An Relihiyosong mga Tradisyon Asin an Biblia

“BINABASANG nindo an tataramon nin Dios dahelan kan saindong tradisyon.” Daing ibang nagsabi kaini kundi si Jesu-Cristo. (Marcos 7:13) Kapareho kan dakol na tawo ngonyan, an mga Judio kan kaaldawan ni Jesus maimbod na nagkuyog sa komplikadong mga presepto asin kostumbre. Asin kapareho kan dakol na klerigo ngonyan, ibinilang kan mga namomoon sa saindang relihiyon na an mga tradisyon na ini mas mahalaga kisa Biblia.

Sa pag-ilustrar: An Tataramon nin Dios espisipikong nagboot na igalang nin mga aki an saindang mga magurang. (Exodo 20:12) Malinaw na kaiba digdi an pagtabang sa mga magurang na naholog sa pagtios. Minsan siring, nagkaigwa nin Judiong tradisyon na nagtao nin kombenyenteng paagi na malikayan an Biblikal na paninimbagan na ini. An kaipuhan sanang gibohon nin sarong paslong tawo ipanuga na an personal niang rogaring sa huri idodonar sa templo, na ilinalaen an rogaring na iyan sa pagsabi na iyan “corban.” An terminong ini nangahulogan “sarong regalo na dusay sa Dios.” Minsan ngani an Judiong parasamba malinaw na libreng padagos na gamiton an corban na ini para sa personal niang pakinabang, puwede niang ipanguri iyan na may kabanalan sa saiyang mga magurang.—Marcos 7:9-12.

Alagad ta inangat ini ni Jesus asin an iba pang Judiong ’banal na mga tradisyon,’ na sinasabi: “Kamong mga parasaginsagin, marahay nanggad an pagkahula ni Isaias dapit sa saindo, kan sia magsabi, ’An mga tawong ini nagtataong onra sako sa saindang mga ngabil, alagad an saindang puso harayo sako. Sayang sana na sinda nagsasamba sako, huli ta itinotokdo ninda bilang mga doktrina an mga pagboot nin mga tawo.’”—Mateo 15:3-9.

Huli sa isinabi ni Jesus, talaga daw na ikabibilang nin sarong Kristiano an ano man na relihiyosong tradisyon na kapantay kan Biblia? Dai nanggad. Minsan pa guranong sentimiento o emosyon an konektado sa sarong kostumbre, an tatawan nin atension kan Kristiano kun baga iyan oyon sa Tataramon nin Dios o bako. Bilang halimbawa, horophoropa an nagkapirang tradisyonal na relihiyosong akto na sinasabi sa librong Katoliko na Liturgy—An Elementary Course, ni Maria A. Lombillo Clark, T.D. Paano nakakokomparar an mga tradisyon na ini sa aktuwal na sinasabi kan Biblia?

[Kahon]

LITURGY

“Ipinaheheling niato an satong pagsamba sa Dios paagi sa relihiyosong mga akto.”

“Maninigo kitang gumibo nin relihiyosong mga akto sa Kabanalbanaleng Birhen Maria, sa mga anghel, asin sa mga santo. Alagad an [siring na] relihiyosong mga akto nin pagsamba . . . sa katapustapusi nakaaabot sa Dios, kun paanong an sarong hade natatawan nin onra kun tinatawan nin onra an saiyang mga ministro.”

An Krusipiho dai puwedeng mawara sa altar; kun mayo kaini dai maseselebrar an Banal na Misa. Kaipuhan man an tolong mantel sa altar, duwang kandelabra, asin an mga sacramental tablet.”

“Nobyembre 1 . . . an pagselebrar kan Todos los Santos. Iyan an Banal na Aldaw kan gabos na kalag na maogmang nag-iistar sa langit, asin an sarong aldaw na iyan sato.”

“Bilang pagtabang sa mga kalag na ini [an Iglesya] nagtalaan kan ’Paggirumdom sa mga nagadan na maimbod’ sa petsa dos nin Nobyembre. Sa aldaw na ini an mga padi nagmimisa nin tolong beses tanganing mainaan an pagdusa kan mapalad na mga kalag na ini sa purgatoryo asin maapretaran an paglaog ninda sa langit.”

