Kan si Jesus mga dos anyos pa sana, dinara siya digdi ni Jose asin Maria hali sa Ehipto. Minalataw na kan panahon na ini, siya pa sana an aki ninda. Pero paghaloy-haloy, namundag an saiyang mga tugang na lalaki sa ina—si Santiago, Jose, Simon, asin Judas. Nagkaigwa man si Jose asin Maria nin mga aking babayi, na mga tugang pa ni Jesus sa ina. Iyo, nagkaigwa si Jesus nin dai mababa sa anom na nguhod na tugang na lalaki saka babayi.

Kaipuhan ni Jose na magtrabahong marhay para suportaran an nagdadakula niyang pamilya. Saro siyang karpintero. Pinadakula niya si Jesus bilang sadiri niyang aki, kaya inapod si Jesus na “aki kan karpintero.” (Mateo 13:55) Tinukduan man ni Jose si Jesus nin pagkarpintero, asin nakanuod ining marhay. Sa katunayan, kan huri nagsarabi an mga tawo manungod ki Jesus: “Ini su karpintero.”—Marcos 6:3.