Mga Hapot Hale sa mga Parabasa
◼ Ano an boot sabihon ni Jesus na “mga ini” kan hapoton nia si apostol Pedro, “Namomoot ka sa sako nin orog kisa mga ini?”
An binuhay liwat na si Jesus yaon kaidto sa Dagat nin Galilea. Mababasa niato: “Ngonyan, kan makapamarahaw na sinda, si Jesus nagsabi ki Simon Pedro: ‘Simon na aki ni Juan, namomoot ka sa sako nin orog kisa mga ini?’ Sia nagsabi sa saiya: ‘Iyo, Kagurangnan, ika nakakaisi na ako namomoot sa saimo.’ Sia nagsabi sa saiya: ‘Pasabsaba an sakong mga kordero.’”—Juan 21:15.
Minsan ngani an henero nin sarong pronombreng Griego kun beses nagpaparisa kan pinanonongdan kaiyan, an plural na touʹton (“mga ini”) puwedeng magkaigwa nin panlalaki, pambabae, o neutrong pinanonongdan. Kaya, an mga iskolar nagsuherir nin tolong posibleng kahulogan kan hapot ni Jesus:
1. Namomoot ka sa sako nin orog kisa pagkamoot sa ibang disipulong ini?
2. Namomoot ka sa sako nin orog kisa pagkamoot sa sako kan mga disipulong ini?
3. Namomoot ka sa sako nin orog kisa mga bagay na ini, arog baga kan sira?
Mangatanosan kita sa tolong ini tanganing helingon kun arin an pinakaposible.
Numero 1. An totoo, pipirang Kristiano an mag-iisip na si Cristo maghahapot, ‘Namomoot ka sa sako nin orog kisa pagkamoot mo sa ibang disipulo?’ Siyempre iyo! Nangorognang pambihira na hapoton nin siring si Pedro. Bago pa sana siang makaibanan nin anom na disipulo sa sakayan, pero kan mamidbid nia si Jesus sa baybayon, binayaan ni Pedro an mga disipulo asin luminangoy pagilid. Sa pagpaheling nin kaparehong pagkadayupot, kan si Cristo maghapot kun baga gusto kan mga apostol na umiba sa mga nasingkog, si Pedro nagsabi na determinado siang umiba ki Jesus.—Juan 6:66-69; 21:7, 8.
Numero 2. Ano man an posibilidad na an boot sabihon ni Jesus, ‘Pedro, namomoot ka sa sako nin orog kisa ibang disipulo?’ Dakol na komentarista an nagsusuportar sa opinyon na ini, mantang bago kaini si Pedro nagsabi na sia mas maimbod ki Jesus kisa iba. (Mateo 26:33-35) Pero, an pagsabot sa Juan 21:15 sa paaging ini naghahagad na ipakahulogan an sarong berbo na dai sinabi, arog baga kan ‘Namomoot ka sa sako nin orog kisa [ginigibo kan] mga ini?” Alagad ta mayo sa hapot ni Jesus an dagdag na berbong iyan, asin iyan nagtatao nin gramatikong mga problema. Dugang pa, garo bag bakong maninigo para ki Jesus na hagadon ki Pedro na ikomparar an kadakulaan kan saiyang pagkamoot sa kadakulaan kan pagkamoot nin iba. Bako daw na itinanos ni Jesus an mga apostol kan sinda magriribal?—Marcos 9:33-37; 10:35-44; Lucas 22:24-27.
Kun siring posible daw na an Numero 3 an ihinahapot ni Jesus, ‘Namomoot ka sa sako nin orog kisa mga bagay na ini, arog baga kan sira?’ An posibilidad na ini tama sa pagkasabi kan hapot sa Griego; ta hinahagad ki Pedro na pumili sa duwang baga (ki Jesus asin sa “mga ini”). An siring na hapot angay man huli sa nakaagi ni Pedro. Saro sia sa enot na mga disipulong nagsunod ki Jesus. (Juan 1:35-42) Alagad minalataw na si Pedro dai tolos nagsunod ki Jesus nin bilog na panahon. Imbes, nagbuwelta sia sa paninira. Kaya, pakalihis nin pirang bulan inapod ni Jesus si Pedro na humale sa dakulang negosyong iyan tanganing magin ‘parasira nin mga tawo.’ (Mateo 4:18-20; Lucas 5:1-11) Minsan siring, pagkagadan ni Jesus, pinangenotan ni Pedro an pagbuwelta sa trabahong ini, na sinasabihan an ibang disipulo: “Maninira ako.”—Juan 21:2, 3.
Kaya posible nanggad na idinodoon ni Jesus ki Pedro an pangangaipo na gumibo nin desididong pagpili. Ano an eenoton nia sa saiyang buhay—an pagigin parasunod ni Jesus o an paghihingoa sa sarong karera, na isinusuherir kan sira na natatambak sa atubangan ninda? Gurano kadakula kan lugar na okupado kan sira, mga hikot, sakayan, asin pakikiamigo nin mga kapwa parasira sa puso ni Pedro? Talaga daw na tatalikdan ni Pedro an maogmang mga bagay na idto tanganing ipaorog an pagkamoot nia ki Cristo asin an pagpasabsab sa ‘saradit na karnero’ ni Jesus?—Juan 21:17.
Puwede niatong ihapot an nakaaagid na hapot manongod sa ‘mga bagay na ini’ na tibaad makaakit sa sato, arog baga kan satong kawiliwiling trabaho o negosyo, kan satong pagkawili sa sekular na edukasyon, kan satong harong, o kan satong paboritong aling-alingan. Puwede niatong horophoropon nin prangka: ‘Namomotan ko daw si Jesus nin orog kisa arin man o gabos na bagay na ini?’ Ipinaheling ni Jesus na kun an satong simbag iyo, ipaheheling niato iyan paagi sa pagpasabsab sa ‘saradit na kordero.’
[Picture Credit Line sa pahina 31]
Pictorial Archive (Near Eastern History) Est.