Pagtogdok Para sa Daing Sagkod na Ngapit
“An lambang harong igwa nin paratogdok, an Paratogdok kan gabos na bagay iyo an Dios.”—HEBREO 3:4, Weymouth.
1, 2. (a) Siisay an nagdisenyo sa dahong, asin gurano kadetalyado kan mga instruksion na itinao? (b) Taano ta kaipuhan na kita magkuyog, arog ni Noe?
KAIDTONG mga 4,400 na taon na an nakaagi pinagbotan ni Jehova si Noe na magtogdok kan dahong para sa pagliligtas nin buhay. Alagad ta dai pinabayaan nin Dios si Noe na magtogdok nin minsan anong klaseng sakayan na puwedeng lumataw sa tubig. Imbes, sia nagtao nin espisipikong mga instruksion dapit sa materyales, disenyo, laba, lakbang, langkaw, agihan nin aire, asin pagkompleto kaiyan sa laog asin luwas. “Asin ginibo ni Noe an sono sa gabos na ipinagboot sa saiya nin Dios. Siring nanggad kaiyan an saiyang ginibo.”—Genesis 6:13-16, 22.
2 Kanigoan karahay na halimbawa para sa mga saksi ni Jehova sa modernong aldaw! Kapareho ni Noe, kita pinaniwalaan nin sarong gibohon na nagliligtas nin buhay alagad ngonyan nagtatanaw sa kaligtasan nin ‘minilyon na nabubuhay ngonyan na tibaad dai na noarin man magadan.’ Napakahalaga nanggad na kita magin makinuyog, kapareho ni Noe! Napakahalaga na arogon niato an halimbawa kan Saro na orog na dakula ki Noe, si Jesu-Cristo, sa paglilingkod bilang ‘mga parahulit nin katanosan’!—2 Pedro 2:5.
Sarong Espirituwal na Pagtotogdok
3. (a) Ano an ibubunga kan pagtotogdok sa mga tataramon ni Jesus? (b) Taano an paghuhulit ni Jesus ta nagtotogdok nin pagtubod?
3 1,956 na taon na poon kan an mga banwaan sa Galilea biglaon ni Jesus paagi sa saiyang kapahayagan: “Magsorolsol kamo, banwaan, huli ta an kahadean kan kalangitan harani na.” Ibinaing nia an gabos na nagkukuyog sa saiyang mga tataramon asin nagtotogdok sa ibabaw kaiyan sa sarong “madonong, na nagtogdok kan saiyang harong sa gapo.” An pagtubod kan tawong iyan marigon, dai natatanyog, dai nahihiro. Iyan dai marurumpag kun nasa kagipitan. An paghuhulit ni Jesus nagtotogdok nin pagtubod. Iyan nakataros sa puso nin mga tawo, na laen na gayo sa nagsasagin banal na mga tataramon kan Judiong mga namomoon sa relihiyon. An ordinaryong mga tawo napangalas sa paagi ni Jesus sa pagtotokdo. Dawa an mga soldados na isinugo tanganing dakopon sia nagbuwelta na daing dara, na an sabi: “Dai pa nin tawong nagtaram nin arog kaini.”—Mateo 4:17; 7:24, 25, 28; Juan 7:46.
4. (a) Paano si Jesus nagtogdok para sa ngapit? (b) Ano an dakulang pagtotogdok na nangyari kan Pentecostes nin 33 C.E.?
4 Si Jesus nagtotogdok kaidto para sa ngapit. Nagtipon sia nin mga katabang, arog ni Pedro, na inapod man na Cefas, na an boot sabihon “sarong gapo.” Sa disipulong ini, si Jesus nagsabi: “Ika si Pedro, asin sa ibabaw kan gapong ini papatindogon ko an sakong kongregasyon.” Pag-abot nin panahon si Pedro nagin saro sa dakol na “nabubuhay na mga gapo” na natotogdok ki Jesus, an “pundasyon na gapo kan anggulo” kan kongregasyon. An kongregasyon na idto tinindog kan Pentecostes nin 33 C.E. kan ibubo kan binuhay liwat na si Jesus, sa too nin Dios sa langit, an banal na espiritu sa naghahalat na mga disipulo.—Mateo 16:18; 1 Pedro 2:4-6; Gibo 2:2-4, 32, 33.
