An Huring mga Aldaw—Panahon nin Pag-ani
“Asin ako nagheling, asin, uya! an sarong panganoron na maputi, asin sa ibabaw kan panganoron may sarong nagtutukaw na kaagid nin aki nin tawo, na may koronang bulawan sa saiyang payo asin matarom na kagot sa saiyang kamot.”—KAPAHAYAGAN 14:14.
1. Ano an nagkapirang bagay na guminibo sa siglong ini na pambihira?
NAGIN maribokon nanggad na panahon an ika-20 siglong ini! An katawohan nagtagal sa duwang maringis na guerra mundial. Sunod-sunod na nasyon an biyong ginagaba nin rebolusyon. An gutom nagin causa nin kasakitan na labi kisa kasuarin pa man sa kasaysayan nin tawo. An kadaihan nin kasegurohan sa ekonomiya, krimen, polusyon, asin makatatakot na mga helang nagsasapeligro kan karahayan nin gabos. Kadungan kaiyan, an tawo nakagibo nin darakulaon na progreso sa siensia. Nagamit na nia an puwersa kan atomo asin nakatongtong na ngani sa bulan. Tunay na pambihira an satong kapag-arakian sa dakol na paagi. Minsan siring, may sarong bagay na minalataw bilang an pinakamahalagang pangyayari sa satong panahon, asin kataed kaiyan an gabos na ibang bagay nawawaran nin halaga.
2. Anong pangyayari na ihinula ni Daniel an nakatalaan na mangyari sa satong panahon?
2 An makasaysayan nanggad na pangyayaring ini ihinula kaidto pang ikaanom na siglo B.C.E. ni propeta Daniel. Hinanyoga an saiyang bareta na ipinasabong nin Dios: “Padagos akong nagheheling sa mga bisyon kan banggi, asin, helinga duman! kaibanan sa mga panganoron kan kalangitan an saro na kaagid sa aki nin tawo nagdadangadang; asin sia nakadolok sa Suanoy nin mga Aldaw, asin sia saindang irinani sa atubang kan Sarong iyan. Asin sa saiya itinao an paghade asin kamahalan patin kahadean, tanganing an mga banwaan, mga nasyon asin mga tataramon gabos maglingkod sa saiya.”—Daniel 7:13, 14.
3. (a) Siisay an “Suanoy nin mga Aldaw,” asin ano an itinao nia sa “saro na kaagid sa aki nin tawo”? (b) Siisay an sarong ini na “kaagid sa aki nin tawo,” asin ano an reaksion kan Judiong mga namomoon nin relihiyon kan ini ipamidbid ni Jesus?
3 An “Suanoy nin mga Aldaw” iyo si Jehova Dios. Naheling sia ni Daniel sa “mga panganoron kan kalangitan,” an boot sabihon, sa dai naheheling na lugar nin mga espiritu, na nagtatao nin pagkahade sa “saro na kaagid sa aki nin tawo.” Siisay an “sarong” iyan? Sinimbag ni Jesus an hapot na iyan kaidtong 33 C.E. kan sia binibista sa Sanhedrin. An Judiong halangkaw na saserdote pinapanumpa sia na sabihon kun baga sia an Cristo o bako. Sa pagsimbag, mapusong iinaplikar ni Jesus sa saiya man sana an hula ni Daniel, na an sabi: “Poon ngonyan maheheling nindo an Aki nin tawo na nagtutukaw sa too nin kapangyarihan asin naghihilig sa mga panganoron nin langit.” Imbes na dumuko sa piniling Hade ni Jehova, pinagsahotan sia kan halangkaw na saserdote nin paglanghad. Dangan, pinirit kan Judiong mga namomoon nin relihiyon si Poncio Pilato na sentensiahan nin kagadanan si Jesus.—Mateo 26:63-65; 27:1, 2, 11-26.
