‘Pakakua nin Sarong Perlas na Halangkaw an Halaga’

“An kahadean kan kalangitan iyo an pasohan na pinagmamaigotan na aboton nin mga tawo, asin an mga nagmamaigot nakakapangapot dian.”​—MATEO 11:12.

1, 2. (a) Anong pambihirang kualidad an ilinadawan ni Jesus sa saro kan saiyang mga parabola sa Kahadean? (b) Ano an sinabi ni Jesus sa parabola kan perlas na dakulaon an halaga?

IGWA daw nin sarong bagay na halangkawon an pagpahalaga nindo kaya isasakripisyo nindo an gabos na nasa saindo tanganing makua iyan? Minsan ngani nagtataram an mga tawo manongod sa pagigin dedikado sa pag-aabot ninda sa sarong pasohan​—kuarta, kabantogan, kapangyarihan, o katongdan​—pambihira na an sarong tawo makanompong nin sarong bagay na kawiliwili nanggad na marhay kaya andam niang isakripisyo an gabos na bagay para dian. Nasambitan ni Jesu-Cristo an pambihira alagad kahangahangang kualidad na ini sa saro kan dakol niang nakakapukaw nin isip na parabola manongod sa Kahadean nin Dios.

² Iyan sarong parabola, o ilustrasyon, na sinabi ni Jesus sa mga disipulo nia sana, na parateng inaapod na parabola kan perlas na dakulaon an halaga. Ini an sinabi ni Jesus: “An kahadean kan kalangitan nakakaagid sa sarong nagbibiaheng negosyante na naghahanap nin marahay na klase nin mga perlas. Kan makakua nin sarong perlas na halangkaw an halaga, naghale sia asin ipinabakal tolos an gabos niang sadiri patin binakal iyan.” (Mateo 13:​36, 45, 46) Ano an gusto ni Jesus na manodan kan mga nagdadangog sa saiya gikan sa ilustrasyon na ini? Asin paano kita makikinabang sa mga tataramon ni Jesus?

Halangkaw na Halaga nin mga Perlas

3. Taano ta dakula an halaga kan marahay na klase nin mga perlas kan suanoy na mga panahon?

³ Poon kan suanoy na mga panahon, ibinilang na may halaga an mga perlas bilang mga pansamno. An sarong reperensia nagsabi na oyon sa Romanong iskolar na si Plinio na Matua, an mga perlas an “pinakahalangkaw sa gabos na bagay na may halaga.” Bakong arog nin bulawan, pirak, o dakol na gapong mutya, an mga perlas napoprodusir nin mga bagay na buhay. Aram na marhay na an nagkapirang klase nin sisi puedeng gibohon an mga bagay na masimpil​—halimbawa, an saradit na pidaso nin gapo​—na magin makinang na mga perlas paagi sa pagtahob kaini nin mga suon nin sekresyon na inaapod nakar. Kan suanoy na mga panahon, an pinakamarahay na klase nin mga perlas prinsipalmenteng nakukua sa Dagat na Pula, sa Golpo Persiano, asin sa Dagat Indio​—harayo sa daga nin Israel. Daing duwa-duwa na ini an dahelan kaya si Jesus nagtaram dapit sa “sarong nagbibiaheng negosyante na naghahanap nin marahay na klase nin mga perlas.” Tanganing makakua nin talagang may halagang mga perlas, kinakaipuhan an dakulang paghihingoa.

4. Ano an prinsipal na leksion sa parabola ni Jesus kan nagbibiaheng negosyante?

⁴ Maski ngani kaidto pa ibinilang na mamahalon an marahay na klase nin mga perlas, malinaw na bakong an kantidad kaiyan an prinsipal na leksion sa parabola ni Jesus. Sa parabolang ini, dai sana iinagid ni Jesus an Kahadean nin Dios sa sarong perlas na halangkaw an halaga; dinara nia an atension sa “sarong nagbibiaheng negosyante na naghahanap nin marahay na klase nin mga perlas” asin sa nagin reaksion nia kan makakua sia. Bakong arog sa sarong ordinaryong paratinda, an sarong nagbibiaheng negosyante nin perlas puedeng apodon na eksperto sa negosyong iyan, saro na malinaw an pagheling sa mga detalye o matibay magrisa na kinakaipuhan tanganing maheling an artistikong mga kualidad asin an pagigin pino kaini na nagpapamidbid sa sarong perlas bilang ekstraordinaryo. Maaaraman nia an tunay kun maheling nia iyan asin dai maloloko nin maluyang klase o palsipikadong perlas.

5, 6. (a) Ano an partikularmenteng mahalagang mangnohon manongod sa negosyante sa parabola ni Jesus? (b) Ano an ihinahayag kan parabola kan natatagong kayamanan manongod sa nagbibiaheng negosyante?

⁵ May iba pang bagay manongod sa partikular na negosyanteng ini na mahalagang mangnohon. Tibaad kalkulohon nguna nin sarong ordinaryong negosyante an kantidad kan perlas tanganing madeterminaran kun gurano an ibabayad nia kaiyan tanganing gumanansia. Tibaad isipon man nia kun may mapapabakalan kan siring na perlas tanganing ikapabakal nia tolos iyan. Sa ibang pagtaram, interesado sia na gumanansia tolos sa saiyang ikinapital, bako na sadirihon an perlas. Alagad bakong arog kaiyan an negosyante sa parabola ni Jesus. Bakong kuarta o materyal an saiyang interes. Sa katunayan, andam niang isakripisyo “an gabos niang sadiri”​—posibleng an gabos niang rogaring asin propiedad​—tanganing makua an haloy na niang hinahanap.

