Lakop sa Kinaban na Katiwasayan sa Pagsakop kan “Prinsipe nin Katoninongan”

Kapitulo 10: An Isinumpa nin Dios na Gibohon Para sa Katawohan—Harani Na!

1, 2. (a) Sa anong sentido na an Dios nanunumpa, asin taano? (b) Ano an sinasabi nin Dios sa Isaias 45:23? (c) Kita maninigong umoyon sa anong mga tataramon ni propeta Isaias?

MINASUMPA daw an Dios? Iyo, an Dios minasumpa, pero dai sia minagamit nin lapastangan na pagtaram, na minaputok an kaanggotan asin nawawaran nin pagpopogol sa sadiri. An saiyang pagsumpa perming tanganing parigonon an isinasabi niang katuyohan. Iyan nagtatao nin dagdag na garantiya sa mga maaapektaran. Kaya, an gabos na tawo marahay na magtao nin atension sa saiyang mga tataramon sa Isaias 45:23: “Ako nanumpa sa sako mismong sadiri—hale sa sakuya mismong ngoso nagluwas an tataramon sa katanosan, kaya dai iyan mabalik—na sa sako an gabos na tuhod maluhod, an gabos na dila masumpa.”

² Ngonyan, labi nang 2,700 na taon poon kan hulang iyan, kombensido daw kita na an isinabi kan propeta sa Isaias 45:24 totoo: “Totoong gayo na an bilog na katanosan asin kakosogan yaon ki Jehova. An gabos na naaanggot tumang sa saiya madorolok sa saiya asin magkakasoropog”? Kun iyo, makaooyon man kita sa minasunod na mga tataramon ni Isaias sa bersikulo 25: “Dian ki Jehova an bilog na banhi nin Israel magigin tama asin mag-oorgolyo manongod sa sainda man sana.”

3, 4. (a) Taano an Isaias 45:25 ta dai maninigong magpaisip sa sato kan Republika nin Israel? (b) Nasudya daw an pagkaotob kan Isaias 45:23-25, asin taano ta siring an simbag nindo?

³ Sa pagbasa kan Isaias 45:25, Republika nin Israel daw an iisipon niato? Bako! An mga Israeli dai iinaatribuwir an saindang kapangganahan sa Dios kan saindang banal na Hebreong Kasuratan. Huli sa napasalang paggalang habo ngani nindang pronunsiaron an saiyang ngaran.

⁴ Huli kaini, kita daw nagsasabi na an Isaias 45:23-25 dai naotob sagkod sa taon na ini? Dai! Dai nasudya an kaotoban kan hula sa itinalaan na panahon ni Jehova. Sa saiya, an pagkasudya kan saiyang hula imposible! Bako sana na an saiya mismong tataramon masasarigan asin mapangangaptan kundi nangorogna kun iyan sinusumpaan ni Jehova, idinudugang an saiyang sumpa, tanganing patunayan an mga bagay.

An Dios Nagsumpa

5. Paano ipinaliliwanag kan Hebreo 6:13-18 an panunumpa nin Dios sa panuga ki Abraham?

⁵ Mapadapit digdi, mababasa niato sa Hebreo 6:13-18: “Huli ta kan an Dios manuga ki Abraham, huli ta dai nia ikapanunumpa an siisay man na orog na dakula, ipinanumpa nia an saiyang sadiri, na an sabi: ‘Sa katotoohan sa bendisyon bebendisyonan ta ka, asin sa pagpadakol padadakolon ta ka.’ Kaya pakatapos na si Abraham makapaheling nin pagkatagal, nakamtan nia an panugang ini. Huli ta an mga tawo ipinanunumpa an saro na orog na dakula, asin an saindang sumpa iyo an panapos sa gabos na pasuruhay, huli ta iyan legal na garantiya sa sainda. Sa paaging ini an Dios, kan mawot niang ipahayag nin orog sa mga paramana kan panuga an dai pagkaliwat kan saiyang kahatolan, nagsumpa, tanganing, paagi sa duwang dai nagliliwat na bagay na dian dai mangyayaring magputik an Dios, kita na nagdulag pasiring sa pailihan magkaigwa nin masarig na pagpakosog na mangapot sa paglaom na ibinugtak sa atubang niato.”