4. Kasuarin inako ni Jesus an korona nin pagkahade, asin sa ibong nin anong pagtumang?
4 An pagprobar na ini na sudyaon an mga tataramon ni Jesus dai nagin mapanggana kan sia buhayon liwat hale sa mga gadan asin sumakat sa langit tanganing halaton an itinalaan na panahon ni Jehova sa pagtao sa saiya kan Kahadean. (Gibo 2:24, 33, 34; Salmo 110:1, 2) An panahon na iyan nag-abot kan 1914. Sono sa gabos na ebidensia, sa huring kabtang kan taon na iyan, inako ni Jesus an korona nin pagkahade gikan sa “Suanoy nin mga Aldaw” asin nagpoon na maghade. (Mateo 24:3-42) An Kahadean na bagong mamundag napaatubang sa mapait na pagtumang. Alagad ta an Judiong mga namomoon nin relihiyon kan enot na siglo, an gabos na natipon na kapangyarihan kan mga nasyon, pati si Satanas asin an saiyang mga demonyo dai nakaolang sa pagkaotob kan kabotan nin Dios. (Salmo 2:2, 4-6; Kapahayagan 12:1-12) Kan 1914 an langitnon na koro nag-arawit nin eksakto sa iskedyul: “An kahadean kan kinaban nagin nang kahadean kan satong Kagurangnan asin kan saiyang Cristo, asin sia maghahade sagkod lamang.” (Kapahayagan 11:15) Poon kan petsang idto, kita nabubuhay sa “huring mga aldaw” kan maraot na palakaw na ini nin mga bagay.—2 Timoteo 3:1.
Panahon nin Pag-ani
5. (a) Sono sa hula ni Daniel, siisay an maglilingkod sa bagong makoronahan na Hade? (b) Anong bisyon an naheling ni Juan na mapadapit man ki Jesus bilang bagong koronahan na Hade?
5 Sono sa hula ni Daniel, kun akoon na ni Jesus an saiyang korona “an mga banwaan, mga nasyon asin mga tataramon gabos [maglilingkod] sa saiya.” Paano iyan mangyayari mantang sa kabilogan isinisikwal sia kan katawohan bilang Hade? An sarong dramatikong bisyon na itinao ki apostol Juan nagpaparisa kan simbag. Sinasabi sato ni Juan an saiyang naheling: “Uya! an sarong panganoron na maputi, asin sa ibabaw kan panganoron may sarong nagtutukaw na kaagid nin aki nin tawo, na may koronang bulawan sa saiyang payo asin matarom na kagot sa saiyang kamot.” (Kapahayagan 14:14) Nakaaagid sa bisyon ni Daniel, naheheling digdi si Jesus na nasa ibabaw nin panganoron asin sinasabing “sarong . . . kaagid nin aki nin tawo.” Igwa sia nin korona nin pagkahade, alagad ta sa saiyang kamot an kapot nia bakong setro kundi kagot nin paraani. Taano?
6. Ano an ipinagboot ni Jehova na gibohon kan bagong koronahan na si Jesus?
6 Si Juan nagpadagos: “Asin an saro pang anghel nagluwas sa santuaryo kan templo, na nagkukurahaw sa makosog na tingog sa saro na nagtutukaw sa ibabaw kan panganoron: ‘Tigpasan an saimong kagot asin mag-ani ka, huli ta nagdatong na an oras na mag-ani, ta an anihon kan daga hinog na.’” Si Jesus, minsan ngani Hade, nagkukuyog pa man giraray sa mga instruksion na itinatao hale ki Jehova sa “santuaryo kan templo.” Kaya kan pagbotan sia ni Jehova na gibohon an pag-ani sa huring mga aldaw, sia nagkuyog. Si Jesus “itinigpas an saiyang kagot sa daga, asin an daga naani.”—Kapahayagan 14:15, 16; Hebreo 9:24; 1 Corinto 11:3.
7. (a) Ano “an anihon kan daga”? (b) Ano an kapinonan kan “anihon” na ini?
