Nasasakalan

9, 10. Kan suanoy na mga panahon, simbolo nin ano an sakal, asin taano ta inagda ni Jesus an mga tawo na pasanon an saiyang sakal?

⁹ Narisa daw nindo na sa mga tataramon na kinotar sa Mateo 11:​28, 29, sinabi ni Jesus: “Pasana nindo an sakong sakal asin makanood kamo sa sako.” Kaidto, an sarong ordinaryong tawo tibaad an pagmate garo sia nagtatrabaho na nasasakalan. Poon kan suanoy na mga panahon, an sakal simbolo nin kaoripnan. (Genesis 27:40; Levitico 26:13; Deuteronomio 28:48) An dakol sa aldawan na trabahador na nanuparan ni Jesus nagtatrabaho na igwa nin aktuwal na sakal sa saindang abaga, na nagpapasan nin magabat na mga pasan. Depende sa pagkadisenyo sa sakal, iyan puedeng komportable sa liog asin abaga o iyan puedeng nakakagasgas. Bilang panday, si Jesus puedeng naggibo nin mga sakal, asin siertong tatao sia kun paano madisenyo nin sakal na “maboot.” Tibaad sinapinan nia nin anit o tela an irarom kaiyan tanganing an sakal magin komportable sagkod sa mapupuede.

¹⁰ Kan sabihon ni Jesus na, “Pasana nindo an sakong sakal,” puedeng iinaagid nia an saiyang sadiri sa saro na nagtatao nin mga sakal na marahay an pagkagibo na magigin “maboot” para sa liog asin abaga nin sarong trabahador. Sa siring, idinugang ni Jesus: “An sakong pasan magian.” Nangangahulogan ini na an pasanan na sakal bakong nakauuyam gamiton, asin an trabaho bako man na pan-ooripon. Totoo, sa pag-agda sa mga naghihinanyog sa saiya na akoon an saiyang sakal, si Jesus dai nag-aalok nin ensegidang pakaginhawa sa gabos na sobra kanakapagagabat na kamugtakan kan panahon na idto. Pero, an laen na punto de vista na iinatubang nia matao nin darudakulang kaginhawahan. An mga pagliliwat sa saindang estilo nin pamumuhay asin paghiro makagiginhawa man sa sainda. Orog na mahalaga, an malinaw asin masarig na paglaom matabang sa sainda na magin daing gayong tension an buhay.

Puede Kamong Makaginhawa

11. Taano ta dai man isinusuherir ni Jesus an pagbalidya nin mga sakal?

¹¹ Tabi mangnohon, dai sinasabi ni Jesus na ibabalidya kan mga tawo an sakal. Kontrolado pa man giraray kan Roma an nasyon, kun paanong kontrolado kan presenteng mga gobyerno an mga lugar na ineerokan kan mga Kristiano. An paniningil nin buhis kan Roma kaidtong enot na siglo dai mahahale. An mga problema sa salud asin pagbuhay yaon pa man giraray. An pagkabakong sangkap asin kasalan padagos na makaaapektar sa mga tawo. Pero, puede sindang makaginhawa paagi sa pag-ako kan katokdoan ni Jesus, siring na kita puede man ngonyan.

12, 13. Ano an idinoon ni Jesus na matao nin kaginhawahan, asin ano an nagin reaksion nin nagkapira?

¹² An sarong mahalagang aplikasyon kan ilustrasyon ni Jesus kan sakal nagin malinaw mapadapit sa paggibo nin mga disipulo. Daing duda na an pangenot na aktibidad ni Jesus iyo an pagtotokdo sa iba, na an idinodoon iyo an Kahadean nin Dios. (Mateo 4:23) Kaya kan sabihon nia na, “Pasana nindo an sakong sakal,” magigin kalabot nanggad dian an pagsunod sa saiya sa iyo man sanang aktibidad na iyan. An rekord kan Ebanghelyo nagpapaheling na napahiro ni Jesus an sinserong mga tawo na bagohon an saindang okupasyon, sarong pangenot na ikinapupurisaw sa buhay kan dakol. Girumdoma an saiyang pag-apod ki Pedro, Andres, Santiago, asin Juan: “Sumunod kamo sa sako, asin gigibohon ko kamong mga parasira nin mga tawo.” (Marcos 1:16-20) Ipinaheling nia sa mga parasira na idto kun gurano kanakakokontento kun gigibohon ninda an gibohon na ineenot nia sa saiyang buhay, na ginigibo iyan sa paggiya asin tabang nia.