⁶ Sa pagheling kan kadaklan na negosyante, an ginibo kan lalaking iyan sa parabola ni Jesus tibaad bakong madonong. An madonong na negosyante dai maisip na gibohon an siring kaiyan na peligrosong pagnegosyo. Alagad an negosyante sa parabola ni Jesus igwa nin laen na pamantayan sa kun ano an mahalaga. An saiyang balos bakong ano man na pinansial na bentaha kundi kagayagayahan asin pagkakontento sa pakakua nin sarong bagay na nakakalabing marhay an halaga. Linilinaw an puntong ini sa kaagid na ilustrasyon na itinao ni Jesus. Sia nagsabi: “An kahadean kan kalangitan nakakaagid sa sarong kayamanan na natatago sa oma, na nakua nin sarong tawo asin itinago; asin huli sa kagayagayahan nia sia naglakaw asin nagpabakal kan mga sadiri nia asin binakal an omang iyan.” (Mateo 13:44) Iyo, an kagayagayahan na bunga kan pakanompong asin pakasadiri kan kayamanan igo na tanganing pahiroon an tawong iyan na butasan an gabos na bagay na yaon sa saiya. Igwa daw nin mga indibiduwal na arog kaiyan ngonyan? Igwa daw nin kayamanan na maninigo sa siring na sakripisyo?

An mga Nagpahalaga sa Halangkaw na Halaga

7. Paano ipinaheling ni Jesus na odok niang pinahalagahan an halangkaw na halaga kan Kahadean?

⁷ Kan sinasabi an saiyang parabola, nagtataram si Jesus manongod sa “kahadean kan kalangitan.” Sia mismo siertong nagpahalaga sa halangkaw na halaga kan Kahadean. An mga pagkasaysay sa Ebanghelyo nagtatao nin mapuersang patotoo sa bagay na iyan. Pakabautismohi sa saiya kan 29 C.E., si Jesus “nagpoon na maghulit asin magsabi: ‘Magsorolsol kamo, huli ta an kahadean kan kalangitan harani na.’” Sa laog nin tolo may kabangang taon, tinokdoan nia an kadakoldakol na tawo manongod sa Kahadean. Dinumanan nia an bilog na daga, na “naglibot sa siudad-siudad asin baryo-baryo, na naghuhulit asin nagpapahayag kan maogmang bareta kan kahadean nin Dios.”​—Mateo 4:​17; Lucas 8:1.

8. Ano an ginibo ni Jesus tanganing ipaheling kun ano an gigibohon kan Kahadean?

⁸ Paagi sa pagsagibo nin balakid na milagro sa bilog na daga​—kaiba an pagpaomay sa mga may helang, pagpakakan sa mga nagugutom, pagkontrol sa kamugtakan kan panahon, pagbuhay pa ngani nin mga gadan​—ipinaheling man ni Jesus kun ano an gigibohon kan Kahadean nin Dios. (Mateo 14:14-​21; Marcos 4:​37-​39; Lucas 7:​11-​17) Sa katapustapusi, pinatunayan nia an saiyang kaimbodan sa Dios asin sa Kahadean paagi sa pagtao kan saiyang buhay, na nagadan bilang sarong martir sa hariging pasakitan. Kun paanong andam na itinao kan nagbibiaheng negosyanteng iyan an gabos na sadiri nia para sa “perlas na halangkaw an halaga,” si Jesus nabuhay asin nagadan para sa Kahadean.​—Juan 18:37.

9. Anong pambihirang kualidad an naheling sa enot na mga disipulo ni Jesus?

⁹ Bako sanang isinentro ni Jesus an saiya mismong buhay sa Kahadean kundi nagtipon man sia nin sadit na grupo nin mga parasunod. An mga ini man mga indibiduwal na odok na nagpahalaga sa halangkaw na halaga kan Kahadean. Kabilang sa sainda si Andres, na sa kapoonpooni sarong disipulo ni Juan na Bautisador. Kan madangog an patotoo ni Juan na si Jesus “an Kordero nin Dios,” si Andres asin an saro pa sa mga disipulo ni Juan, na posibleng marhay na saro kan mga aking lalaki ni Zebedeo na an ngaran man Juan, tolos-tolos na naakit na dumolok ki Jesus asin nagin mga nagturubod. Alagad dai iyan dian natatapos. Tolos-tolos, dinumanan ni Andres an saiyang tugang na si Simon asin sinabihan sia: “Nakua na niamo an Mesiyas.” Dai nahaloy kasunod kaiyan, si Simon (na namidbid bilang si Cefas, o Pedro) saka si Felipe asin an saiyang amigo na si Natanael minidbid man si Jesus bilang an Mesiyas. Sa katunayan, napahiro si Natanael na sabihon ki Jesus: “Ika an Aki nin Dios, ika an Hade kan Israel.”​—Juan 1:​35-​49.

Napahiro Sinda

10. Ano an nagin reaksion kan mga disipulo kan si Jesus mag-abot asin apodon sinda pakalihis nin pirang panahon pagkatapos kan enot na manuparan nia sinda?

