Ihinahapot nin mga Hobenes . . .

Taano ta Maninigo Akong Magsakripisyo Para sa Iba?

“KIISAY na interes an naeenot sa saindong buhay?” An sarong reporter kan Magmata! ihinapot ini sa sarong grupo nin mga hobenes sa matawong tinampo. “An sakuya,” sabi ni Mike. “Inaasikaso ko an ‘numero uno’ nin enot, ultimo, asin sa gabos na panahon.” An desisiete anyos na si Susie nagsabi: “Kun an pagpipilian an kapakanan kan sakong pamilya o sako, eenoton ko an sako.”

Makamomondong sabihon, lakop an siring na mga saboot. An sarong libro na inaapod The Postponed Generation nagsasabi manongod sa pagsiyasat sa 1,125 estudyante na dian prinobaran na aramon nin duwang sosyologo kun baga an mga hobenes sa pangenot nagmamakolog sa saindang sadiri o sa sosyedad. An resulta? Mga 80 porsiento an napatunayan na “an inaasikaso an saindang sadiri, na mayo nin paggirumdom o obligasyon sa sosyedad.”

Kaya, bakong makangangalas na pipira sana an andam na magsakripisyo para sa iba, masakitan o gumibo nin ekstrang paghihingoa para sa iba apuwera kan saindang sadiri. An mga libro na arog kan The Art of Selfishness asin Looking Out for Number One nagigin pinakamabentang mga libro, na daing iba kundi plano para sa pagkultibar nin paslong ugale. Arog kan ihinula kan Biblia, an mga tawo ngonyan “mga mamomoton sa sainda man sana.”—2 Timoteo 3:1, 2.

Alagad, ano an reaksion nindo sa mga pangangaipo nin iba? Halimbawa, kun andam na kamong tumukaw asin helingon an paborito nindong programa sa telebisyon asin pakiolayan kamo ni Nanay o Tatay na bumakal sa tindahan, kamo daw naaanggot o nauuyam? Hinahaboan daw nindo an ideya na magtrabaho sa harong, hirasan nin gubing o lugar an sarong tugang na lalaki o babae, o gibohan sana nin pabor an saro kun iyan ‘bakong kombenyente’? Kun siring panahon nang kamo magbakle. Alagad taano? Asin mas mahalaga, paano?

An Ginikanan nin Kapasloan

An pagboot nin Dios sa saiyang banwaan iyo ini: “Mamotan mo an saimong kataed nin siring sa saimo man sana.” (Mateo 22:39) Ini nangangahulogan na kita obligadong magin mapagmakolog, bakong paslo, sensitibo sa mga pangangaipo nin iba. Minsan siring, dai kita perming nakaaabot sa halangkaw na pamantayan na ini, asin tinatabangan kita kan Biblia na masabotan kun taano. Sa Genesis 8:21 iyan nagsasabi: “An tendensia kan puso nin tawo maraot poon sa saiyang pagkaniaki.”

An apoon niatong si Adan daing pakiaram kun paano makakaapektar sa iba an saiyang rebelyon. Kaya, dai niato maninigong ipagngalas na kita, na saiyang gikan, namundag na may kapasloan. (Ikomparar an Salmo 51:5.) Ini makangangalas na nahahayag amay pa sa buhay. An magasin na Parents nagkokomento: “An gabos na aking sadit paslo. . . . Interesado sinda sa saimo pero kun ika may ginigibo sana para sa sainda.” Kun dai mababakle, an kapasloan tibaad magin ugale na.

An saro pang ugale na minaolang sa saro sa pagsakripisyo para sa iba iyo an kahugakan. (Talinhaga 21:25) An totoo, kun nangingibabaw an kahugakan, an saro maimbento nin pambihirang mga sarahotan tanganing makalikay sa trabaho. Sabi kan Talinhaga 22:13: “Olay kan hugakon: ‘May leon sa luwas! Sa tahaw kan mga plasa gagadanon ako!’”

