Lakop sa Kinaban na Katiwasayan sa Pagsakop kan “Prinsipe nin Katoninongan”
Kapitulo 14: Pakatapos kan Bagong Tipan—An Milenyal na Kahadean
1, 2. (a) Kiisay ikababaing ngonyan an minilyon na benepisyaryo sa pagpunsionar kan bagong tipan? (b) Ano an sinabi kan mga kondisyones kan bagong tipan?
AN MINILYON na tawo sa bilog na daga nag-ako na nin makangangalas na mga pakinabang gikan sa pagpunsionar kan bagong tipan, minsan ngani sinda mayo sa laog kaiyan. Sinda kapareho kan mga bakong Israelita na nag-iistar sa Israel kaidtong kaaldawan na an Mosaikong tipan nin Pagboot nagpupunsionar pa. (Exodo 20:10) Paano ini nangyari sa nagdadakol na minilyon na benepisyaryo na asosyado sa natatada sa espirituwal na mga Israelitas ngonyan?
2 Sa hula kan Jeremias 31:31-34, an Saro na nagbubugtak kan mga kondisyones kan bagong tipan nagsabi: “Ibubugtak ko an sakong pagboot sa sainda, asin sa saindang puso iyan isusurat ko. Asin ako magigin saindang Dios, asin sinda magigin sakong banwaan.”
3. (a) Sa anong porma itinao sa Israel an pagboot kan daan na Mosaikong tipan? (b) Bago isurat an Kristianong Griegong Kasuratan, saen ipinasurat nin Dios an mga pagboot kan bagong tipan?
3 Sa kaso kan tipan nin Pagboot, si Jehova Dios, paagi ki propeta Moises bilang tagapag-oltanan, itinao sa Israel sa laman “an nasusurat na dokumento . . . , na mga kasugoan.” (Colosas 2:14) Alagad, kumusta man an pagboot kan bagong tipan? An Tagapag-oltanan kaiyan dai iyan iuukit sa gapo, o isusurat sa sarong manuskrito. An Tagapag-oltanan kaiyan daing iwinalat na sadiri niang mga kasuratan. Nasisierto niato kun ano an pagboot kan bagong tipan gikan sa ipinasabong na Kristianong Griegong Kasuratan. (2 Timoteo 3:16) Alagad dawa pa bago ponan na isurat an Griegong Kasuratan, poon kan mga 41 C.E., pinonan na isurat ni Jehova Dios an saiyang pagboot kan bagong tipan. Kasuarin? Kan aldaw nin Pentecostes, 33 C.E. Saen? Kun saen nia haloy nang ipinanuga na isurat iyan: “Ilalagda ko an sakong mga pagboot sa saindang isip, asin sa saindang puso isusurat ko iyan.”—Hebreo 8:10.
4. An pagsurat nin Dios kan mga pagboot nia sa puso asin paglagda kaiyan sa isip kan saiyang mga lingkod magkakaigwa nin anong marahay na epekto?
4 Huling isinurat sa puso, an mga pagboot na iyan mas kadikit an posibilidad na dai na kamotan kan mga nagkukuyog dian. Kun an mga pagboot na iyan ilinagda “sa saindang isip,” mas kadikit an posibilidad na malingawan ninda iyan. Kaya, an mga nag-ootob sa mga pagboot na iyan nagsasabi, sa pananaram kan Salmo 119:97: “Kanigoan an sakong pagkamoot sa saimong pagboot! Sa bilog na aldaw iyan sakong pinaghohorophorop.” Sa kairairaromi kan saindang pagkatawo, ibinubugtak ninda an saindang pagkamoot sa mga pagboot ni Jehova na itinao paagi sa saiyang Tagapag-oltanan, si Jesu-Cristo. Kaya, igwa nin tamang motibasyon, nagdedesisyon sinda na otobon an mahahalagang pagboot na iyan. Ini aplikado pareho sa “sadangoton na aripompon” na nasa laog kan bagong tipan asin sa “dakulang kadaklan” nin “ibang karnero” na, bakong nasa laog kan bagong tipan, kundi sakop kaiyan.—Ikomparar an 1 Juan 5:3; Juan 14:15.