6. (a) Ano an motibasyon nin Dios na ipanumpa an saiya man sana mapadapit sa saiyang panuga ki Abraham? (b) Paano magagamit ni Jehova an saiyang “katood”?

⁶ Sa kadaklan, may mapuwersang motibasyon sa pagsumpa, sa pagsabi nin sarong sumpa. Iyan nangorognang totoo kun an pagsumpa sa sadiring boot nin Dios, boluntad. An siring na motibasyon itinatao sa kasong ini na dian si Jehova sinasabi na nagsumpa, iyo, ipinanumpa an saiya man sana. An may sumpang panuga na ginibo ni Jehova ki Abraham, an saiyang “katood,” nakaaapektar sa sato gabos ngonyan. Inapresyar ni Jehova kan kuyogon ni Abraham an banal na imbitasyon asin binayaan an saiyang sadiring daga tanganing magduman sa daga na itatao ni Jehova sa mga gikan ni Abraham bilang rogaring. Magigibo ni Jehova na dakula an ngaran kan “katood” na ini asin magagamit sia para sa pagbendisyon sa iba. Masasabi ni Jehova sa saiya: “Asin bebendisyonan ko an mga nagbebendisyon saimo, asin sia na nagsusumpa saimo susumpaon ko, asin an gabos na pamilya kan daga magbebendisyon nanggad kan saindang sadiri paagi sa saimo.”—Genesis 12:3; Isaias 41:8.

7. (a) Paagi sa anong milagro pinaboran nin Dios si Abraham kan an saiyang agom 90 anyos na? (b) Paano ipinaheling ni Abraham an saiyang pagtubod asin pagkuyog sa pambihirang paagi?

⁷ Kan an agom ni Abraham na si Sara 90 anyos na, na haloy nang nakalihis sa edad nin pangangaki, milagroso siang pinaboran nin Dios na ipangaki ki Abraham an namomotan nindang aki, si Isaac, dugang pa sa Saiyang makangangalas na panuga ki Abraham. Pinatunayan ni Abraham na sia andam asin boot na idolot pati an minamahal na aking ini bilang tawong atang sa pagkuyog sa pagboot kan saiyang Dios, si Jehova. An pambihirang kapahayagan na ini nin pagtubod asin pagkuyog nakapahirong gayo ki Jehova kaya sinabi nia sa saiyang “katood,” si Abraham:

8, 9. (a) Ano an nagin reaksion ni Jehova sa kapahayagan na ini kan pagtubod asin pagkuyog ni Abraham? (b) Kiisay pinapanimbag nin Dios an saiyang sadiri?

⁸ “‘Paagi sa sako man sana ako minasumpa,’ an sabi ni Jehova, ‘na huli sa bagay na ginibo mo an bagay na ini asin dai mo isinayuma an saimong aki, an saimong bugtong na aki, ika bebendisyonan ko nanggad asin padadakulon ko nanggad an saimong banhi siring kan mga bitoon sa kalangitan asin siring kan mga baybay sa baybayon; asin an saimong banhi makasasadiri kan tata kan saiyang mga kaiwal. Asin paagi sa saimong banhi an gabos na nasyon sa daga magbebendisyon nanggad kan saindang sadiri huli sa bagay na ika naghinanyog sa sakong tingog.’”—Genesis 22:15-18.

⁹ Ini an enot na lugar sa Biblia na nagsasabing si Jehova nagsumpa. Huli ta dai sia makapanunumpa paagi sa saro na orog pang dakula, ipinanumpa nia an saiya man sana, na inobligar dian an saiyang sadiri. Sa paaging ini ginibo nia an saiyang sadiri na maninimbag bakong sa siisay pa man kundi sa saiya man sana. Kaomawan nia na inootob nia an sadiri niang kapahayagan nin katuyohan.

Gurano an Pagkaotob?