7 Ano an “anihon kan daga”? Iyan mga tawo na minaluwas sa satanikong palakaw nin mga bagay na ini tanganing maglingkod ki Jehova asin sa Saiyang nombradong Hade. An pag-ani minapoon sa pagtipon sa mga natatada pa sa 144,000 na maghahade kaiba ni Jesus sa saiyang langitnon na kahadean. (Mateo 13:37-43) An mga ini “an Israel nin Dios,” “enot na mga bunga sa Dios asin sa Kordero.” Sinda binakal “hale sa lambang tribo asin tataramon asin banwaan patin nasyon.” (Galacia 6:16; Kapahayagan 14:4; 5:9, 10) Sa paaging ini, an mga tawo hale sa gabos na “banwaan, mga nasyon asin mga tataramon” minapoon na maglingkod sa nagtutukaw na sa tronong si Jesus.
8. (a) Sa anong taon minalataw na natapos an pagtipon sa mga ultimo sa mga linahidan? (b) Paano, sono sa saro pang bisyon ni Juan, nagpadagos an pag-ani?
8 Minsan siring, dai sinda nagsosolo. Si Juan, sa saro pang bisyon, naheling an pagtatak sa mga nahuhuri sa 144,000. (Kapahayagan 7:1-8) Maliwanag na an pagtipon sa mga ini haros tapos na kan 1935. Alagad ta, an bareta ni Juan, sia nakaheling nin “sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon, na nagtitindog sa atubang kan trono asin sa atubang kan Kordero.” (Kapahayagan 7:9-17) Kaya an pag-ani nagpapadagos mantang dakol pa hale sa “mga banwaan, mga nasyon asin mga tataramon” an minapoon na maglingkod ki Jesus bilang Hade.
9. Siisay an mga bagohan na ini, asin ano pang ibang hula an nagsasabi manongod sa saindang paglataw sa “huring kabtang kan mga aldaw”?
9 An mga bagohan na ini naglalaom na magkamit nin buhay sa sarong paraisong daga sakop kan ninombrahan na Hade ni Jehova. (Salmo 37:11, 29; 72:7-9) An pagtipon sa sainda ihinula sa nagkapirang iba pang hula. Halimbawa, si Isaias naghula na sa “huring kabtang kan mga aldaw” an mga nasyon maduruman sa harong ni Jehova. (Isaias 2:2, 3) Si Haggeo naghula nin pagyugyug sa mga nasyon na sa panahon na iyan “an mga kawiliwiling bagay kan gabos na nasyon dapat na maglaog.” (Haggeo 2:7) Si Zacarias nagtaram manongod sa “sampulong tawo hale sa gabos na tataramon kan mga nasyon” na maiba sa banwaan nin Dios. (Zacarias 8:23) Dugang pa, si Jesus mismo naghula manongod sa “dakulang kadaklan” na ini. Sia nagsabi: “Kun an Aki nin tawo magdatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamurawayon na trono. Asin an gabos na nasyon titiponon sa atubang nia, asin pagbubulagbulagon nia an mga tawo, kun paanong ibinubulag nin pastor an karnero hale sa mga kanding. Asin ibubugtak nia an mga karnero sa saiyang too, alagad an mga kanding sa saiyang wala.”—Mateo 25:31-33.
10. (a) Paagi sa ano na inaani an “anihon kan daga”? (b) Siisay sana an nakikikooperar sa mga anghel sa gibohon na ini?
10 Iyo, an bilog na katawohan sinisiyasat tanganing helingon kun baga siisay an “karnero” asin siisay an “kanding.” Paano ginigibo an pagsiyasat na ini? Sa bisyon ni Juan, an “anihon kan daga” inani kadungan nin mapuwersang mga mensahe na ibinabalangibog nin mga anghel. An sarong anghel nagpapahayag nin mensahe nin “daing katapusan na maogmang bareta.” An saro pa ipinaiisi an pagbagsak kan “Dakulang Babilonya.” Asin an ikatolo nagpapatanid tumang sa pagsamba sa “mabangis na hayop,” an politikal na palakaw nin mga bagay ni Satanas. (Kapahayagan 14:6-10) Totoo, mayo nin siisay man na nakadangog sa aktuwal na tingog kan mga anghel na ini. Alagad nakadangog sinda nin kaparehong mga mensahe na itinataram nin maimbod na mga tawo. (Mateo 24:14; Isaias 48:20; Zacarias 2:7; Santiago 1:27; 1 Juan 2:15-17) Kaya malinaw na an mga mensahe ibinabalangibog nin mga tagapagtaram na tawo sa paggiya nin mga anghel. An saro namimidbid kun baga ‘karnero’ o ‘kanding’ paagi sa saiyang reaksion sa mga mensahe nin mga anghel. Sa ika-20 siglong ini, solamente an mga Saksi ni Jehova an nakikooperar sa mga anghel sa mahalagang gibohon na ini.