5. Sa anong mga pangyayari sa modernong mga panahon napapalabot na gayo an Kristianong kongregasyon?
5 Ngonyan, an Kristianong kongregasyon kalabot na gayo sa pag-otob sa mga katuyohan ni Jehova. Ini an panahon nin “apocalipsis,” o “kapahayagan,” na “an mga bagay na kaipuhan na mangyari” ihinahayag sa “mga oripon” nin Dios digdi sa daga. (Kapahayagan 1:1-3, Ref. Bi., nota sa ibaba) Ini an panahon na an mga oripon na ini dapat na ‘maghulit kan maogmang bareta kan Kahadean nin Dios sa bilog na daga para sa pagpatotoo,’ bago nia silotan an maraot na palakaw ni Satanas. Ini an panahon na isiblag kan Hade, si Jesu-Cristo, na ngonyan natutukaw na sa trono sa kalangitan, an mga mahoyo, arog-karnero sa matagas an payo, arog-kanding na mga tawo na habo sa Kahadean na iyan, asin tiponon an mga “karnerong” ini sa saiyang kongregasyon nin espirituwal na “mga tugang” bago umabot an “dakulang kahorasaan.”—Mateo 24:14, 21; 25:31-40.
6. Ano ngonyan an “dahong,” asin paano kita makakaligtas?
6 Ano an dahong nin kaligtasan sa modernong aldaw? Iyan an espirituwal na kamugtakan kan mga Saksi ni Jehova poon kan 1919, sarong espirituwal na paraiso. Arog kan mga kaiba sa pamilya ni Noe, an natatada sa linahidan na mga Kristiano asin an saindang kairiba kaipuhan na magdanay sa laog kaiyan, na nagtatrabahong makinuyog, bilog na puso, sa pagtapos sa dakulang espirituwal na proyekto na katuyohan ni Jehova. An proyektong ini iyo an “tiponon giraray an gabos dian ki Cristo, an mga bagay sa kalangitan [poon kan 33 C.E. sa mga linahidan na pasiring sa langit] asin an mga bagay sa daga [nangorogna poon kan 1935 sa internasyonal na “dakulang kadaklan” na nakatalaga para sa buhay na daing katapusan sa daga].”—Efeso 1:10; Kapahayagan 7:9, 14.
‘Nagtotogdok Asin Nagtatanom’
7. Anong duwang gibohon an ginigibo ngonyan, asin paano kita puwedeng magkaigwa nin kabtang sa kaogmahan kapareho ni Noe asin Jeremias?
7 Sinugo ni Jehova an natatada pa sa linahidan na mga Kristiano sa daga, arog kan ginibo nia ki propeta Jeremias, na magin “sa ibabaw kan mga nasyon asin sa ibabaw kan mga kahadean, tanganing mangabot asin manraot asin manlaglag patin mangaba, tanganing magtogdok asin magtanom.” Kaya ginigibo ngonyan an duwang gibohon: (1) an pagpaisi kan paghokom ni Jehova tumang sa maraot na pankinaban na palakaw ni Satanas asin (2) an pagtogdok asin pag-establisar nin sarong sosyedad kan banwaan nin Dios para sa kaligtasan. (Jeremias 1:10; 24:6, 7; Isaias 26:20, 21) Kanigoan kaogma kan natatada sa mga linahidan asin kan nagdadakol na kairiba ninda mantang sinda nakikikabtang sa gibohon na ini ngonyan! Iyan an kaogmahan na seguradong namatean kan mahigos na si Noe asin kan saiyang pamilya kan saindang kaaldawan.
8. (a) Anong pag-oswag sa parahayag sa nakaaging 22 na taon an maririsa? (b) Sa pagheling sa pahina 20-3 kan Enero 1, 1986 na The Watchtower, ano an nagkapira sa mga nasyon na nagkaigwa nin pambihirang pag-oswag kan 1985?
