Hula ni Isaias—Liwanag Para sa Bilog na Katawohan I
Kasumpay kan Kapitulo Kinse: An Konseho ni Jehova Tumang sa mga Nasyon
Natutunaw an Puso kan Egipto
25. Bilang kaotoban kan Isaias 19:1-11, ano an nangyari sa suanoy na Egipto?
25 An pinakaharaning kataed kan Juda sa timog iyo an Egipto, sarong haloy nang kaiwal kan katipan na banwaan nin Dios. Isinasaysay kan kapitulo 19 an maribok na kamugtakan sa Egipto durante kan panahon na nabubuhay si Isaias. Igwa nin guerra sibil sa Egipto, “siudad tumang sa siudad, kahadean tumang sa kahadean.” (Isaias 19:2, 13, 14) An mga historyador nagtatao nin ebidensia nin magkaribal na mga dinastiya na namamahala nin sarabay sa manlaenlaen na kabtang kan nasyon. An ipinaghahambog na kadonongan nin Egipto, kaiba an saiyang ‘daing kamanungdanan na mga dios asin paragayuma,’ dai sia ikinaligtas sa “kamot nin sarong maisog na kagurangnan.” (Isaias 19:3, 4) An Egipto sunod-sunod na kinongkistar kan Asiria, Babilonya, Persia, Grecia, asin Roma. An gabos na pangyayaring ini kaotoban kan mga hula sa Isaias 19:1-11.
26. Sa mas dakulang kaotoban, ano an magigin reaksion kan mga nag-eerok sa “Egipto” sa presenteng aldaw sa mga paghokom ni Jehova?
26 Minsan siring, sa Biblia, an Egipto sa parate nagsisimbolisar sa kinaban ni Satanas. (Ezequiel 29:3; Joel 3:19; Kapahayagan 11:8) Kun siring, igwa daw nin mas dakulang kaotoban an “kapahayagan tumang sa Egipto”? Igwa nanggad! An enot na mga tataramon kan hula maninigong magin dahelan na magmangno an gabos: “Uya! Si Jehova nakasakay sa sarong panganoron na marikas asin pasiring sa Egipto. Asin an daing kamanungdanan na mga dios nin Egipto tatakigan nanggad huli sa saiya, asin an mismong puso kan Egipto matutunaw sa tahaw kaiyan.” (Isaias 19:1) Si Jehova sa dai na mahahaloy mahiro tumang sa organisasyon ni Satanas. Sa panahon na iyan, mapatutunayan na daing kamanungdanan an mga dios kan sistemang ini nin mga bagay. (Salmo 96:5; 97:7) “An mismong puso kan Egipto matutunaw” sa takot. Ihinula ni Jesus an panahon na iyan: “Magkakaigwa nin . . . kahandalan nin mga nasyon, na dai naaaraman an gigibohon huli sa hagobohob kan dagat asin kan mga alon, mantang an mga tawo nalulunosan huli sa takot asin paghalat sa mga bagay na maabot sa ineerokan na daga.”—Lucas 21:25, 26.
27. Anong panlaog na pagkabaranga an ihinula para sa “Egipto,” asin paano ini naootob ngonyan?
27 Dapit sa panahon na masagkod sa pagsagibo nia nin paghokom, si Jehova nagsasabi sa makahulang paagi: “Susutsutan ko an mga Egipcio tumang sa mga Egipcio, asin makikiguerra nanggad sinda balang saro tumang sa saiyang tugang, asin balang saro tumang sa saiyang kaibaiba, siudad tumang sa siudad, kahadean tumang sa kahadean.” (Isaias 19:2) Poon kan maestablisar an Kahadean nin Dios kan 1914, an ‘tanda kan presensia ni Jesus’ namidbid sa pagtindog nin nasyon tumang sa nasyon asin kahadean tumang sa kahadean. An mga lagdoan na pangadan nin tribo, madugong pagpara sa bilog na rasa, an midbid sa apod na mga paglinig etniko guminadan nin minilyon durante kan huring mga aldaw na ini. An siring na “mga kolog nin kasakitan” orog sanang magrabe mantang orog na nagrarani an katapusan.—Mateo 24:3, 7, 8.
28. Sa aldaw nin paghokom, ano an magigibo kan falsong relihion tanganing iligtas an sistemang ini nin mga bagay?
28 “Matataranta an espiritu kan Egipto sa tahaw kaiyan, asin riribarawon ko an sadiring konseho kaiyan. Asin siertong madolok sinda sa daing kamanungdanan na mga dios asin sa mga paragayuma asin sa mga patagolainan asin sa propesyonal na mga parahula.” (Isaias 19:3) Kan si Moises umatubang ki Faraon, napasupog an mga saserdote nin Egipto, ta dai ninda mapantayan si Jehova sa kapangyarihan. (Exodo 8:18, 19; Gibo 13:8; 2 Timoteo 3:8) Kaagid kaiyan, sa aldaw nin paghokom, dai ikaliligtas kan falsong relihion an maraot na sistemang ini. (Ikomparar an Isaias 47:1, 11-13.) Sa kahurihurihi, an Egipto nasakop nin “sarong maisog na kagurangnan,” an Asiria. (Isaias 19:4) Ipinanganganino kaini an makamomondong ngapit na napapaatubang sa sistemang ini nin mga bagay.