¹⁰ An kaogmahan na naeksperyensiahan ni Andres, Pedro, Juan, asin kan iba pa kan manompongan ninda an Mesiyas puedeng ikomparar sa kaogmahan na naeksperyensiahan kan nagbibiaheng negosyante kan makua nia an perlas na halangkaw an halaga. Ano daw an gigibohon ninda ngonyan? An Ebanghelyo daing gayong sinasabi sa sato manongod sa ginibo ninda pakatapos tolos kan enot na pakanupar na ini ki Jesus. Minalataw na an kadaklan sa sainda nagbalik sa saindang normal na pamumuhay. Minsan siring, pakalihis nin mga anom na bulan sagkod sarong taon, tinupar giraray ni Jesus si Andres, Pedro, Juan, asin an tugang ni Juan na si Santiago sa saindang negosyo nin paninira sa gilid kan Dagat nin Galilea.a Pakaheling sa sainda, si Jesus nagsabi: “Sumunod kamo sa sako, asin gigibohon ko kamong mga parasira nin mga tawo.” Ano an nagin reaksion ninda? Manongod ki Pedro asin Andres, an pagkasaysay ni Mateo nagsasabi: “Tolos-tolos binayaan an mga hikot, sinda nagsunod sa saiya.” Kun dapit ki Santiago asin Juan, mababasa niato: “Tolos-tolos na binayaan an baroto asin an saindang ama, sinda nagsunod saiya.” Idinagdag kan pagkasaysay ni Lucas na ‘binayaan ninda an gabos na bagay asin nagsunod sa saiya.’​—Mateo 4:​18-​22; Lucas 5:​1-​11.

11. Ano an posibleng marhay na rason kan tolos-tolos na reaksion kan mga disipulo sa pangapodan ni Jesus?

¹¹ Biriglaan daw na desisyon an tolos-tolos na reaksion kan mga disipulo? Dai nanggad! Dawa ngani talagang nagbalik sinda sa negosyo kan saindang pamilya na paninira pagkatapos kan enot na pakipag-olay ninda ki Jesus, daing duwa-duwa na an saindang naheling asin nadangog sa pangyayaring idto nagwalat nin hararom na epekto sa saindang puso asin isip. An pag-agi nin haros sarong taon nagtao sa sainda nin dakol na panahon tanganing horophoropon an mga bagay na iyan. Nag-abot na ngonyan an panahon para magdesisyon. Magigin arog daw sinda kan nagbibiaheng negosyante na napahirong marhay an puso kan makakua kan daing kaagid sa halagang perlas kaya, siring kan pagkaladawan kaiyan ni Jesus, ‘naghale sia asin tolos’ na ginibo an dapat niang gibohon tanganing bakalon an perlas na iyan? Iyo. Pinahiro an saindang puso kan saindang naheling asin nadangog. Rinekonoser ninda na nag-abot na an panahon para humiro. Sa siring, arog kan sinasabi sa sato kan pagkasaysay, daing pag-alangan na binayaan ninda an gabos na bagay asin nagin mga parasunod ni Jesus.

12, 13. (a) Ano an nagin reaksion kan dakol na nakadangog ki Jesus? (b) Ano an sinabi ni Jesus manongod sa saiyang maimbod na mga disipulo, asin ano an ipinaparisa kan saiyang mga tataramon?

¹² Laen nanggad an mga maimbod na ini sa iba pang nasambitan kan huri sa mga pagkasaysay sa Ebanghelyo! Kadakol kan pinaomayan o pinakakan ni Jesus alagad sinda nagpadagos sana sa saindang pan-aroaldaw na pamumuhay. (Lucas 17:​17, 18; Juan 6:26) Nagsayuma pa ngani an nagkapira kan imbitaran sinda ni Jesus na magin saiyang mga parasunod. (Lucas 9:​59-​62) Sa kabaliktaran na marhay, may labot sa mga maimbod, si Jesus nagsabi kan huri: “Poon kan kaaldawan ni Juan Bautista sagkod ngonyan an kahadean kan kalangitan iyo an pasohan na pinagmamaigotan na aboton nin mga tawo, asin an mga nagmamaigot nakakapangapot dian.”​—Mateo 11:12.

¹³ “Pinagmamaigotan” asin “nagmamaigot”​—ano an ipinaparisa kan mga tataramon na ini? Mapadapit sa Griegong berbo na pinagkuanan kan pananaram na ini, an Vine’s Expository Dictionary of Old and New Testament Words nagsasabi: “An berbo nagsusuherir nin mapuersang paghihingoa.” Asin mapadapit sa bersikulong ini, an iskolar sa Biblia na si Heinrich Meyer nagsasabi: “Ilinaladawan sa paaging ini an galaga asin dai mapopogolan na paghihingoa para sa nagdadangadang na Mesiyanikong kahadean . . . Galaga asin entusiastikong marhay (bako nang kalmado asin naghahalat) an interes mapadapit sa kahadean.” Arog kan nagbibiaheng negosyante, an pira sanang indibiduwal na ini madaling namidbid kun ano talaga an mahalagang marhay, asin andam nindang binutasan an gabos na yaon sa sainda para sa kapakanan kan Kahadean.​—Mateo 19:​27, 28; Filipos 3:8.

Nakiayon an Iba sa Paghanap

14. Paano inandam ni Jesus an mga apostol para sa paghuhulit kan Kahadean, asin ano an resulta?

¹⁴ Mantang nagpapadagos si Jesus sa saiyang ministeryo, saiyang sinanay asin tinabangan an iba na pag-aaboton an Kahadean. Enot, nagpili sia nin 12 sa saiyang mga disipulo asin dinesignaran sinda bilang mga apostol, o mga isinugo nia. Sa mga ini, nagtao si Jesus nin detalyadong mga instruksion kun paano ninda isasagibo an saindang ministeryo saka mga patanid manongod sa mga angat asin kasakitan na nasa ngapit pa. (Mateo 10:​1-​42; Lucas 6:​12-​16) Sa suminunod na duwang taon o labi pa, inibanan ninda si Jesus sa saiyang mga biahe sa paghuhulit sa bilog na daga, na nagkaigwa nin dayupot na relasyon sa saiya. Nadangog ninda an saiyang mga tataramon, naobserbaran an saiyang makapangyarihan na mga gibo, asin naheling an saiyang personal na halimbawa. (Mateo 13:​16, 17) Daing duwa-duwa na an gabos na ini nakatudok na marhay sa saindang boot, kaya arog kan nagbibiaheng negosyante, maigot asin bilog na puso sinda sa saindang pagmamaigot na hanapon an Kahadean.