¹³ An nagkapira sa Judiong mga nagdadangog sa saiya nakasabot asin iinaplikar iyan. Imahinara an kamugtakan sa tampi kan dagat na mababasa ta sa Lucas 5:1-11. Apat na parasira an nagpagal nin magdamlag alagad mayong nadakop. Bigla na sana, napano an saindang mga hikot! Dai ini nagkanorongod sana; resulta iyan kan pag-interbenir ni Jesus. Kan sinda magtanaw sa baybayon, naheling ninda an kadakoldakol na tawo na interesadong marhay sa mga katokdoan ni Jesus. Nakatabang iyan na ipaliwanag an sinabi ni Jesus sa apat na idto: “Poon ngonyan an dadakopon [nindo] mga tawong buhay.” Ano an nagin reaksion ninda? “Idinuong ninda an mga baroto, saka binayaan an gabos na bagay asin nagsunod sa saiya.”

14. (a) Paano kita makakukua nin kaginhawahan ngonyan? (b) Anong nakagiginhawang maogmang bareta an ibinalangibog ni Jesus?

¹⁴ Sa pundamental, kaagid kaiyan an puedeng magin reaksion nindo. An gibohon na pagtotokdo sa mga tawo kan katotoohan sa Biblia nagpapadagos sagkod ngonyan. Mga anom na milyon na Saksi ni Jehova sa bilog na kinaban an nag-ako kan pangagda ni Jesus na ‘pasanon ninda an saiyang sakal’; sinda nagin “parasira nin mga tawo.” (Mateo 4:19) An nagkapira ginibo iyan na bilog na panahon na okupasyon ninda; an iba ginigibo an saindang makakaya nin por ora sana. Para sa gabos nakagiginhawa iyan, kaya an saindang buhay nagigin daing gayong tension. Kabale dian an paggibo kan ikinaoogma ninda, pagsabi sa iba nin maogmang bareta​—an “maogmang bareta kan kahadean.” (Mateo 4:23) Pirmeng nakaoogma na pag-olayan an manongod sa maogmang mga bareta alagad nangorogna an maogmang bareta na ini. Nasa Biblia an pangenot na materyales na kaipuhan niato tanganing kombensiron an dakol na puede sindang magkaigwa nin buhay na daing gayong tension.​—2 Timoteo 3:​16, 17.

15. Paano kamo puedeng makinabang sa mga katokdoan ni Jesus manongod sa buhay?

¹⁵ Sa sarong kabtang, dawa an mga tawo na nagpoon pa sanang makanood manongod sa Kahadean nin Dios nakikinabang na sa mga katokdoan ni Jesus manongod sa kun paano mamumuhay. Dakol an sadiosan na makasasabi na an mga katokdoan ni Jesus nakaginhawa sa sainda asin nakatabang na bakleon an saindang buhay. Mapatutunayan nindo iyan sa saindong sadiri paagi sa pagsiyasat sa nagkapira sa mga prinsipyo nin pamumuhay na isinabi sa pagkasaysay dapit sa buhay asin ministeryo ni Jesus, partikular na an Ebanghelyo ni Mateo, Marcos, asin Lucas.

Sarong Paagi na Makaginhawa

16, 17. (a) Saen nindo manonompongan an nagkapira sa pangenot na mga katokdoan ni Jesus? (b) Ano an kaipuhan tanganing makaginhawa paagi sa pag-aplikar kan mga katokdoan ni Jesus?

¹⁶ Kan tigsoli nin 31 C.E., nagtao si Jesus nin sarong diskurso na bantog sa kinaban sagkod ngonyan. Iyan sa parate inaapod na Sermon sa Bukid. Nakasurat iyan sa Mateo kapitulo 5 sagkod 7 asin Lucas kapitulo 6, asin sinusumaryo kaiyan an dakol sa saiyang mga katokdoan. Maheheling nindo an iba pang katokdoan ni Jesus sa iba pang kabtang kan Ebanghelyo. An dakol sa saiyang sinabi madaling saboton, pero an pag-aplikar kaiyan puedeng masakit. Taano ta dai basahon nin maingat asin may paghorophorop an mga kapitulong iyan? Togotan an puersa kan saiyang mga ideya na makaimpluwensia sa saindong kaisipan asin aktitud.

