Lakop sa Kinaban na Katiwasayan sa Pagsakop kan “Prinsipe nin Katoninongan”
Kapitulo 5: Kaliwanagan Para sa “Pagtatapos kan Palakaw nin mga Bagay”
1. Para sa “pagtatapos kan palakaw nin mga bagay” na ini, anong mahalagang kasal an ihinula kan “Prinsipe nin Katoninongan,” asin sa anong parabola?
MAPADAPIT sa “pagtatapos kan palakaw nin mga bagay,” an “Prinsipe nin Katoninongan” nagsabi sa Mateo 24:38 na magkakaigwa nin “mga lalaki [na] nag-aaragom asin an mga babae nagpapaaragom.” Alagad sa iyo man sanang panahon, mapoon sa langit an pinakadakulang kasal. Iyan an kasal na sinasabi sa ilustrasyon ni Jesus manongod sa sampulong paradara nin ilawan, sampulong daraga.—Mateo 24:3; 25:1-12.
2. (a) Sa anong oras nangyari an kasal na ini sa parabola? (b) Ano an suminunod sa kasal, asin paano nagkakailaw?
2 An lugar kan kasal na ini sa Tahaw na Sirangan. Iyan nangyari matanga nang banggi, madali nang mag-alas dose. Ginibo nguna an kasal kan nobya asin kan saiyang nobyo asin sinundan nin sarong prosisyon pasiring sa harong kan punsion. An dalan dai iniilawan nin mga ilawan sa tinampo. An liwanag itinatao kan mga nakikiiba sa prosisyon, asin an mga miron puwedeng magheling sa pag-agi kan prosisyon, na minamawot an kaogmahan kan bagong kasal.
3, 4. (a) Siisay an nagpaheling nin interes sa suminunod na prosisyon, asin may anong pag-andam? (b) An kaotoban kan parabolang ini nagdudugang nin pruweba sa anong katotoohan? (c) Maoogma kita kun gigibohon niato an ano?
3 Siring sa hilig nin mga babae, an mga daraga interesado sa kasal. Kaya, sa aagihan kan prosisyon, may sampulong daraga na naghahalat sagkod na makaabot sa saindang namumugtakan an prosisyon kan kasal. Boot nindang tawan nin liwanag an okasyon, asin sa dahelan na ini sinda gabos may darang ilawan, pero lima sana sa sainda an may darang pan-emerhensiang lana. An limang ini madonong na mga daraga. Maninigo kitang magkainteres sa kaotoban kan parabolang ini ngonyan, huli ta sono ki Jesu-Cristo, iyan dugang na nagpapatunay na kita nasa pagtatapos na kan daan na palakaw na ini.—Mateo 25:13.
4 Maogma kita kun kita madonong asin namamansayan niato an kaotoban kan kasal na ini sa gabos na kasal asin kan kairibang kabtang kaiyan! Siisay ngonyan an tinatawan kan pabor na makalaog sa punsion? Igwa daw sa sato? Helingon niato!
5. Ano an nagin pagkakalaen kan mga minakompuwesto sa sampulong daraga, asin ano an nangyari kan nag-aatraso an nobyo?
5 An ilustrasyon na itinao ni Jesus manongod sa sampulong daraga may koneksion sa “kahadean kan kalangitan,” an pankinaban na gobyerno para sa pagbendisyon sa gabos na tawo. Kaya si Jesu-Cristo nagpadagos sa pagsabi: “An kahadean kan kalangitan magigin kaagid nin sampulong daraga na nagkua kan saindang mga ilawan asin nagruluwas sa pagsabat sa nobyo. An lima sa sainda mangmang, asin an lima madonong. Huli ta an mga mangmang nagkurua kan saindang mga ilawan alagad dai nagbalon nin lana, mantang an mga madonong nagbalon nin lana sa saindang mga lalagan kaiba kan saindang mga ilawan. Mantang nag-aatraso an nobyo, sinda gabos nagtungka asin natorog.”—Mateo 25:1-5.
6. (a) Siisay an ipinaglaladawan kan sampulong daraga? (b) Taano ta daing nasasabihan na nobya sa parabola?