8 Minilyon daw an makaliligtas sa aldaw kan kaanggotan ni Jehova? Igwa nin marahay na paglaom para dian, arog kan ipinaheheling kan 1985 Service Year Report of Jehovah’s Witnesses. An detalye kan report na ini nasa pahina 20-3 kan The Watchtower na Enero 1, 1986. Nakakaogma nanggad na marisa an makangangalas na pag-oswag sa pinakahalangkaw na bilang nin mga trabahador sa langtad. Ini nagin nang 3,024,131 na mga parahulit kan Kahadean gabos. An 1,000,000 enot na naabot kan 1963, an 2,000,000 kan 1974, asin ngonyan an labing 3,000,000 kan 1985. Sa laog kan 22 na taon na iyan, nagkaigwa nin 200-porsientong pag-oswag. Nagpapasalamat nanggad kita ki Jehova na, paagi sa saiyang espiritu, iyo an nagpapatalubo sa mga bagay!—Zacarias 4:6; 1 Corinto 3:6.
9. (a) Taano ta mas makangangalas an pag-oswag sa payunir? (b) Ano an irinerekomendar sa gabos na makapagtatao nin lugar dian, asin taano?
9 Mas makangangalas pa sa laog kan mga taon na iyan an pag-oswag sa bilog na panahon na mga parabalangibog kan Kahadean. Sa ibong nin naggagrabeng kamugtakan sa ekonomiya sa bilog na kinaban, an bilang kan mapusong grupong ini nin mga “payunir” naglangkaw poon sa bulanan na promedyo nin 38,573 kan 1963 sagkod sa 322,821 kan 1985—737-porsientong pag-oswag! Ano an ipinaririsa kaini? Iyan nagpapaheling na igwa nin makangangalas na espiritu nin pagsasakripisyo sa tahaw kan banwaan nin Dios, kaoyon sa mga tataramon ni Jesus sa Lucas 9:23. Sa parate, kaipuhan an maingat na pagpaplano asin pagpainda sa sadiri tanganing magin mapanggana sa pagpapayunir. Alagad ta dakula an mga balos.—Roma 12:1, 2; Malaquias 3:10.
10. (a) An mga parahayag sa kongregasyon kaipuhan na omawon huli sa ano? (b) Anong tolong bagong pinakahalangkaw na bilang an mamamasdan digdi, asin ano an ipinaririsa kaiyan?
10 An minilyon na mga parahayag sa kongregasyon kaipuhan man na paglabanan an mga kasakitan na itinatao ni Satanas asin kan saiyang kinaban. Alagad sinda man nagdodolot sa Dios kan saindang “atang nin pag-omaw.” (Hebreo 13:15; Roma 10:9, 10) An mga oras, dakol man o kadikit, na irineport nindo na maimbod na mga parahayag kada bulan nagin kabtang kan bagong pinakahalangkaw na bilang na 590,540,205 oras sa paglilingkod sa langtad para sa 1985. Ini 16.8-porsientong pag-oswag ki sa 1984! An mga bagong pinakahalangkaw na bilang na 224,725,918 pagdalaw liwat asin 2,379,146 na pag-adal sa Biblia kaiba nin mga interesado nagpaparisa na an mga parabalangibog kan Kahadean sa gabos na lugar naghihingoa na magin marahay na mga paratokdo patin maigot na mga parahulit.—Mateo 28:19, 20.
Nagtotogdok Para sa Tunay na Katoninongan Asin Katiwasayan
11. Paano ipinaiisi an tunay na paglaom sa katoninongan asin katiwasayan, asin gurano kahiwas?
11 Sa paghinanapos kan 1985, idineklarar kan Naciones Unidas an 1986 bilang an Internasyonal na Taon nin Katoninongan. Bago pa sana, dakol an sinasabi kan NU manongod sa katoninongan asin katiwasayan. Alagad an mas importanteng proklamasyon, an dapit sa Makakasuratan na paglaom para sa katoninongan asin katiwasayan, nagkaigwa nin dakulang puwersa kan 1985 mantang an mga Saksi ni Jehova nakawaras sa kinaban nin 38,805,561 Biblia, libro, asin pulyeto, saka nin 300,545,609 magasin, asin nakakua nin 1,719,930 suskripsion para sa An Torrengbantayan asin Magmata! Paagi sa inimprentang babasahon asin berbal na tataramon, an napatindog nang Kahadean kan tunay na “Prinsipe nin Katoninongan” nag-ako kan kadarudakulaing patotoo sagkod sa panahon na ini. Tunay na, “an pag-oswag kan saiyang gobyerno asin katoninongan dai matatapos.”—Isaias 9:6, 7, King James Version.
