Ano an Kaipuhan Niatong Gibohon Tanganing Makaligtas?

SARONG lalaki an naghapot ki Jesus: “Kagurangnan, an mga maliligtas daw pipira sana?” Paano suminimbag si Jesus? Sia daw nagsabi: ‘Akoon mo sana ako bilang saimong Kagurangnan asin Paraligtas, asin ika maliligtas’? Dai! Si Jesus nagsabi: “Maghingoa kamo nin maigot na makalaog sa piot na tata, huli ta, sinasabi ko sa saindo, dakol an magmamawot na makalaog alagad dai makahihimo.”​—Lucas 13:​23, 24.

Dai daw nasimbag ni Jesus an hapot kan lalaki? Dai, an lalaki dai naghapot kun gurano kasakit na maligtas; sia naghapot kun baga pipira sana an maliligtas. Kaya sinabi sana ni Jesus na mas kadikit na tawo kisa sa tibaad laoman nin saro an maghihingoa nin maigot tanganing mag-ako kan makangangalas na bendisyon na ini.

‘Bako iyan an isinabi sa sako,’ an tibaad ireklamo nin nagkapirang parabasa. Tibaad kotaron kan mga ini an Juan 3:​16, na nagsasabi: “Namomotan na gayo nin Dios an kinaban, kaya itinao nia an saiyang bugtong na Aki, tanganing an siisay man na tumubod sa saiya dai mapara, kundi magkaigwa nin buhay na daing katapusan.” (King James Version) Minsan siring, an satong simbag: ‘Kun siring, ano an kaipuhan tang tubodon? Na si Jesus talagang nabuhay? Siempre. Na sia an Aki nin Dios? Dapat sana! Asin mantang si Jesus inaapod kan Biblia na “Paratokdo” asin “Kagurangnan,” bako daw na kaipuhan ta man na tubodon an saiyang itinokdo, kuyogon sia, asin sunodon sia?’​—Juan 13:13; Mateo 16:16.

Pagsunod ki Jesus

Ay, digdi minalataw an problema! An dakol na tawo na sinabihan na sinda “ligtas na” garo baga kakadikit kan intension na sumunod o kumuyog ki Jesus. Sa katunayan, sarong Protestanteng klerigo an nagsurat: “Siempre, an satong pagtubod ki Cristo maninigong magpadagos. Alagad an paghingako na iyan biyong kaipuhan, o dapat na magpadagos, dai nanggad sinusuportaran kan Biblia.”

Sa kabaliktaran, ilinilista kan Biblia an inmoral na mga gibo na komon sa tahaw kan nagkapirang tawo na nagsasaboot na sinda “ligtas na.” Manongod sa saro na nagpadagos sa siring na mga dalan, iyan nagtaong instruksion sa mga Kristiano: “Haleon nindo an maraot na tawo dian sa tahaw nindo.” Seguradong habo nin Dios na an maraot na mga tawo atian an saiyang Kristianong kongregasyon!​—1 Corinto 5:​11-13.

Kun siring, ano an kahulogan kan pagsunod ki Jesus, asin paano ta iyan magigibo? Bueno, ano an ginibo ni Jesus? Sia daw inmoral? parapakisaro? paraburat? putikon? Sia daw bakong sadiosan sa negosyo? Siempre bako! ‘Alagad,’ tibaad ihapot nindo, ‘kaipuhan ko daw na haleon an gabos na iyan sa sakong buhay?’ Para sa simbag, konsiderara an Efeso 4:17 sagkod sa 5:5. Dai kaiyan sinasabi na kita aakoon nin Dios dawa ano an satong gibohon. Imbes, sinasabi kaiyan sa sato na magin napapalaen sa kinabanon na mga nasyon na “nawaran na kan gabos na pagmate sa moral, . . . alagad bakong siring an nanodan nindo ki Cristo . . . Haleon an daan na pagkatawo na oyon sa dati nindong paggawe . . . An parahabon dai na maghabon . . . An pakikisaro asin gabos na klase nin karigsokan o kapasloan dai ngani masambitan dian sa saindo, siring sa maninigo sa mga banal . . . Huli ta aram nindo, mantang minimidbid nindo mismo iyan, na mayo nin parapakisaro o marigsok na tawo o paslong tawo​—na nangangahulogan nin pagigin parasamba sa ladawan—​na may mamanahon sa kahadean kan Cristo asin nin Dios.”