6 Ngonyan siisay an ipinag-iilustrar kan sampulong daragang idto? Sinda nag-ilustrar sa may esperansang magin miembro kan nobya kan espirituwal na Nobyo, si Jesu-Cristo. Daing duwa-duwa na huli sa dahelan na ini na dai nasasambitan an nobya sa ilustrasyon ni Jesus; an nobyo sana an yaon. Sa siring, dai mariribaraw an paliwanag, na garo baga an mga daraga naglaladawan sa iba pang grupo.
7. Sa anong panahon na garo baga nag-atraso an Nobyo sa pagkua kan nobya, asin taano?
7 An pagkakasal kan may esperansang magin mga miembro kan grupong nobya sa saindang langitnon na Nobyo dai nangyari, arog kan linalaoman, sa katapusan kan “itinalaan na mga panahon kan mga nasyon” kan 1914. (Lucas 21:24) Makatanosan sana, para sa sainda an Nobyo garo baga nag-atraso sa pag-abot, minsan ngani an saiyang presensia sa saiyang langitnon na Kahadean talagang nangyari kan 1914. An makamomondong mga taon kan Guerra Mundial I nagin siring sa madiklomon na banggi sa eksperyensia kan grupong mga daraga.
8. (a) Paano na, sa piguratibong pagtaram, nangyari an pagtungka asin pagkatorog kan mga daraga? (b) Huli sa anong katuyohan na an Nobyo nag-abot sa templo, asin taano ini ta may koneksion sa grupong nobya?
8 Sa piguratibong pagtaram, nangyari an pagtungka asin pagkatorog kan mga daraga. Haros napondo an paghuhulit sa publiko kan maogmang bareta kan nagdadangadang na paghade ni Cristo sa laog nin sangribong taon para sa pagbendisyon sa gabos na tawo. Poon kan ultimong taon kan Guerra Mundial I, nagpoon an panahon nin paghokom para sa piguratibong mga daraga. Ini huli ta an natutukaw na sa tronong si Hadeng Jesu-Cristo nag-abot sa espirituwal na templo. Kan sia umabot dian, pinonan nia an paghohokom tanganing linigan an mga ninombrahan na maglingkod ki Jehova Dios sa templo. (Malaquias 3:1-3) Ini an panahon kan saiyang pagkahayag na, bilang an langitnon na Nobyo, panahon nang akoon nia sa langit an aprobadong mga miembro kan grupong nobya na kaidto gadan na.
9. Kasuarin nagin panahon nang pukawon an grupong mga daraga sa inaktibidad, asin taano?
9 Kan 1919, pakaluwas kan walong prominenteng miembro kan Watch Tower Bible and Tract Society sa pagkabilanggo na bakong makatanosan, panahon na para sa grupong daraga na buhay pa digdi sa daga na pukawon sa saindang pagkatorog na inaktibidad. Nasa enotan an gibong pagtao nin kaliwanagan sa bilog na kinaban. Panahon nang sabaton ninda, na may darang may ilaw na mga ilawan, an Nobyo, na nag-abot sa espirituwal na templo. Ini tanganing an mga tawo hale sa gabos na nasyon magduruman sa “harong ni Jehova” na garo baga ilinangkaw sa ibabaw kan mga alitoktok nin mga bukid.—Isaias 2:1-4.
Pagpakarhay sa Saindang mga Ilawan
10. Ano an ipinagladawan kan lana na kinua sa mga lalagan kan madonong na mga daraga?
10 An mga madonong sa mga daraga nagbalon nin pan-emerhensiang suplay nin lana sa saindang mga lalagan. Dai sinda naatraso sa pagpano liwat sa saindang mga ilawan. An lana para sa ilaw nagladawan sa nagpapaliwanag na Tataramon ni Jehova asin sa saiyang banal na espiritu. Kun siring, ano an ilinadawan kan lana na kinua sa mga lalagan kan madonong na mga daraga? An reserbang espiritu ni Jehova na nagtatao nin liwanag sa saiyang nasusurat na Tataramon asin nasa linahidan na natatada kan pinaniaki sa espiritung mga disipulo kan Nobyo kan nakatalaan na pumoon an gibo pakaguerra na pagtao nin liwanag sa bilog na kinaban manongod sa “kahadean kan kalangitan.”