Ibantog an Isyu kan Kahadean!
5. Ano an ihinula kan Tagapag-oltanan kan bagong tipan sa Mateo 24:12-14?
5 An mga nag-ootob sa mga pagboot kan bagong tipan nag-iingat na dai maholog sa ihinula kan Tagapag-oltanan, si Jesu-Cristo, bilang kabtang kan “tanda . . . kan pagtatapos kan palakaw nin mga bagay”: “Huli sa pag-orog nin katampalasanan an pagkamoot nin dakol malipot. Alagad an makatagal sagkod sa katapusan iyo an maliligtas. Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon.”—Mateo 24:3, 12-14.
6. (a) Saro sana daw na hula an Mateo 24:14? (b) Siisay an ibinilang iyan na bako sanang hula, asin ano an masasabi manongod sa saindang pakatagal?
6 An huring mga tataramon na ini manongod sa lakop sa dagang pagpatotoo sa Kahadean bako sanang hula. Idto direktiba sa saiyang mga disipulo na nabubuhay sa “pagtatapos kan palakaw nin mga bagay.” Idto giya para sa saindang tamang paggawe sagkod sa biyong pagkatapos nin sarong palakaw nin mga bagay na daing pagkamoot asin pano nin katampalasanan sa kagabsan, bako sanang nin kadaihan nin paggalang sa pagboot nin Dios. Siisay ngonyan an napatutunayan na tunay na mga Kristiano, na ibinibilang na direktiba sa sainda an mga tataramon na idto ni Jesu-Cristo? An mga katunayan sa kasaysayan na nagdakol poon kan 1919 minasimbag nin totoo, “An mga Saksi ni Jehova”! An saindang kampanya nin pagtotokdo kan Biblia manongod sa Kahadean iyo an pinakadakulang nasa rekord, asin sinda nagpaheling nin pakatagal dian sa nakaaging 69 taon. Taon-taon ngonyan, iyan nagdadakula sa hiwas asin kosog.
7, 8. (a) Kan Guerra Mundial I, ano an prinobaran na gibohon ni Satanas sa mga nasa bagong tipan? (b) Kan panahon pakaguerra, paano nabantog an isyu kan Kahadean?
7 Prinobaran ni Satanas na Diablo na olangon an makangangalas na kampanyang ini nin pagtotokdo kan Biblia paagi sa pagpangyari na mapara an pirang natatada sa espirituwal na mga Israelitas kaidtong Guerra Mundial I. Nasudya sia! Tolos-tolos, pagkabuhay ninda liwat gikan sa garo pagkagadan kan tig-initan nin 1919, ginibo ninda an saindang enot na kombension pakaguerra sa Cedar Point, Ohio, kan Setyembre kaidtong taon na idto. Sa ikaduwang kombension sa Cedar Point kan Setyembre 1922, nabantog an isyu kan Kahadean. Sa ikaapat na aldaw kan kombension na iyan, na may titulong “An Aldaw,” an presidente kan Watch Tower Society dinara sa pambihirang kulminasyon an saiyang nakaoogmang pahayag paagi sa pagsabi:
8 “Kaya buwelta kamo sa langtad, O kamong mga aki kan Kaharohalangkaweng Dios! Isolog nindo an saindong pangalasag! Magin kamong kalmado, mapagbantay, aktibo, mapuso. Magin kamong maimbod asin tunay na mga saksi para sa Kagurangnan. Abante kamo sa pakikilaban sagkod na magaba an gabos na gira kan Babilonya. Ibalangibog an mensahe sa gabos na lugar. Kaipuhan na maaraman kan kinaban na si Jehova an Dios asin na si Jesu-Cristo an Hade nin mga hade asin Kagurangnan nin mga kagurangnan. Ini an aldaw sa gabos na aldaw. Uya, an Hade naghahade na! Kamo an saiyang mga parabareta. Kaya ipaisi, ipaisi, ipaisi an Hade asin an saiyang Kahadean.”
Pagkamidbid ki Jehova na May Orog na Pakamansay
9. (a) Huli sa pagdakol kan ebidensia mapadapit sa matanos na gobyernong iyan, ano an kaipuhan na gibohon na paninindogan nin mga tawo? (b) An mga may paborableng paninindogan tinatawan nin anong kaaraman?
