Lakop sa Kinaban na Katiwasayan sa Pagsakop kan “Prinsipe nin Katoninongan”

Kapitulo 7: Pakipagkuwenta sa Paggamit sa Pirak ni Cristo

1. Anong gobyerno an mayo nin problema sa ekonomiya, asin siisay ngonyan an kaipuhan na makipagkuwenta sa gobyernong ini?

APUWERA sa saro, mayo nin gobyerno na mayo nin problema sa ekonomiya. An kadaklan na gobyerno kadakol kan utang. An sarong gobyerno na napapalaen iyo an lakop nang ikinabalangibog ngonyan na “kahadean kan kalangitan.” (Mateo 25:1) Igwa pa sa daga nin may esperansang magin mga miembro kan langitnon na Kahadean na iyan na naglilingkod sa gobyernong iyan. Sa pinakakritikal na panahon na ini sa bilog na kasaysayan nin tawo, an mga lingkod na ini kan “kahadean kan kalangitan” inaapodan na makipagkuwenta. Kaipuhan na makipagkuwenta sinda sa gobyerno kun paano ninda ginamit an mahahalagang bagay na ipinaniwala sa sainda.

2. Taano ta maninigo kitang magin interesadong gayo sa sarong parabola na isinaysay kan “Prinsipe nin Katoninongan”?

² Sa pag-ilustrar kaini, an pinakapangenot na representante kan “kahadean kan kalangitan” na iyan nagsaysay kaidtong haloy na nin sarong parabola, o ilustrasyon. Maninigo kitang magkainteres dian ngonyan, ta iiniba iyan kan “Prinsipe nin Katoninongan” sa saiyang hula manongod sa “tanda” na matanda sa saiyang “presensia” sa Kahadean na may lubos na autoridad na maghade. (Mateo 24:3) Kita ngonyan kalabot nanggad sa resulta na masunod sa kaotoban kan makahulang parabola, ta an satong padagos na buhay, an sato mismong buhay, napapalabot. Kaya uya ngonyan an pagkasaysay kan “Prinsipe nin Katoninongan” sa parabola sa saiyang mga apostol mga pirang aldaw bago an saiyang sakripisyal na kagadanan sa Kalbaryo.

An Parabola kan mga Talento

3. Ano an ginibo sa mga talento kan mga oripon na nag-ako kaiyan sa kagurangnan bago sia naghale kaidtong mayo na sia?

³ “Kaya magpuka kamo, huli ta dai nindo naaaraman an aldaw ni an oras. Huli ta iyan garo man sana kun an sarong tawo, na mapaduman sa harayong daga, nag-apod kan saiyang mga oripon asin ipinaniwala sa sainda an saiyang mga rogaring. Asin sa saro sia nagtao nin limang talento,a sa saro nin duwa, sa saro pa nin saro, sa lambang saro sono sa saiyang kakayanan, asin sia naghale. Tolos man an saro na nag-ako kan limang talento naghale asin ipinagnegosyo iyan patin nakatubo nin lima pa. Sa siring man na paagi an saro na nag-ako kan duwa nakatubo nin duwa pa. Alagad an saro na nag-ako nin saro sana naghale, asin nagkotkot sa daga patin itinago an pirak kan saiyang kagurangnan.

4. Ano an isinabi kan kagurangnan sa mga oripon na napadakol an talento?

⁴ “Pakalihis nin haloy na panahon an kagurangnan kan mga oripon na idto nagdatong asin nakipagkuwenta sa sainda. Kaya an nag-ako nin limang talento uminatubang asin nagdara nin lima pang talento, na an sabi, ‘Kagurangnan, limang talento an ipinaniwala mo sa sako; uya, napatubuan ko nin lima pang talento.’ An saiyang kagurangnan nagsabi sa saiya, ‘Marahay na gibo, marahay asin maimbod na oripon! Nagin maimbod ka sa pira sanang bagay. Ipaniniwala ko sa saimo an dakol na bagay. Lumaog ka sa kaogmahan kan saimong kagurangnan.’ Dangan an nag-ako nin duwang talento uminatubang asin nagsabi, ‘Kagurangnan, ipinaniwala mo sa sako an duwang talento; uya, napatubuan ko nin duwa pang talento.’ An saiyang kagurangnan nagsabi sa saiya, ‘Marahay na gibo, marahay asin maimbod na oripon! Nagin maimbod ka sa pira sanang bagay. Ipaniniwala ko sa saimo an dakol na bagay. Lumaog ka sa kaogmahan kan saimong kagurangnan.’