29. Kun dumatong na an aldaw ni Jehova, may magigibo daw an mga politiko?
29 Pero, kumusta man an politikal na mga namomoon? Makakatabang daw sinda? “An mga prinsipe nin Zoan mangmang nanggad. Kun manongod sa mga madodonong sa mga konsehero ni Faraon, an saindang konseho bakong rasonable.” (Basahon an Isaias 19:5-11.) Kanigoan kabakong rasonable na maglaom na may magigibo an tawong mga konsehero sa aldaw nin paghokom! Dawa pa nasa sainda an gabos na kaaraman kan kinaban, mayo sinda nin diosnon na kadonongan. (1 Corinto 3:19) Hinaboan ninda si Jehova asin naglaom sa siensia daa, pilosopiya, kuarta, kasingawan, asin iba pang kasalihid na mga dios. Bilang resulta, mayo sinda nin kaaraman dapit sa mga katuyohan nin Dios. Sinda nadaya asin nariribaraw. An saindang mga gibo daing kamanungdanan. (Basahon an Isaias 19:12-15.) “An mga madonong nagkasurupog. Sinda nagkatarakot asin madadakop. Uya! Isinikwal ninda an mismong tataramon ni Jehova, asin ano an kadonongan ninda?”—Jeremias 8:9.
Sarong Tanda Asin Sarong Patotoo Para ki Jehova
30. Sa paanong paagi na “an daga kan Juda magigin dahelan nin pagripaydipay nin Egipto”?
30 Minsan siring, minsan ngani an mga namomoon sa “Egipto” maluya, na “siring sa mga babae,” igwa pa man giraray nin mga indibiduwal na naghahanap nin diosnon na kadonongan. An mga linahidan ni Jehova asin an saindang mga kaibaiba ‘ipinapahayag nin mahiwas an mga kamurawayan nin Dios.’ (Isaias 19:16; 1 Pedro 2:9) Ginigibo ninda an saindang makakaya tanganing patanidan an mga tawo manongod sa maabot na pagbagsak kan organisasyon ni Satanas. Tinatanaw an situwasyon na ini, si Isaias nagsasabi: “An daga kan Juda magigin dahelan nin pagripaydipay nin Egipto. An gabos na pinagsasabihan kaiyan grabe an takot huli sa konseho ni Jehova nin mga hukbo na nagigin konseho nia tumang sa saiya.” (Isaias 19:17) An fiel na mga mensahero ni Jehova nagruruluwas na sinasabi sa mga tawo an katotoohan—kaiba an pagpaisi kan mga damat na ihinula ni Jehova. (Kapahayagan 8:7-12; 16:2-12) Nakapupurisaw ini sa mga namomoon sa relihion sa kinaban.
31. Paano nangyayari na an “lenguahe kan Canaan” an ginagamit sa pagtaram sa mga siudad kan Egipto (a) kan suanoy na mga panahon? (b) sa presenteng mga panahon?
31 Ano an nakabibiglang resulta kan pagproklamar na ini? “Sa aldaw na iyan magkakaigwa nin limang siudad sa daga nin Egipto na nagtataram kan lenguahe nin Canaan asin nanunumpa ki Jehova nin mga hukbo. An Siudad nin Pagkatumpag an iaapod sa sarong siudad.” (Isaias 19:18) Kan suanoy na panahon minalataw na naotob an hulang ini kan an Hebreong lenguahe an ginagamit sa pagtaram sa mga siudad nin Egipto kan mga Judio na nagdulag pasiring duman. (Jeremias 24:1, 8-10; 41:1-3; 42:9–43:7; 44:1) Ngonyan, may mga tawo sa teritoryo kan “Egipto” sa presenteng aldaw na nakanood na magtaram kan “dalisay na tataramon” nin katotoohan sa Biblia. (Sofonias 3:9) An saro sa limang piguratibong siudad inaapod na “An Siudad nin Pagkatumpag,” na nangangahulogan na may kabtang an “dalisay na tataramon” na konektado sa pagbuyagyag asin ‘pagtumpag’ sa organisasyon ni Satanas.
32. (a) Anong “altar” an yaon sa tahaw kan daga nin Egipto? (b) Paanong an mga linahidan kaagid nin “sarong harigi” kataning kan linderos nin Egipto?
