Lakop sa Kinaban na Katiwasayan sa Pagsakop kan “Prinsipe nin Katoninongan”
Kapitulo 6: Nagpupuka sa Panahon kan “Pagtatapos kan Palakaw nin mga Bagay”
1. Taano ta kaipuhan kitang magpuka?
Nasa poro na kita kan “pagtatapos kan palakaw nin mga bagay,” pero ‘dai niato aram an aldaw ni an oras’ na matatapos an panahon para sa nagliligtas nin buhay na pagtatao nin liwanag. Iyan an dahelan na si Jesus nagsabi: “Kaya magpuka kamo, huli ta dai nindo naaaraman an aldaw ni an oras.”—Mateo 24:3; 25:13.
2. Anong mamondong eksperyensia an kaipuhan na likayan?
2 Nakapanluluya nanggad nin boot na an saro mahuring umabot sa lugar kan punsion sa kasal asin maheling na pinto na an tata. Alagad ta iyan an nakatalagang mangyari sa mayoriya nin naghihingakong mga Kristiano sa harani nang ngapit. Ipinag-ilustrar ini kan “Prinsipe nin Katoninongan” paagi sa mga tataramon na ini: “Pagkatapos an ibang daraga nagdatong man, na an sabi, ‘Kagurangnan, kagurangnan, bukasi kami!’ Sa pagsimbag sia nagsabi, ‘Sinasabi ko saindo an katotoohan, Dai ko kamo midbid.’”—Mateo 25:11, 12.
3. (a) An taon 1919 nagin taon nin ano? (b) An mga relihiyonista daw kan Kakristianohan nakatao kan kinakaipuhan na espirituwal na lana?
3 Poon kan 1919 nagkaigwa nin espirituwal na kaliwanagan paagi sa mga madonong sa tabang kan “lana” kan Tataramon asin banal na espiritu ni Jehova, pero an mga mangmang naghihingoang bumakal nin espirituwal na lana sa mga nasa Kakristianohan na naghihingakong nagpapabakal kaiyan. (Mateo 25:9) Alagad ta an mga relihiyonista nin Kakristianohan mayo kan tamang klase nin lana. Dai sinda nakatao nin kaliwanagan manongod sa presensia ni Jesu-Cristo bilang an langitnon na Nobyo. Sinda naglalaom na pagkagadan ninda masakat tolos sinda sa langit asin sasabaton sia, na dai man nakikabtang sa gibong pagtatao nin liwanag sa “pagtatapos kan palakaw nin mga bagay” na ini.
4. Sagkod ngonyan, ano an dai nagibo kan ilinaladawan kan mangmang na mga daraga, asin taano?
4 Sa ibong na kampi, igwa nin mga, kapareho nin espirituwal na mga daraga, nagpatunay na igwa nin reserba kan “lana” kan banal na espiritu asin Tataramon nin Dios para sa gibohon pakaguerra na pagtao nin kaliwanagan sa bilog na kinaban manongod sa “kahadean.” (Mateo 24:14) An mga ilinaladawan sa parabola ni Jesus na mangmang na mga daraga dai nakikakabtang dian paagi sa pagpasirang kan liwanag sa maogmang baretang ini na may internasyonal na halaga. Mayo sinda kan “lana” kan nagpapaliwanag na Tataramon nin Dios asin kan saiyang banal na espiritu, asin an Nobyong Hokom sa espirituwal na templo namansayan an pagkukulang nindang ini. An saindang puso mayo sa gibohon pakaguerra na listong ginibo kan 1919 kan Kristianong mga daraga na madonong sa pakamansay pareho sa panahon asin sa gibohon.