“Sa simpleng pagtaram, an Katolikong doktrina manongod sa purgatoryo basado sa tradisyon, bakong sa Banal na Kasuratan.”—New Catholic Encyclopedia, Tomo 11, pahina 1034.

TATARAMON NIN DIOS

“Saradit na aki, maglikay kamo sa mga ladawan.”—1 Juan 5:21.

“An Dios Espiritu, asin idtong nagsasamba saiya kaipuhan na magsamba saiya sa espiritu asin sa katotoohan.”—Juan 4:24.

“Kita naglalakaw paagi sa pagtubod, bakong paagi sa pakaheling.”—2 Corinto 5:7.

“Ako si Jehova. Iyan an sakong ngaran; asin dai ko itatao sa iba an sakong kamurawayan, ni an sakong kaomawan sa mga imahen.”—Isaias 42:8.

“Dai ka maggibo para sa saimo man sana nin linabrang ladawan o porma na kabaing nin ano man na yaon sa kalangitan sa itaas o yaon sa daga . . . Dai ka maghorohod sa sainda ni madara na maglingkod sa sainda.”—Exodo 20:4, 5.

“Ako si Juan . . . naglaob sa pagsamba sa pamitisan kan anghel . . . Alagad sia nagsabi sako: ‘Mag-ingat ka! Dai mo iyan paggibohon! . . . Sambahon mo an Dios.”—Kapahayagan 22:8, 9.

“Igwa nin sarong Dios, asin sarong tagapag-oltanan sa tahaw nin Dios asin nin mga tawo, an sarong tawo, si Cristo Jesus.”—1 Timoteo 2:5.

“An Dios na naggibo kan kinaban asin kan gabos na yaon dian, mantang, arog kan Sarong ini, Kagurangnan nin langit asin daga, dai nag-eerok sa mga templo na ginibo nin mga kamot.“—Gibo 17:24.

“Kami nakatorohok, bakong sa mga bagay na naheheling, kundi sa mga bagay na dai naheheling.“—2 Corinto 4:18.

“An mga gadan dai nag-oomaw ki Jah, ni an siisay man na naghihilig sa katrangkilohan.”—Salmo 115:17.

“An mga gadan daing ano man na aram.”—Eclesiastes 9:5, Revised Standard Version Common Bible.

“An lambang kalag na habong magdangog sa propetang iyan lalaglagon.”—Gibo 3:23, Douay Version.

“Ni an gibohon, ni pag-isip, ni kadonongan, ni kaaraman mayo sa impierno, na pasiring dian ika naghihidali.”—Eclesiastes 9:10, Douay Version.

“Dai kamo manarig sa [tawo] . . . mabuwelta sia sa saiyang daga: sa aldaw na iyan an gabos nindang isip mapapara.”—Salmo 145:2-4, Douay Version.

Nakalda sa Nakadadanyar na mga Tradisyon

Kaya an dakol na popular na relihiyosong tradisyon dai ikinaoogma nin Dios asin kun siring nakadadanyar. Pero, makawiwili, si apostol Pablo nagsurat: “Ngonyan inoomaw ko kamo huli ta sa gabos na bagay . . . pinangangaptan nindo nin marigon an mga tradisyon siring sa pagkatao ko kaiyan sa saindo.” (1 Corinto 11:2) Alagad, an mga tradisyon na ini marahay, kapakipakinabang na mga gibo na basado sa Tataramon nin Dios—bakong daing kamanungdanan, gibong-tawong mga rituwal. Sinalidahan kaiyan an “daing kamanungdanan na gawe na inako paagi sa tradisyon” na ginigibo kan dakol kaidtong enot na siglo bago nagin Kristiano.—1 Pedro 1:18.