9 Labi nang 70 taon an nag-agi poon kan si Cristo patukawon sa kapangyarihan kan Kahadean kan 1914. Poon kaidto, an ebidensia manongod sa matanos na gobyerno nin Dios nagdakol nanggayod. An mga tawo sa kinaban nin katawohan kaipuhan na manindogan manongod sa isyu kan Kahadean, magsalang apabor sa Kahadean o tumang dian. Asin naootob na sa mga naninindogan apabor sa banal na gobyernong iyan an mahahalagang tataramon na ini kan bagong tipan: “An lambang saro dai matokdo sa saiyang kaibanan asin sa saiyang tugang, na nagsasabi, ‘Midbida si Jehova!’ huli ta sinda gabos makakamidbid na sa sako, pagpoon sa pinakasadit sa sainda sagkod sa pinakadakula sa sainda.”—Jeremias 31:34.
10. (a) Kaya sa anong ngaran na pinonan na akoon kan natatada sa espirituwal na mga Israelitas an “ibang karnero”? (b) Anong kaaraman an nakamtan kan “ibang karnero”?
10 Kan 1935 an natatada sa espirituwal na mga Israelitas pinonan na akoon an “ibang karnero” kan Marahay na Pastor sa aktibong pakikiasosyar sa sainda sa “sarong aripompon” na sakop ni Jesu-Cristo, na sinda gabos mga Saksi ni Jehova. Dangan an mga “ibang karnero,” na nagpoon na dumakol tanganing magin “dakulang kadaklan” na mayo nin itinalaan na bilang, nagpoon, kaiba kan pinaniaki nin espiritung natatada, na ‘kuyogon an mga pagboot nin Dios’ asin otobon an “gibohon nin pagpatotoo ki Jesus.” (Kapahayagan 7:9-17; 12:17) Kaya poon sa kapinonan kan 1935, namidbid man si Jehova kan mga “ibang karnerong” ini “pagpoon sa pinakasadit sa sainda sagkod sa pinakadakula sa sainda.”
11. Paano an Kristianong kaaraman manongod ki Jehova laen asin mas marahay kisa kan mga Judio na sakop kan tipan nin Pagboot?
11 Alagad, paano na an Kristianong kaaraman manongod ki Jehova laen asin mas marahay kisa kaaraman kan mga Judio na sakop kan daan na Mosaikong tipan nin Pagboot? An langitnon na Kaggibo sa bagong tipan nagpadagos sa pagsabi sa sato: “Huli ta ipatatawad ko an saindang sala, asin an saindang kasalan dai ko na gigirumdomon.” (Jeremias 31:34; Hebreo 8:12) Ini huli sa bagay na an bagong tipan basado sa orog karahay na atang paagi sa orog karahay na Tagapag-oltanan. (Hebreo 8:6; 9:11, 12, 22, 23) An orog karahay na tipan kan orog karahay na Tagapag-oltanan dai kaipuhan na otrohon, kapareho kaidtong taonan na Aldaw nin Pagtubos sa irarom kan daan na Mosaikong tipan nin Pagboot. (Hebreo 10:15-18) Huli kan gabos na ini, an kaaraman manongod ki Jehova na nasa mga nasa laog asin sakop kan bagong tipan tunay na mas marahay, mas nakapayayaman, mas mapagmansay, mas kompleto kisa kaaraman manongod sa Dios kan mga Judio na sakop kan tipan nin Pagboot.
12. Orog sa gabos, ano an katongdan ni Jehova para sa mga pinalaog sa bagong tipan asin sa mga sakop kaiyan?
12 Orog sa gabos, si Jehova Dios, an Kaggibo sa Tipan, iyo an Hade kan mga pinalalaog nia sa bagong tipan asin kan mga ibinubugtak niang sakop kaiyan. (Mateo 5:34, 35; Jeremias 10:7) Si apostol Pablo, 1,850 taon bago si Jesus patukawon sa trono bilang an Hade sa kalangitan kan 1914, itinokdo an pagkahade ni Jehova sa mga nagkukuyog sa mga pagboot kan bagong tipan, na an sabi: “Ngonyan mapasa Hade na dai nin katapusan, dai nin pagkalapa, dai naheheling, an solamenteng Dios, an kagalangan asin kamurawayan sagkod noarin pa man. Amen.”—1 Timoteo 1:17.