11. Gurano kahalaga kan pagpalakop kan mga mensaheng ini nin mga anghel?
11 An pagpalakop kan mga mensaheng ini mas apretado kisa ano pa man na ginigibo ngonyan. Mayo nin politikal na progreso o sientipikong diskobremiento na nakaaagid man lamang sa halaga. An mga mensaheng ini nagtotokdo kan paagi na maresolberan an mga problema nin gabos na tawo asin nagsasaysay manongod sa daing sagkod na kaligtasan nin maimbod na mga tawo. Asin, pinakamahalaga, iyan manongod sa pagpakangbanal sa ngaran ni Jehova.
An Taonan na Report
12, 13. Tumao nin pirang detalye hale sa taonan na report na nagpaparisa na natipon na an dakol na “anihon.”
12 Iyan an dahelan na hinahalat nin mga Saksi ni Jehova taon-taon na mabasa an taonan na report kan aktibidad kan organisasyon ni Jehova. Ikinaoogma nindang maheling an padagos na ebidensia kan saiyang pagbendisyon sa saindang mga gibo. Kun sisiyasaton nindo an report sa 1987, na yaon sa pahina 6 sagkod 9 kan magasin na ini, maheheling nindo na an mga anghel asin an saindang mga katabang na tawo aktibo nanggad kan nakaaging taon.
13 An maogmang bareta nadangog sa 210 na kadagaan—tunay nanggad na ‘lambang tribo asin nasyon patin tataramon’ na maaabot sa presente. (Marcos 13:10) Dugang pa, bilang kaharohalangkaweng bilang, 3,395,612 an nagtarabang na magibo iyan—labi kisa kasuarin pa man sa Kristianong kasaysayan. An mga kabilangan kahangahanga minsan sa pirang indibiduwal na mga daga. Sa Estados Unidos, naabot an bagong pinakahalangkaw na bilang na 773,219. An duwa pang nasyon, an Brazil asin Mejico, nagkaigwa nin pinakahalangkaw na bilang na 216,216 asin 222,168; asin an anom pa, an Britania, Alemania, Italia, Hapon, Nigeria, asin Pilipinas, nagreport nin pinakahalangkaw na mga bilang na labi sa 100,000. Sa ibong na kampi, may mga kadagaan na darakula an populasyon asin pipira sanang ribo an parahayag o mas kadikit pa. An ginibo kan maimbod na mga kalag na ini napakahalaga man mantang naghihingoa sindang papagdanayon na minasirang an liwanag nin katotoohan sa irarom nin masakit na mga kamugtakan.—Mateo 5:14-16.
14. Anong klaseng mga tawo an tinitipon sa organisasyon ni Jehova?
14 Siyempre, an banwaan nin Dios bakong interesado sana sa pagdakol. Pero aram ninda na an gabos na bagohan na iyan na minalaog sa organisasyon ni Jehova “mga kawiliwiling bagay” sa pagheling ni Jehova. Dakol an “nag-aaragagha asin nag-aaragrangay huli sa gabos na makababaldeng bagay” na naheling ninda sa Kakristianohan. (Ezequiel 9:4) Sinda gabos minatukad sa “bukid ni Jehova” ta gusto nindang matokdoan sa mga dalan nin Dios. (Isaias 2:2, 3) Kanigoan kakosog na ebidensia kan bendisyon ni Jehova—na sa maraot asin materyalistikong palakaw na ini nin mga bagay, an ginatos na ribong bagohan kada taon ihinahayag an sadiri na “mga kawiliwiling bagay” ni Jehova!