Kun Ano an Kalabot sa Pagtabang sa Iba

An parabola kan Samaritanong maboot sa kataed na nasusurat sa Lucas 10:29-37 nagpapaheling na an pagtabang sa iba tibaad may kalabot na tunay na pagsasakripisyo sa sadiri. Bilang simbag sa hapot na, “Siisay man nanggad an sakong kataed?” si Jesus nagsaysay manongod sa sarong Judio na binugbug nin mga parahabon asin binayaan sa paghonang gadan na. Sa ibong nin mga problema sa rasa sa pag-oltanan nin mga Judio asin Samaritano, an sarong Samaritano napahirong magsakripisyo para sa biktima nin krimen. Inasikaso nia an mga lugad kan tawo, na ginagamit an sadiri niang arak asin lana. Dangan luway-luway niang isinakay an tawo sa saiyang hayop asin dinara sia sa sakatan. Binayadan nia an maysadiri nin kantidad nin duwang aldaw na suweldo asin nanuga na bayadan an ano man na dagdag na gastos.

An nakapahihirong ilustrasyon na ini pinipreserbar an pinakakahulogan kan pagsasakripisyo para sa iba: magsadiring boot, gibohon an sadiri na kataed nin iba. Kalabot dian an pagigin andam na isakripisyo an panahon, kosog, asin kuwarta. Pag-olayan niato an pirang paagi na magibo ini.

Pagsasakripisyo Para sa Saindong Pamilya

An pinakaharani nindong kataed iyo an mga miembro kan saindong pamilya—mga magurang, tugang na lalaki, tugang na babae. Alagad tibaad an paghona nindo an mga pinakadayupot sa saindo maninigong makasabot sa saindong kasibotan asin dai magparahagad sa saindo. Minsan siring, an Biblia nagsasadol: “Magin mapagpasakat sa lambang saro na daing paggumodgumod.” (1 Pedro 4:9) Probaran na ibilang an garo baga mga kadepisilan na tibaad ibunga na, bakong mga nakauuyam, kundi oportunidad na pakosogon an bogkos kan pamilya.

Nagigirumdoman ni Eddie: “An iskedyul ni Nanay parateng nakapapagal na gayo sa saiya. Pero noarin man dai ko malilingawan an itsura kan lauog nia pagbukas nia kan pinto asin naheheling na nahugasan na an mga kinakanan, nalampaso na an salog, asin puwesto na an lamesa. Inaako ko na gustong-gusto ko kutanang magbobola sa mga panahon na idto, pero an pagsasakripisyo nakatabang na orog na magkadayupot an samong pamilya.” May naiisip daw kamong pirang paagi na kamo magsakripisyo para sa mga kaiba nindo sa pamilya?

Pagigin Marahay na Kataed sa mga Kapwa Kristiano

Sabi ni apostol Pablo: “Kun siring, mantang igwa kita nin panahon para kaiyan, gumibo kita nin marahay sa gabos, alagad orog na sa mga may relasyon sa sato sa pagtubod.” (Galacia 6:10) Dakulang kaogmahan an ibinubunga kun kamo nagmamaigot para sa mga kapwa Kristiano.—Gibo 20:35.

Halimbawa, an desisais anyos na si Chris saro sa mga Saksi ni Jehova. Naoogma siang magpasugosugo sa sarong gurang nang miembro kan lokal na kongregasyon. Sarong beses inapodan sia kaini sa telepono tanganing patabang. Raot an elevator sa apartment kan tugang, asin huling dai na sia nakasasakat sa limang eskalon, dai sia makahiro. Kan mag-abot, si Chris nagsabi: “Baba po sako, asin kakargahon ko kamo kun areglado sa saindo.” Nagsakat sinda sagkod sa ikalimang eskalon! Nakapapagal? Siyempre. Pero si Chris nagkamit nin balos bako sanang sa pasasalamat kan saiyang gurang nang katood kundi sa kaaraman na an saiyang ginibo ikinaogma nin Dios!