15. Ano an sinabi ni Jesus sa tunay na dahelan nin paggayagaya kan saiyang mga parasunod?

¹⁵ Apuera sa 12 apostol, si Jesus “puminili pa nin pitong polo asin isinugo sinda nin manduwaduwa na maenot sa saiya sa kada siudad asin lugar na saiya mismong dudumanan.” Isinabi man nia sa sainda an manongod sa mga pagbalo asin kasakitan na aatubangon ninda asin pinagbotan sinda na sabihon sa mga tawo: “An kahadean nin Dios harani na sa saindo.” (Lucas 10:​1-​12) Kan magbalik an 70, labi-labi an kagayagayahan ninda asin itinao an report na ini ki Jesus: “Kagurangnan, minsan an mga demonyo ipinapasakop sa samo paagi sa paggamit kan ngaran mo.” Alagad tibaad ipinagngalas ninda, ipinahayag ni Jesus na orog pa nganing kagayagayahan an naghahalat sa sainda huli kan saindang kaigotan para sa Kahadean. Sinabihan nia sinda: “Dai kamo maggayagaya dapit kaini, na an mga espiritu nasasakop nindo, kundi maggayagaya kamo huli ta an saindong ngaran isinurat sa kalangitan.”​—Lucas 10:​17, 20.

16, 17. (a) Ano an sinabi ni Jesus sa saiyang maimbod na mga apostol kan ultimong banggi na kaibanan nia sinda? (b) Anong kagayagayahan asin garantiya an itinao kan mga tataramon ni Jesus sa mga apostol?

¹⁶ Sa katapustapusi, kan ultimong banggi na kaibanan ni Jesus an mga apostol, Nisan 14, 33 C.E., inestablisar nia an inapod na Pamanggihan nin Kagurangnan asin pinagbotan sinda na girumdomon an okasyon na iyan. Durante kan bangging iyan, sinabihan ni Jesus an 11 nawalat: “Kamo an mga nakidamay sa sako sa mga pagbalo sa sako; asin ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean, tanganing kamo kumakan asin uminom sa lamesa ko sa sakong kahadean, asin tumukaw sa mga trono tanganing maghokom sa doseng tribo nin Israel.”​—Lucas 22:​19, 20, 28-​30.

¹⁷ Siertong napano nin kagayagayahan asin pagkakontento an saindang puso kan madangog kan mga apostol an mga tataramon na idto hale ki Jesus! Itinatao sa sainda an pinakahalangkaw na onra asin pribilehio na puedeng akoon nin siisay man na tawo. (Mateo 7:​13, 14; 1 Pedro 2:9) Arog kan nagbibiaheng negosyanteng iyan, dakol an isinakripisyo ninda tanganing sumunod ki Jesus sa pagmamaigot na hanapon an Kahadean. Nakakaseguro na sinda ngonyan na an mga pagsasakripisyo ninda sagkod sa oras na idto dai nasayang.

18. Sairisay apuera sa 11 apostol an makikinabang man sa Kahadean pag-abot nin panahon?

¹⁸ Bako sanang an mga apostol na kaiba ni Jesus kan bangging idto an makikinabang sa Kahadean. Kabotan ni Jehova na darahon sa tipan para sa Kahadean an kabilangan na 144,000 bilang kairibang namamahala ni Jesu-Cristo sa mamuraway na langitnon na Kahadean. Dugang pa, naheling ni apostol Juan sa bisyon “an sarong dakulang kadaklan, na dai nin siisay man na makakabilang, . . . na nagtitindog sa atubangan kan trono asin sa atubangan kan Kordero, . . . na nagsasabi: ‘Utang niato an kaligtasan sa satong Dios, na nagtutukaw sa trono, asin sa Kordero.’” Ini an daganon na mga sakop kan Kahadean.b​—Kapahayagan 7:​9, 10; 14:​1, 4.

19, 20. (a) Anong oportunidad an bukas sa mga tawo kan gabos na nasyon? (b) Anong hapot an totokaron sa sunod na artikulo?

¹⁹ Dai nahaloy bago magsakat si Jesus sa langit, pinagbotan nia an saiyang maimbod na mga parasunod: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako nasa saindo sa gabos na aldaw sagkod sa pagtatapos kan sistema nin mga bagay.” (Mateo 28:​19, 20) Sa siring, an mga tawo hale sa gabos na nasyon magigin mga disipulo ni Jesu-Cristo. Itinalaga man kan mga ini an saindang puso sa Kahadean​—baga man para sa langitnon o para sa daganon na balos​—siring kan ginibo kan nagbibiaheng negosyante kun mapadapit sa marahay na klase nin perlas.

²⁰ Ipinarisa kan mga tataramon ni Jesus na an paggibo nin mga disipulo magpapadagos sagkod “sa pagtatapos kan sistema nin mga bagay.” Kaya sa satong kaaldawan, igwa pa daw nin mga indibiduwal na arog kan nagbibiaheng negosyante, na andam na itao an gabos na yaon sa sainda sa pagmamaigot na hanapon an Kahadean nin Dios? An hapot na ini totokaron sa sunod na artikulo.

[Mga Nota sa Ibaba]

Pagmamaigot na Hanapon an “Perlas na Halangkaw an Halaga” Ngonyan

“An maogmang baretang ini kan kahadean ihuhulit sa bilog na ineerokan na daga para sa pagpatotoo.”​—MATEO 24:14.