12. An paghiwas nagbunga nin anong dakulang pangangaipo, asin paano nagsararo an banwaan ni Jehova sa paghihingoa na mapanigoan an pangangaipong iyan?
12 An labi-labi kadakulang pag-oswag sa langtad nangaipo nin pagpahiwas sa nagsusuportar na organisasyon. Kan 1985 an kabilangan nin mga kongregasyon kan mga Saksi ni Jehova sa bilog na kinaban nagdakol poon sa 47,869 sagkod sa 49,716. Ini nangaipo nin ginatos na bagong mga tiriponan. Marahayon nanggad na, sa dakol na kadagaan, an mga Saksi binendisyonan sa saindang mga paghihingoa na magkaigwa nin pondo para sa mga Kingdom Hall! Sa mga lugar na may pangangaipo, an mga indibiduwal asin kongregasyon daing kapasloan na nagsuportar sa programa sa pagtotogdok kan lambang saro, kaya nangyari an “pagkasarama” sa kasararoan nin magturugang sa bilog na kinaban.—2 Corinto 8:14, 15.
13. Paano puwedeng magdonar an mga indibiduwal sa mga proyekto na pagtotogdok nin Kingdom Hall?
13 Sa mga nasyon na paborable an kamugtakan, an mga sangang opisina kan Watch Tower Society nagtao man nin tabang sa mga proyekto sa Kingdom Hall. Sa Estados Unidos asin sa Canada, an dakol nagdodonar sa espesyal na Kingdom Hall Fund, na nagpangyari sa mga pautang para sa orog pang pagtogdok nin mga Kingdom Hall. An iba man idinonar an saindang kosog asin abilidad, kaya pati an itinogdok sa madali na mga Kingdom Hall ikinakatogdok sa laog sana nin sarong Sabado asin Domingo. Paagi sa pagtatrabaho sa mga proyektong iyan “nin bilog na kalag na siring baga kun para ki Jehova,” nagigibo kan saiyang mga Saksi an pinaghohonang imposible nin kinabanon na mga tawo.—Colosas 3:23.
14. Paano napanigoan an mga pangangaipo sa Assembly Hall?
14 Sa nagkapirang nasyon, an kakulangan nin mga pasilidad na angay para sa duwa kada taon na pansirkitong mga asamblea kan mga Saksi ni Jehova nagin man dakulang problema. Sa giraray, maogmang inatubang kan mga Saksi an angat paagi sa mga pagtotogdok, sa espiritu na kapareho kan ipinaheling kan mga lingkod nin Dios kan suanoy na mga panahon. Halimbawa, kan kinaipuhan na humanap nin materyales para sa pagtogdok kan tabernakulo, an kasararoan nin Israel sararong nagkuyog sa pagboot nin Dios: “Kumua kamo sa saindo nin kontribusyon ki Jehova. An lambang may dusay na puso magdara kaiyan bilang kontribusyon ki Jehova.” An kasararoan na idto nagtao nin labi nanggad sa kinaipuhan, asin an trabaho madaling nahaman.—Exodo 35:5-19; 36:7.
15. (a) Anong mga pagpahiwas an nangyayari sa mga sanga kan Watch Tower Society? (b) Paano nahaman an gibohon?
15 Mantang nag-oorog an pangangaipo para sa mga Biblia asin mga publikasyon na basado sa Biblia, an dakol sa 94 sanga kan Watch Tower sa bilog na kinaban kinaipuhan na pahiwason an saindang mga pasilidad. An pag-imprenta sa Brooklyn asin Watchtower Farms iyo pa man giraray an pinakadakula, alagad an 36 na sanga kan Sosyedad iyo na ngonyan an nag-aasikaso sa sadiri nindang pag-imprenta nin magasin, asin an 6 na sanga may kakayahan man na mag-imprenta asin gumibo nin mga libro. Sa mga ini, an Alemania, Italia, asin Hapon naggigibo nin mga Biblia. An bagong pabrika sa Selters, Alemania, nagtatrabaho na sa pinakakapasidad kaiyan. Sa Ebina, Hapon, itinotogdok an anom na eskalon na dagdag na pabrika asin an walong eskalon na Erokan na Bethel tanganing maistaran nin 280 pang mga trabahador. Kun paanong an banwaan ni Jehova nagsuportar sa pagtogdok kan templo ni Salomon “sa bilog na puso,” ngonyan man an banwaan nin Dios sa laen-laen na kadagaan nagtatao nin “gikan sa boot na mga dolot ki Jehova,” asin idinudugang nia an saiyang bendisyon tanganing mahaman an gibohon.—1 Cronica 22:14, 15; 29:7, 9; helingon an Ref. Bi., mga nota sa ibaba.
