AN Ebanghelyo ni Lucas isinurat nin sarong tawo na alisto an isip asin maboot an puso, patin an marahayon na kombinasyon na ini nin mga kualidad, kaiba an paggiya kan espiritu nin Dios, nagbunga nin sarong pagkasaysay na eksakto sagkod pano nin init saka pagmate. Sa enot na mga bersikulo, sia nagsasabi, “Pinagmarahay ko man, huling sinusog ko nin eksakto an gabos na bagay poon sa kapinonan, na isurat iyan sa saimo sa makatanosan na pagkasurunodsunod.” An saiyang detalyado asin maingat na pag-atubang kaiyan lubos na nagpapatunay sa sinabing ini.​—⁠Luc. 1:⁠3.

⁴ Kasuarin isinurat ni Lucas an saiyang Ebanghelyo? Ipinaparisa kan Gibo 1:1 na an kagsurat kan Gibo (na iyo man si Lucas) naenot nang isinurat an “enot na pagkasaysay,” an Ebanghelyo. An Gibo posibleng marhay na natapos kan mga 61 C.E. mantang nasa Roma si Lucas kaiba ni Pablo, na hinahalat an saiyang apelasyon ki Cesar. Kaya an pagkasaysay sa Ebanghelyo posibleng isinurat ni Lucas sa Cesarea kan mga 56-58 C.E., pagkatapos na sia magbalik kaiba ni Pablo hale sa Filipos sa katapusan kan ikatolong pagbiahe sa pagmimisyonero ni Pablo asin mantang si Pablo naghahalat nin duwang taon sa bilanggoan sa Cesarea bago darahon sa Roma para sa saiyang apelasyon. Huling si Lucas nasa Palestina, sa panahon na ini nasa marahay siang kamugtakan na ‘susogon nin eksakto an gabos na bagay poon sa kapinonan’ manongod sa buhay asin ministeryo ni Jesus. Huli kaini, minalataw na an pagkasaysay ni Lucas naenot sa Ebanghelyo ni Marcos.

⁵ Siempre, dai man naheling mismo ni Lucas an gabos na pangyayari na isinurat nia sa saiyang Ebanghelyo, huling bako siang kaiba sa 12 asin posibleng saka sana sia nagtubod pagkagadan ni Jesus. Minsan siring, sia dayupot na marhay na kaibaiba ni Pablo sa langtad nin pagmimisyonero. (2 Tim. 4:11; Filem. 24) Kaya, siring sa malalaoman, an saiyang surat nagpapatunay kan impluwensia ni Pablo, siring kan maheheling kun pagkokompararon an duwang pagkasaysay ninda dapit sa Pamanggihan kan Kagurangnan, na nasa Lucas 22:​19, 20 asin 1 Corinto 11:​23-25. Bilang dugang pang reperensia, posibleng nagkonsulta si Lucas sa Ebanghelyo ni Mateo. Sa ‘pagsusog nin eksakto sa gabos na bagay,’ personalmente niang maiinterbio an dakol na nakaheling mismo kan mga pangyayari sa buhay ni Jesus, siring baga kan buhay pang mga disipulo asin posibleng pati an ina ni Jesus na si Maria. Makakasierto kita na ginibo nia an gabos na paagi tanganing tiponon an gabos na masasarigan na detalye.