1, 2. (a) Ano an inisip kan mga Judio kan kaaldawan ni Jesus manongod sa Kahadean nin Dios? (b) Ano an ginibo ni Jesus tanganing itao an tamang pakasabot sa Kahadean, asin may anong mga resulta?

AN Kahadean nin Dios iyo an tema na pinagkakainteresan na marhay kan mga Judio kan si Jesus nagdigdi sa daga. (Mateo 3:​1, 2; 4:​23-​25; Juan 1:49) Minsan siring, sa primero an kadaklan sa sainda dai lubos na narorop kun magigin gurano kahiwas an pagsakop asin kapangyarihan kaiyan; ni nasabotan man ninda na iyan magigin sarong langitnon na gobyerno. (Juan 3:​1-5) Dawa an nagkapira na nagin parasunod ni Jesus dai lubos na nasabotan kun ano an Kahadean nin Dios o kun ano an dapat nindang gibohon tanganing akoon an bendisyon na magin kairibang namamahala ni Cristo.​—Mateo 20:20-​22; Lucas 19:11; Gibo 1:6.

² Sa pag-agi nin panahon, mapasensiang tinokdoan ni Jesus an saiyang mga disipulo nin dakol na leksion, kaiba an parabola kan perlas na halangkaw an halaga na tinokar sa naenot na artikulo, na itinotokdo sa sainda an kahalagahan kan paghihingoa ninda sa paghanap kan langitnon na Kahadean. (Mateo 6:​33; 13:​45, 46; Lucas 13:​23, 24) Siertong napahiro na marhay kaini an saindang puso huling dai nahaloy sinda nagin daing kapagalan asin makosog an boot na mga parabalangibog kan maogmang bareta kan Kahadean sa hararayong parte kan daga, na igong pinapatunayan kan libro nin Gibo.​—Gibo 1:8; Colosas 1:23.

3. Kun mapadapit sa satong panahon, ano an sinabi ni Jesus manongod sa Kahadean?

³ Kun siring, kumusta man ngonyan? An mga bendisyon nin sarong daganon na paraiso sa irarom kan Kahadean ihinuhulit sa minilyon. Sa saiyang dakulang hula manongod sa “pagtatapos kan sistema nin mga bagay,” espesipikong sinabi ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:​3, 14; Marcos 13:10) Ipinaliwanag man nia na isasagibo an dakulaon na gibohon na ini sa ibong nin masakit na mga kaolangan asin kadepisilan, paglamag pa ngani. Minsan siring, itinao nia an garantiyang ini: “An nakatagal sagkod sa katapusan iyo an maliligtas.” (Mateo 24:​9-​13) Kinakaipuhan kan gabos na ini an klase nin pagsakripisyo kan sadiri asin pagigin dedikado na ipinaheling kan nagbibiaheng negosyante sa parabola ni Jesus. Igwa daw nin mga indibiduwal ngonyan na nagpapaheling kan siring na pagtubod asin kaigotan sa pagmamaigot na hanapon an Kahadean?

An Kagayagayahan sa Pakaaram kan Katotoohan

4. Ano an epekto kan katotoohan kan Kahadean sa mga tawo ngonyan?

⁴ An negosyante sa parabola ni Jesus labi-labi an kagayagayahan kan saiyang manompongan an aram niang “perlas na halangkaw an halaga.” Pinahiro sia kan kagayagayahan na iyan na gibohon an gabos niang makakaya tanganing mapasaiya an perlas. (Hebreo 12:1) Ngonyan, an katotoohan manongod sa Dios asin sa saiyang Kahadean nakakadagka asin nakakamotibar man sa mga tawo. Ipinapagirumdom kaini an ikinomento ni Tugang na A. H. Macmillan, na nagsurat manongod sa personal niang paghanap sa Dios asin sa Saiyang katuyohan para sa katawohan, sa librong Faith on the March. Sia nagsabi: “An nanompongan ko nanonompongan pa nin rinibong tawo kada taon. Asin sinda mga tawo na arog man sana sa saindo asin sa sako, huling hale sinda sa gabos na nasyonalidad, rasa, klase nin pamumuhay asin manlaenlaen an edad. An katotoohan dai nagpapalaenlaen sa mga tawo. Iyan nakakaakit sa gabos na klase nin tawo.”

5. Anong marahay na mga resulta an maheheling sa report kan 2004 taon nin paglilingkod?

⁵ Naheheling an pagigin totoo kan mga tataramon na iyan mantang taon-taon ginatos na ribong indibiduwal na sadiosan an puso an napapahiro kan maogmang bareta kan Kahadean nin Dios na idusay an saindang buhay ki Jehova asin gibohon an saiyang kabotan. Bakong puera an 2004 taon nin paglilingkod, na nagpoon kan Setyembre 2003 sagkod Agosto 2004. Sa 12 bulan na iyan, 262,416 na tawo an nagsimbolisar sa publiko kan saindang pagdusay ki Jehova paagi sa bautismo sa tubig. Nangyari ini sa 235 kadagaan, na dian an mga Saksi ni Jehova may ginigibong 6,085,387 pag-adal sa Biblia serosemana tanganing tabangan an mga tawo sa gabos na klase nin pamumuhay asin hale sa dakol na nasyon, tribo, asin tataramon na ilaog sa isip an nagtatao nin buhay na katotoohan hale sa Tataramon nin Dios.​—Kapahayagan 7:9.

