‘Si Salomon Dai Nagubingan nin Siring sa Saro Kaini’
AN KADLAGANON na mga burak arog kan maheheling digdi ordinaryong maheheling sa kalabaan kan mga dalan sa timog Aprika. Inaapod iyan na cosmos asin naggikan iyan sa mga tropiko sa Amerika. An siring na magayonon na mga burak tibaad magpagirumdom sa sato kan sarong leksion na itinokdo ni Jesus. An dakol sa mga nagdadangog sa saiya dukha, asin nahahadit sinda dapit sa pisikal na mga pangangaipo ninda, an saindang kakanon asin gubing.
“Manongod sa paggubing,” si Jesus naghapot, “taano ta nahahadit kamo? Makanood kamo nin leksion sa mga liryo sa oma, kun paano sinda nagtutubo; dai sinda nagpapagal, ni naghahabol man sinda; alagad ako nagsasabi saindo na minsan si Salomon sa bilog niang kamurawayan dai nagubingan nin siring sa saro kaini.”—Mateo 6:28, 29.
Nagkaigwa nin manlaenlaen na suhestion sa kun anong espesipikong klase nin kadlaganon na burak an nasa isip ni Jesus. Minsan siring, ikinomparar iyan ni Jesus sa ordinaryong mga pananom, na nagsasabi: “Ngonyan, kun ginugubingan nin Dios sa siring na paagi an mga pananom sa oma, na ngonyan yaon asin sa aga iinaapon sa horno, bako daw na orog pa nia kamong gugubingan, kamo na may kadikit na pagtubod?”—Mateo 6:30.
Minsan ngani an cosmos dai naggikan sa Israel, sinuportaran nanggad kaiyan an leksion na itinotokdo ni Jesus. Baga man tinatanaw sa harayo o hineheling nin haranihan, kahangahanga an kagayonan kaiyan asin paborito iyan na retratohon kan mga retratista saka ipinta nin mga pintor. Totoo nanggad, si Jesus dai nagpapasobra kan sia nagsabing, “minsan si Salomon sa bilog niang kamurawayan dai nagubingan nin siring sa saro kaini.”
An leksion para sa sato ngonyan? An mga naglilingkod sa Dios makasesegurado na tatabangan nia sinda na makua an mga pangangaipo ninda dawa sa depisil na mga panahon. Ipinaliwanag ni Jesus: ‘Padagos nindong hanapon an kahadean [nin Dios], asin an mga bagay na ini [arog kan kinakaipuhan na kakanon asin gubing] idadagdag sa saindo.’ (Lucas 12:31) Iyo, nagbubunga nin tunay na mga pakinabang an paghanap kan Kahadean nin Dios. Alagad aram daw nindo kun ano an Kahadean nin Dios asin kun ano an gigibohon kaiyan para sa katawohan? Maoogma an Mga Saksi ni Jehova na tabangan kamong manompongan an mga simbag sa Biblia.