¹⁷ Siempre pa, an mga katokdoan ni Jesus puedeng areglaron sa laen-laen na paagi. Grupo-grupohon niato an pangenot na mga katokdoan tanganing igwa nin saro para sa kada aldaw kan bulan, na an pasohan iaplikar iyan sa saindong buhay. Paano? Bueno, dai iyan pagpasadahan sana. Girumdoma an mayaman na namamahala na naghapot ki Jesu-Cristo: “Sa paggibo nin ano na ako magmamana nin buhay na daing katapusan?” Kan repasohon ni Jesus an mahalagang marhay na mga kahagadan sa Ley nin Dios, an lalaki nagsimbag na naootob na nia ini. Pero, narealisar nia na kaipuhan niang gumibo nin orog pa. Sinabihan sia ni Jesus na gumibo nin orog pang paghihingoa na iaplikar an diosnon na mga prinsipyo sa praktikal na mga paagi, na magin aktibong disipulo. Minalataw na an lalaki dai andam na gibohon an siring kaiyan. (Lucas 18:18-23) Huli kaini, kaipuhan na girumdomon nin saro na gustong makanood kan mga katokdoan ni Jesus ngonyan na igwa nin kalaenan an pag-oyon dian asin aktibong pag-ako kaiyan, na sa siring nakakabawas sa tension.

18. Ipaheling kun paano nindo magagamit nin kapakipakinabang an kaibanan na kahon.

¹⁸ Bilang pagpopoon kan pagsiyasat asin pag-aplikar kan mga katokdoan ni Jesus, helinga an punto 1 sa kaibanan na kahon. Itinotokdo kaiyan an Mateo 5:3-9. An totoo, an siisay man sa sato puedeng gumamit nin dakol-dakol na panahon sa paghorophorop sa makangangalas na hatol na iinatubang sa mga bersikulong iyan. Pero, sa pagsiyasat dian sa kabilogan, ano an konklusyon nindo manongod sa aktitud? Kun talagang gusto nindong mahale an epekto nin labi-labing tension sa buhay nindo, ano an makatatabang? Paano kamo mapapakarhay kun dudugangan nindo an atension nindo sa espirituwal na mga bagay, na tinotogotan iyan na mag-okupar nin orog na kabtang sa saindong isip? Igwa daw nin bagay sa saindong buhay na dai nindo kaipuhan na gayong tawan nin importansia, na nagtotogot na matawan nin orog na atension an espirituwal na mga isyu? Kun iyan gigibohon nindo, makadadagdag iyan sa saindong kaogmahan ngonyan.

19. Ano an puede nindong gibohon tanganing makakua nin dugang na pakarorop asin pakasabot?

¹⁹ Ngonyan gibohon nindo an saro pang lakdang. Taano ta dai ipakipag-olay sa saro pang lingkod nin Dios an mga bersikulong iyan, puedeng sa saindong agom, dayupot na paryente, o katood? (Talinhaga 18:24; 20:5) Tandaan na an mayaman na namamahala naghapot sa iba​—ki Jesus​—manongod sa sarong konektadong bagay. An simbag puede kutanang nakadagdag sa saiyang tinatanaw na kaogmahan asin nagdadanay na buhay. An kapwa parasamba na kinakaolay nindo dapit sa mga bersikulong iyan bakong kapareho ni Jesus; pero, pareho kamo makikinabang sa pag-oolay manongod sa mga katokdoan ni Jesus. Probaran na gibohon tolos-tolos iyan.

20, 21. Anong programa an puede nindong sundan tanganing manodan an mga katokdoan ni Jesus, asin paano nindo matatantsar an saindong pag-oswag?

²⁰ Helinga giraray an kaibanan na kahon na, “Mga Katokdoan na Matabang sa Saindo.” An mga katokdoan na ini grinupo-grupo tanganing igwa kamo nin kisuerra sarong katokdoan na hohorophoropon sa sarong aldaw. Puede nindong basahon nguna an sinabi ni Jesus sa sinitar na mga bersikulo. Dangan isip-isipon an saiyang mga tataramon. Pensaron kun paano nindo iyan ikaaaplikar sa saindong buhay. Kun sa heling nindo ginigibo na nindo iyan, magpensar tanganing maheling kun ano pa an magigibo nindo tanganing makapamuhay sono sa katokdoan na iyan nin Dios. Isagibo iyan durante kan aldaw na iyan. Kun kaipuhan nindong maghingoa nin maigot tanganing masabotan iyan o mamansayan kun paano nindo iyan ikaaaplikar, gibohon iyan nin saro pang aldaw. Minsan siring, tandaan na dai nindo iyan kaipuhan na polboson bago kamo dumagos sa masunod. Sa sunod na aldaw, puede nindong estudyaran an saro naman na katokdoan. Sa poro kan semana, puede nindong repasohon kun gurano kamo kamapanggana sa paggamit nin apat o lima kan mga katokdoan ni Jesus. Sa sunod na semana dagdagan pa iyan, kada aldaw. Kun maheling nindo na dai nindo ikinaaplikar an sarong katokdoan, dai manluya an boot. An lambang Kristiano makaeeksperyensia kaiyan. (2 Cronica 6:36; Salmo 130:3; Eclesiastes 7:20; Santiago 3:8) Ipadagos iyan sa ikatolong semana asin sa ikaapat.