Siring man ngonyan, an tawong matatakton sa Dios dapat na siyasaton nin maingat asin isikwal an ano man na tradisyon na napatunayan na bakong sono sa Kasuratan. Tunay na an relasyon nin saro sa Dios mas mahalaga nanggad kisa ano man na gibong-tawong pagsamba! Siyempre, bako man na pasil an pagsikwal sa mga tradisyon na bakong makakasuratan. Iyan parateng nagkakaipo nin pagliliwat sa haloyon nang pinagkatodan. An sarong barobata sa Colombia, halimbawa, sagom sa relihiyosong tradisyon. Poon sa pagkaniaki malaad an saiyang kamawotan na magin pading Katoliko. Parate siang nagkakawat nin ‘pagmisamisa’ sa saiyang mga tugang na babae, na “pinakukumpisal” pa ngani sinda. Pakalihis nin mga taon naglaog sia sa eskuwelahan antes an seminaryo, asin sa huri naglaog sia sa sarong Katolikong unibersidad. Duman, orog pang natanom sa saiyang buhay an relihiyosong mga tradisyon.

Sarong aldaw, may nagsongkong saro sa mga Saksi ni Jehova sa saiyang harong. Minsan ngani haros dai pinapagtaram an Saksi kan saiyang mga magurang, hinangaan kan relihiyosong barobatang ini an kadikit na nasabi. Kan huri iinareglo niang hilom na makipag-adal kan Biblia sa Saksing ini. “An tunay kong kamawotan,” an paggirumdom nia, “manodan an Biblia sa laen man na punto-de-vista na dai liniliwat an sakong relihiyon. Makosogon an kamawotan ko na maglingkod sa Dios bilang padi, tanganing mabakle an puso nin mga tawo. Pakapag-adal sa Biblia nin sarong bulan, naglataw an pagkakatumang sa sakong boot, ta an mga tradisyon asin rituwal kan sakong relihiyon kontra sa malinig na mga pamantayan kan Kasuratan.”

Pinirit sia kan saiyang pamilya na pumondo sa pag-adal sa Biblia, asin sa katapustapusi napiritan siang humale sa saindang harong. Minsan siring, sia nagsasabi: “Pakalihis nin duwang bulan na pag-adal sa Biblia, nakombensir ako na grabe an sala kan namumugtakan ko, asin binayaan ko an unibersidad asin an trabaho ko bilang maestro sa sarong relihiyosong kolehiyo asin idinusay ko an sadiri ko sa paghuhulit sa harong-harong. Ngonyan naliwat an buhay ko pati an sakong mga kostumbre. Nakamate ako nin espesyal na kaogmahan kaidtong dai ko malilingawan na aldaw na sinimbolisaran ko an sakong pagdusay ki Jehova paagi sa bautismo.” An barobatang ini naglilingkod ngonyan nin bilog na panahon sa pagtabang sa iba na makalda sa mga tradisyon na naglalanghad sa Dios.

Kun kamo odok na debotado sa relihiyosong mga tradisyon, tibaad madiskobre nindo na kaipuhan man nindong magbakle. Girumdoma liwat an isinabi ni Jesus sa Samaritana sa bobon. Sia asin an banwaan nia may suanoy nang kostumbre na sumamba sa Dios sa Bukid nin Gerizim. Alagad ta ipinaliwanag saiya ni Jesus na ini daing kamanungdanan na tradisyon, na sinasabi: “Tuboda ako, babae, An oras madatong na minsan sa bukid na ini o sa Jerusalem dai na nindo sasambahon an Ama. . . . An tunay na mga parasamba masamba sa Ama sa espiritu asin katotoohan, huli ta, sa katunayan, hinahanap kan Ama an mga siring na magsamba sa saiya.”—Juan 4:19-23.

Saro daw kamo na “hinahanap kan Ama”? Igwa daw kamo nin malaad na kamawotan na sambahon an Dios sa katotoohan? Kun siring tamang-tama an patanid ni apostol Pablo sa Colosas 2:8: “Mag-ingat kamo na dai togotan an siisay man na dayaon kamo paagi sa saiyang mga pilosopiya, na may daing kamanungdanan na mga pangarap na kinua sa tradisyon nin tawo.” (The Holy Bible, ni Ronald A. Knox) Imbes, sunodon an mga katokdoan nin tunay na Kristianismo, na magiya sa saindo pasiring sa buhay na daing katapusan!—Juan 17:3.