Ikahuhula daw nin mga Pangatorogan an Ngapit?

POON kan suanoy na mga panahon, makosogon na an interes nin katawohan sa mga pangatorogan. An mga Egipcio naggibo nin madetalyeng mga libro para sa pag-interpretar sa pangatorogan, asin an mga Babilonyo igwa nin mga interprete sa pangatorogan. Sa tahaw kan mga Griego an kostumbre pinatotorog an mga may helang sa mga altar ni Asclepio tanganing umako nin mga instruksion sa salud sa saindang mga pangatorogan. Kan ikaduwang siglo kan satong Komon na Kapanahonan, si Artemidoro guminibo nin sarong libro na dian sia nagtao nin mga interpretasyon sa mga simbolo sa pangatorogan. An dakol na kaagid na librong ginibo poon kaidto ibinasar sa saiyang libro. Sagkod sa aldaw na ini, ginigibo an mga paghihingoa na interpretaron an mga pangatorogan, alagad iyan daw sa katotoohan nagtatao nin pakarorop sa mga mangyayari sa ngapit?

Tangani na iyan magkaigwa nin kahulogan may koneksion sa ngapit, iyan kaipuhan na impluwensiado nin sarong mas halangkaw na puersa. Sa Biblia makanonompong kita nin dakol na pangyayari na dian an Dios nagtao kan mismong puersang iyan. Nagtao sia nin makahulang mga pangatorogan sa saiyang mga lingkod saka sa nagkapira na dai nagsasamba sa saiya. Sa katunayan, an Job 33:​14-​16 nagsasabi: “An Dios nagtataram . . . sa sarong pangatorogan, sarong bisyon kan banggi, kun an nanok na torog minaabot sa mga tawo, sa panahon nin mga pagtorog sa higdaan. Sa panahon na iyan na saiyang binubukasan an talinga nin mga tawo.”

Ginibo ini nin Dios sa kaso kan Faraon nin Egipto kaidtong kaaldawan ni Jose, na nabuhay kaidtong labing 1,700 na taon bago an Komon na Kapanahonan. An pangatorogan ni Faraon yaon sa Genesis 41:​1-7, asin sa bersikulo 25 sagkod 32, ininterpretar iyan ni Jose bilang naghuhula nin pitong taon “na abundang marhay sa bilog na daga nin Egipto,” na susundan nin pitong taon nin makuring kakulangan nin kakanon. Ipinaliwanag ni Jose ki Faraon: “An gigibohon kan tunay na Dios pinapangyari niang maheling ni Faraon.” (Genesis 41:28) An pangatorogan naghula kan aktuwal na nangyari.

An sarong prominenteng hade kan mga Babilonyo nagkaigwa nin kaagid na eksperyensia. Si Nabucodonosor nagkaigwa nin pangatorogan na nakaribok na marhay sa isip nia, alagad ta dai nia iyan magirumdoman. Kaya inapod nia an saiyang mga pararatak tangani na isabi sa saiya an pangatorogan asin an interpretasyon kaiyan. Ini kahagadan na imposibleng maotob ninda.​—Daniel 2:​1-​11.

Mantang an Dios an nagtao kan pangatorogan sa hade, pinapangyari Nia an propetang si Daniel na ihayag an pangatorogan asin an interpretasyon dian. An Daniel 2:​19 nagsasabi: “Dangan nangyari na an hilom ihinayag ki Daniel sa sarong bisyon sa banggi.” Itinao ni Daniel sa Dios an kaomawan para sa pangatorogan na ini: “An hilom na hinahagad kan hade mismo, an madodonong, an mga salamangkero, an mga saserdoteng nagmamahika asin an mga astrologo mismo dai kayang ipaheling sa hade. Minsan siring, igwa nin sarong Dios sa kalangitan na Parahayag nin mga hilom, asin ipinaisi nia ki Hadeng Nabucodonosor kun ano an mangyayari sa huring kabtang kan mga aldaw.”​—Daniel 2:​27, 28.

Kun beses an Dios nagtao nin mga instruksion sa saiyang banwaan paagi sa mga pangatorogan, asin kun beses nagtao sia nin garantiya sa pabor nin Dios o tinabangan sinda na masabotan kun paano nia sinda tinatabangan. Sa kaso ni Jacob, ihinayag nin Dios an saiyang pag-oyon paagi sa sarong pangatorogan.​—Genesis 48:​3, 4.