Pero, dai na nindo kaipuhan na halaton an siring na dramatikong mga situwasyon tanganing ipaheling an saindong pagmakolog sa iba. Halimbawa, bago asin pagkatapos kan Kristianong pagtiripon, an pirang hobenes may tendensiang magtiripontipon, na ipinupuwera an mga may edad na. Ini kontra sa hatol kan Biblia na ‘magpaheling nin konsiderasyon’ sa mga gurang. (Levitico 19:32) Kun beses, an kaipuhan sana sarong makikatood na pangungumusta o halipot na pakikipag-olay tanganing mapaogma an sarong gurang. ‘Pero nadedepisilan akong makipag-olay sa gurang,’ tibaad ireklamo nindo. ‘Mayo man kami nin mapag-olayan.’

Si Doug, na ngonyan naglilingkod bilang magurang sa Kristianong kongregasyon, may pagkaogmang nakakagirumdom: “Kan ako 19 anyos an pinakadayupot kong mga katood puwede nang magin sakong mga magurang o apoon. Dakulaon an ikinatabang ninda sa sakong espirituwal na pagtalubo!” Taano ta dai kamo magsakripisyo nin kadikit asin seguradohon na makikatood sa pirang gurang, tibaad sa masunod nindong Kristianong pagtiripon? Parate nindong madidiskobre na mas dakol kamong mapag-oolayan kisa pinaghohona nindo! Asin kapareho ni Doug, madidiskobre nindo na may manonodan kamo sa saindang mahalagang kabatidan sa buhay.

Pagtabang sa “mga Nasa Luwas”

Sa Colosas 4:5 si apostol Pablo nagsabi: “Padagos kamong maglakaw sa kadonongan manongod sa mga nasa luwas, na tinutubos an panahon para sa saindo man sana.” An mga Saksi ni Jehova nagpapaheling nin pagmakolog sa iba paagi sa paghuhulit kan mensahe kan Biblia. (Mateo 24:14) An mga hobenes na isinasaboot an saindang obligasyon sa Dios napahihirong magkaigwa nin pinakalubos na pakikikabtang sa gibohon na ini na makakaya ninda.

“Naghihingoa ako sa paghuhulit huli sa pagkamoot ko ki Jehova,” sabi ni Tamitha. Minsan ngani 11 anyos pa sana, naggagamit sia nin dakol na oras kada bulan sa pag-ebanghelyo. “An paghuhulit nagtatao man sako nin oportunidad na magpaheling nin pagkamoot sa sakong kapwa.” Imbes na humanap nin mga trabahong halangkaw an suweldo, rinibong hobenes na Kristiano an ginibong karera an paglilingkod sa iba bilang bilog na panahon na mga paraebanghelyo, na parateng nagtatrabaho nin por ora sana tanganing masustentohan an sadiri. An iba nagboluntaryong magin mga misyonero o magtrabaho sa laen-laen na sangang opisina kan Watch Tower Society.

Nakikinabang Kamo sa Pagtao

“An tawo kaipuhan an ibang tawo para sa ikararahay kan saindang salud,” sabi kan magasin na American Health. Sinasabi pa ngani nin mga parasiyasat na an mga tawo na nagsasakripisyo para sa iba nagkakamit nin mga pakinabang sa salud. Pero, isinabi ni Jesu-Cristo an saro pang pakinabang, na an sabi: “Magin matinao, asin an mga tawo magtatao saindo.” (Lucas 6:38) An matinaong tawo namomotan nin iba; permi siang pinahehelingan man nin pagkamatinao!—Ikomparar an Talinhaga 11:25.

Kaya magin matinao, na nagsasakripisyo para sa iba. Basta minaluwas an saindong kapasloan, girumdomon na an Tataramon nin Dios nagsasabi: “An lambang saro maghanap, bakong kan saiyang karahayan, kundi kan iba.” (1 Corinto 10:24) Sa paggibo kaiyan kakamtan nindo bako sanang an pakikikatood nin iba kundi an pag-oyon kan Kaharohalangkaweng Dios.

[Ritrato sa pahina 22]

An pagsasakripisyo para sa iba nagtatao nin dakulang kaogmahan