Nagigirumdoman daw Nindo?

Nanompongan daw nindo na may praktikal na halaga sa saindo an dai pa sana nahahaloy na mga luwas kan An Torrengbantayan? Kun siring taano ta dai baloon an saindong memorya paagi sa minasunod na mga hapot:

◻ Anong duwang hapot an nakatabang sa dakol na Kristiano na napaaatubang sa mga desisyon dapit sa trabaho na makaabot sa personal na desisyon?

An enot na mahalagang hapot iyo ini: Kinokondenar daw sa Biblia an sekular na trabaho mismo? An ikaduwang hapot: An paggibo daw kan trabahong ini magibo sa saro na komplise sa sarong kinokondenar na gibo?—4/15, pahina 28.

◻ Sa anong paagi na ‘an linalang na tawo ipinasakop sa kasayangan’? (Roma 8:20)

Kita “ipinasakop sa kasayangan” huli sa mga ginibo kan satong orihinal na mga magurang, si Adan asin Eva. “Bakong sa sadiring boot” niato o bilang resulta nin personal na pagpili nin indibiduwal kaya nangyari ini. Minana ta iyan. Minsan ngani an ikakapamana sana kan satong orihinal na mga magurang ngonyan iyo an pagkabakong sangkap, kasalan, asin kagadanan, may pagkaherak na tinogotan pa sinda ni Jehova na mangaki. An kagadanan nakalakop sa gabos na tawo, kaya sa sentidong iyan an mga linalang “ipinasakop [nin Dios] sa kasayangan.”—5/1, pahina 5.

◻ Taano ta makatanosan na sabihon na magkakaigwa nin ngapit na ‘pagtindog sa sarong banal na lugar’ kan “makababaldeng bagay”? (Mateo 24:15)

Sa suanoy na modelo, ‘an makababaldeng bagay na nagtitindog sa sarong banal na lugar’ konektado sa pagsalakay kan mga Romano sa pangengenot ni Heneral Gallo kan 66 C.E. An kaagid kan pagsalakay na iyan sa presenteng aldaw—an biglang pag-abot kan “dakulang kahorasaan”—sa ngapit pa. (Mateo 24:21) Kaya “an makababaldeng bagay na nagpapangyari nin kagabaan” matindog sa sarong banal na lugar sa ngapit pa.—5/1, pahina 16, 17.

◻ Paano an nagtatrabahong ama asin ina makanonompong nin panahon tanganing makaibaiba an saindang mga aki?

An ina na pagal-pagal na pakatapos na magtrabaho maghapon puedeng magpatabang sa saiyang mga aki sa pagluto. An ama na kadakol na gigibohon kun Sabado asin Domingo puedeng gibohon an nagkapira sa mga trabahong iyan na kaibanan an saiyang mga aki.—5/15, pahina 6.

◻ Ano an dapat na gibohon kan mga ‘naglalakaw sa dalan ni Jehova’? (Jeremias 7:23)

An paglakaw sa dalan ni Jehova naghahagad nin kaimbodan—determinasyon na sia sana an paglingkodan. Iyan naghahagad nin tiwala—bulaos na pagtubod na an mga panuga ni Jehova masasarigan asin maootob. An paglakaw sa dalan ni Jehova naghahagad nin pagkuyog—pagsunod sa saiyang mga ley na mayo nin pagsuway asin pag-otob sa saiyang haralangkaw na pamantayan. (Salmo 11:7)—5/15, pahina 14.

◻ Ano an apat na importanteng paninimbagan na puedeng otobon kan “balaog na mga lalaki?” (Efeso 4:8)

Puede kita nindang mapagpadangat na pakarhayon giraray, may pagkamoot na pinakokosog kita, nakakokontribwir sa satong pagkasararo sa kongregasyon, asin mapuso na pinoprotehiran kita. (Efeso 4:12-14)—6/1, pahina 14.

◻ Ano an manonodan niato sa pakiibaiba ni Pablo sa mga sanggatos na indibiduwal na nasambitan sa Gibo asin sa saiyang mga isinurat?

Maninigo na kita pirmeng makipagtabangan sa organisasyon nin Dios, sa satong lokal na kongregasyon, asin sa satong mga kapagtubod. Kaipuhan ta an saindang tabang, suporta, asin pagranga sa marahay na mga panahon asin sa mapurisaw na mga panahon.—6/1, pahina 31.

◻ Anong tolo an kabtang na pangangatanosan an puedeng gamiton sa pagtabang sa iba na mag-isip-isip manongod sa Kaglalang?

An pagkaeksakto na naheheling sa mahiwas na uniberso, an ginikanan nin buhay digdi sa daga, asin an dai manenegaran na pagigin daing kaagid kan hotok nin tawo, na may pagkalaenlaen an kakayahan.—6/15, pahina 18.

◻ Taano an pakasabot sa kahulogan kan personal na ngaran kan Kaglalang ta importanteng marhay?

An ngaran nin Dios nangangahulogan “Saiyang Pinapangyayaring Magin” asin nagdodoon na sia nagkakaigwa nin katuyohan sagkod minagibo nin aksion. Sa satong pakaaram asin paggamit kan saiyang ngaran, orog niatong naaapresyar na sia nag-ootob kan saiyang mga panuga asin aktibong pinapangyayari an saiyang katuyohan.—6/15, pahina 21.

◻ Paano puedeng ilabot an mga aki sa pampamilyang pag-adal sa Biblia?

Sagkod sa mapupuede, iareglo na an balang aki may sadiring Biblia asin publikasyon na pag-aadalan. Puedeng hagadon sa sarong aki na ipaliwanag an mga retrato na yaon sa pinag-aadalan, asin an aking saday puedeng iasignar antes pa na basahon an sarong teksto. An mas matua puedeng iasignar na sabihon an mga oportunidad para sa praktikal na pag-aplikar kan pinag-aadalan.—7/1, pahina 15.

◻ Ano an nagkapirang pasohan na puedeng iiba nin pamilya bilang pag-andam para sa mga pagtiripon kan kongregasyon?

(1) An balang saro sa pamilya andam na magkomento sa mga pagtiripon; (2) an balang saro naghihingoang magkomento sa sadiri niang tataramon; (3) iiniiba an mga teksto sa komento; asin (4) inaanalisar an pag-aadalan sa katuyohan na iaplikar iyan nin personal.—7/1, pahina 20.

◻ Ano an importanteng marhay sa marahay na relasyon mag-agom?

Tanganing mabuksan asin maeksperyensiahan an mahalagang marhay na mga kagayagayahan sa marahay na relasyon mag-agom, an sarong kaipuhan iyo an kapakipakinabang na komunikasyon. Kalabot digdi an pagpinahayagan nin mga saboot asin ideya. Asin kalabot sa kapakipakinabang na komunikasyon an mga bagay na nakapakokosog, nakagiginhawa, birtuoso, kaomaw-omaw, asin nakararanga. (Efeso 4:29-32; Filipos 4:8)—7/15, pahina 21.

◻ Ano an ‘dalan ni Jehova?’ (Salmo 25:8, 9, 12)

An dalan na iyan iyo an dalan nin pagkamoot. Iyan basado sa paggibo kan tama oyon sa mga pamantayan nin Dios. Inaapod kan Biblia an aplikasyon kan may prinsipyong pagkamoot na ini na “an nakalalabing marhay na dalan.” (1 Corinto 12:31)—8/1, pahina 12.