6. Ano an dahelan kan dagos-dagos na mga pagdakol sa nakaaging mga taon?

⁶ Paano nagin posible an gabos na ini? Daing duwa-duwa na dinadagka ni Jehova sa saiya an mga tawong ini na tama an inklinasyon. (Juan 6:​65; Gibo 13:48) Minsan siring, dai dapat inaan nin halaga an daing kaimotan na espiritu asin daing kapagalan na paghihingoa kan mga naggibo kan gabos na makakaya ninda sa pagmamaigot na hanapon an Kahadean. Sa edad na 79, si Tugang na Macmillan nagsurat: “Poon kan enot kong manodan an manongod sa mga panuga na itinatao sa naghehelang asin nagagadan na katawohan dai nagluya an sakong paglaom sa ihinahayag kan mensaheng iyan kan Biblia. Kaidto mismo nagdesisyon ako na aramon nin orog pa an itinotokdo kan Biblia tanganing matabangan ko an iba pang arog ko na naghahanap kan kaaraman manongod sa Makakamhan sa Gabos na Dios, si Jehova, asin sa saiyang magayon na mga katuyohan para sa katawohan.”

7. Anong eksperyensia an nagpapaheling kan kagayagayahan asin pagkagalaga kan mga nakakanompong kan katotoohan sa Biblia?

⁷ An pagkagalagang iyan naheheling man sa mga lingkod ni Jehova ngonyan. Kuanon tang halimbawa si Daniela na taga Vienna, Austria. Sia nagsabi: “Poon sa pagkaniaki ko, an Dios an nagin pinakadayupot kong amigo. Pirme kong gustong maaraman an saiyang ngaran huling para sa sako an ‘Dios’ impersonal na marhay. Alagad kinaipuhan kong maghalat sagkod na ako nag-17 anyos, kan an mga Saksi ni Jehova uminabot sa sakong pinto. Ipinaliwanag ninda an gabos na gusto kong maaraman manongod sa Dios. Nanompongan ko sa katapustapusi an katotoohan, asin marahayon iyan! Naogma akong marhay kaya pinonan kong maghulit sa lambang tawo.” An saiyang pagkaentusiastiko dai nahaloy nagbunga nin pag-olog-olog kan saiyang mga kaeskuela. “Pero, para sa sako garo ko man sana naheheling na naootob an hula sa Biblia,” an pagpadagos ni Daniela, “huling naaraman ko na sinabi ni Jesus na ikakaongis asin paglalamagon an saiyang mga parasunod huli sa ngaran nia. Naogma akong marhay asin napangalas.” Dai nahaloy, idinusay ni Daniela an saiyang buhay ki Jehova, nagpabautismo, asin pinonan na aboton an pasohan na maglingkod bilang misyonera. Pagkatapos na sia mag-agom, pinonan ni Daniela, kaiba kan saiyang agom na si Helmut, an paghuhulit sa mga populasyon na Aprikano, Indian, Intsik, asin Pilipino na nasa Vienna. Si Daniela asin Helmut naglilingkod na ngonyan bilang mga misyonero sa timog-solnopan na Aprika.

Dai Sinda Minaontok

8. Ano an sarong nakakakontentong paagi na ikinapaheling nin dakol an saindang pagkamoot sa Dios asin kaimbodan sa saiyang Kahadean?

⁸ Tunay nanggad, an paglilingkod bilang misyonero saro sa mga paagi na ikinakapaheling kan banwaan ni Jehova ngonyan an saindang pagkamoot sa Dios asin kaimbodan sa saiyang Kahadean. Arog kan negosyante sa parabola ni Jesus, an mga naglalaog sa paglilingkod na ini andam na magbiahe sa hararayong lugar para sa kapakanan kan Kahadean. Siempre, an mga misyonerong ini dai nagbibiahe tanganing hanapon an maogmang bareta kan Kahadean; dinadara ninda iyan sa mga tawo sa hararayong lugar kan daga, na tinotokdoan asin tinatabangan sinda na magin mga disipulo ni Jesu-Cristo. (Mateo 28:​19, 20) Sa dakol na kadagaan, kaipuhan nindang tagalan an grabeng kasakitan. Alagad igong binabalosan an saindang pakatagal.

9, 10. Ano an nakakaogmang mga eksperyensia kan mga misyonero sa hararayong lugar na arog kan Republika nin Aprika Sentral?

⁹ Kuanon niatong halimbawa an Republika nin Aprika Sentral, na kan nakaaging taon 16,184 an kabilangan nin mga nag-atender sa Memorial kan kagadanan ni Cristo, mga pitong doble kan kabilangan kan mga parahayag kan Kahadean sa nasyon na iyan. Mantang an dakol na parte kan nasyon na iyan mayong elektrisidad, an pan-aroaldaw na mga gibohon kan mga tawo parateng ginigibo ninda sa luwas sa sirong nin kahoy. Kaya natural sana para sa mga misyonero na gibohon an saindang paghuhulit sa kaparehong paagi​—ginigibo sa luwas an mga pag-adal sa Biblia sa sirong nin malimpoy na kahoy. Bako sanang mas maliwanag asin mas presko sa luwas kundi igwa man nin saro pang bentaha. An mga tawo igwa nin natural na pagkamoot sa Biblia, asin an pag-orolay dapit sa relihiosong mga bagay ordinaryo na sana kapareho nin pag-erestoryahan manongod sa isport o sa kamugtakan nin panahon sa ibang mga kultura. Sa parate, naririsa kan nag-aaragi an nangyayari asin basta na sana minaayon sa pag-adal.

¹⁰ Huli kaini, kan an sarong misyonero may inaadalan sa Biblia sa luwas, an sarong hoben na lalaki na nakaistar sa ibong kan tinampo nagrani asin nagsabi na huling dai pa sia nadudumanan, maninigong dumanan sia kan misyonero asin adalan man sia sa Biblia. Siempre, naogma an misyonero na gibohon iyan, asin an hoben na lalaki marikas na nag-ooswag. Sa nasyon na iyan, parateng pinapapondo nin pulis an mga Saksi sa tinampo, bako na tanganing sitahon o pamultahon sinda, kundi tanganing humagad nin pinakabagong mga luwas kan magasin na Torrengbantayan asin Awake! o tanganing pasalamatan sinda sa artikulo na partikularmenteng nagustohan ninda.

