nagtatalubo kun naheheling niato sa sato mismong buhay an ebidensia kan saiyang mamomoton na pangataman. Naeksperyensiahan iyan ni Josue, asin pinagirumdom nia an saiyang mga kapwa Israelita: “Aram nindong gayo sa bilog nindong puso asin sa bilog nindong kalag na ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob sa saindo.”​—Josue 23:14.

An leksion na iyan nanodan man ni Josefina, sarong may agom na tugang na babae na taga-Pilipinas. Ipinaliliwanag nia an kamugtakan kan buhay ninda bago nia namidbid an katotoohan: “An agom kong lalaki dati makosogon uminom, asin kun sia nabuburat, naaanggot sia asin kinokologan ako. Apektado man an samong aking lalaki kan bakong maogmang relasyon mi mag-agom. Pareho kami nagtatrabaho mag-agom, na dakula an sueldo, alagad isinusugal mi an kadaklan sa samong sueldo. Kadakol nin amigo an agom ko, pero an kadaklan sa sainda nakiamigo sa saiya tanganing sia an magbayad para sa mga inomon, asin an iba hiningoa pa nganing buraton sia tangani sanang mapagngisihan sia.

“Nagliwat an mga bagay kan mamidbid mi si Jehova asin isinapuso an saiyang hatol. Dai na nag-iinom an agom ko, nagpondo na kami sa pagsugal, asin igwa kami nin tunay na mga katood na namomoot asin nagtatabang sa samo. Maogma na an relasyon niamo mag-agom, asin an samong aki nagdadakula sa pagigin maboot na barobata. Mas kadikit na oras an pagtrabaho mi, alagad mas dakol an samong kuarta. Tinokdoan kami nin eksperyensia na si Jehova arog sa mamomoton na Ama, na perming naggigiya sa samo sa tamang direksion.”

Bilang resulta nin mga instruksion na irinadyo o nin pagheling sa instrumento, kun beses narerealisar nin mga piloto na kaipuhan na itanos ninda an saindang dalagan. Tibaad kaipuhan man kitang magliwat nin direksion sono sa instruksion ni Jehova. “An saimong mga talinga makakadangog nin tataramon sa likod mo na nagsasabi: ‘Iyo ini an dalan. Maglakaw kamo dian, banwaan,’ kun baga kamo banwaan maninigong magpatoo o magpawala.” (Isaias 30:21) Paagi sa saiyang Tataramon asin paagi sa saiyang organisasyon, nag-aako kita nin hatol na nagpapatanid sa sato dapit sa espirituwal na mga peligro. An saro kaini may labot sa pag-iriba.

Puede Kitang Mawaran nin Direksion Huli sa Pag-iriba

An sadit na eroplano madalion na mawaran nin direksion kun dai ginigibo an kinakaipuhan na mga pagtatanos. Kaagid kaiyan, an mga impluwensia sa luwas daing ontok sa pagsalpok sa mga Kristiano ngonyan. Nabubuhay kita sa sarong makalaman an isip na kinaban na an dakol nagtutuya sa espirituwal na mga prinsipyo sa buhay, na orog nanggad na pinahahalagahan an kuarta asin kaalingan. Pinatanidan ni Pablo si Timoteo na an huring mga aldaw magigin “masakit pakibagayan.” (2 Timoteo 3:​1-5) An mga tin-edyer, na naghihimuyawot na akoon asin magin popular, nangorognang madaling mabiktima nin maraot na pag-iriba.​—2 Timoteo 2:22.

Si Amanda, na 17 anyos, nagpapaliwanag: “Sa halipot na panahon napanluya an sakong pagtubod kan sakong mga kaklase. Permi nindang sinasabi na an sakong relihion kadakol kan bawal asin bakong rasonable, asin ini nagpoon na magpaluya sa sakong boot. Minsan siring, tinabangan ako kan sakong mga magurang na masabotan na an mga susundan na Kristiano nagpoprotehir imbes na naglilimitar. Ngonyan narealisar ko na an mga prinsipyong ini nakatatabang sa sako na magkaigwa nin buhay na mas nakakokontento kisa sa buhay kan mga dati kong kaeskuela. Nakanood akong pagtiwalaan an mga talagang nagmamakolog sa sako​—an sakong mga magurang asin si Jehova—​asin naoogma ako sa pagpapayunir.”

