Padagos na Ihulit an Kahadean
“An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—MATEO 24:14.
1, 2. (a) Ano an pinakamahalagang gibohon sa siglong ini, asin gurano kahiwas na iyan ginigibo? (b) Ano an ebidensia sa pagbendisyon ni Jehova sa gibohon na ini?
AN PAGHUHULIT kan maogmang bareta kan Kahadean nin Dios iyo an pinakamahalagang gibohon sa siglong ini. Iyan an boot na ipagibo ngonyan kan Makakamhan sa gabos na Dios, asin iyan ginigibo bilang kaotoban kan saiyang makahulang Tataramon. An reaksion nindo dian makaaapektar sa saindong daing sagkod na kaaabtan.—1 Corinto 9:16, 23.
2 Nakaoogmang maheling na an kabilangan kan mga nakikakabtang sa paghuhulit na ini nagpapadagos na dumakol, na ngonyan labi nang tolong milyon an nakikakabtang. Mas dakol kisa kasuarin man an minalaog sa bilog na panahon na ministeryo. Asin dakol pang interesado an nag-aako nin pag-adal sa Biblia asin naghihingoa na makanood na mag-otob kan kabotan nin Dios.
3. Ano an tibaad sabihon nin iba manongod sa pangangaipo na ipagpadagos an paghuhulit kan maogmang bareta?
3 Alagad, kun beses an iba tibaad “mag-ontok sa paggibo nin karahayan” asin “mapagal” kun dapit sa paghuhulit. (Galacia 6:9; Hebreo 12:3) Tibaad sabihon ninda na an maogmang bareta ikinahulit na nin igo sa saindang teritoryo asin an mga tawo may paninindogan na asin ngonyan nauuyam kun kita minaduman sa saindang harong. An mga naggigibo kan paghuhulit dian pipira sana o mayo pa nganing nakakamtan na resulta. Kaya, paghona ninda, seguro tapos na an trabaho, asin dai na kaipuhan na magpadagos. Ano an sala sa kaisipan na ini?
Taano ta Magsisigesige?
4. Ano an maninigong magmotibar sato na magpadagos sa paghuhulit dawa sa teritoryo na maluya an pag-ako?
4 Enot, an pagtagal niato na may kaimbodan sa paghuhulit dai maninigong magdepende sa kun baga naghihinanyog sa sato o dai an mga tawo. Si Jeremias naghulit sa laog nin 40 taon sa Jerusalem minsan ngani pipira an naghinanyog asin dakol an madahas na nagtumang sa saiya. Taano ta nagsigesige sia? Huli ta an ginigibo nia ipinagboot ni Jehova asin huli ta an saiyang makahulang kaaraman sa mangyayari sa Jerusalem puminirit sa saiya na padagos na magtaram. (Jeremias 1:17-19) Sia nagsabi: “Sa sakong puso iyan nagin siring sa naglalaad na kalayo na tuminaros sa sakong mga tolang; asin ako napagal sa pagpogol kaiyan, asin dai ko na iyan natagalan.” (Jeremias 20:7-10) Nakaaagid an satong kamugtakan. Si Jehova, paagi ki Jesu-Cristo, an nagboot na an “maogmang bareta” ihulit sa bilog na ineerokan na daga. (Mateo 24:14) Kun an mga tawo habong maghinanyog, ini nagtatao sato nin oportunidad na ipaheling an rarom kan satong pagkamoot asin debosyon ki Jehova paagi sa pagpadagos sa paggibo kan tama. (1 Juan 5:3) Apuwera kaiyan, kun hinohorophorop niato an tagama kan harani nang ngapit para sa katawohan, paano kita makapagpopogol na patanidan an satong pagtaraed?—2 Timoteo 4:2.
5. (a) Huli sa ano pang ibang dahelan na kita maninigong magtagal sa paghuhulit? (b) Paano nagigin pasisikadan sa paghokom an paghuhulit?