32 Nin huli sa pagproklamar kan banwaan ni Jehova, an saiyang dakulang ngaran mamimidbid nanggad sa sistemang ini nin mga bagay. “Sa aldaw na iyan magkakaigwa nin sarong altar para ki Jehova sa tahaw kan daga nin Egipto, asin nin sarong harigi para ki Jehova kataning kan linderos kaiyan.” (Isaias 19:19) An mga tataramon na ini nagtotokdo sa katongdan kan linahidan na mga Kristiano, na may pakipagtipan na relasyon sa Dios. (Salmo 50:5) Bilang “sarong altar” idinodolot ninda an saindang mga atang; bilang “sarong harigi asin sulay kan katotoohan,” sinda nagpapatotoo dapit ki Jehova. (1 Timoteo 3:15; Roma 12:1; Hebreo 13:15, 16) Sinda nasa “tahaw kan daga,” na manonompongan—kaiba kan saindang mga kaibaibang “ibang karnero”—sa labing 230 nasyon asin isla kan dagat. Alagad sinda “bakong kabtang kan kinaban.” (Juan 10:16; 17:15, 16) Sinda garo man sana nagtitindog sa linderos kan kinaban na ini asin kan Kahadean nin Dios, na andam na bumalyo sa linderos na iyan asin akoon an saindang langitnon na balos.
33. Sa anong mga paagi na an mga linahidan “tanda” asin “patotoo” sa “Egipto”?
33 Si Isaias nagpapadagos: “Iyan dapat na magin tanda asin patotoo para ki Jehova nin mga hukbo sa daga nin Egipto; huli ta sinda maagrangay ki Jehova huli sa mga nan-aapi, asin masugo sia sa sainda nin sarong paraligtas, saro na dakula ngani, na aktuwal na magliligtas sa sainda.” (Isaias 19:20) Bilang “tanda” asin “patotoo,” an linahidan nangengenot sa paghuhulit asin pinamumuraway an ngaran ni Jehova sa sistemang ini nin mga bagay. (Isaias 8:18; Hebreo 2:13) Sa bilog na kinaban an mga agrangay kan mga tawong inaapi madadangog, alagad sa pankagabsan, dai sinda kayang tabangan kan mga gobyerno nin tawo. Minsan siring, si Jehova masugo nin sarong Dakulang Paraligtas, si Hadeng Jesu-Cristo, tanganing patalingkason an gabos na mahoyo. Kun umabot na sa kulminasyon an huring mga aldaw na ini sa guerra nin Armagedon, matao sia nin kaginhawahan asin daing katapusan na mga bendisyon sa mga tawong matatakton sa Dios.—Salmo 72:2, 4, 7, 12-14.
34. (a) Paano si Jehova mamimidbid kan “mga Egipcio,” asin anong atang asin regalo an itatao ninda sa saiya? (b) Noarin hahampakon ni Jehova an “Egipto,” asin anong pagpaomay an masunod?
34 Mientras tanto, kabotan nin Dios na an gabos na klase nin tawo magkaigwa nin tamang kaaraman asin makaligtas. (1 Timoteo 2:4) Huli kaini, si Isaias nagsurat: “Si Jehova mamimidbid nanggad kan mga Egipcio; asin mamimidbid kan mga Egipcio si Jehova sa aldaw na iyan, asin sinda matao nin atang asin regalo asin magibo nin promesa ki Jehova asin ootobon iyan. Asin hahampakon nanggad ni Jehova an Egipto. Magkakaigwa nin paghampak asin pagpaomay; asin sinda mabalik ki Jehova, asin totogotan nia na sia mapakimaherakan ninda asin paoomayan nia sinda.” (Isaias 19:21, 22) An mga tawo sa gabos na nasyon kan kinaban ni Satanas, an indibiduwal na “mga Egipcio,” namimidbid si Jehova asin nagtatao nin atang sa saiya, “an bunga nin mga ngabil na nagpapahayag sa publiko kan saiyang ngaran.” (Hebreo 13:15) Sinda naggigibo nin promesa ki Jehova paagi sa pagdusay ninda kan saindang sadiri sa saiya, asin inootob ninda an saindang promesa paagi sa pamumuhay na maimbod na naglilingkod. Kasunod kan ‘hampak’ na itatao ni Jehova sa sistemang ini nin mga bagay sa Armagedon, gagamiton nia an saiyang Kahadean tanganing paomayan an katawohan. Durante kan Milenyal na Paghade ni Jesus, an katawohan papakarhayon an kamugtakan sa espirituwal, mental, moral, asin pisikal na pagkasangkap—pagpaomay nanggad!—Kapahayagan 22:1, 2.