11. Sa ibong nin mga kasakitan, ano an namamatean kan haloy nang mga misyonero manongod sa saindang paglilingkod?

¹¹ An dakol na naglaog sa paglilingkod bilang misyonero kaidtong 40 o 50 taon na an nakaagi maimbod pa man giraray na naglilingkod sa langtad. Kanigoan na halimbawa nin pagtubod asin pagmamaigot para sa sato gabos! Sa nakalihis na 42 na taon, an sarong mag-agom magkaibanan na naglingkod bilang mga misyonero sa tolong laen-laen na nasyon. An agom na lalaki nagsabi: “Nagkaigwa nin mga kadepisilan. Halimbawa, linabanan niamo an malaria sa laog nin 35 taon. Pero, nungka niamong pinagbasolan an samong desisyon na magin mga misyonero.” Idinugang kan saiyang agom: “Pirmeng kadakol kan dapat ipagpasalamat. An ministeryo sa langtad sarong kagayagayahan nanggad, asin pasil na magbukas nin mga pag-adal sa Biblia. Kun naheheling nindo an mga inaadalan sa Biblia na nag-aatender sa mga pagtiripon asin nagkakamiridbidan, garo iyan pagtiripontipon nin pamilya sa kada pagtiripon.”

‘Ibinibilang Ninda an Gabos na Bagay na Kapierdihan’

12. Paano ikakapahayag an tunay na pagpahalaga sa halaga kan Kahadean?

¹² Kan manompongan kan nagbibiaheng negosyante an perlas na halangkaw an halaga, “naghale sia asin ipinabakal tolos an gabos niang sadiri patin binakal iyan.” (Mateo 13:46) An pagigin andam na ini na butasan an ano man na ibinibilang na mahalaga karakteristiko kan mga tunay na nagpapahalaga sa halaga kan Kahadean. Bilang saro na makakaibanan ni Cristo sa kamurawayan kan Kahadean, si apostol Pablo nagsabi: “Tunay na ibinibilang ko man an gabos na bagay na kapierdihan huli sa daing kaagid na halaga kan kaaraman manongod ki Cristo Jesus na sakong Kagurangnan. Huli saiya tinios ko an pagkawara kan gabos na bagay asin ibinibilang ko an mga iyan na tapok, tanganing makamtan ko si Cristo.”​—Filipos 3:8.

13. Paano ipinaheling nin sarong taga Republikang Czech an saiyang pagkamoot para sa Kahadean?

¹³ Sa kaparehong paagi, dakol ngonyan an andam na gumibo nin dakulang mga pagbabago sa saindang buhay tanganing kamtan an mga bendisyon kan Kahadean. Halimbawa, kan Oktubre 2003, an 60 anyos na prinsipal nin sarong eskuelahan sa Republikang Czech nakakua nin pantabang sa pag-adal kan Biblia na Kaaraman na Minagiya Pasiring sa Buhay na Daing Katapusan. Pakabasa kaiyan, tolos-tolos niang kinontak an mga Saksi ni Jehova sa lugar nia tanganing magkaigwa nin pag-adal sa Biblia. Nagin marahay an saiyang pag-oswag sa espirituwal asin dai nahaloy nagpoon nang atenderan an gabos na pagtiripon. Pero, paano na an saiyang mga plano na kumandidato sa pagkaalkalde asin sa huri umentra sa eleksion sa pagkasenador? Pinili niang lumaog sa ibang karera​—an karera para sa buhay, bilang sarong parabalangibog kan Kahadean. Sia nagsabi, “Nakapasakamot ako nin kadakol na literatura sa Biblia sa sakong mga estudyante.” Sinimbolisaran nia an saiyang pagdusay ki Jehova paagi sa pagpabautismo sa tubig sa sarong kombension kan Hulyo 2004.

14. (a) An maogmang bareta kan Kahadean nagpahiro sa minilyon na gibohon an ano? (b) Anong nakakapapensar na mga hapot an puedeng ihapot sa sadiri kan lambang saro sa sato?

¹⁴ Minilyon na iba pa sa bilog na kinaban an naghimate sa maogmang bareta kan Kahadean sa parehong paagi. Nagruluwas sinda sa maraot na kinaban, hinale an saindang daan na personalidad, binayaan an saindang dating kairiba, asin binutasan an saindang kinabanon na mga pinag-aaabot. (Juan 15:19; Efeso 4:​22-​24; Santiago 4:4; 1 Juan 2:​15-​17) Taano ta ginigibo ninda an gabos na ini? Huling pinapahalagahan ninda an mga bendisyon kan Kahadean nin Dios nin orog pa kisa ano man na ikakatao kan presenteng sistema nin mga bagay. Arog man daw kaiyan an saindong namamatean manongod sa maogmang bareta kan Kahadean? Namomotibar daw kamo kaiyan na gibohon an kinakaipuhan na mga pagbabago tanganing ioyon sa mga kahagadan ni Jehova an saindong estilo nin pamumuhay, mga pamantayan sa buhay, asin mga pasohan? An paggibo kaiyan maresulta sa mayaman na mga bendisyon para sa saindo, ngonyan asin sa ngapit.