Sinusunod ta daw si Jesus kun dai ta man lamang hinihingoa na mamuhay kaoyon kan saiyang halimbawa? Dai ta daw kaipuhan na pagmaigotan na orog na magin arog-Cristo an satong buhay? An mahalagang hapot na iyan bihirang konsideraron, kun nagigibo man, nin mga tawo na nagsasabi, arog kan sarong relihiosong tract: “Dumolok ki Cristo ngonyan​—na daing pagliliwat sa saindong gawe.”

An saro sa mga disipulo ni Jesus nagpatanid na an maraot na mga tawo “ginagamit na sarahotan an dai na kutana maninigong kabootan kan satong Dios sa malaswang gawe asin nagpapainda sa satong iyo sanang Kagsadiri asin Kagurangnan, si Jesu-Cristo.” (Judas 4) Paano kita tibaad, sa katunayan, ginagamit an pagkaherak nin Dios ‘na sarahotan sa malaswang gawe’? Iyan puede niatong magibo paagi sa pag-asumir na an atang ni Cristo nagtatahob sa tuyong mga kasalan na intension niatong gibohon nin padagos imbes na mga kasalan na dara nin pagkabakong sangkap nin tawo na pinagmamaigotan niatong haleon. Seguradong habo niatong umoyon sa saro sa midbid na marhay na ebanghelisador sa Amerika, na nagsabi na dai na nindo kaipuhan na “magbagong buhay, bayaan an maraot na mga gawe, o makombertir.”​—Helingon an kalaenan kan Gibo 17:30; Roma 3:25; Santiago 5:​19, 20.

An Pagtubod Nakapahihiro

Dakol na tawo an nasabihan na an “pagtubod ki Jesus” sarong unikong akto asin na an satong pagtubod dai kaipuhan na makosog nin igo tanganing makapahiro na kumuyog. Alagad an Biblia dai minaoyon. Dai sinabi ni Jesus na an mga tawo na nagpoon sa pagigin Kristiano ligtas na. Imbes, sia nagsabi: “An makatagal sagkod sa katapusan iyo an maliligtas.” (Mateo 10:22) An Biblia ibinabaing an satong pagigin Kristiano sa sarong paorumbasan, na an kaligtasan iyo an premyo sa katapusan kaiyan. Asin iyan nagsasadol: “Dumalagan kamo sa paagi na kamtan nindo iyan.”​—1 Corinto 9:24.

Sa siring, an kalabot sa “pag-ako ki Cristo” bako sanang pag-ako kan mga bendisyon na iinaalok kan labi sa gabos na atang ni Jesus. An pagkuyog hinahagad. Sinasabi ni apostol Pedro na an paghokom minapoon “sa harong nin Dios,” asin idinugang: “Ngonyan kun iyan magpoon nguna sa sato, ano an mangyayari sa mga bakong makinuyog sa maogmang bareta nin Dios?” (1 Pedro 4:17) Kaya kita kaipuhan na gumibo nin orog pa kisa sa pagdangog asin pagtubod sana. Sinasabi kan Biblia na kaipuhan tang ‘magin mga paragibo kan tataramon, asin bakong mga paradangog sana, na dinadaya an satong sadiri nin putik na pangangatanosan.’​—Santiago 1:22.

An Mismong mga Mensahe ni Jesus

An libro sa Biblia na Kapahayagan igwa nin mga mensahe hale ki Jesus, na itinao paagi ki Juan sa pitong enot na Kristianong kongregasyon. (Kapahayagan 1:​1, 4) Sinabi daw ni Jesus na mantang “inako” na sia kan mga tawo sa mga kongregasyon na ini, iyan igo na? Dai. Inomaw nia an saindang mga gibo, an saindang pagpapagal asin an saindang pagtagal saka nagtaram sia manongod sa saindang pagkamoot, pagtubod, asin ministeryo. Alagad sinabi nia na babaloon sinda kan Diablo asin na sinda tatawan nin balos ‘lambang saro sono sa saindang mga gibo.’​—Kapahayagan 2:​2, 10, 19, 23.

Sa siring ilinadawan ni Jesus an sarong mas dakula nanggad na paninimbagan kisa sa nasabotan kan dakol na tawo kan sinda sabihan na an saindang kaligtasan sarong “natapos nang gibohon” kan sia “inako” ninda sa sarong relihiosong pagtiripon. Si Jesus nagsabi: “Kun an siisay man boot na maglakaw sa hudian ko, paindahan nia an saiyang sadiri asin pasanon an saiyang hariging pasakitan patin padagos na sumunod sa sako. Huli ta an siisay man na boot na magligtas kan saiyang kalag mawawaran kaiyan; alagad an siisay man na mawaran kan saiyang kalag dahel sako makakukua kaiyan.”​—Mateo 16:​24, 25.