5 Dugang pa, an paghuhulit ni Jeremias sa katunayan gibong paghohokom. Kan 607 B.C.E., mayo sa mga nagadan o nabihag kan bumagsak an Jerusalem na makapagsasabi na dai ninda aram kun taano ini ta nangyayari sa sainda. Sa laog nin 40 taon bago kaini, pinatanidan sinda ni Jeremias manongod sa siring nanggad na resulta kun sinda magpapadagos na magrebelde tumang ki Jehova. (Ikomparar an Ezequiel 2:5.) Siring man ngonyan, an paghuhulit kan maogmang bareta bilang “patotoo sa gabos na nasyon” pasisikadan sa paghokom. Liniwanag ini ni apostol Pablo kan sabihon nia na si Cristo Jesus mamamalos sa “mga dai nakakamidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus.” (2 Tesalonica 1:8, 9) An mga tawo hohokoman basado sa saindang reaksion sa maogmang bareta. Kaya, an paghuhulit kaipuhan na magpadagos nin makosog asin klaro sagkod sa katapusan. (Kapahayagan 14:6, 7) Mayo nin ano man na maninigong makaolang sa pagdara kan mahalagang mensaheng ini sa mga tawo sa pinakaparateng mapupuwede. Ini nagtatao nin dakulang paninimbagan sa gabos na nagdusay na lingkod ni Jehova.
6. Minsan ngani tibaad aram nin dakol an satong mensahe, taano ta kaipuhan kitang magpadagos sa paghuhulit?
6 Totoo, tibaad ikinahulit na niato nin igo an maogmang bareta sa satong lugar. Alagad ta kadakol kan nangyayari sa kinaban kaya minsan ngani dakol na an nakadangog kan satong mensahe, madali ninda iyan na malilingawan kun mapondo kita sa paghuhulit. Isip-isipa an mga rebolusyon, an ginigibo nin mga terorista, pagwelga, iskandalo, asin iba pang mga pangyayari na nababaretang gayo. Yaon man an kadakol na klase nin popular na aling-alingan asin iba pang pan-istorbo. Kaipuhan kitang magpadagos sa paghuhulit tanganing ipagirumdom sa mga tawo an satong mensahe sa ibong kan gabos na ini na nakakukua sa saindang atension.
7. Paano an reaksion kan dakol ngonyan nakaaagid sa reaksion kan mga Israelitas sa paghuhulit ni Isaias, alagad taano ini ta dai maninigong makaolang sa sato sa paghuhulit?
7 Kun dakol an dai nag-iintindi sa sato, maninigo niatong girumdomon kun anong klaseng mga tawo an kaipuhan na hulitan ni propeta Isaias. Sinabihan sia ni Jehova: “Huli ta iyan banwaan na masumbikal, mga aking putikon, mga aki na habong magdangog sa pagboot ni Jehova; na nagsabi sa mga nakaheheling, ‘Dai kamo magheling,’ asin sa mga nagkakaigwa nin bisyon, ‘Dai kamo maghula para sa samo nin ano man na tanos. Itaram nindo sa samo an magagayon na bagay; maghula kamo nin mapandayang mga bagay. Bayae nindo an dalan; sumuhay kamo sa dalan. Paontoka an Banal na Saro nin Israel huli sana sa samo.’” Minsan siring, si Isaias maimbod na nagsabi sa banwaan: “Si Jehova Dios nin paghokom. Maogma an gabos na naghahalat sa saiya.” (Isaias 30:9-11, 18) Maninigo niatong gibohon an siring. Sagkod na kita sige-sige sana, an satong mensahe makatataros minsan paano. An iba maghihinanyog asin an iba dai. Alagad an gabos magkakaoportunidad na makadangog.
‘Paano Sinda Makakadangog?’
8. Minsan ngani an mga tawo garo baga naninindogan na tumang sa katotoohan, anong mga bagay an tibaad makaliwat sa saindang isip?
8 Tibaad pinaghohona niato na an mga tawo sa sarong teritoryo nanindogan na asin determinado na isikwal an satong mensahe o tumangon pa ngani iyan. Alagad girumdoma, an kamugtakan sa buhay nin mga tawo perming nagliliwat. Tibaad sinda mapaatubang sa bagong mga problema o situwasyon sa aga, sa masunod na semana, o sa masunod na bulan na dahelan na sinda mag-ako sa katotoohan. Tibaad makabareta sinda nin makatatakot na mga pangyayari sa kinaban o tibaad mag-agi nin pagtios, helang, o kagadanan sa pamilya. An siring na mga bagay tibaad magpangyari sainda na mapagmata asin magmawot na maaraman an dahelan kan saindang kasakitan. Kun kita magpapadagos na maghulit, maaaraman ninda kun saen sinda madolok.