²¹ Pakalihis nin sambulan o labi pa, tibaad naestudyaran na nindo an gabos na 31 punto. Sa paano man, ano daw an mamamatean nindo bilang resulta? Bako daw na kamo medyo mas maogma, tibaad mas relaks na. Dawa kun dikit sana an inoswag nindo, posibleng marhay na kamo dai nang gayo matetension, o minsan paano mas makakaya na nindo an tension, asin igwa na kamo nin paagi na magpadagos. Dai paglingawan na igwa pang dakol na marahay na punto sa mga katokdoan ni Jesus na mayo sa lista. Taano ta dai siyasaton an nagkapira kaiyan asin hingoahon na iaplikar iyan?​—Filipos 3:16.

22. Ano an puedeng ibunga kan pagsunod sa katokdoan ni Jesus, alagad ano pang aspekto an maninigo na pag-adalan?

²² Masasabotan nindo na an sakal ni Jesus, baga man bakong daing gabat, totoong maboot. An pasan na mga katokdoan nia asin nin pagigin disipulo magian. Pakalihis nin labing 60 taon nin personal na eksperyensia, si apostol Juan, an dayupot na katood ni Jesus, uminoyon: “Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon dai nakapagagabat.” (1 Juan 5:3) Puede man kamong magkaigwa kan siring na kompiansa. Mientras na mas haloy na kamong nag-aaplikar kan mga katokdoan ni Jesus, orog man nindong maheheling na an nakakatension na marhay sa buhay nin dakol ngonyan bako man na siring kanakapupurisaw sa saindo. Maheheling nindo na darudakula an pakaginhawa nindo. (Salmo 34:8) Pero, may saro pang aspekto an maboot na sakal ni Jesus na kaipuhan nindong estudyaran. Nasambitan man ni Jesus an saiyang pagigin “mahoyo asin may kababaan an puso.” Paano iyan minaaplikar sa satong pakanood asin pag-arog ki Jesus? Sa masunod na artikulo, eestudyaran niato ini.​—Mateo 11:29.

“Makanood Kamo sa Sako”

“Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin makakukua kamo nin kaginhawahan para sa saindong kalag.”​—MATEO 11:29.

1. Taano an pakanood ki Jesus ta puedeng magin nakaoogma asin nakapaooswag sa kualidad nin buhay?

SI Jesu-Cristo pirmeng nag-iisip, nagtotokdo, asin naghihiro sa angay na paagi. An saiyang panahon sa daga halipot, alagad nagkaigwa sia nin kapakipakinabang asin nakakokontentong karera, asin nagdanay siang maogma. Nagtipon sia nin mga disipulo asin tinokdoan sinda kun paano sasambahon an Dios, kamomotan an mga tawo, asin dadaogon an kinaban. (Juan 16:33) Pinano nia nin paglaom an saindang puso asin ‘tinawan nin liwanag an buhay asin pagkadaing kalapaan paagi kan maogmang bareta.’ (2 Timoteo 1:10) Kun kamo kabilang sa saiyang mga disipulo, ano sa paghona nindo an kahulogan nin pagigin disipulo? Paagi sa pag-estudyar sa sinasabi ni Jesus manongod sa mga disipulo, makakanood kita kun paano paooswagon an kualidad kan satong buhay. Kalabot dian an pag-ako sa saiyang punto de vista asin pag-aplikar kan nagkapirang pundamental na prinsipyo.​—Mateo 10:​24, 25; Lucas 14:​26, 27; Juan 8:​31, 32; 13:35; 15:8.

2, 3. (a) Ano an disipulo ni Jesus? (b) Taano ta mahalaga na ihapot sa satong sadiri, ‘Kiisay daw ako nagin disipulo?’