Paindahan an satong sadiri? Padagos na sumunod ki Jesus? Nangangaipo iyan nin paghihingoa. Babagohon kaiyan an satong buhay. Pero, sinabi daw ni Jesus na an nagkapira sa sato tibaad kaipuhan pa nganing ‘mawaran kan satong kalag’​—magadan para sa saiya? Iyo, an siring na klase nin pagtubod nakukua paagi sana sa pakaaram kan makangangalas na mga bagay na puede nindong manodan sa pag-adal kan Tataramon nin Dios. Iyan malinaw kan aldaw na ginapo si Esteban nin relihiosong mga panatiko na ‘dai mapangaptan an sa saindang sadiri tumang sa kadonongan asin espiritu na huli kaiyan sia nagtaram.’ (Gibo 6:​8-12; 7:​57-60) Asin an siring na pagtubod ikinapaheling sa panahon ta kan ginatos na Saksi ni Jehova na nagkagaradan sa mga Nazing kampo de konsentrasyon imbes na balgahon an saindang konsensia na pinatood sa Biblia.a

Kristianong Kaigotan

Kita kaipuhan na mangapot nin marigon sa satong Kristianong pagtubod huli ta, bakong arog kan puedeng nadadangog nindo sa nagkapirang simbahan o sa relihiosong mga programa sa telebisyon, an Biblia nagsasabi na kita puedeng makasuhay. Iyan may nasasambitan na mga Kristiano na nagbaya “sa dalan na matanos.” (2 Pedro 2:​1, 15) Sa siring kaipuhan kitang ‘padagos na maghingoa na makamtan an satong kaligtasan na may takot asin pagtakig.’​—Filipos 2:12; 2 Pedro 2:20.

Ini daw an pakasabot dian kan mga Kristiano kan enot na siglo, an mga tawong aktuwal na nakadangog ki Jesus asin sa saiyang mga apostol na magtokdo? Iyo. Aram ninda na igwa sindang kaipuhan na gibohon. Si Jesus nagsabi: “Kaya paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.”​—Mateo 28:19, 20.

Duwang bulan pakalihis na sabihon iyan ni Jesus, 3,000 katawo an nabautismohan sa saro sanang aldaw. An bilang nin mga nagtutubod marikas na uminabot sa 5,000. Idtong mga nagturubod nagtokdo sa iba. Kan sinda nagkawararak huli sa paglamag, iyan logod nagin paagi na ikalakop an saindang mensahe. Sinasabi kan Biblia na bako sanang pipirang lider kundi “idtong nagkawararak naglibot sa daga na nagpapahayag kan maogmang bareta kan tataramon.” Kun siring, pakalihis nin mga 30 taon, si apostol Pablo nakasurat na an maogmang bareta “ikinahulit sa gabos na linalang sa sirong nin langit.”​—Gibo 2:41; 4:4; 8:4; Colosas 1:23.

Si Pablo dai nangombertir, na siring sa nagkapirang ebanghelisador sa TV, paagi sa pagsabi: ‘Akoon nindo si Jesus ngonyan, asin sagkod lamang kamo ligtas na.’ Ni igwa man sia kan kompiansa kan Amerikanong klerigo na nagsurat: “Kan tin-edyer pa, . . . ako ligtas na.” Pakalihis nin labing 20 taon poon kan pilion mismo ni Jesus si Pablo na darahon an Kristianong mensahe sa mga tawo kan mga nasyon, an mahigos na apostol na ini nagsurat: “Linalanog ko an sakong hawak asin inooripon iyan, tanganing, pakatapos na ako makapaghulit sa iba, ako mismo dai isikwal minsan sa ano man na paagi.”​—1 Corinto 9:27; Gibo 9:​5, 6, 15.

An kaligtasan sarong daing bayad na regalo hale sa Dios. Iyan dai puedeng makua bilang bayad. Pero hinahagad kaiyan an paghihingoa sa parte niato. Kun may mag-alok sa saindo nin sarong mamahalon na regalo asin dai kamo nagpaheling nin igong apresasyon na kuanon iyan asin darahon iyan, an saindong kakulangan nin utang na boot puedeng magpangyari sa kagtao na itangro iyan sa iba. Bueno, gurano kahalaga kan dugo ni Jesu-Cristo? Iyan sarong daing bayad na regalo, alagad kaipuhan tang ipaheling an hararom na pag-apresyar dian.