An Milenyal na Kahadean Pakalihis kan “Dakulang Kahorasaan”
13. (a) Noarin asin sa irarom nin anong mga kamugtakan na an “dakulang kadaklan” lubos na malaog sa mga bendisyon na nagbubulos gikan sa bagong tipan? (b) Anong makangangalas na katuyohan an maootob kan bagong tipan sa panahon na iyan?
13 An “dakulang kadaklan” kan “ibang karnero,” na mayo sa laog kan bagong tipan kundi sakop kaiyan, naglalaom na makasalbar na buhay sa “dakulang kahorasaan.” Pakatapos na malaglag an presenteng palakaw na ini nin mga bagay, kakamtan ninda, sa laog nin sangribong taon, an paghade ni Jesu-Cristo asin kan saiyang kairibang paramana sa sarong nalinigan na daga. (Kapahayagan 7:9-14) Dangan maootob na an katuyohan kan bagong tipan, na pagbilog nin “banwaan para sa espesyal na pagkasadiri” tanganing magin mga paramana sa langitnon na Kahadean nin Dios. (1 Pedro 2:9; Gibo 15:14) Paagi sa Kahadean nin Dios, mabulos nin biyo an mga bendisyon sa “dakulang kadaklan” nin mga nakaligtas na “ibang karnero.” Si Satanas na Diablo asin an saiyang dai naheheling na organisasyon nin mga demonyo ihinolog na kaiyan sa bungaw asin dai na makapangugunlabot.—Kapahayagan 21:1-4; 20:1-3.
14. An nakaligtas na “dakulang kadaklan” nagkaigwa nin anong marahay na preparasyon?
14 An nakaligtas na “dakulang kadaklan” nin “ibang karnero” nagkaigwa nin marahay na preparasyon para sa pamumuhay sa bagong palakaw nin mga bagay. Kapareho kan natatada sa espirituwal na mga Israelitas, namidbid na ninda an Dios “pagpoon sa pinakasadit sa sainda sagkod sa pinakadakula sa sainda.” (Jeremias 31:34) Sa pamimibi sa Dios, an natutukaw na sa tronong Hade sarong beses nagsabi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) Kaya an lakop na kaaraman na ini manongod ki Jehova Dios magbubunga nin daing katapusan na kaligtasan. Ini magigin totoo bako sanang para sa “laman” na maliligtas na buhay sa “dakulang kahorasaan” kundi para man sa binilyon na mga gadan na makakadangog sa tingog kan Hade asin maruluwas sa saindang mga lolobngan nin girumdoman. An gabos na kinakaipuhan na kaaraman dapit ki Jehova itatao sa mga bubuhayon liwat na iyan.—Mateo 24:21, 22; Juan 5:28, 29; Kapahayagan 20:11-15.
15. Taano an pagkaotob kan bagong tipan ta dai magbubunga nin ano man na kapierdihan sa “dakulang kadaklan” kan “ibang karnero”?
15 Makaoogma, an pag-otob sa bagong tipan nin Dios pasiring sa makangangalas na kapangganahan dai magbubunga nin kapierdihan sa “dakulang kadaklan” nin mga arog-karnero na makaliligtas sa kalaglagan kan palakaw na ini nin mga bagay. Imbes, iyan mabukas kan dalan para sa mas makangangalas na mga bendisyon digdi sa nalinigan nang daga na mamanahon ninda asin magkakaigwa sinda nin enot na kabtang sa paggibo kaiyan na magin lakop sa globong paraiso. (Mateo 25:34; Lucas 23:43) Dai na mahahaloy ngonyan, an mga naglalaglag sa daga mawawara na, “alagad idtong mga naglalaom ki Jehova iyo an magmamana kan daga. . . . An mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.” (Salmo 37:9-11) Pag-omawon an Milenyal na Kahadean ni Jehova Dios paagi sa “Prinsipe nin Katoninongan” na masunod sa pagkaotob kan bagong tipan!