“Magpaoripon Kamo sa Kagurangnan, si Cristo”
SA BILOG na kasaysayan, minilyon na tawo na an nagtagal sa gabat nin pagkaoripon. Halimbawa, rinibong taon na an nakaagi, an mga Israelita nagsapar na gayo sa kamot kan mga kapatas na Egipcio. Siring sa sinasabi kan Biblia, ‘binugtakan ninda an mga Israelita nin mga kapatas kan mga oripon tanganing papanluyahon sinda sa irarom nin magagabat na pasan,’ partikularmente sa paggibo nin mga ladrilyo.—Exodo 1:11, The Jerusalem Bible.
Sa dakol na nasyon ngonyan, an mga tawo tibaad dai inooripon sa literal na sentido, alagad dakol an kaipuhan na magtrabaho nin halawig na mga oras sa irarom nin eksido—kun beses masakit—na mga kamugtakan. Nasa irarom sinda kan dakulang pagabat kan puedeng apodon na pagkaoripon sa pagbuhay.
Minsan siring, igwa nin sarong klase nin pagkaoripon na bakong magabat. Sinadol ni apostol Pablo an mga kapwa nagtutubod: “Magpaoripon kamo sa Kagurangnan, si Cristo.” (Colosas 3:24) An mga pinili na magin oripon ni Cristo nakanonompong nin kaginhawahan sa saindang magabat na mga pasan. Si Jesus mismo nagsabi: “Madia kamo sa sako, kamo gabos na nagpapagal asin nagagabatan, asin pagiginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin mapakumbaba sa puso, asin makakukua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”—Mateo 11:28-30.
An pag-ako kan sakal ni Cristo dai pinalilibre an saro sa obligasyon na sustentohan sa materyal an saiyang pamilya. (1 Timoteo 5:8) Minsan siring, iyan talagang nagtatao nin katalingkasan sa dakol na siod nin materyalistikong mga okupasyon. Imbes na gibohon an materyal na kaginhawahan na pangenot nindang pasohan sa buhay, nakanonompong an mga Kristiano nin pagkakontento sa pundamental na mga pangangaipo.—1 Timoteo 6:6-10; ikomparar an 1 Corinto 7:31.
Nakanonompong man an mga Kristiano nin kaginhawahan sa pag-otob kan saindang paninimbagan na paghuhulit kan “maogmang bareta” kan Kahadean nin Dios. (Mateo 24:14) Ini nagtatao nin tunay na kagayagayahan asin satispaksion!
Maninigo kitang magpasalamat na puede kitang ‘magpaoripon sa Kagurangnan, si Cristo’!
[Pasasalamat para sa pinagkuanan kan retrato sa pahina 32]
Pictorial Archive (Near Eastern History) Est.