9. Paano ikababaing an satong paghuhulit sa mga parasalbar sa sarong lugar nin kalamidad?
9 An kamugtakan niato ikababaing sa mga parasalbar sa sarong lugar nin kalamidad, arog baga pakatapos nin linog. An iba tibaad nagtatrabaho sa sarong lugar na mas kadikit an nanonompongan na natadang buhay, alagad an bagay na an saindang mga kapwa trabahador nakakanompong nin mas dakol na natadang buhay sa ibang lugar dai magigin dahelan na sinda maghinugak asin pumondo. Imbes, an gabos na parasalbar daing kapagalan na naghihingoa dawa kun sa paghona ninda tibaad mayo na nin natadang buhay sa lugar na iinasignar sa sainda. Dangan, kun beses nakakanompong sinda nin saro pang buhay. Pinapopondo sana an paghanap kun an panahon na nag-agi nagpapaheling na mayo na nin paglaom. Bueno, an paghanap niato dai pa pinapopondo, asin nakakanompong pa kita nin riniboribo na boot na maligtas sa daan na kinaban na ini asin matadang buhay sa “dakulang kahorasaan.” (Kapahayagan 7:9, 14) Dawa sa mga lugar na lubos nang nagibo asin an kadaklan na tawo dai nag-aako, igwa pa man giraray nin pirang ibinubunga. Asin igwa nin dugang pang mga dahelan sa pagpapadagos na maghulit.
10. Paano sana maaaraman nin mga tawo kun saen sinda madolok kun gusto nindang hanapon an katotoohan, sono sa Roma 10:13, 14?
10 An mga tawo kaipuhan na padagos na pagirumdomon na “an gabos na nag-aapod sa ngaran ni Jehova maliligtas.” Minsan siring, arog kan pagpapadagos ni Pablo sa saiyang surat sa mga taga-Roma, “paano sinda mag-aapod sa saiya na dai ninda tinutubod? Asin paano man sinda matubod sa saiya na dai man ninda nadangog? Asin paano man sinda makakadangog kun mayo nin parahulit?” (Roma 10:13, 14) An mga tataramon na ini maninigong magdoon sa lambang saro sato kan pangangaipo na magsigesige sana sa paghuhulit kan maogmang bareta kan Kahadean nin Dios.
11. Ano an paninimbagan niato sa mga hobenes na nagdadakula pasiring sa tamang edad?
11 Mantang nagpapadagos an panahon kan katapusan, may namundag na mga aki asin an mga ini nagdakula pasiring sa tamang edad o edad nin responsibilidad. Parate na an mga hobenes na ini dai nagtao nin atension sa katotoohan. An saindang mga magurang tibaad nagsikwal sa mensahe asin nagtaram pa tumang dian. Alagad ngonyan an mga hobenes na ini nasa edad na tanganing magsadiring horophoropon an mga kamugtakan sa kinaban, an ngapit, asin an saindang katuyohan sa buhay. Sinda man kaipuhan na mag-apod sa ngaran ni Jehova tangani sindang maligtas. Alagad “paano . . . sinda matubod sa saiya na dai man ninda nadangog?” (Roma 10:14) Sa dakol na kaso an mga tin-edyer asin hobenes na ini nag-aako kan katotoohan, kaya kaipuhan na hanapon niato sinda asin hulitan sinda.