11. Ano an simbolikong mga lalagan na nabubugtakan kan lana?
11 An mga lalagan nagladawan mismo sa piguratibong madonong na mga daraga bilang igwa kan simbolikong lana nin kaliwanagan. Dai ini nangangahulogan na kaidto sana enot na linahidan kan espiritu ni Jehova an grupong daraga. Dai, an mga daraga dai nagsasadiring lahidan an sainda man sana kan saiyang espiritu. Sia an naggigibo kaiyan!—Isaias 61:1, 2; Lucas 4:16-21.
12. (a) Anong hula ni Joel an nakatalagang maotob sa madonong na mga daraga? (b) Kasuarin nag-abot para sa sainda na magtao nin liwanag paagi sa saindang mga ilawan?
12 Bilang pagsuportar sa pag-asignar sa sainda kan mahiwas na gibong pagpaliwanag sa kinaban manongod sa “kahadean kan kalangitan,” an madodonong na daraga tinawan kan pabor na maotob sa sainda an Joel 2:28, 29. Arog kaini an pagkakotar ni apostol Pedro sa mga bersikulong iyan: “‘Asin sa huring mga aldaw,’ an sabi nin Dios, ‘ibububo ko an iba sa sakong espiritu sa gabos na klase nin laman, asin an saindong mga aking lalaki asin mga aking babae maghuhurula asin an saindong mga barobata makakaheling nin mga bisyon asin an saindong mga gurang na lalaki mangangatorogan nin mga pangatorogan.’” (Gibo 2:17) Kaya poon kan 1919 an mga madonong sa piguratibong grupong mga daraga kaipuhan na kapotan an saindang pan-ilaw, an saindang simbolikong mga ilawan—sinda mismo. Ini ginibo ninda tanganing paliwanagan an gabos na nasa espirituwal na kadikloman pa. Huli sa pamumuhay ninda sa irarom kan impluwensia kan Tataramon asin espiritu nin Dios, sinda nagigin “mga ilaw kan kinaban.” (Filipos 2:15) Kaya ginibo ninda an pagsunod sa lakad kan Nobyo mantang sia nag-aandam na ipag-iba an gabos na miembro kan grupong nobya sa langitnon na Kahadean pagkagadan ninda sa daga.—Mateo 5:14-16.
Mga Resulta nin Espirituwal na Kamangmangan
13. Ano an isinimbag kan madonong na mga daraga sa pakiolay kan mangmang na mga daraga?
13 Kumusta naman an mga mangmang sa grupong mga daraga? Si Jesus nagpadagos sa pagsabi: “An mga mangmang nagsabi sa mga madonong, ‘Tawe man kami kan saindong lana, ta mapaparong na an samong ilawan.’ An mga madonong nagsimbag sa mga tataramon na, ‘Tibaad magkulang para sa samo asin sa saindo. Marahay pang pumaduman kamo sa mga nagtitinda kaiyan asin bumakal kan para sa saindo.’”—Mateo 25:8, 9.
14. Taano an mga daraga na nagsayumang ihiras an saindang lana ta madonong imbes na paslo?
14 An mga habong hirasan an mga mangmang bakong paslo, madonong sana. Dai ninda binabayaan an pag-otob sa saindang orihinal, marahay na katuyohan na tawan nin liwanag an madiklom na palibot para sa Nobyo. Dai man sinda obligadong makikompromiso, na inaan an banal na espiritu ni Jehova na nasa sainda tanganing matawan nin lugar an mga mangmang sa espirituwal. An mga mangmang na iyan dai inandam an saindang sadiri na listong lumaog sa pribilehiyo nin paglilingkod na nabukasan sa sainda kan 1919.
15. (a) Kan pumoon an panahon nin katrangkilohan, siisay sa grupong mga daraga an nagpoon na magpaheling nin tendensia sa espirituwal na kamangmangan? (b) Taano an madonong na mga daraga ta dai nakatabang sa mangmang sa espirituwal na mga daraga?