16. Taano ta kinaipuhan an dagdag na pagtogdok asin pag-organisar na ini?
16 Talaga daw na kaipuhan an gabos na pagtogdok asin pag-organisar na ini? Iyo, tanganing an “maimbod asin madonong na oripon” padagos na makapagtao nin espirituwal na “kakanon sa igong panahon.” An kakanon na iyan kaipuhan na gayo para sa pagtalubo kan “harong nin Dios” asin sa panglobong paghuhulit sa labing 200 na tataramon. (Mateo 24:45; Efeso 2:19; 4:15, 16) An banwaan ni Jehova mismo nagdonar kan saindang abilidad sa paggibo nin sarong multilanguage electronic phototypesetting system (MEPS), na ngonyan ikinatao na sa 26 na sanga kan Watch Tower. Pinapangyari kaini an nagkakasararong panglobong pag-imprenta sa offset asin nakatabang sa durungan na pagpublikar kan mensahe kan Kahadean sa dakol na kabtang kan daga.—Ikomparar an Isaias 52:7-9.
17. Ano an pangangaipo sa opisina prinsipal sa Brooklyn, asin paano ini inaatubang?
17 Garo baga daing katapusan an paghiwas kan organisasyon ni Jehova sa modernong aldaw. Ngonyan pa sana, an pamilyang Bethel sa opisina prinsipal kan Sosyedad sa Brooklyn, Nueva York, nagdakula na sagkod na maokupar an gabos na madadagusan. Kun kabotan ni Jehova, an halangkaw na edipisyo na maiistaran nin sangribo pang trabahador sa Bethel tibaad ikatogdok sa daga kan Sosyedad sa Columbia Heights. Alagad ta kun ini dai mangyari, hahalaton niato an paggiya ni Jehova sa bagay. An mga pamibi asin maimbod na pagsuportar kan kasararoan nin magturugang sa bilog na kinaban mapadapit sa gabos na pagpahiwas na ini tunay na pinasasalamatan.—Ikomparar an Gibo 21:14; 2 Tesalonica 3:1.
18. Taano ta kadakol kan mga proyekto sa pagtotogdok ngonyan, sa ibong kan kaharanihan nin Armagedon?
18 ‘Pero,’ tibaad may maghapot, ‘taano ta kadakol kan mga proyekto sa pagpahiwas mantang kita haranihon na sa Armagedon?’ An simbag iyo na an organisasyon ni Jehova dai ‘magsisirra’ sa pagdangadang kan Armagedon. Iyan ‘panahon nin pagsirra’ para sana sa organisasyon ni Satanas. An organisasyon ni Jehova nagtotogdok para sa daing sagkod na ngapit. Baga man an gibong-tawong mga edipisyo makatagal o dai sa bagyo nin Armagedon, aram niato na an organisasyon nin Dios maliligtas bilang nagpupunsionar na organisasyon asin na iyan saka an mga maimbod na nagsusuportar dian gagamiton ni Jehova, na nag-eestablisar nin daing sagkod na katoninongan asin katiwasayan sa mamuraway na daganon na Paraiso na ipinanuga nin Dios.—Kapahayagan 7:9, 14-17; 21:1, 4, 5.
Pagtotogdok na May Katuyohan
19. Anong angat an maheheling sa report sa Memorial para sa 1985?
19 Si Noe nagtogdok na may katuyohan, asin iyo man an kaipuhan sa sato. An sarong kabtang kan 1985 Service Year Report nagtatao nin dakulang iisipon. Iyan iyo an makangangalas na kabilangan nin nag-atender na 7,792,109 sa Memorial kan kagadanan ni Jesus kan Abril 4, 1985—na 375,135 an kalabihan ki sa kaidtong 1984. Makangangalas nanggad! Alagad an kabilangan na iyan nagtatao nin angat. Mantang an pinakahalangkaw na kabilangan nin nakikikabtang sa paglilingkod sa Kahadean 3,024,131 parahayag, igwa nin labing 4,000,000 na iba pa na nakikiasosyar sa sato, kisuerra sa kadikit, na dai pa nakakapagtogdok para sa ngapit paagi sa pakikikabtang sa Kristianong ministeryo. Paano daw niato sinda matatabangan?