12. Paano an satong pagpapadagos sa paghuhulit kapahayagan kan pagkaherak ni Jehova?
12 An bagay na an dalan bukas pa para sa paghuhulit kapahayagan kan pagkaherak ni Jehova. Si apostol Pedro nagsurat: “Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta habo nia na an siisay man malaglag kundi boot nia na an gabos makapagsolsol. Dugang pa, ibilang nindo an pagpapasensia kan satong Kagurangnan na kaligtasan.” (2 Pedro 3:9, 15) An pagmawot ni Jehova na an gabos na klase nin tawo maligtas ipinahahayag bako sanang kan saiyang mapasensiang pagtao nin panahon bago sia maghokom kundi siring man kan saiyang padagos na pakiolay sa mga tawo na dumolok sa saiya asin maligtas. (1 Timoteo 2:4) Mantang kita nagpapadagos na ihulit an maogmang bareta, itinatampok niato an pagkaherak nin Dios, asin sa paaging ini inoomaw niato sia.
Paglikay sa Pagkakasala sa Dugo
13, 14. (a) Paano an satong paghuhulit ikababaing sa gibo nin sarong bantay, arog kan sinasabi sa hula ni Ezequiel? (b) Taano ta nasabi ni Pablo na sia ‘malinig sa dugo kan gabos na tawo,’ asin paano sana ini masasabi ngonyan nin mga Saksi ni Jehova?
13 An paninimbagan kan nagdusay na mga Saksi ni Jehova na patanidan an mga tawo manongod sa nagdadangadang na paghokom nin Dios ikakokomparar sa paninimbagan ni Ezequiel kan saiyang panahon. Ibinugtak siang bantay sa harong ni Israel. An asignasyon sa saiya patanidan an mga Israelitas na maabot sa sainda an paglaglag kun dai ninda tatalikdan an saindang maraot na mga gibo. Kun sia bilang bantay dai makatao kan patanid, lalaglagon pa man giraray an mga maraot, alagad an saindang dugo mapapasa payo kan pabayang bantay. Digdi ipinaheheling ni Jehova an saiyang kaisipan sa paghohokom: “Naoogma ako, bakong sa pagkagadan kan maraot, kundi sa bagay na an sarong maraot minatalikod sa saiyang dalan asin magdanay na mabuhay. Talikod kamo, talikod kamo sa saindong maraot na mga dalan, huli ta taano ta kaipuhan pa kamong magadan, O harong ni Israel?”—Ezequiel 33:1-11.
14 Inadmitir ni apostol Pablo an saiyang paninimbagan bilang bantay, na sinasabi sa kamagurangan na taga-Efeso: “Kaya inaapodan ko kamong magpatotoo sa aldaw mismong ini na malinig ako sa dugo kan gabos na tawo.” Taano ta nasabi nia iyan? Sia nagpadagos: “Huli ta dai ako nagpogol sa pagsabi sa saindo kan gabos na sadol nin Dios.” (Gibo 20:26, 27) Iyo man sa grupong bantay ngonyan, an natatada sa linahidan na mga parasunod ni Jesu-Cristo. An gabos na ini, kaiba an labing tolong milyon nindang kairiba na may paglaom na makaligtas sa katapusan kan palakaw na ini nin mga bagay asin mag-ako nin buhay na daing katapusan digdi sa daga, noarin man dai dapat na manluya sa paghuhulit kan maogmang bareta kan Kahadean nin Dios asin pagpatanid manongod sa nagdadangadang na paghokom nia. Sa paaging ini nalilikayan ninda an pagkakasala sa dugo.
15. Sono sa Ezequiel kapitulo 9, siisay an tinandaan, asin siisay an nantanda?
15 An paghuhulit ngonyan makahulang ilinadawan sa Ezequiel kapitulo 9. Digdi, diniterminaran na an padusa ni Jehova sa siudad nin Jerusalem. Bago gibohon an paghokom na iyan, an sarong lalaki na may gubing na lino asin may tintero nin sekretaryo sa saiyang habayan sinabihan na umagi sa siudad asin bugtakan nin tanda sa angog an gabos na nag-aaragagha huli sa makababaldeng mga bagay na ginigibo duman. Kun matapos an gibong pagtandang ini, an gabos sa siudad apuwera an natandaan para maligtas gagadanon. Sa mapangganang pagkatapos kan saiyang gibong pantanda, an lalaki nagsabi: “Ginibo ko na an siring sa ipinagboot mo sa sako.” (Ezequiel 9:11) Maimbod niang inotob an saiyang asignasyon sagkod na matapos.