Apretadong mga Panahon
15. (a) Gurano kahiwas kan teritoryo na lalakopan kan paghuhulit? (b) Sono sa bisyon ni Juan, gurano kaaktibo kan “dakulang kadaklan”?
15 An paghuhulit kan mga Saksi ni Jehova apretado. Taano? Primero, mahiwas an teritoryo. An “maogmang bareta” kaipuhan na ipaisi “sa lambang nasyon asin tribo asin tataramon patin banwaan.” (Kapahayagan 14:6) Sa parabola ni Jesus, an mga tawo sa “gabos na nasyon” pinagbubulagbulag sa “karnero” asin “kanding.” (Mateo 25:32) Kadakol kan gigibohon. Tamang-tama na an “dakulang kadaklan” na naheling ni Juan nag-oomaw sa Dios “aldaw asin banggi sa saiyang templo.” (Kapahayagan 7:15) Bilang kaotoban kan bisyon na ini, an “dakulang kadaklan” na ini, na nakikikooperar sa saindang linahidan na mga tugang, nagreport nin 739,019,286 na oras na ginamit sa paghuhulit kan nakaaging taon—bilang na haros dai mo maimahinar sa kadakulaan. Sa bilog na kinaban, ini nagrepresentar nin promedyong labi sa 18 oras sa sarong bulan kada parahayag. Ikomparar ini sa promedyong 12 oras kada bulan kaidtong sampulong taon na an nakaagi, asin maririsa nindo na nagririkas an paghuhulit. Paano nakakokomparar an saindong personal na promedyo sa pankinaban na promedyo?
16. (a) Ano an marahay na paagi na ‘ihulit an tataramon . . . na may pagkasibot’? (b) Pira an nakikabtang sa gibohon na ini kan sarong taon?
16 Mangnoha man an bagong pinakahalangkaw na bilang nin mga auxiliary asin regular payunir: 650,095. Ini nangangahulogan na mas dakol an payunir sa langtad kan nakaaging taon kisa mga parahayag kaidtong 1955. Saro daw kamo sa mga payunir na iyan? Kun iyo, nakanompong kamo nin marahayon na paagi na personal na iaplikar an hatol ni Pablo: “Ihulit mo an tataramon, gibohon iyan na may pagkasibot.” (2 Timoteo 4:2) Taano ta dai magplano na makikabtang sa pagpapayunir kisuerra sarong bulan sa 1988 taon nin paglilingkod?
Mga Malalaoman Para sa Orog Pang Pag-oswag
17. Anong mga kabilangan an nagpapaheling na an paglaom sa maabot pang pag-oswag marahay?
17 Ekselente nanggad an paglaom sa maabot pang pag-oswag. An kabilangan kan mga pag-adal sa Biblia 3,005,048—asin an lambang inaadalan sa Biblia may potensial na magin “kawiliwiling bagay”! Dugang pa, 8,965,221 an nag-atender sa selebrasyon kan Pamanggihan kan Kagurangnan kan Abril. An kadaklan sa nag-atender bakong mga Saksi ni Jehova. An iba mga bagong interesado. Sinda maogmang inako asin dinadagka na padagos na umoswag. An iba tibaad makapira nang nakaatender sa siring na mga okasyon. Malinaw na naoogma sindang makiiba sa mga Saksi pero dai pa nakamamate kan pangangaipo na gumibo nin labi pa dian.
18. Sono sa mga hula ni Jesus asin ni Zacarias, ano an kaipuhan na gibohon nin saro tanganing ikabilang na saro sa mga “karnero” ni Jehova?
18 An mga siring kaipuhan na omawon huli sa saindang interes sa katotoohan kan Biblia. Alagad girumdoma, sa parabola ni Jesus an mga “karnero” na maduman sa buhay na daing katapusan iyo an mga nagtatabang sa linahidan na mga tugang ni Jesus asin nakikikooperar sa sainda. (Mateo 25:34-40, 46) Sa hula ni Zacarias, an kompletong bilang na “sampulong tawo” nagpapahayag na daing pag-alangan: “Maiba kami saindo, huli ta nabaretaan niamo na an Dios yaon dian sa saindo.” (Zacarias 8:23) Sinda bako sanang makikatood. Sinda ‘minakapot’ sa banwaan nin Dios asin minaiba sa sainda, na idinudusay an saindang sadiri na maglingkod sa Dios kan mga ini. Sa satong kaaldawan, kaiba digdi an lubos na pakikiiba sa organisasyon ni Jehova.