5, 6. Ano an isinarahotan kan ikatolong oripon sa pagtago kan talento, asin ano an ginibo sa saiya kan kagurangnan?

⁵ “Sa katapustapusi an saro na nag-ako nin sarong talento nagdolok asin nagsabi, ‘Kagurangnan, midbid ta ka bilang tawong estrikto, na nag-aani ka sa dai mo sinabwagan asin nagtitipon ka sa dai mo pinagtahopan. Kaya ako natakot asin naghale patin itinago an saimong talento sa daga. Uya na an sadiri mo.’ Sa pagsimbag an saiyang kagurangnan nagsabi sa saiya, ‘Maraot asin hugakon na oripon, bako daw na aram mo na nag-aani ako sa dai ko sinabwagan asin nagtitipon ako sa dai ko tinahopan? Bueno, kun siring, ideneposito mo kutana an sakong mga pirak sa bangko, asin pagdatong ko aakoon ko an sadiri ko na may patubo.

⁶ “‘Kaya kuana nindo sa saiya an talento asin tawan iyan sa may sampulong talento. Huli ta an gabos na igwa, tatawan pa nin orog asin sia magsosopay; alagad an dai, minsan idtong nasa saiya na kukuanon pa sa saiya. Asin tapokan nindo an oripon na daing kamanungdanan sa kadikloman sa luwas. Dian an saiyang pagtangis asin an pagragot nin saiyang mga ngipon.’”—Mateo 25:13-30.

7. Ano an ipinagrerepresentar kan mga talento?

⁷ Sa parabolang ini, ano an ipinagrerepresentar kan mga talento? Bagay na may halangkaw na halaga, bakong sa kuwarta kundi sa espirituwal na sentido. An mga talento nagrerepresentar sa sugo na gumibo nin mga disipulo ni Cristo. Kaiba kan sugong ini an napakapalad na oportunidad na magin mga embahador ni Cristo, an Hade, na irepresentar an Kahadean sa gabos na nasyon kan kinaban.—Efeso 6:19, 20; 2 Corinto 5:20.

8. (a) Sa anong kadikloman iinapon an grupong “hugakon” na oripon sa “pagtatapos kan palakaw nin mga bagay”? (b) Taano an kinaban nin katawohan ta dai nagkakamit kan liwanag kan pag-oyon asin bendisyon nin Dios?

⁸ Daing duwa-duwa, kita ngonyan nakaabot na sa kulminasyon kan kaotoban kan makahulang parabolang ini! Yaon na sa kapag-arakian na ini an pinakamadiklom na panahon sa bilog na kasaysayan nin tawo! Tunay na igwa nin maninigong kadikloman sa luwas kan naheheling na kabtang kan organisasyon ni Jehova na dian puwedeng iapon an grupong “hugakon” asin “daing kamanungdanan” na oripon sa pagboot kan Kagurangnan. An “kadikloman sa luwas” naglaladawan sa madiklom na kamugtakan kan kinaban nin katawohan, nangorogna sa relihiyosong sentido. An kinaban nin katawohan dai nagkakamit kan liwanag kan pag-oyon asin bendisyon nin Dios. Iyan mayo sa liwanag kan kaaraman sa Kahadean nin Dios. Iyan sakop kan “dios kan palakaw na ini nin mga bagay,” na binuta “an isip kan mga dai nagtutubod, tanganing an liwanag kan mamuraway na maogmang bareta manongod ki Cristo, na iyo an ladawan nin Dios, dai sumirang.”—2 Corinto 4:4.

[Nota sa Ibaba]