10. Mga gurano na kahaloy na ginibo nin Dios an saiyang pakipagtipan ki Abraham, asin anong hapot an minalataw kun siring?

¹⁰ Si Abraham naglaog sa ipinanugang daga nin Canaan kaidtong haros 4,000 na taon na an nakaagi. Kaya ngonyan, gurano na an naotob sa tipan na idto na ginibo kan 1943 B.C.E.?

11. (a) Ano an ipinaririsa kan pagigin miembro sa NU kan Republika nin Israel, asin may anong mga resulta? (b) An mga gikan daw sa laman ni Abraham nakaootob sa mga kahagadan na magin an ipinanugang “banhi”?

¹¹ Ngonyan, yaon an Republika nin Israel sa Tahaw na Sirangan. Huli sa pansadiring interes, iyan miembro kan Naciones Unidas. An NU nagrerepresentar sa pagsikwal sa Kahadean ni Jehova Dios paagi sa ipinanugang “banhi” ni Abraham kaya iyan lalaglagon sa “ralaban kan dakulang aldaw nin Dios na Makakamhan sa gabos,” an Armagedon. An gabos na miembro kan NU, kaiba na an Republika nin Israel, paparaon. Makamomondo, an sa laman, natural na mga gikan ni Abraham dai nakaootob sa mga kahagadan tanganing magin an ipinanugang Mesiyanikong “banhi” na paagi kaiyan bebendisyonan ni Jehova Dios an bilog na katawohan.—Kapahayagan 16:14-16.

12, 13. (a) Bakong arog kan saiyang apoon na si David, taano an “Prinsipe nin Katoninongan” ta dai maghahade nin solo? (b) Kinaipuhan daw na maghalat an linahidan na mga Kristiano sagkod na mapatindog an Kahadean kan 1914 tanganing akoon an ipinanugang bendisyon, asin paano niato naaaraman?

¹² Malinaw sa gabos, an ipinanugang Mesiyas dai naghahade sa nasa Tahaw na Sirangan, daganon na Jerusalem tanganing maotob an Abrahamikong tipan. Bakong arog kan apoon niang si David kan suanoy, an Mesiyas asin “Prinsipe nin Katoninongan” dai maghahade nin solo. Sia nanuga na iiba sa saiyang paghade an saiyang 12 maimbod na apostol asin an iba pa niang pinaniaki sa espiritung mga disipulo, sagkod sa kabilangan na 144,000. (Kapahayagan 7:1-8; 14:1-4) Igwa pa nin natatada sa mga disipulong iyan digdi sa daga. Ano an ginibo para sa sainda sa pag-otob sa Abrahamikong tipan na sinumpaan nin Dios? An saro na pangenot na may esperansang magin kaiba sa Kahadean na iyan, si apostol Pablo, nagsurat sa Galacia 3:8: “Ngonyan an Kasuratan, huli sa patienot na pakaheling na ipahahayag nin Dios na matanos an mga tawo kan mga nasyon huli sa pagtubod, patienot na nagpahayag kan maogmang bareta ki Abraham, na an sabi: ‘Paagi sa saimo an gabos na nasyon bebendisyonan.’”

¹³ An mga Kristiano na pinili sa mga nasyon dai kinaipuhan na maghalat sagkod na mapatindog an Kahadean kan 1914 tanganing akoon an ipinanugang bendisyon, huli ta si apostol Pablo nagpadagos sa pagsabi: “Kaya an gabos na nagdadanay sa pagtubod binibendisyonan sa kaibanan kan maimbod na si Abraham.” (Galacia 3:9) Si Pablo kaidto sarong Kristiano asin binibendisyonan, siring man an gabos na iba pang pinaniaki sa espiritung Kristiano kan saiyang kaaldawan.a Siring man ngonyan, an natatada, na kompuwesto nin pinaniaki sa espiritung mga Kristiano na nangangapot sa pagtubod sa Mesiyas bilang an pangenot na “banhi” ni Abraham para sa pagbendisyon sa gabos na tawo, nakakaeksperyensia kan ipinanugang bendisyon.