Ano man an satong edad, may manonompongan kitang mga tawo na magkokomento nin mapagmenus sa satong mga tinutubod. Tibaad garo sinda eksperyensiado sa kinaban, alagad para sa Dios sinda pisikal, bakong espirituwal. (1 Corinto 2:14) An sarong maimpluwensiang grupo sa Corinto kaidtong kaaldawan ni Pablo iyo an madonong sa kinaban na Mga Mapagduda. An mga katokdoan kan mga pilosopong ini posibleng naggiya sa ibang Kristianong taga-Corinto na mawaran nin pagtubod sa paglaom sa pagkabuhay liwat. (1 Corinto 15:12) “Dai kamo palagalag,” an patanid ni apostol Pablo. “An maraot na pag-iriba nakararaot sa marahay na mga ugale.”​—1 Corinto 15:33.

Sa ibong na lado, an marahay na pag-iriba nagpapakosog sa sato sa espirituwal. Sa laog kan Kristianong kongregasyon, igwa kita kan oportunidad na makiiba sa mga tawo na namumuhay sono sa pagtubod. Si Norman, sarong tugang na nakanood kan katotoohan kan 1939, sagkod ngonyan nakaparirigon na marhay nin boot para sa gabos. Ano an nagpadanay na malinaw sa saiyang espirituwal na pagmansay? “Mahalagang marhay an pagtiripon asin an dayupot na pakikikatood sa fiel na mga tugang,” an simbag nia. “An arog kaining pakikiiba nakatabang sa sako na masabotan nin malinaw an kalaenan kan organisasyon nin Dios asin kan ki Satanas.”

An Mapandayang Kapangyarihan nin Kayamanan

Si Brian, sarong eksperyensiadong piloto, nagpapaliwanag na “an sarong piloto tibaad may beses na nadedepisilan na tubodon an saiyang mga instrumento​—huli sana ta dai oyon an saiyang natural na tendensia. May nabaretang eksperyensiadong mga piloto na naglayog nin baliktad huli ta an mga ilaw sa daga garo mga bitoon​—minsan ngani iba an sinasabi kan saindang mga instrumento.”

Sa kaagid na paagi, an satong paslong natural na tendensia puede kitang ilagalag sa espirituwal na sentido. Sinabi ni Jesus na an kayamanan may “mapandayang kapangyarihan,” asin nagpatanid si Pablo na ‘an pagkamoot sa kuarta ilinagalag an dakol sa pagtubod.’​—Marcos 4:​19; 1 Timoteo 6:10.

Siring sa mapandayang mga ilaw na nagkikimatkimat, an mapagpasikat na materyalistikong mga pasohan puede kitang itokdo sa salang direksion. Imbes na maggayagaya sa “paghalat sa mga bagay na linalaoman,” puede kitang malingling sa pagpaabaw-abaw kan kinaban na maagi sana. (Hebreo 11:​1; 1 Juan 2:​16, 17) Kun kita “nagmamaigot” na magkaigwa nin mayaman na estilo nin pamumuhay, posible na magigin kadikiton na an panahon niato para sa espirituwal na pagtalubo.​—1 Timoteo 6:​9; Mateo 6:​24; Hebreo 13:5.

An sarong hoben na may agom na si Patrick nag-admitir na sinda mag-agom isinakripisyo an espirituwal na mga pasohan para sa pagkakamit nin mas marahay na pamumuhay. Sia nagpapaliwanag: “Naimpluwensiahan kami kan mga yaon sa kongregasyon na may darakulang kotse asin maluhong mga harong. Minsan ngani dai niamo noarin man nalingawan an paglaom sa Kahadean, inisip niamo na marahay man kun komportable an buhay mi. Minsan siring, pag-abot nin panahon, narealisar niamo na an tunay na kaogmahan nakukua sa paglilingkod ki Jehova asin sa pagtalubo sa espirituwal. Ngonyan simple na naman an samong buhay. Ininaan mi an oras nin pagtrabaho, asin kami nagin mga regular payunir.”