5. Sa ano dai nakakapakikabtang an mangmang na mga daraga na kaipuhan tanganing sinda makaibanan kan Nobyong Hade?
5 Sa pagsiblag sa mga nagsusuportar sa naheheling na organisasyon ni Jehova, an mga mangmang dai nakakapartisipar sa lakop sa kinaban na pagpatotoo sa Kahadean. Sa katapustapusi nakakua sinda nin “lana” nin relihiyosong kaliwanagan, pero bako idto an tamang klase nin lana. Dai iyan magtatao nin kaliwanagan sa tamang okasyon sa tamang panahon. Kaya dai sinda naghuhulit kan mensahe kan Kahadean asin kan “aldaw nin pamalos kan satong Dios.” (Isaias 61:1-3) Dai ninda inoomaw an Nobyong Hade arog kan ginigibo kan linahidan na natatada kan grupong mga daraga.
An Epekto kan Liwanag kan Ilawan sa Matangang Banggi
6, 7. (a) Ano an nangyari kan kabangaan kan mga taon 1930 na nagsuherir na igwa na nin bastanteng daraga tanganing makompleto an grupong nobya? (b) Inapod an atension sa anong grupo na ngonyan kaipuhan nang tiponon?
6 Kan kabangaan kan mga taon 1930, may nangyaring makahulogan. An nangyari nagsuherir na nakompleto na an miembro kan espirituwal na nobya ni Cristo, na igwa na sa daga nin bastanteng pinaniaki kan espiritung mga disipulo kan Nobyo tanganing makompleto an bilang kan saiyang langitnon na nobya.
7 Kan panahon na idto, kan 1935, pinonan na apodon an atension sa saro pang grupo nin arog-karnerong mga disipulo ni Jesus. Ini an grupo na dinara sa atension kan publiko kaidtong enot na guerra mundial. Kaidtong Pebrero 24, 1918, na itinao an pahayag manongod sa temang “An Minilyon na Nabubuhay Ngonyan Tibaad Dai na Noarin Man Magadan” sa sarong nag-uusyoso, seguro pano nin pagduda, na mga nagdadangog. Sa kombension kan 1935 kan mga Saksi ni Jehova sa Washington, D.C., may iinintrodusir na sarong bagay na positibo manongod sa pagtipon sa minilyon na “ibang karnero” ni Cristo sa sarong sararong “aripompon” na sakop ni Jesu-Cristo bilang an “sarong pastor.” (Juan 10:16) Isinabi kun siisay an kabtang na ini kan “ibang karnero” na ihinula sa Kapahayagan 7:9-17.
8. Nagkaigwa nin anong obligasyon an madonong na mga daraga kan 1935, na dai ninda linalaoman?
8 An natatada sa “sadangoton na aripompon” nagkaigwa ngonyan kan obligasyon na ponan an pagtipon sa “dakulang kadaklan” na ini kan “ibang karnero.” (Lucas 12:32) Ini huli ta an kabilangan nin madonong na mga daraga na kaipuhan tanganing mabilog an nobya ni Jesus kompleto na. Alagad an mga daragang iyan dai tolos dinara sa langit. Palalaogon pa sana sinda sa lugar na iyan nin punsion sa langit kun matapos ninda an saindang buhay digdi sa daga bilang nagdadanay sa integridad na mga saksi kan saindang Dios, si Jehova. Huli sa saindang maimbod na gibo nin pagtatao nin liwanag sagkod kan 1935, pinalaog sinda sa espesyal na pribilehiyo na dai ninda noarin man linaoman bago kan kabangaan kan mga 1930.
9. Ano na an kabilangan kan natatada sa madonong na mga daraga?
9 Labi nang kabangang siglo an nakaagi poon kan 1935, asin sa laog kan mga taon na ini naiinaan an mga madonong sa grupong mga daraga. Sa ibong na kampi, an gibong paghuhulit nakalakop na sa bilog na kinaban, iyo, nakaabot na sa labing 200 na kadagaan. Sa presente, an grupong mga daraga buminaba na sa mga 9,000.