20. Ano an apretadong pangangaipo tanganing maatubang an angat, asin paano niato iyan magigibo sa praktikal na paagi?
20 An kadaklan sa mga interesadong ini midbid niato nin personal. Tibaad sinda mga kaiba sa pamilya, mga inaadalan niato sa Biblia, suskritor sa satong mga magasin, o iba pa. An iba tibaad nagin interesado poon kan ultimong Memorial. Puwede daw kitang gumibo ngonyan nin espesyal na mga paghihingoa tanganing maataman an mga ini, na pinakokosog sinda paagi sa pag-adal sa Biblia, tanganing sinda makapagpaili sa areglo ni Jehova “sagkod na makaagi an mga kasakitan”? (Salmo 57:1) An “dakulang kahorasaan” magigin an akto nin pagbindikar ni Jehova, na mas makahulogan pa asin pangultimo ki sa Baha ni Noe. Boot niatong pakosogon an mga interesadong ini paagi sa mga katotoohan na nagtatao nin buhay, tangani sindang “mag-apod sa ngaran ni Jehova” asin dai malaglag. (Mateo 24:21, 22, 39; Sofonias 2:3; 3:8, 9) Ipakipag-adal niato sa sainda an Tataramon nin Dios, na ginagamit an librong You Can Live Forever in Paradise on Earth o iba pang babasahon sa Biblia na nagpapakosog sa pagtubod.
21. Paano kita makapagtotogdok nin pagtubod sa sato mismo asin sa iba na kapareho kan ki Noe?
21 Si Jehova Dios an Ekspertong Paratogdok asin Dakulang Paratao sa katawohan. (Salmo 127:1; 145:16; Eclesiastes 3:10-13) Sia an nagsabi ki Noe kun ano an disenyo asin kun paano an pagtogdok kan dahong. Paagi sa odok na pagkooperar kan Orog Kadakulang Noe, si Jesu-Cristo, ginibo nia an areglo na tubuson an makinuyog na mga tawo sa kasalan asin kagadanan. Paagi sa Aking ini itinogdok man nia an modernong “dahong,” an nag-ooswag na espirituwal na paraiso na dian an mga lalaki asin babae na may pagtubod puwedeng makanompong nin kaligtasan, na may paglaom sa buhay na daing katapusan. (Mateo 20:26-28; Juan 3:16; 17:3) Matabangan logod niato an dakol pa na magtogdok nin pagtubod asin makagibo nin haraning relasyon ki Jehova asin sa saiyang Aki. Matabangan logod niato sinda na mamoot sa katanosan asin maongis sa karatan. (Hebreo 1:9) Sa siring, may pagtubod na kapareho kan ki Noe, kita makapagpapadagos na magtogdok para sa daing sagkod na ngapit.—1 Timoteo 4:15, 16.
PIRANG HAPOT PARA SA REPASO—
◻ Paano si Jesus nagtogdok para sa ngapit?
◻ Ano an naheling nindong pambihira sa report kan 1985?
◻ Taano ta kaipuhan an teokratikong mga programa sa pagtotogdok?
◻ Paano kita gabos makakapagtogdok na may katuyohan?
[Kahon para sa pahina 10]
An sarong kongregasyon sa sarong nasyon sa Aprika na duman prohibido an gibohon ni Jehova igwa nin 95 parahayag, na an gabos nakikikabtang sa paglilingkod bulan-bulan. An promedyo ninda sa mga pagtiripon 130 alagad may 160 sa saindang mga pahayag-publiko. Igwa sinda nin tolong regular payunir asin kasuarin pa sana nagkaigwa nin walong auxiliary payunir. Sa laog sana nin anom na bulan, 21 bagong parahayag an nagpoon sa paglilingkod sa langtad.
[Kahon para sa pahina 11]
Walong nasyon an nagreport nin pinakahalangkaw na bilang na labi sa 100,000 na parahayag kan 1985
E.U.A. 723,220
Brazil 177,904
Mejico 173,037
Italia 127,526
Nigeria 121,729
Alemania 115,604
Britania 103,522
Hapon 103,117