Kan madiskobre ni Jose, an nag-ampon na ama ni Jesus, na bados si Maria, sia nagdesisyon na idiborsio ini. Dangan nag-ako sia nin mga instruksion sa sarong pangatorogan na dai iyan paggibohon. An Mateo 1:​20 nagsasabi: “Pakatapos na mapag-isipan nia an mga bagay na ini, uya! an anghel ni Jehova nagpaheling sa saiya sa sarong pangatorogan, na nagsasabi: ‘Jose, aking lalaki ni David, dai ka matakot na darahon sa harong si Maria na saimong agom na babae, huli ta an pinapangyaring ipangidam dian sa saiya paagi sa banal na espiritu.’” Pagkaagi kaini nag-ako sia nin patanid sa sarong pangatorogan: “An anghel ni Jehova nagpaheling ki Jose sa pangatorogan, na an sabi: ‘Bangon, daraha an omboy asin an saiyang ina asin dulag kamo sa Egipto.’”​—Mateo 2:13.

Mga Pangatorogan na Bakong Gikan sa Dios

An bagay na an pag-interpretar nin pangatorogan uso sa tahaw kan mga bakong banwaan nin Dios nagpaparisa na sa pankagabsan an mga pangatorogan dai ikabibilang na masasarigan na mga parahayag kan ngapit. Kan kaaldawan kan propeta nin Dios na si Jeremias, an falsong mga propeta nagsasarabi: “Nangatorogan ako! Nangatorogan ako!” (Jeremias 23:25) An intension ninda dayaon an mga tawo sa pag-isip na an Dios nagtataram paagi sa sainda. Mapadapit sa mga parapangatorogan na ini, si Jeremias pinasabngan na magsabi: “Iyo ini an isinabi ni Jehova nin mga hukbo, an Dios nin Israel: ‘Dai kamo padaya sa saindong mga propeta na yaon dian sa tahaw nindo asin sa saindong mga paratoodtood, asin dai kamo maghinanyog sa saindang mga pangatorogan na pinangangatorogan ninda. Huli ta “sa kaputikan na sinda naghuhurula sa saindo sa ngaran ko . . . ,” an sabi ni Jehova.’”​—Jeremias 29:​8, 9.

Mantang an falsong mga propetang ini “mga paratoodtood,” an saindang mga pangatorogan puedeng inimpluwensiahan nin maraot na espiritung mga puersa sa katuyohan na dayaon an banwaan. Iyan man an ipinaririsa sa sinasabi sa Zacarias 10:​2: “An terafim mismo nagtaram kan misteryoso; asin an mga paratoodtood, sa saindang kabtang, nagkaigwa nin bisyon na kaputikan, asin nagpaparataram sinda nin mga pangatorogan na daing kamanungdanan.”

An Diablo iyo an pangenot na paradaya na sa rinibong taon naggamit kan mga namomoon sa relihion na putik na maghingako na an Dios nagtaram sa sainda paagi sa mga bisyon asin pangatorogan, arog kan ginibo kan falsong mga propeta kan kaaldawan ni Jeremias asin Zacarias. Manongod sa mga iyan, an pinasabngan na parasurat sa Biblia na si Judas nagsurat sa mga Kristiano kan enot na siglo: “An nagkapirang tawo nakalaog sa hilom na kaidto pa iinasignar na kan Kasuratan sa paghokom na ini, mga tawong marompot, na ginigibo an dai na kutana maninigong kabootan kan satong Dios na magin sarahotan para sa malaswang gawe asin pinaiindahan an satong solamenteng Kagsadiri asin Kagurangnan, si Jesu-Cristo.” An mga tawong ini, sabi nia, garo baga “nangangatorogan.”​—Judas 4, 8.

Baloon an mga Paghihingako

Tibaad maghingako an sarong tawo na an Dios nagtaram sa saiya sa sarong pangatorogan o na nagkatotoo an saiyang mga pangatorogan manongod sa maabot na mga pangyayari, pero bako iyan na igong dahelan na paniwalaan sia asin basta na sana sumunod sa saiya. Mangnoha an mga instruksion na isinurat sa mga Israelita, na yaon sa Deuteronomio 13:​1-3, 5: “Kun igwa nin tumindog sa tahaw mo na propeta o parapangatorogan nin pangatorogan asin tumao sa saimo nin tanda o ngangalasan, asin mangyari an tanda o ngangalasan na isinabi nia sa saimo, na sinasabi, ‘Sumunod kita sa ibang mga dios, na dai mo namidbid, asin maglingkod kita sa sainda,’ dai ka maghinanyog sa mga tataramon kan propetang iyan o kan parapangatorogan kan pangatorogan na iyan . . . Asin an propetang iyan o an parapangatorogan na iyan kan pangatorogan maninigong gadanon.” Itinogot nin Dios na an mga siring magtaram nin putik bilang pagbalo sa kaimbodan kan saiyang banwaan.

Imbes na butang maniwala sa mga paghihingako nin karismatikong mga parapangatorogan, an madonong na gibohon baloon niato an saindang mga paghihingako tangani na dai kita ikalagalag kan dai naheheling na pangenot na paradaya, na “ilinalagalag an bilog na ineerokan na daga.” (Kapahayagan 12:9) Alagad ta paano mababalo an mga iyan sa masasarigan na paagi?