Matinabang na mga Kairiba kan mga Paradara nin Ilaw
10. Huli sa kadakulaan kan gibohon, napaninigoan daw kan natatada sa madonong na mga daraga an pangangaipo nin mga trabahador?
10 An linahidan na natatada kan piguratibong mga daraga haros natatahoban na kan labing tolong milyon na mga parahayag kan Kahadean sa labing 49,000 na kongregasyon nin mga Saksi ni Jehova sa bilog na globo. Paano maaasikaso kan kadikit na bilang kan linahidan na natatada an gibong paghuhulit sa labing 200 na kadagaan na namumugtakan kan rinibong kongregasyon? Dai ninda kaya.
11. (a) An pagkamidbid sa “maimbod asin madonong na oripon” nagpangyari sa ano sa tahaw kan mga naghihingakong daraga? (b) Ano an dai namansayan kan kabilang sa grupong “maraot na oripon” huli ta kulang nin espirituwal na liwanag?
11 Siyempre, sinda Makakasuratan na naglilingkod sa ihinulang katongdan na “maimbod asin madonong na oripon” na nanompongan na maimbod kan Nobyong Kagurangnan kan sia umabot sa templo para sa paghokom. Kaidto nagpoon na mangyari an pagkakasiblag kan madonong na mga daraga asin kan mangmang na mga daraga sa piguratibong grupo nin mga daraga. An ibinibilang na grupong “maraot na oripon” mayo kan lana kan nagpapaliwanag na Tataramon nin Dios asin kan saiyang banal na espiritu sa saindang mga lalagan tanganing magpailaw sa saindang mga ilawan. Kaya mayo sinda nin bastanteng espirituwal na liwanag na mamansayan an “dakulang kadaklan” kan “ibang karnero,” na tinitipon na poon kan 1935 bilang kabtang kan “sarong aripompon.”—Mateo 24:45-51.
12. Siisay an nagin dayupot na kaibaiba kan natatada sa grupong nobya?
12 Poon kan Guerra Mundial II, an kaotoban kan hula ni Jesus para sa “pagtatapos kan palakaw nin mga bagay” sa dakulang kabtang huli sa ginigibo kan “dakulang kadaklan” nin “ibang karnero.” An liwanag hale sa may ilaw na mga ilawan kan natatada nagpaliwanag sa mga mata kan saindang puso, asin natabangan sinda na pasirangon an liwanag sa iba na yaon pa sa kadikloman kan kinaban na ini. (Ikomparar an Efeso 1:18.) Natabangan ninda an minilyon na nag-eerok sa dagang ini na mamansayan an presensia kan Nobyong Hade mantang nagdadangadang an aldaw kan saiyang kasal sa kompletong grupong nobya. Sinda nagin dayupot na kaibaiba kan natatada sa grupong nobya.
13, 14. (a) Anong maogmang situwasyon may koneksion sa kairiba kan natatada an piguratibong sinasabi sa Kapahayagan 7:9, 10? (b) Ano an listong reaksion sa pagpaliwanag kan hulang iyan?
13 Poon kan 1935 nagin maogma an kamugtakan kan kairibang ini kan natatada sa grupong nobya. Ipinag-oogma ninda bako sanang an makangangalas na mga pribilehiyo na linaogan kan natatada kundi siring man an mapalad na mga bendisyon na pinalaogan mismo sa sainda paagi sa natatada sa grupong nobya.