² Sa Kristianong Griegong Kasuratan, an termino na trinadusir na “disipulo” sa pundamental nangangahulogan nin saro na itinututok an saiyang isip sa sarong bagay, o saro na nakakanood. An sarong konektadong termino minalataw sa satong pinakatemang teksto, an Mateo 11:29: “Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin makakukua kamo nin kaginhawahan para sa saindong kalag.” Iyo, an disipulo saro na nakakanood. Sa parate iinaaplikar kan Ebanghelyo an terminong “disipulo” sa dayupot na mga parasunod ni Jesus, na uminiba sa saiya mantang sia naghuhulit asin mga tinokdoan nia. May mga tawo na tibaad inako sana an mga katokdoan ni Jesus, na ginigibo pa ngani iyan sa hilom. (Lucas 6:17; Juan 19:38) Nauunabihan man kan mga kagsurat kan Ebanghelyo “an mga disipulo ni Juan [na Bautisador] asin an mga disipulo kan mga Fariseo.” (Marcos 2:18) Huling pinatanidan ni Jesus an saiyang mga parasunod na “magmaan . . . sa katokdoan kan mga Fariseo,” puede tang ihapot sa satong sadiri, ‘Kiisay daw ako nagin disipulo?’​—Mateo 16:12.

³ Kun kita disipulo ni Jesus, kun kita nakanood sa saiya, kun siring an iba dapat na makamateng nagiginhawahan sa espirituwal sa satong presensia. Dapat nindang mamansayan na kita nagin orog na mahoyo asin may kababaan an puso. Kun igwa kita nin mga responsibilidad na pagmanehar sa satong trabaho, kun kita magurang, o igwa nin katongdan na pagpastor sa Kristianong kongregasyon, an mga nasa pangangataman daw niato nakakamate na tinatratar ta sinda nin siring kan pagtratar ni Jesus sa mga nasa pangangataman nia?

Kun Paano an Pagtratar ni Jesus sa mga Tawo

4, 5. (a) Taano ta bakong masakit na maaraman kun paano an pagtratar ni Jesus sa mga tawong may mga problema? (b) Ano an naeksperyensiahan ni Jesus kan nagkakakan sa harong nin sarong Fariseo?

⁴ Kaipuhan tang maaraman kun paano an pagtratar ni Jesus sa mga tawo, nangorogna sa mga may magabat na mga problema. Dai iyan maninigo na magin masakit manodan; an Biblia igwa nin dakol na report dapit sa mga pagkanupar ni Jesus sa ibang mga tawo, na an nagkapira purisaw. Mangnohon ta man an paagi nin pagtratar kan mga namomoon sa relihion, partikular na an mga Fariseo, sa mga tawo na igwa nin kaparehong mga problema. An kalaenan nagtatao nin kaliwanagan.

⁵ Kan taon 31 C.E., kan si Jesus nagbabaklay sa paghuhulit sa Galilea, “saro sa mga Fariseo an padagos na nakikiolay [ki Jesus] na magkakan sia kaiba kaini.” Si Jesus dai nag-alangan na akoon an imbitasyon. “Huli kaiyan naglaog sia sa harong kan Fariseo asin huminilay sa lamesa. Asin, uya! sarong babae na midbid sa siudad na sarong parakasala an nakaaram na sia nakahilay sa pagkakan sa harong kan Fariseo, asin nagdara ini nin sarong lalagan na alabastro na may ungguento, asin, pakapuesto sa likod sa may pamitisan nia, naghibi an babae asin pinonan na basaon an saiyang mga bitis kan mga luha nia asin pinunasan nia iyan kan bohok kan saiyang payo. Siring man, mapagpadangat na hinadokan kan babae an saiyang mga bitis asin linahidan iyan kan ungguento.”​—Lucas 7:36-38.

6. Tadaw an babae na “sarong parakasala” ta yaon sa harong kan Fariseo?

⁶ Maiimahinar daw nindo iyan? An sarong reperensia nagsasabi: “Inaprobetsaran kan babae (b.37) an sosyal na mga kostumbre na nagtotogot sa mga tawong daing sukat na sumongko sa siring na mga bangkete tanganing akoon an nagkapirang tada.” Iyan an puedeng magpaliwanag kun paano makakalaog an sarong tawo na dai imbitado. Tibaad may iba pang nag-aasa na kumua nin tada pagkatapos kan karakanan. Minsan siring, pambihira an ihiniro kan babaeng ini. Dai sia nag-abang bilang bakong kabale, na hinahalat na matapos an pamanggihan. Maraot an reputasyon nia, sarong midbid na “parakasala,” kaya nagsabi si Jesus na aram nia “an saiyang mga kasalan, minsan pa gurano kadakol.”​—Lucas 7:47.

7, 8. (a) Ano daw kutana an satong nagin reaksion sa situwasyon na siring kan ibinareta sa Lucas 7:36-38? (b) Ano an nagin reaksion ni Simon?