14. (a) Paano nagkamit nin espesyal na bendisyon an linahidan na mga Kristiano sono sa Abrahamikong tipan? (b) Sa anong paagi ini nakabindikar ki Jehova?

¹⁴ Paagi sa pagdusay kan saindang sadiri ki Jehova asin pagsimbolisar kan pagdusay na ini paagi sa pagpabautismo sa tubig dangan pinaniniaki kan espiritu nin Dios sa espirituwal na kamugtakan, an mga Kristianong ini nagin espirituwal na mga aki kan Orog na Dakulang Abraham, si Jehova Dios. Sinda man nagin kairibang paramana ni Jesu-Cristo, an Orog na Dakulang Isaac. (Roma 8:17) Tunay na sinda may espesyal na bendisyon sono sa Abrahamikong tipan. Inootob ni Jehova an isinumpa niang gibohon, sa siring ibinibindikar an sadiri bilang parasabi nin totoo, Saro na may sangkap na kakayahan na otobon an solemne niang isinumpang gibohon sa ngaran nia.

15. An lambang miembro kan natatada sa pinaniaki sa espiritung mga Kristiano sinasabi ni apostol Pablo na ano?

¹⁵ An lambang miembro kan natatada sa pinaniaki sa espiritung Kristiano Judio sa espirituwal na sentido. Arog kan sabi ni apostol Pablo: “Bakong Judio an Judio sa luwas, ni an pagturi na sa luwas sana sa laman. Alagad Judio an Judio sa laog, asin an saiyang pagturi iyo an sa puso paagi sa espiritu, asin bakong paagi sa nasusurat na pagboot.”—Roma 2:28, 29.

16. An espirituwal na mga Judio minabilog sa anong grupo na ihinula sa Zacarias 8:23?

¹⁶ Sa “pagtatapos kan palakaw nin mga bagay” na ini, an pinaniaki sa espiritung mga Kristianong iyan, na mga Judio sa laog asin tinuri sa puso, minakompuwesto sa grupong Judio na ihinula sa Zacarias 8:23, na dian nasusurat: “Ini iyo an isinabi ni Jehova nin mga hukbo, ‘Mangyayari sa mga aldaw na iyan na an sampulong tawo hale sa gabos na tataramon kan mga nasyon makarapot, iyo, sinda nanggad makarapot sa gayad kan gubing nin sarong tawo na Judio, na nagsasarabi: “Maiba kami saindo, huli ta nabaretaan niamo na an Dios yaon dian sa saindo.”’”

17. (a) Siisay an ipinagrerepresentar kan “sampulong tawo” na gustong sumamba ki Jehova kaiba kan natatada sa espirituwal na mga Judio sa presenteng aldaw? (b) Paagi sa pakikiasosyar sa espirituwal na mga Judio sa pagsamba ki Jehova, ano an nakakamtan ngonyan kan mga miembro kan “ibang karnero”?

¹⁷ An mga boot na ibanan kan “sampulong tawo” sa pagsamba ki Jehova Dios iyo an natatada sa espirituwal na mga Judio sa presenteng aldaw, an grupo na minabilog sa “maimbod asin madonong na oripon” sa Mateo 24:45-47. Mantang an kabilangan na sampulo nagrerepresentar sa daganon na pagkakompleto, an “sampulong tawo hale sa gabos na tataramon kan mga nasyon” nagrerepresentar sa gabos na simbolikong karnero na ihinula sa Mateo 25:32-46. An mga ini kabilang sa grupong “ibang karnero” na sinabi ni Jesus na iiiba nia sa arog-karnerong natatada tanganing bumilog kaiba ninda nin “sarong aripompon” sa pangangataman kan “sarong pastor,” sia. (Juan 10:16) Sa paaging ini nagkakamit sinda nin panamit sa mga bendisyon kan Abrahamikong tipan paagi sa “banhi” kan Orog na Dakulang Abraham, si Jehova Dios. Kaya tunay na an isinumpa nin Dios na gibohon para sa gabos na tawo harani na!

[Mga Nota sa Ibaba]