14 May makangangalas na teksto na binukasan sa pagsabot kan banwaan ni Jehova sa kombension sa Washington, D.C., kan 1935, asin iyan naghula nin makawiwiling situwasyon para sa “dakulang kadaklan,” an kairiba kan mga linahidan. Helinga sinda duman, “nagtitindog sa atubang kan trono [ni Jehova Dios] asin sa atubang kan Kordero, na nagugubingan nin maputing mga gubing; asin igwa nin mga palma sa saindang mga kamot”! Hinanyoga an ikinukurahaw ninda tanganing madangog kan gabos sa publiko: “Utang niato an kaligtasan sa satong Dios, na nagtutukaw sa trono, asin sa Kordero”! (Kapahayagan 7:9, 10) Sinda nagtubod na sa “Kordero nin Dios na naghahale kan kasalan kan kinaban,” asin paagi sa saiya idinusay ninda an saindang sadiri ki Jehova Dios asin nagpabautismo bilang simbolo kan pagdusay na iyan. (Juan 1:29) Tara, an 840 sa sainda nagpabautismo kan sumunod na aldaw pagkadangog ninda sa paliwanag kan Kapahayagan 7:9-17 kan Biyernes, Mayo 31, 1935.
15. Poon kaidto, pira na an nabautismohan, asin paano sinda ilinaladawan sa Kapahayagan 7:14-17?
15 Labi nang tolong milyon an guminibo nin siring poon kan kombension na idto sa Washington kan 1935. Kaya sinda ilinaladawan na nagugubingan nin maputi huli ta hinugasan na iyan sa nakalilinig na dugo kan Kordero. Asin igwa sinda kan paglaom na lumuwas sa dakulang kahorasaan na nagdadangadang para sa bilog na kinaban nin katawohan, na igwa nin banal na proteksion tanganing maligtas sa kahorasaan na iyan. (Mateo 24:21, 22) Kun siring, sinda sinasabing yaon sa espirituwal na templo ni Jehova asin dian nagsasamba sa saiya kaiba kan natatada sa grupong mga daraga.—Kapahayagan 7:14-17.
16. Kun siring, siisay an pinasasalamatan nin dakula para sa saindang kabtang may koneksion sa pag-otob sa Mateo 24:14?
16 Kun siring, dakulang salamat sa internasyonal, laen-laen an tataramon na “dakulang kadaklan” para sa dakulaon na kabtang ninda sa pag-otob sa hula kan Nobyo sa Mateo 24:14!
“Asin Pininto an Tata”
17. (a) Noarin mapipintoan an tata sa punsion sa kasal? (b) Ano an kaipuhan na gibohon ngonyan kan natatada sa grupong mga daraga asin kan “dakulang kadaklan” na kairiba ninda?
17 Dai aram kun noarin eksakto na an natatada sa grupong mga daraga makalalaog sa seremonya kan kasal, dangan pipintoan an tata. Alagad sierto na iyan mas harani kisa kasuarin pa man, asin nauubos na an panahon! Kaya, tamang-tama, tinapos ni Jesus an parabola kan mga daraga paagi sa nagpapatanid na mga tataramon: “Kaya magpuka kamo, huli ta dai nindo naaaraman an aldaw ni an oras.”—Mateo 25:13.
18. (a) Kiisay ngonyan uminiba an mangmang na mga daraga? (b) Anong kabtang kan parabola ni Jesus an madali na nindang maeksperyensiahan?
18 Sa dahelan na ini an mangmang na mga daraga maaabotan na dai nagpupuka. Huli sa saindang pagsiblag sa madonong na mga daraga, sinda nagin kabtang kan malalaglag na kinaban na ini asin nakapareho kan gabos na iba pang relihiyonista na nasa nag-oorog na kadikloman sa daga. Kaya natalaga sindang makaeksperyensia kan ilinadawan kan Nobyong si Jesu-Cristo sa mga tataramon na ini kan parabola: “Pagkatapos an ibang daraga nagdatong man, na an sabi, ‘Kagurangnan, kagurangnan, bukasi kami!’ Sa pagsimbag sia nagsabi, ‘Sinasabi ko saindo an katotoohan, Dai ko kamo midbid.’”—Mateo 25:10-12.
