Nagigirumdoman daw Nindo?

Tinawan daw nindo nin maingat na paghorophorop an dai pa sana nahahaloy na mga luwas kan An Torrengbantayan asin The Watchtower? Kun iyo, magigin interesante para sa saindo na girumdomon an minasunod:

◻ Ano an nagkapirang hapot na puedeng ihapot nin duwang Kristiano sa saindang sadiri bago ninda ponan na isipon an pagkatratong pakasal?

‘Talagang segurado daw ako sa saiyang espirituwalidad asin debosyon sa Dios? Maiimahinar ko daw na kaibanan ko sia sa paglilingkod sa Dios sa bilog na buhay? Naheling mi na daw nin igo an ugale nin lambang saro? Kompiado daw ako na kami magigin bagay sagkod lamang? Igo na daw an aram mi manongod sa mga ginibo asin sirkunstansia sa presente kan lambang saro?’—8/15, pahina 31.

◻ Ano an boot sabihon ni Jesus kan sia magsabi sa saiyang mga parasunod: “Kamo iyo an asin kan daga”? (Mateo 5:13)

Ipinarisa ni Jesus na an paghuhulit kan saiyang mga parasunod sa iba manongod sa Kahadean nin Dios magkakaigwa nin potensial na nakapepreserbar, o nagliligtas-buhay, na impluwensia sa mga nagdadangog sa sainda. Tunay nanggad, an mga iinaaplikar an mga tataramon ni Jesus mapoprotehiran sa moral asin espirituwal na pagkalapa sa kinaban.—8/15, pahina 32.

◻ Paano an magkailusyon makalilikay sa siod nin seksuwal na inmoralidad?

Kun kamo nagde-date, madonong na likayan nindo na kamo sana kan saindong aagomon an magkaibanan sa bakong angay na mga kamugtakan. Pinakamarahay na mag-ibaiba kamo na may kairiba o sa pampublikong mga lugar. Magbugtak nin mga limite sa mga pagpaheling nin kapadangatan, na iginagalang kan balang saro an mga saboot asin konsensia kan saro.—9/1, pahina 17, 18.

◻ Ano an pakasabot?

Iyan an abilidad na masabotan an kairairaromi nin sarong bagay asin mamansayan an minabilog kaiyan paagi sa pagsabot sa koneksion kan mga kabtang sa balang saro asin sa kabilogan, sa siring nasasabotan an tunay na kahulogan kaiyan. (Talinhaga 4:1)—9/15, pahina 13.

◻ Ano an hinahagad ni Jehova sa sato ngonyan?

Sa pundamental, an hinahagad sa sato ni Jehova iyo na maghinanyog sa Saiyang Aki asin sunodon an saiyang halimbawa asin mga katokdoan. (Mateo 16:24; 1 Pedro 2:21)—9/15, pahina 22.

◻ Siisay sana an makaeeksperyensia nin katoninongan?

Mantang si Jehova “an Dios na nagtatao nin katoninongan,” an katoninongan maeeksperyensiahan sana nin mga tawo na namomoot sa Dios asin hararom an paggalang sa saiyang matanos na mga prinsipyo. (Roma 15:33)—10/1, pahina 11.

◻ Paano si Jose nagkaigwa nin moral na kosog na magsayuma sa agom ni Potifar aroaldaw?

Pinahalagahan ni Jose an saiyang relasyon ki Jehova nin labi nanggad kisa pagpahalaga nia sa temporaryong kasingawan. Siring man, minsan ngani sia dai sakop kan mga susundon sa ley nin Dios, malinaw an pakasabot ni Jose sa moral na mga prinsipyo. (Genesis 39:9)—10/1, pahina 29.

◻ Gurano kaimportante an satong pagigin andam na magpatawad sa satong mga tugang?

An satong mga oportunidad na padagos na mag-ako kan kapatawadan nin Dios sa dakulang kabtang nakadepende sa satong pagigin andam na magpatawad sa iba. (Mateo 6:12, 14; Lucas 11:4)—10/15, pahina 17.

◻ Anong klaseng mga kasalan an pinanonongdan kan Mateo 18:15-17, asin ano an nagpaparisa kaiyan?

An mga kasalan na boot sabihon ni Jesus may igong kagabatan kaya iyan puedeng sumagkod sa punto na an nagkasala ibibilang na “tawo kan mga nasyon asin parasingil nin buhis.” An mga Judio habong makipag-ibaiba sa mga Hentil, asin linikayan ninda an mga parasingil nin buhis. Kaya an pinanonongdan sa Mateo 18:15-17 seryosong mga kasalan, bakong personal na mga pagkakasala sana o pakakolog nin boot na puede sana nindong patawadon asin lingawan. (Mateo 18:21, 22) —10/15, pahina 19.

◻ Ano an kalabot sa talagang pagkamoot sa Tataramon nin Dios?

An pagkamoot sa Tataramon nin Dios minagiya sa saro na mamuhay kaoyon kan mga kahagadan kaiyan. (Salmo 119:97, 101, 105) Ini nagkakaipo nin dayaday na pagliwat kan kaisipan asin pamumuhay nin saro.—11/1, pahina 14.

◻ Huli ta nag-ako nin labi-labi sa kamot ni Jehova, ano an ikatatao niato bilang balos sa kadarudakulaing Hade asin Paratao?

Ihinahayag kan Biblia na an pinakamarahay na regalo na ikatatao ta ki Jehova iyo an “atang nin pag-omaw.” (Hebreo 13:15) Taano? Huli ta an atang na ini direktang konektado sa pagliligtas nin buhay, sarong bagay na may dakulang halaga para ki Jehova sa panahon na ini nin katapusan. (Ezequiel 18:23)—11/1, pahina 21.

◻ Ano an boot sabihon ni Salomon kan sia sumurat: “An mga tataramon kan mga madonong garo mga panudok”? (Eclesiastes 12:11)

An mga tataramon kan mga may diosnon na kadonongan sinasadol an mga nagbabasa o naghihinanyog na umoswag kaoyon kan madonong na mga tataramon na nabasa o nadangog.—11/15, pahina 21.

◻ Ano an diosnon na pakamansay?

Iyan an abilidad na mamidbid an kalaenan nin tama sa sala dangan pilion an tamang dalan. An pag-adal asin pag-aplikar kan Tataramon nin Dios nagtatao nin pakamansay.—11/15, pahina 25.

◻ An pagigin andam na akoon an mga paninimbagan maninigong timbangan nin ano? (1 Timoteo 3:1)

Ini maninigong timbangan nin marahay na paghusgar. Mayo nin siisay man na maninigong umako nin kadakol na asignasyon na dahelan kaiyan nawawara na an saiyang kagayagayahan sa paglilingkod ki Jehova. Kaomaw-omaw an espiritu nin pagigin andam, alagad dapat man na mabanaag sa pagigin andam an kababaan nin boot asin “marahay na kaisipan.” (Tito 2:12; Kapahayagan 3:15, 16)—12/1, pahina 28.

◻ Paano puedeng atubangon an angat sa pagpadakula sa aki?

Hinahatolan nin Dios an mga magurang na magin halimbawa, kaibaiba, parakomunikar, asin paratokdo. (Deuteronomio 6:6, 7)—12/1, pahina 32.