“Bendisyonan Logod an Sakong Banwaan”
35, 36. Bilang kaotoban kan Isaias 19:23-25, nagkaigwa nin anong relasyon kan suanoy na panahon an Egipto, Asiria, asin Israel?
35 Dangan naheling antes pa kan propeta an sarong pambihirang pangyayari: “Sa aldaw na iyan magkakaigwa nin sarong tinampo hale sa Egipto pasiring sa Asiria, asin an Asiria maduman nanggad sa Egipto, asin an Egipto sa Asiria; asin maglilingkod nanggad sinda, an Egipto kaiba an Asiria. Sa aldaw na iyan an Israel magigin ikatolo kaiba kan Egipto asin kaiba kan Asiria, arin na baga, sarong bendisyon sa tahaw kan daga, huli ta binendisyonan iyan ni Jehova nin mga hukbo, na sinasabi: ‘Bendisyonan logod an sakong banwaan, an Egipto, asin an gibo kan sakong mga kamot, an Asiria, asin an sakong mana, an Israel.’” (Isaias 19:23-25) Iyo, maabot an aldaw na magigin magkatood an Egipto asin Asiria. Paano?
36 Kan isalbar ni Jehova an saiyang banwaan sa mga nasyon kan suanoy na mga panahon, naggibo sia para sa sainda nin mga tinampo pasiring sa katalingkasan, sabi ngani. (Isaias 11:16; 35:8-10; 49:11-13; Jeremias 31:21) An sarong limitadong kaotoban kan hulang ini nangyari pakatapos na madaog an Babilonya kan an mga desterrado hale sa Asiria asin Egipto, siring man an hale sa Babilonya, ibinalik sa Dagang Panuga. (Isaias 11:11) Alagad kumusta man sa presenteng mga panahon?
37. Paanong an minilyon ngonyan namumuhay na garo baga may sarong tinampo sa pag-oltanan nin “Asiria” asin “Egipto”?
37 Ngonyan, an natatada kan linahidan na espirituwal na mga Israelita “sarong bendisyon sa tahaw kan daga.” Sinusuportaran ninda an tunay na pagsamba asin ipinahahayag an mensahe kan Kahadean sa mga tawo kan gabos na nasyon. An nagkapira sa mga nasyon na ini garo an Asiria, militaristikong marhay. An ibang nasyon mas liberal, arog gayod nin Egipto—na may panahon kaidto na iyo “an hade kan timog” sa hula ni Daniel. (Daniel 11:5, 8) Minilyon na indibiduwal hale sa militaristikong mga nasyon asin sa mas liberal na mga nasyon an nagpoon na lumakaw sa dalan nin tunay na pagsamba. Sa siring, an mga tawo hale sa gabos na nasyon nagkakasararo sa ‘paglilingkod.’ Mayo nin nasyonalistikong pagkabaranga sa tahaw kan mga ini. Sinda nagkakaminorootmootan, asin totoo nanggad na masasabi na an ‘Asiria naduman sa Egipto asin an Egipto sa Asiria.’ Garo baga may sarong tinampo hale sa saro pasiring sa ibong.—1 Pedro 2:17.
38. (a) Paanong an Israel “magigin ikatolo kaiba kan Egipto asin kaiba kan Asiria”? (b) Taano ta sinasabi ni Jehova na “Bendisyonan logod an sakong banwaan”?
38 Pero, paanong an Israel ‘nagin ikatolo kaiba kan Egipto asin kaiba kan Asiria’? Sa kapinonan kan “panahon kan katapusan,” an kadaklan kan mga naglilingkod ki Jehova sa daga miembro kan “Israel nin Dios.” (Daniel 12:9; Galacia 6:16) Poon kan mga taon nin 1930, naglataw an sarong dakulang kadaklan nin “ibang karnero,” na may daganon na paglaom. (Juan 10:16a; Kapahayagan 7:9) Sa pagluwas sa mga nasyon—na ipinanganino kan Egipto asin Asiria—sinda nagbuburunyog sa harong nin pagsamba ki Jehova asin inaagda an iba na makiayon sa sainda. (Isaias 2:2-4) Ginigibo ninda an paghuhulit na kapareho kan saindang linahidan na mga tugang, tinatagalan an kaagid na mga pagbalo, nagpapaheling kan iyo man sanang pagigin fiel asin integridad, asin nagkakakan sa iyo man sanang espirituwal na lamesa. Totoo nanggad, an linahidan asin an “ibang karnero” “sarong aripompon, sarong pastor.” (Juan 10:16b) Mapagdududahan daw nin siisay man na si Jehova, na nakaheheling kan saindang kaigotan asin pakatagal, naoogma sa saindang aktibidad? Bakong makangangalas na sia nagdeklarar nin sarong pagbendisyon sa sainda, na nagsasabi: “Bendisyonan logod an sakong banwaan”!