⁷ Imahinara na kamo buhay na kan panahon na idto asin nasa lugar ni Jesus. Ano daw kutana an nagin reaksion nindo? Dai daw kamo mapapamugtak kan an babaeng ini rumani sa saindo? Ano an magigin epekto sa saindo kan siring na situwasyon? (Lucas 7:45) Kamo daw mangigirabo, makukubhanan?

⁸ Kun kabale kamo sa iba pang mga bisita, an kaisipan daw nindo tibaad nagin minsan paano medyo arog kan kaisipan ni Simon na Fariseo? “Kan maheling iyan an Fariseo na nag-imbitar [ki Jesus] nagsaboot: ‘An tawong ini, kun sia propeta, makakamidbid kun siisay asin kun anong klaseng babae an nagduduta sa saiya, na sia sarong parakasala.’” (Lucas 7:39) Sa kabaliktaran, si Jesus sarong tawo na may hararom na pakikidamay. Naintindihan nia an mamondong kamugtakan kan babae asin namatean an labi-labing kamondoan kaini. Dai sinabi sa sato kun paano sia naholog sa pamumuhay sa kasalan. Kun sia talagang patotot, an mga tawo sa banwaan, na debotong mga Judio, minalataw na dai sia tinabangan.

9. Ano an reaksion ni Jesus, asin ano an posibleng resulta?

⁹ Alagad boot ni Jesus na tabangan sia. Sinabi nia sa saiya: “Ipinatawad na an saimong mga kasalan.” Dangan sinabi pa nia: “Ilinigtas ka kan saimong pagtubod; lakaw sa katoninongan.” (Lucas 7:48-50) Digdi natatapos an pagkasaysay. Tibaad may kumontra na mayo man gayong ginibo si Jesus para sa saiya. Sa pundamental, pinahale nia sia na may bendisyon nia. Sa paghona daw nindo posibleng nagbalik sia sa saiyang makamomondong pamumuhay? Minsan ngani dai kita nakasisierto, mangnoha an sunod na sinasabi ni Lucas. Isinaysay nia na si Jesus naglibot “sa siudad-siudad asin baryo-baryo, na naghuhulit asin nagpapahayag kan maogmang bareta kan kahadean.” Ibinareta man ni Lucas na “an nagkapirang babae” kaibanan ni Jesus asin kan saiyang mga disipulo, “na naglilingkod sa sainda gikan sa . . . mga rogaring [kan mga babae].” Dai puedeng haleon an posibilidad na an nagsosolsol asin mapag-apresyar na babaeng ini kabilang na ngonyan sa sainda, na pinoponan an sarong diosnon na pamumuhay na may malinig na konsensia, nabuhay giraray na pakamate nin katuyohan, asin mas hararom nanggad na pagkamoot sa Dios.​—Lucas 8:1-3.

An Kalaenan ni Jesus Asin kan mga Fariseo

10. Taano ta kapakipakinabang na estudyaran an pagkasaysay dapit ki Jesus asin kan babae sa harong ni Simon?

¹⁰ Ano an manonodan ta sa malinaw na pagkasaysay na ini? Pinahihiro kaiyan an satong emosyon, bako daw? Imahinaron nindo na kamo nasa harong ni Simon. Ano daw an mamamatean nindo? An reaksion daw nindo kapareho kan ki Jesus, o makakamate kamo nin medyo arog kan Fariseo na nag-imbitar sa saiya? Si Jesus an Aki nin Dios, kaya dai kita puedeng makamate asin humiro na kaparehong-kapareho nia. Sa ibong na kampi, tibaad habong-habo niatong isipon na kita kapareho ni Simon, an Fariseo. Pipira an ipag-oorgolyo an pagigin Fariseo.

11. Taano ta habo niato na ibilang sa mga Fariseo?

¹¹ Base sa pagsiyasat sa nasa Biblia asin sekular na ebidensia, ikakokonklusyon ta na an mga Fariseo halangkaw an pagheling sa saindang sadiri bilang mga bantay kan karahayan kan publiko asin kan ikararahay kan nasyon. Bako sindang kontento na an Ley nin Dios sa pundamental malinaw na asin madaling masabotan. Kun an Ley garo baga para sa sainda bakong espesipiko, hiningoa ninda na dugangan iyan nin espesipikong mga aplikasyon tanganing haleon an ano man na pangangaipo nin konsensia. An mga namomoon na ini sa relihion nagprobar na mag-imbento nin sarong presepto na madeterminar kan paggawe sa gabos na isyu, maski sa mga bagay na daing halaga.a