An Pag-ani Nagdadangadang sa Katapusan Kaini

15. Ano an ihinula na gigibohon kan banwaan nin Dios sa ultimong mga aldaw?

¹⁵ An salmista nagsurat: “An saimong banwaan gikan sa boot na magpepresentar kan saindang sadiri sa aldaw kan saimong puersa militar.” Kaiba sa mga nagpresentar kan saindang sadiri an “grupo nin hoben na mga lalaki siring kan tagdo kan ambon” asin an “dakulang hukbo” nin “mga babae na nagsasabi kan maogmang bareta.” (Salmo 68:11; 110:3) Ano an nagin resulta kan kahigosan asin pagsakripisyo kan banwaan ni Jehova​—mga lalaki asin babae, hoben asin gurang​—sa ultimong mga aldaw na ini?

16. Tumao nin halimbawa kun paano naghihingoa an mga lingkod nin Dios na matabangan an iba na makanood manongod sa Kahadean.

¹⁶ An sarong payunir, o bilog na panahon na parabalangibog kan Kahadean, sa India nag-isip-isip kun paano matatabangan an labi sa duwang milyon na bungog sa nasyon na iyan na makanood manongod sa Kahadean. (Isaias 35:5) Nagdesisyon sia na maglaog sa sarong kurso sa Bangalore tanganing mag-adal nin pagtaram sa senyas. Duman nahimo nia na ikahiras an paglaom sa Kahadean sa dakol na bungog, asin may naorganisar na mga grupo nin pag-adal sa Biblia. Sa laog nin pira sanang semana, labing sarong dosena katawo an nagpoon na mag-atender sa mga pagtiripon sa Kingdom Hall. Paghaloyhaloy, sa sarong punsion sa kasal, nakamidbid kan payunir an sarong hoben na bungog na lalaki na taga Calcutta na kadakol na hapot asin nagpaheling nin makosog na interes na orog pang makaaram manongod ki Jehova. Minsan siring, igwa nin problema. Kaipuhan kan hoben na lalaki na magbalik sa Calcutta, mga 1,600 kilometros an rayo, tanganing ponan an pag-adal sa kolehio, asin mayo nin mga Saksi duman na tatao nin pagtaram sa senyas. Paagi sa dakulang paghihingoa, nakombensir nia an saiyang ama na togotan siang sa Bangalore na sana mag-eskuela tanganing ikapagpadagos nia an pag-adal sa Biblia. Nagin marahay an pag-oswag nia sa espirituwal, asin pakalihis nin mga sarong taon, idinusay nia an saiyang buhay ki Jehova. Inadalan man nia sa Biblia an nagkapirang bungog, kaiba an sarong amigo poon sa pagkaniaki. Inaareglo na ngonyan kan sangang opisina sa India na mag-adal nin pagtaram sa senyas an mga payunir tanganing makatabang sa langtad na iyan.

17. Isaysay an naheling nindo na partikularmenteng nakakaparigon sa boot manongod sa report sa 2004 taon nin paglilingkod na nasa pahina 19 sagkod 22.

¹⁷ Sa pahina 19 sagkod 22 kan magasin na ini, maheheling nindo an pambilog na kinaban na report kan aktibidad sa langtad kan Mga Saksi ni Jehova para sa 2004 taon nin paglilingkod. Tawan nin kadikit na panahon na siyasaton iyan, asin maheheling nindo mismo an ebidensia na an banwaan ni Jehova sa bilog na daga konsentradong marhay sa pagmamaigot na hanapon an “perlas na halangkaw an halaga” ngonyan.

“Padagos na Hanapon Nguna an Kahadean”

18. Anong impormasyon an dai iiniba ni Jesus sa parabola kan nagbibiaheng negosyante, asin taano ta dai?

¹⁸ Kun babalikan niato an parabola ni Jesus kan nagbibiaheng negosyante, maririsa niato na mayo nin ano man na sinabi si Jesus manongod sa kun paano na an magigin pagbuhay kan negosyante pagkatapos na ipabakal an gabos na sadiri nia. Sa totoo sana, an nagkapira tibaad maghapot: ‘Paano makakakua nin kakanon, gubing, asin istaran an negosyante ngonyan na mayo nang natada sa saiya? Ano an pakinabang nia sa mahalagang marhay na perlas na iyan?’ Rasonable an mga hapot na iyan sa makalaman na punto de vista. Alagad bako daw na sinadol ni Jesus an saiyang mga disipulo na: “Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo”? (Mateo 6:31-33) An pangenot na punto kan parabola iyo an pangangaipo na ipaheling an bilog na pusong debosyon sa Dios asin kaigotan para sa Kahadean. Igwa daw ini nin leksion para sa sato?

19. Anong importanteng marhay na leksion an manonodan niato sa parabola ni Jesus kan perlas na halangkaw an halaga?

¹⁹ Baga man bago pa sana niatong manodan an manongod sa makangangalas na maogmang bareta o haloy nang panahon niatong pinagmamaigotan na hanapon an Kahadean asin isinasabi sa iba an manongod sa mga bendisyon kaiyan, dapat na padagos niatong gibohon na pinakasentro kan satong interes asin atension an Kahadean. Masakit an mga panahon ngonyan, alagad igwa kita nin masarig na mga dahelan na maniwala na an satong pinag-aaabot tunay asin daing kaagid​—arog kan perlas na nakua kan negosyante. An mga pangyayari sa kinaban asin naotob na mga hula sa Biblia nagtatao nin nakakakombensir na ebidensia na nabubuhay na kita sa “pagtatapos kan sistema nin mga bagay.” (Mateo 24:3) Arog kan nagbibiaheng negosyante, ipaheling niato an bilog na pusong kaigotan para sa Kahadean nin Dios asin maggayagaya sa pribilehio na magbalangibog kan maogmang bareta.​—Salmo 9:​1, 2.