19. Kun siring siisay an ilinaladawan kan mangmang na mga daraga, asin taano sinda ta ibibilang sa Dakulang Babilonya?
19 Kaya dai bubukasan an tata kan punsion para sa mangmang na mga daraga. Sinda naglaladawan nanggad sa mga sa panahon kan “pagtatapos kan palakaw nin mga bagay” dai nakalalaog sa “kahadean kan kalangitan.” (Mateo 24:3; 25:1) Huli sa pangangapot sa pinili nindang relihiyon, arog kan ipinaririsa kan pagduman ninda sa sadan tanganing bumakal nin ibang lana, sinda ibinibilang sa Dakulang Babilonya.
20. (a) Kun maheling kan mangmang na mga daraga na binibirikan na kan “sampulong sungay” kan “mabangis na hayop” an Dakulang Babilonya, siisay an dodolokon ninda asin ano an magigin paghihingako ninda? (b) Taano ta makakaeksperyensia pa man giraray sinda nin kalaglagan?
20 Kaya, kun an simbolikong “mabangis na hayop,” na nasasakayan kan relihiyosong patotot, birikan sia paagi sa “sampulong sungay” kaiyan, sinda kaipuhan na mapadamay sa saiyang kaaabtan. (Kapahayagan 17:16) Kun an mga relihiyonistang ini, na ilinadawan kan limang mangmang na daraga, maheling an pagpopoon na ini kan pagsikwal sa Babilonikong relihiyon kan makapangyarihan na mga puwersa kan politikal na elemento, madolok sinda sa Nobyong Hade, na nagsasabing sinda kabilang sa grupong “kahadean kan kalangitan” asin maninigo na palaogon sa espirituwal na punsion sa kasal kaiba kan madonong na mga daraga. Nakakukubhan, an inaapod nindang “Kagurangnan,” an Nobyong si Jesu-Cristo, masayumang midbidon sinda bilang maninigong palaogon sa langitnon na Kahadean. Asin mayo man sinda nin paglaom sa buhay na daing sagkod digdi sa daga kaiba kan “dakulang kadaklan.” Kaya mayo na nin natatada para sa mangmang na mga relihiyonistang ini kundi kalaglagan kaiba kan pankinaban na imperyo nin falsong relihiyon, an Dakulang Babilonya!
21. (a) Huli sa makatatakot na paglaom na iyan, ano an ginigibo kan madonong na mga daraga asin kan saindang kairiba? (b) Anong mga pribilehiyo sa paglilingkod an linalaoman na kamtan kan mga miembro kan “dakulang kadaklan”?
21 Makatatakot nanggad na paglaom para sa sainda! Mantang aram ini, an natatada asin an dakol nindang kairiba perming kukuyogon an hatol ni Jesus na “magpuka.” Sinda perming pano kan banal na espiritu nin Dios asin daing takot na pasisirangon an liwanag sa ikamumuraway ni Jehova Dios asin ni Jesu-Cristo. Bilang balos, kagayagayahan an seguradong makakamtan ninda! Asin an mga katongdan nin pagkaprinsipe sa “bagong daga” naghahalat sa mga miembro kan “dakulang kadaklan,” siring sa pagkapili kan kinasal nang Nobyong Hade.—Isaias 32:1; ikomparar an Salmo 45:16.
22. (a) An kaotoban kan parabola kan mga daraga nagseserbing patotoo sa anong bagay? (b) Siisay an mag-oogma huli sa kasal na ini kan Nobyong Hade asin kan saiyang daragang nobya?
22 Kaya an dugang pang kaotoban kan parabola kan sampulong daraga nagseserbing patotoo sa bagay na kita nabubuhay na sa “pagtatapos kan palakaw nin mga bagay.” Kanigoan an pagpasalamat niato na kita pinaliwanagan tanganing maheling an ebidensiang ini sa kaharanihan kan kasal ni Jesu-Cristo sa saiyang kompleto nang grupong nobya! Sa langitnon na kasal na ini, an langit asin an matanos na “bagong daga” mag-oogma sa dai ikaladawan na kaogmahan.—Kapahayagan 19:6-9.