12. Ano an pagheling kan mga Fariseo sa saindang sadiri?

¹² Linilinaw kan Judiong historyador kan enot na siglo na si Josefo na an heling kan mga Fariseo sa saindang sadiri maboot, suabe, rasonable, asin biyong kualipikado sa saindang trabaho. Daing duwa-duwa, an nagkapira sa sainda medyo arog kaiyan. Tibaad sumabong sa isip nindo si Nicodemo. (Juan 3:​1, 2; 7:​50, 51) Pag-abot nin panahon, an nagkapira sa sainda maogmang inako an Kristianong dalan. (Gibo 15:5) An Kristianong apostol na si Pablo nagsurat manongod sa nagkapirang Judio, arog kan mga Fariseo: “Igwa sinda nin kaigotan para sa Dios; alagad bakong oyon sa tamang kaaraman.” (Roma 10:2) Minsan siring, ipinamimidbid sinda kan Ebanghelyo segun sa pagheling sa sainda kan ordinaryong mga tawo​—mga mapalangkaw, arogante, nagpapakangmatanos, tatsador, mapaghusgar, asin mapagmenos.

An Pagheling ni Jesus

13. Ano an sinabi ni Jesus manongod sa mga Fariseo?

¹³ Sinagwe nin makuri ni Jesus an mga eskriba asin Fariseo bilang mga mapagsaginsagin. “Sinda nagbobogkos nin magabat na mga pasanon asin ibinubugtak iyan sa mga abaga nin mga tawo, alagad sinda mismo harabong humiro kaiyan minsan kan saindang moro.” Iyo, magabat an pasanon, asin an sakal na iniimponer sa mga tawo masakit. Nagpadagos si Jesus sa pag-apod sa mga eskriba asin Fariseo na “mga mangmang.” An mangmang sarong peligro sa komunidad. Inapod man ni Jesus an mga eskriba asin Fariseo na “butang mga parakabit” asin positibong sinabi na “liningawan [ninda] an mas magabat na mga bagay kan Ley, arin na baga, an hustisya asin pagkaherak patin pagigin fiel.” Siisay an magugusto na ibilang sia ni Jesus na Fariseo?​—Mateo 23:1-4, 16, 17, 23.

14, 15. (a) An pagtratar ni Jesus ki Mateo Levi naghahayag nin ano manongod sa ugale kan mga Fariseo? (b) Anong mahalagang mga leksion an manonodan ta sa pagkasaysay na ini?

¹⁴ An haros siisay man na nagbabasa kan pagkasaysay sa Ebanghelyo maheheling an pagigin mapagtatsar kan kadaklan na Fariseo. Pakaagda ni Jesus ki Mateo Levi, an parasingil nin buhis, na magin disipulo, si Levi nagpuesto nin sarong dakulang bangkete bilang pag-ako sa saiya. An pagkasaysay nagsasabi: “Sa puntong ini an mga Fariseo asin an saindang mga eskriba nagpoon na maggumodgumod sa saiyang mga disipulo, na sinasabi: ‘Taano ta nagkakakan asin nag-iinom kamo kaiba nin mga parasingil nin buhis asin mga parakasala?’ Sa pagsimbag si Jesus nagsabi sa sainda: ‘ . . . Nagdatong ako tanganing apodon, bakong an mga matanos, kundi an mga parakasala na magsolsol.’”​—Lucas 5:27-32.

¹⁵ Nasabotan mismo ni Levi an ibang bagay na sinabi ni Jesus sa okasyon na idto: “Kun siring paduman kamo asin aramon an kahulogan kaini, ‘An boot ko pagkaherak, asin bakong atang.’” (Mateo 9:13) Minsan ngani an mga Fariseo naghihingakong naniniwala sa mga isinurat kan mga propetang Hebreo, dai ninda inako an kasabihan na ini hale sa Oseas 6:6. Kun sinda mapapasala man, sinisierto ninda na iyan huli sa pagkuyog sa tradisyon. Puedeng ihapot kan lambang saro sa sato sa satong sadiri, ‘Igwa daw ako nin reputasyon nin pagigin mapag-insistir sa nagkapirang susundon, siring kan mga susundon na nagpapabanaag nin personal na opinyon o sentido komun manongod sa sarong bagay? O an pagheling daw sa sako kan iba nangengenot sa gabos na maheherakon asin marahay?’