Dai Na Mahahaloy
19, 20. (a) Sono sa bisyon ni Juan, ano an mangyayari kun matapos na an pagtipon sa “anihon kan daga”? (b) Ano an magigin kahulogan kaini para sa gabos na dai nagpapasakop ki Jesus bilang Hade?
19 An gibong pag-ani apretado huli sa ikaduwang dahelan. Dai na mahahaloy iyan matatapos. (Mateo 24:32-34) Ano na an mangyayari? Basahon an masunod na mangyayari sa bisyon ni Juan: “Asin may saro pang anghel na nagluwas sa santuaryo kan templo na yaon sa langit, na sia man igwa nin matarom na kagot. Asin may saro pang anghel na nagluwas sa altar asin sia igwa nin kapangyarihan sa kalayo. Asin inapod nia sa makosog na tingog an saro na igwa kan matarom na kagot, na an sabi: ‘Tigpasan an saimong matarom na kagot asin gunoa an mga bagikoy kan poon nin ubas kan daga, ta hinog na an mga ubas kaiyan.’ Asin itinigpas kan anghel an saiyang kagot sa daga asin ginuno an poon nin ubas kan daga, asin ihinolog nia idto sa dakulang ligisan kan kaanggotan nin Dios.”—Kapahayagan 14:17-19.
20 Pakatapos na matipon an inaning “mga kawiliwiling bagay,” mayo na nin dahelan na magpadagos na mag-eksister an maraot na daan na kinaban na ini. An “poon nin ubas kan daga,” an bilog na satanikong pankinaban na palakaw nin mga bagay na ini, papalodon asin lalaglagon. Sa panahon na iyan, minsan an mga tumang mapipiritan na midbidon an nombradong Hade ni Jehova. Si Juan nagsurat: “Uya! Sia [si Jesus] madatong kaiba kan mga panganoron, asin an gabos na mata makakaheling sa saiya, asin an mga naglugad sa saiya; asin an gabos na tribo sa daga magmomorondo nin labi-labi huli sa saiya.” (Kapahayagan 1:7; Mateo 24:30) Dangan, an mga isinabi ni Jesus sa Judiong mga namomoon nin relihiyon, na nangengenot sa mga “naglugad sa saiya,” maootob. (Mateo 26:64) Siyempre, an relihiyosong mga parasaginsagin na idto dai bubuhayon liwat tanganing ‘maheling’ si Jesus nin personal. (Mateo 23:33) Alagad an gabos ngonyan na nagpapaheling kan espiritung iyan asin habong akoon an nombradong Hade ni Jehova mapipiritan na midbidon sia kun sia dumatong na sa paglaglag sa mga nasyon sa Armagedon.—Kapahayagan 19:11-16, 19-21.
21. Taano an banwaan nin Dios ta maninigong magmahigos sa pakikikooperar sa langitnon na mga anghel?
21 Tunay na nakataya an kaligtasan nin indibiduwal na mga tawo. Igwa kita nin magabat na paninimbagan sa pagigin mga katabang kan mga anghel. Alagad kanigoan kadakulang pribilehiyo! Magpadagos logod kitang naghihigos sa pakikikooperar sa langitnon na mga anghel mantang pinagmamaigotan niatong hanapon an gabos na arog-karnero, an “mga kawiliwiling bagay” ni Jehova, bago matapos an pag-ani.
Ikapaliliwanag daw Nindo?
◻ Sagkod sa ngonyan ano an mayor na pangyayari sa ika-20 siglong ini?
◻ Ano an “anihon kan daga,” asin paano iyan tinitipon?
◻ Ano an pirang karakteristiko kan “karnero” ni Jehova?
◻ Paano ipinaheheling kan taonan na report an bendisyon ni Jehova sa gibong pag-ani?
◻ Taano ta apretado an gibong paghuhulit?