An Pagtubod Depende sa Mapaghimateng Puso

An mapaghimateng puso mahalaga man an kabtang sa pagkaigwa nin kompiansa ki Jehova. Totoo, “an pagtubod iyo an siertong paghalat sa mga bagay na linalaoman, an hayag na pagpapaheling [o, “nakakokombensir na ebidensia,” nota sa ibaba] kan mga katunayan minsan dai naheheling.” (Hebreo 11:1) Alagad kun kita mayo nin mapaghimateng puso, harayo an posibilidad na kita makombensir. (Talinhaga 18:​15; Mateo 5:6) Sa dahelan na ini sinabi ni apostol Pablo na “an pagtubod bakong sadiri nin gabos na tawo.”​—2 Tesalonica 3:2.

Kun siring, paano niato mapagdadanay na mapaghimate an satong puso sa gabos na nakakokombensir na ebidensiang yaon? Paagi sa pagkultibar sa diosnon na mga kualidad, mga kualidad na nakapaooswag kan kualidad nin asin nakaaanimar sa pagtubod. Sinasadol kita ni Pedro na ‘idagdag sa satong pagtubod an karahayan, kaaraman, pagpopogol sa sadiri, pakatagal, diosnon na debosyon, kapadangatan sa tugang, asin pagkamoot.’ (2 Pedro 1:​5-7; Galacia 5:​22, 23) Sa ibong na lado, kun paslo an satong pamumuhay o paramas sanang paglilingkod an itinatao niato ki Jehova, dai niato rasonableng malalaoman na tumalubo an satong pagtubod.

“Inandam ni Esdras an saiyang puso” na basahon an Tataramon ni Jehova asin gibohon iyan. (Esdras 7:10) Si Miqueas igwa man nin mapaghimateng puso. “Kun para sa sako, para ki Jehova na ako maghahalat. Mapaheling ako nin mapaghalat na kaisipan para sa Dios nin sakong kaligtasan. Dadangogon ako kan sakuyang Dios.”​—Miqueas 7:7.

Si Magdalena, na kinotar sa enotan, mapasensia man na naghahalat ki Jehova. (Habacuc 2:3) Sia nagsasabi: “Yaon na sa sato an espirituwal na paraiso. An ikaduwang tangga, an pisikal na Paraiso, madali nang umabot. Mientras tanto ginatos na ribo an minaiba sa dakulang kadaklan. Ikinaoogma kong marhay na maheling an kadakol na minalaog sa organisasyon nin Dios.”

Paglaom sa Dios kan Satong Kaligtasan

An pagpapadanay sa satong kompiansa na marigon sagkod sa katapusan nagkakaipo nin paggibo kan satong pagtubod asin maingat na paghinanyog sa paggiyang inaako niato gikan ki Jehova asin sa saiyang organisasyon. Tunay na bawi man an paghihingoa. An piloto nakamamate nin hararom na satispaksion kun pakalihis nin halawig, depisil na biahe, sia minaibaba asin sa katapustapusi nakaluluwas sa mahibog na mga panganoron. Nadudungawan nia an daga​—berde asin maogma an pagsabat. Nasa ibaba an landingan, na naghahalat na akoon sia.

May naghahalat man sa sato na maogmahon na eksperyensia. An mamondo, maraot na kinaban na ini sasalidahan nin bagong daga na may katanosan. Naghahalat sa sato an pagsabat nin Dios. Makaaabot kita duman kun hihimateon niato an mga tataramon kan salmista: “Ika an sakong paglaom, O Soberanong Kagurangnan na Jehova, an sakong kompiansa poon sa sakong pagkaniaki. . . . Sa saimo ako danay na mag-oomaw.”​—Salmo 71:​5, 6.