15 Kan pumoon an panahon nin katrangkilohan, an iba na naghihingakong nagdusay, bautisadong kairiba nagpoon na magpaheling nin espirituwal na kamangmangan. Pagkagadan kan enot na presidente kan Watch Tower Society, si Charles Taze Russell, dai sinda lubos na naglaog sa espiritu nin mga pangyayari kaiba kan naheheling na instrumento ni Jehova Dios sa irarom kan bagong presidente kaiyan, si J. F. Rutherford. An saindang puso bako talagang kaoyon sa pagpalakaw sa mga bagay. Nagpaheling sinda nin kakulangan nin pag-apresyar sa pagtratar ni Jehova sa saiyang banwaan. Kaya, idtong mga siring sa madonong na mga daraga dai matawan nin tunay na espiritu nin odok sa pusong pagkooperar an mga mangmang na ini na paorog nang paorog na isinisiblag an saindang sadiri.
16. Paano napalataw an espirituwal na kamangmangan kan mangmang na mga daraga?
16 Kaya napalataw an espirituwal na kamangmangan. Paano? Paagi sa dai pagkaigwa kan simbolikong lana sa panahon na dakula an pangangaipo para sa espirituwal na kaliwanagan mantang nag-aabante an bagong mga pangyayari, na nagpapaheling na presente na an Nobyo. Kaya panahon nang sabaton sia na an ilawan may maliwanag na ilaw, sa piguratibong pagtaram. Alagad imbes, an mga nakaaagid sa mangmang na mga daraga, na napaparong na an mga ilawan, suminiblag sa mga madonong.
17. Anong dai na mababawing pagkapierde an nangyari sa ilinadawan kan mangmang na mga daraga, arog kan ipinaririsa sa Mateo 25:10?
17 Kanigoan na pagkapierdeng dai na mababawi an nangyayari kun an saro na naghihingakong kabilang kan grupong mga daraga mapalihis an dai na maootrong pribilehiyo asin oportunidad na sabaton an espirituwal na Nobyo, si Jesu-Cristo! An siring na pagkapierde nakakamtan kan mga mangmang sa mga daraga sa modernong aldaw, arog kan ipinaririsa kan dugang pang mga tataramon sa ilustrasyon ni Jesus: “Mantang paduman sinda sa pagbakal, nagdatong an nobyo, asin an mga daragang andam naglaog kaiba nia sa punsion sa kasal; asin pininto an tata.”—Mateo 25:10.
18. (a) Sa anong pribilehiyo dai napaasosyar an mangmang na mga daraga sa siglong ini? (b) Taano an mga mangmang ta nahuri sa pakikikabtang sa prosisyon sa kasal asin sa paglaog sa punsion?
18 Makamomondo nanggad an nagigin eksperyensia kan mangmang na mga daraga sa modernong aldaw! Sa pinakamadiklom na panahon na ini sa bilog na kasaysayan nin tawo, dai sinda nakakapakikabtang sa gibong pagtatao nin liwanag sa mga nagtutukaw sa espirituwal na kadikloman asin sa anino nin kagadanan sa “ralaban kan dakulang aldaw nin Dios na Makakamhan sa gabos”! (Kapahayagan 16:14) Mantang mayo na nin lana an saindang piguratibong mga ilawan tanganing paliwanagon an saindang inaagihan, sinda naghale asin kinaipuhan na maglakaw sa kadikloman nin matangang banggi. Huli sa dahelan na ini nahuri sinda sa pagsunod sa Nobyo sa magayagayang prosisyon sa paglaog sa pinto asin sa maliwanag na punsion sa kasal. Nawaran na sinda kan saindang midbidan bilang saiyang mga parasunod na nakalinyang ikasal sa saiya sa langitnon na Kahadean. Dai sinda nanompongan na “andam” sa itinalaan na panahon. Iyan nagtatao nanggad nin nagpapatanid na halimbawa!
19. Anong eksperyensia an naghahalat sato huli sa padagos na pagsiyasat sa bagay na ini sagkod sa katapusan?
19 An makolog na katotoohan na ini buhay na ilinaladawan sa huring kabtang kan ilustrasyon na itinao ni Jesu-Cristo, an Nobyo, partikularmente para sa sato na nabubuhay sa “pagtatapos kan palakaw nin mga bagay.” Kaya siyasaton pa niato nin orog an bagay! An nagtatao nin kagayagayahan na kaliwanagan naghahalat sa sato sa paggibo kaiyan, arog kan maheheling niato sa masunod na kapitulo.