16. (a) Siisay an ilinaladawan ngonyan kan lalaki na may gubing na lino? (b) Paano an isyu sa pagbindikar sa soberaniya ni Jehova nagtutulod sato na magpadagos sa paghuhulit?
16 An lalaki na may gubing na lino naglaladawan sa linahidan na natatada sa mga parasunod ni Cristo, asin may nakiiba sa saindang “dakulang kadaklan” nin “ibang karnero.” An dakulang isyu ngonyan, kapareho kan panahon ni Ezequiel, iyo an pagbindikar sa soberaniya ni Jehova. Manongod sa katapusan kan presenteng maraot na palakaw na ini nin mga bagay sa ralaban kan dakulang aldaw nin Dios na Makakamhan sa gabos, si Jehova nagsabi: “Asin kaipuhan na maaraman kan mga nasyon na ako si Jehova.” (Kapahayagan 7:9; Juan 10:16; Ezequiel 39:7) Tanganing maaraman ini kan mga nasyon, kaipuhan na an mga lingkod ni Jehova digdi sa daga magpadagos sa paghuhulit kan saiyang ngaran asin katuyohan bilang patotoo sa gabos na nasyon.
17, 18. (a) Paano an satong pagpapadagos na maghulit nakatatabang sato na magbantay? (b) Anong report an gusto niato gabos na itao ki Jehova kun tapuson na nia an paghuhulit, asin paano sana niato ini magigibo?
17 Paagi sa padagos na paghuhulit kan maogmang bareta kan Kahadean, napagdadanay niato an satong pagbabantay. Permi niatong nagigirumdoman an halaga kan ngaran asin katuyohan ni Jehova. Kun kita manluluya, puwedeng lumuya an satong paglaom sa Kahadean asin puwede kitang madara kan “mga kahaditan asin kayamanan patin kaalingan kan buhay na ini . . . asin mayo nin ano man na dinadara sa pagkasangkap.” (Lucas 8:14) Paagi sa mahigos na paghihingoa sa pagpahayag kan “maogmang bareta,” maimbod niatong kinukuyog an mga pagboot kan satong Kagurangnan, si Jesu-Cristo: “Magbantay kamo, magpuka kamo, huli ta dai nindo aram kun noarin an itinalaan na panahon. Alagad an isinasabi ko sa saindo isinasabi ko sa gabos, Magpuka kamo.”—Marcos 13:10, 33, 37.
18 Kaya, kita gabos sige-sige sana sa paghanap sa ‘mga nag-aaragagha’ sagkod na itinatao ni Jehova an panahon para kaiyan. Kita logod gabos, baga man kabilang sa linahidan na natatada o sa “ibang karnero,” magmaimbod sa pag-otob sa asignasyon sa sato na ihulit an maogmang bareta kan Kahadean sa bilog na ineerokan na daga para sa pagpatotoo sa gabos na nasyon. (Mateo 24:14) Kun tapuson na mismo ni Jehova an gibohon na ini paagi sa pagpopoon kan “dakulang kahorasaan,” an lambang saro logod sa sato makapagsabi ki Jehova, ‘Ginibo mi an siring sa ipinagboot mo.’
Nagigirumdoman daw Nindo?
◻ Ano an ipinaririsa kan mga resulta kun dapit sa satong paghuhulit?
◻ Ano an iba pang dahelan kun taano kita ta maninigong magpadagos na maghulit?
◻ Paano an satong paghuhulit kapahayagan kan pagkaherak ni Jehova?
◻ Paano kita makapagdadanay na malinig sa dugo nin gabos na tawo?
◻ Paano an satong paghuhulit nakatatabang sato na magdanay na nagbabantay?
[Tsart sa pahina 20]
MGA RESULTA NIN PAGHUHULIT SA NAG-AGING PITONG TAON
Bilang nin Nabautismohan Nag-atender sa Memorial Bilang nin mga Pag-adal sa Biblia
1981 119,836 5,987,893 1,475,177
1982 138,540 6,252,787 1,586,293
1983 161,896 6,767,707 1,797,112
1984 179,421 7,416,974 2,047,113
1985 189,800 7,792,109 2,379,146
1986 225,868 8,160,597 2,726,252
1987 230,843 8,965,221 3,005,048