Mga Hapot Hale sa mga Parabasa

Aram na daw ngonyan ni Jesus kun noarin an Armagedon?

Garo baga rasonable na tubodon na aram na nia.

An iba tibaad magngalas kun taano ta minalataw ngani an hapot na ini. Posible na iyan huli sa komento ni Jesus na yaon sa Mateo 24:​36: “Mapadapit sa aldaw asin oras na iyan mayo nin siisay man na nakaaaram, ni an mga anghel kan kalangitan ni an Aki, kundi an Ama sana.” Mangnoha an fraseng “ni an Aki.”

An bersikulong ini kabtang kan simbag ni Jesus sa hapot kan mga apostol: “Noarin mangyayari an mga bagay na ini, asin ano an magigin tanda kan saimong presensia asin kan pagtatapos kan palakaw nin mga bagay?” (Mateo 24:3) Sa ngonyan bantog nang hula nia manongod sa mga ebidensia na minakompuesto sa “tanda,” ihinula nia an mga guerra, kakulangan nin kakanon, linog, paglamag sa tunay na mga Kristiano, asin iba pang bagay digdi sa daga na magpaparisa kan saiyang presensia. Paagi sa tandang ini mamimidbid kan saiyang mga parasunod na harani na an katapusan. Ipinag-ilustrar nia an kaharanihan sa panahon na an higuerra nagpopoon na magkadahon, na nagpaparisa na harani na an tig-init. Idinugang nia: “Siring man kamo, kun maheling na nindo an gabos na bagay na ini, aramon nindo na sia harani na sa mga tata.”​—Mateo 24:33.

Alagad dai isinabi nin eksakto ni Jesus kun noarin madatong an katapusan. Imbes, isinabi nia an nababasa niato sa Mateo 24:36. Iyan an pagkasabi sa New World Translation of the Holy Scriptures, asin kaagid man kaiyan an pagkasabi nin dakol na modernong Biblia. Pero, an nagkapirang mas naenot na mga bersion mayo kan “ni an Aki.”

Halimbawa, an Katolikong Douay Version nagsasabi: “Alagad manongod sa aldaw asin oras na iyan mayo nin siisay man na nakaaaram, bakong an mga anghel sa langit, kundi an Ama sana.” Kaagid man kaiyan an pagkasabi kan King James Version. Taano ta hinale an “ni an Aki,” minsan iyan yaon sa Marcos 13:32? Huli ta kaidtong kapinonan kan ika-17 siglo kan andamon an duwang bersion na iyan, an mga manuskrito na pinagbasaran kan mga paratradusir mayo kan ekspresyon na iyan. Pero mientras tanto, nadiskobre an dakol na mas naenot na mga manuskritong Griego. An mga ini, na mas harani sa panahon kan orihinal na teksto ni Mateo, igwa kan “ni an Aki” sa Mateo 24:36.

Interesanteng gayo, an Katolikong Jerusalem Bible igwa kan fraseng iyan, na may nota sa ibaba na nagsasabi na hinale kan Vulgata Latina an ekspresyon “posibleng sa teolohikong mga dahelan.” Siempre man nanggad! An mga paratradusir o parakopya na nagtutubod sa Trinidad puedeng masugotan na haleon an frase na nagpaparisa na si Jesus igwa nin dai aram na aram kan saiyang Ama. Paano mangyayari na dai aram ni Jesus an sarong bagay kun sia asin an saiyang Ama pareho kabtang nin sarong trinidad na Dios?

Sa kaagid na paagi, an A Textual Commentary on the Greek New Testament, ni B. M. Metzger, nagsasabi: “An mga tataramon na ‘ni an Aki’ mayo sa mayoriya kan [manuskritong] mga patotoo ni Mateo, kabale an nahuring tekstong Bizantino. Sa ibong na lado, an pinakamarahay na mga representante kan mga klase nin teksto na hale sa Alejandria, sa Solnopan, asin sa Cesarea igwa kan frase. An paghale kan mga tataramon huli sa problema sa doktrina na itinatao kaiyan mas posible kisa sa pagpamugtak na iyan idinadagdag sa” Marcos 13:32.​—Samo an italiko.

An “pinakamarahay na mga representanteng” idto kan mas naenot na mga manuskrito nagsusuportar sa pagkasabi na nagpapaheling nin rasonableng pagkasunodsunod kun dapit sa kaaraman. An mga anghel dai nakaaaram kan oras kan katapusan; ni aram man iyan kan Aki; kundi kan Ama sana. Asin kaoyon ini kan mga tataramon ni Jesus na yaon sa Mateo 20:​23, na dian inadmitir nia na mayo sia kan autoridad na magtao nin prominenteng mga lugar sa Kahadean, alagad an Ama igwa.

Huli kaini, ipinaheheling kan mismong mga tataramon ni Jesus na digdi sa daga dai nia aram an petsa kan ‘katapusan kan kinaban.’ Naaraman na daw nia iyan poon kaidto?

An Kapahayagan 6:​2 ilinaladawan si Jesus na nakasakay sa sarong maputing kabayo asin nagluwas “sa pandaog asin sa pagtapos kan saiyang pandadaog.” Sunod na nagluwas an mga parakabayo na nagrerepresentar sa mga guerra, gutom, asin damat, arog kan satong naeksperyensiahan poon kan magpoon an Guerra Mundial I kan 1914. An Mga Saksi ni Jehova nagtutubod na kan 1914, si Jesus pinatukaw sa trono bilang Hade kan langitnon na Kahadean nin Dios, an saro na mangengenot sa maabot na pakikilaban tumang sa karatan digdi sa daga. (Kapahayagan 6:​3-8; 19:​11-16) Mantang si Jesus ngonyan tinawan na nin kapangyarihan bilang an saro na mandadaog sa ngaran nin Dios, garo baga rasonable na isinabi na sa saiya kan saiyang Ama kun noarin madatong an katapusan, kun noarin nia ‘tataposon an saiyang pandadaog.’

Kita digdi sa daga dai sinabihan kan petsang iyan, kaya sagkod ngonyan aplikado sa sato an mga tataramon ni Jesus: “Magbantay kamo, magpuka kamo, huli ta dai nindo aram kun noarin an itinalaan na panahon. . . . An isinasabi ko sa saindo isinasabi ko sa gabos, Magpuka kamo.”​—Marcos 13:​33-37.