16. Ano an ugale kan Fariseo, asin paano ta malilikayan na magin arog ninda?

¹⁶ Magdiskitar, magdiskitar, magdiskitar. Iyan an ugale kan Fariseo. An mga Fariseo naghahanap nin gabos na sala​—totoo o imahinasyon. Gusto ninda na nagdedepensa an mga tawo asin ipinarurumdom sa sainda an mga pagkukulang ninda. Ipinag-oorgolyo kan mga Fariseo an pagtao nin tinagba kan pinakasadit na mga tinanom, arog kan yerbabuena, anis, asin komino. Ipinagpapasikat ninda an saindang kabanalan paagi sa saindang gubing asin hiningoang direhiran an nasyon. Daing duwa-duwa, tanganing an satong mga hiro magin kaoyon kan halimbawa ni Jesus, dapat niatong likayan an tendensia na pagparahanap asin pagparadoon kan mga sala nin iba.

Paano Inasikaso ni Jesus an mga Problema?

17-19. (a) Ipaliwanag kun paano inasikaso ni Jesus an sarong situwasyon na puede kutanang nagkaigwa nin grabeng mga resulta. (b) Ano an nagpangyari na magin nakakatension asin nakakaaburido an situwasyon? (c) Kun yaon kamo duman kan an babae rumani ki Jesus, ano daw kutana an nagin reaksion nindo?

¹⁷ An paagi ni Jesus sa pag-asikaso nin mga problema laen na marhay kan sa mga Fariseo. Estudyare kun paano inasikaso ni Jesus an sarong situwasyon na puede kutanang nagin grabe. May labot iyan sa sarong babae na 12 taon nang pinag-aawasan nin dugo. Mababasa nindo an pagkasaysay sa Lucas 8:42-48.

¹⁸ An pagkasaysay ni Marcos nagsasabi na an babae “natatakot asin nagtatakig.” (Marcos 5:33) Taano? Daing duwa-duwa ta aram niang binalga nia an Ley nin Dios. Segun sa Levitico 15:25-28, an sarong babae na bakong normal an pag-awas nin dugo maati sagkod na nagpapadagos iyan, patin sa sarong semana pagkatapos. An gabos na madutaan nia asin an gabos na tawong makaolay nia nagigin maramog. Tanganing makarani ki Jesus, an babaeng ini kinaipuhan na makisusuan sa kadakol na tawo. Kun hehelingon ta an pagkasaysay pakalihis nin 2,000 na taon, kita masimpatiya sa saiyang kadepisilan.

¹⁹ Kun yaon kamo kan aldaw na idto, paano daw kutana nindo mamansayon an situwasyon? Ano daw kutana an sinabi nindo? Mangnoha na trinatar ni Jesus an babaeng ini sa maboot, mamomoton, asin makonsiderasyon na paagi, na dai ngani nauunabihan an ano man na tibaad nagin mga problema dahelan sa saiya.​—Marcos 5:34.

20. Kun an Levitico 15:25-28 sarong kahagadan sa ngonyan, anong angat an mapapaatubang sa sato?

²⁰ May manonodan daw kita sa pangyayaring ini? Halimbawang kamo magurang sa Kristianong kongregasyon ngonyan. Saka ipamugtak pa na an Levitico 15:25-28 sarong Kristianong kahagadan sa ngonyan asin na binalga nin sarong Kristiana an ley na iyan, na natataranta asin daing maginibo. Ano an magigin reaksion nindo? Susupogon daw nindo sia sa publiko paagi sa mapagkritika na hatol? “Ay,” sasabihon nindo, “nungka kong gigibohon iyan! Bilang pagsunod sa halimbawa ni Jesus, gigibohon ko an gabos na paghihingoa na magin maboot, mamomoton, maasikaso, asin makonsiderasyon.” Marahayon! Alagad an angat iyo na gibohon iyan, na arogon an ugale ni Jesus.

21. Ano an itinokdo ni Jesus sa mga tawo manongod sa Ley?

²¹ Sa pundamental, an mga tawo nagiginhawahan ki Jesus, naoogma asin naparirigon an boot. Kun saen espesipiko an Ley nin Dios, iyan an talagang gustong sabihon kaiyan. Kun iyan garo pankagabsan, orog nang dapat nindang gamiton an saindang konsensia asin ikapaheheling ninda an saindang pagkamoot sa Dios paagi sa saindang mga desisyon. An Ley nagtotogot sa sainda na mabuhay asin humangos. (Marcos 2:​27, 28) An Dios namoot sa saiyang banwaan, danay na ginigibo an para sa saindang ikararahay, asin andam na maherak kun sinda mapasala. Arog kaiyan si Jesus.​—Juan 14:9.