Huli ta Namibi Sia

SINABI ni apostol Pablo sa 1 Tesalonica 5:17, 18: “Mamibi nin daing ontok. Magpasalamat kamo para sa gabos na bagay. Huli ta iyo ini an kabotan nin Dios sa kasaro ni Cristo Jesus manongod sa saindo.” Alagad, nanonompongan daw nindo an saindong sadiri na nagduduwaduwa na magpasalamat kun nagkakakan sa panpublikong lugar, siring sa restawran? Huli sa patanid ni Jesus tumang sa mapagpasikat na pamibi, masasabotan kun taano an saro ta tibaad nagmamawot na maglikay na makaakit nin bakong maninigong atension sa saiyang sadiri. (Mateo 6:5, 6) Minsan siring, an pahilom na pamimibi puwedeng makaakit nanggad nin paborableng atension.

Ini an eksperyensia nin sarong hoben na ministro na naglilingkod sa Brooklyn Bethel, an pankinaban na opisina kan mga Saksi ni Jehova. Namamahaw sia sa sarong restawran, na nagpaplanong magduman sa saiyang lokal na kongregasyon asin makitipon sa grupo na makikikabtang sa gibohon na paghuhulit kan Kahadean. Kan mag-abot an saiyang pamahawan, namibi sia sa saiyang kinaugalean na paagi. Kan imuklat nia an saiyang mga mata, nagtangad sia asin naheling na may nagtitindog na serbidora na nakatorohok sa saiya.

“Namimibi kamo, bakong iyo?” an hapot nia. Kan nagsimbag siang iyo, sinabi kan babae: “Sierto na saro kamong Saksi ni Jehova. An sakong mga magurang iyo man. Nungka akong nagin tunay na interesado sa saindang relihiyon, alagad aram kong maninigo. Seguro kaipuhan akong sumuskriber sa The Watchtower asin Awake! Puwede ko daw iyan na makua saindo?”

“Haros mahakug ako sa sakong kakanon,” an nagigirumdoman kan hoben na tugang. Minsan siring, nakapasakamot sia nin duwang suskripsion asin nin duwang pinakabagong magasin sa babae asin nag-areglo nin pagdalaw liwat—gabos huli ta namibi sia.