An nasusurat na Tataramon nin Dios iyo an itinao sa sato nin Dios na giya sa katotoohan. Mapadapit dian, si Jesu-Cristo nagsabi: “An saimong tataramon katotoohan.” (Juan 17:17) Kaya sinasadol kita sa 1 Juan 4:​1: “Mga namomotan, dai kamo tumubod sa gabos na ipinasabong na tataramon, kundi baloon an ipinasabong na mga tataramon kun baga iyan gikan sa Dios, huli ta kadakol na falsong propeta na nagruluwas sa kinaban.” Kun maingat na ikinokomparar sa Biblia, an saindang mga paghihingako, pilosopiya, asin hiro katumang kaiyan. An Tataramon nin Dios iyo an autoridad sa kun ano an katotoohan.

An parapangatorogan daw na naghihingakong may espesyal na kaaraman sa aktuwal naggagamit nin pagtoodtood o iba pang espiritistikong kaugalean? Kun iyo, kinokondenar sia kan Tataramon nin Dios. “Mayo nin maninigong makua sa saimo na siisay man na . . . minagamit nin pagtoodtood, paramahika o siisay man na naghahanap nin mga signos o pararatak, o saro na nag-eengkanto o siisay man na nakihuhumapot sa patagolainan o parahula o siisay man na nakihuhumapot sa gadan. Huli ta an gabos na naggigibo kan mga bagay na ini makababalde ki Jehova.”​—Deuteronomio 18:​10-12.

Kun sia naghihingako na igwa sia nin kalag na dai nagagadan, kinokontra nia an Tataramon nin Dios na malinaw na nagsasabi: “An kalag na nagkakasala​—iyan mismo magagadan.” (Ezequiel 18:4) Ilinalangkaw daw nia an saiyang sadiri asin tinitipon an personal na mga parasunod? An Mateo 23:​12 nagpapatanid: “An siisay man na nagpapalangkaw kan saiya man sana ibababa.” Asin an Gibo 20:​30 nagpapatanid sa mga Kristiano: “Hale mismo dian sa saindo may mga lalaking matindog asin mataram nin biribid na mga bagay tanganing maguyod ninda sa sainda an mga disipulo.”

Sia daw nagsusuportar sa madahas na mga aksion? Kinokondenar sia kan Santiago 3:​17, 18: “An kadonongan hale sa itaas enot sa gabos malinig, dangan matoninong, makatanosan, andam na magkuyog, pano nin pagkaherak asin marahay na mga bunga, dai nagpapalaenlaen, bakong parasaginsagin. Dugang pa, an bunga nin katanosan isinasabwag an banhi kaiyan sa irarom nin matoninong na kamugtakan para sa mga nakikipagkatoninongan.” Naghahanap daw sia nin autoridad sa politika o impluwensia sa kinaban? An Tataramon nin Dios may pagdodoon na nagdedenunsiar sa saiya, na sinasabi: “An siisay man . . . na boot na magin katood kan kinaban ginigibo an saiyang sadiri na kaiwal nin Dios.” Sa siring ibinubuyagyag kan Biblia kun ano an falso.​—Santiago 4:4.

Kun an saro nangangatorogan manongod sa kagadanan nin sarong miembro nin pamilya o katood, iyan tibaad huli ta naghahadit sia manongod sa tawong ini. Na an tawo tibaad nagadan sa mismong banggi kan pangatorogan dai man nagpapatunay na makahula an pangatorogan. Sa kada pangatorogan na arog kaini na garo baga nagigin totoo, may ginatos na dai.

Minsan ngani talagang naggamit an Dios nin mga pangatorogan kaidtong nakaagi sa paghayag nin makahulang mga pangyayari asin pagtao nin mga instruksion mantang ginigibo an saiyang nasusurat na Tataramon, dai nia kaipuhan na gibohon iyan ngonyan. Yaon sa nasusurat na Tataramon na iyan an gabos na instruksion hale sa Dios na kaipuhan nin katawohan sa panahon na ini, asin an mga hula kaiyan mapadapit sa mga mangyayari sa ngapit pang labing sangribong taon. (2 Timoteo 3:​16, 17) Kaya makasasarig kita na an satong mga pangatorogan bakong mga parisa nin Dios nin maabot na mga pangyayari kundi mahalagang marhay na mga pagpunsionar kan hotok para sa pagpadanay sa marahay na kamugtakan kan satong isip.

[Retrato sa pahina 7]

Kun paanong an pangatorogan ni Faraon nagpaheling kun ano an maabot, an Tataramon nin Dios nagtatao man nin kaliwanagan sa satong ngapit