An tunay na mga Kristiano nasa ligtas na kamugtakan sa dahelan na sinda nasa inooyonan na kamugtakan sa atubangan nin Dios. Bilang sarong grupo, an saindang kaligtasan segurado. Bilang indibiduwal, kaipuhan nindang aboton an mga kahagadan nin Dios. Minsan siring, puede kitang masudya, huling nagsabi si Jesus: “Kun an siisay man dai magdanay na kasaro ko, sia itinatapok bilang sanga asin naaalang.”​—Juan 15:6.

“An Tataramon nin Dios Buhay”

An pag-olay-olay na nasambitan sa enotan kan sinundan na artikulo nangyari mga 60 taon na an nakaagi. Si Johnny nagtutubod sagkod ngonyan na an kaligtasan paagi sana ki Jesu-Cristo, alagad narerealisar nia na kaipuhan tang pag-aaboton iyan. Sia kombensido pa man giraray na an Biblia nagtotokdo sa solamenteng tunay na gikanan nin paglaom para sa katawohan asin na kaipuhan niatong adalan an kahangahangang librong iyan, pahiroon kaiyan, asin pabayaan na motibaron kita kaiyan sa mga gibo nin pagkamoot, pagtubod, kabootan, pagkuyog, asin pakatagal. Pinadakula nia an saiyang mga aki na tumubod sa iyo man sanang mga bagay, asin ngonyan sia naoogma na maheling man sinda na pinadadakula an saindang mga aki sa iyo man sanang paagi. Minamawot nia na an lambang saro magkaigwa kan siring na klase nin pagtubod, asin ginigibo nia an ano man na kaya niang gibohon tanganing ikatanom iyan sa puso asin isip nin iba.

Si apostol Pablo pinasabngan na sumurat na “an tataramon nin Dios buhay asin mapuersa.” (Hebreo 4:12) Puedeng bagohon kaiyan an mga buhay. Puede kamong motibaron kaiyan sa odok sa pusong mga gibo nin pagkamoot, pagtubod, asin pagkuyog. Alagad kaipuhan nindong gumibo nin labi pa kisa sa “pag-ako” sana sa isip kan sinasabi kan Biblia. Adalan iyan asin pabayaan na motibaron kaiyan an saindong puso. Pagiya kamo sa kadonongan kaiyan. An mga 5,000,000 na andam na Saksi ni Jehova sa labing 230 kadagaan nag-aalok nin daing bayad na pag-adal sa Biblia sa harong. Tanganing maaraman kun ano an manonodan nindo sa siring na pag-adal, sumurat sa mga kagpublikar kan magasin na ini. An pagtubod asin espirituwal na kosog na makakamtan nindo ikawiwili nindo!

[Nota sa Ibaba]

[Kahon sa pahina 7]

TAANO TA DAPAT NA “MAKIPAGLABAN NIN MAIGOT PARA SA PAGTUBOD”?

An libro kan Biblia na Judas ipinanongod sa “mga inapod . . . [na] rinimpos para ki Jesu-Cristo.” Sinasabi daw kaiyan na huli ta sinda ‘nag-ako na ki Jesus,’ segurado na an saindang kaligtasan? Dai, sinabi ni Judas sa mga Kristianong idto na “makipaglaban nin maigot para sa pagtubod.” Tinawan nia sinda nin tolong dahelan na gibohon iyan. Enot, an Dios “ilinigtas . . . an sarong banwaan hale sa daga nin Egipto,” alagad dakol sa sainda an nagbaraya. Ikaduwa, minsan an mga anghel nagrebelde asin nagin mga demonyo. Ikatolo, linaglag nin Dios an Sodoma asin Gomorra huli sa labi-labing seksuwal na inmoralidad na ginibo sa mga siudad na idto. Iinatubang ni Judas an mga talang ini sa Biblia “bilang nagpapatanid na halimbawa.” Iyo, minsan an mga nagtutubod na “rinimpos para ki Jesu-Cristo” kaipuhan na mag-ingat na dai magbaya sa tunay na pagtubod.​—Judas 1-7.

[Kahon sa pahina 8]

ARIN AN TAMA?

An Biblia nagsasabi: “An tawo ipinahahayag na matanos paagi sa pagtubod na siblag sa mga gibo kan pagboot.” Sinasabi man kaiyan: “An sarong tawo ipinahahayag na matanos paagi sa mga gibo, asin bakong paagi sa pagtubod sana.” Arin an tama? Kita daw ipinahahayag na matanos paagi sa pagtubod o paagi sa mga gibo?​—Roma 3:28; Santiago 2:24.

An oroyon na simbag hale sa Biblia iyo na iyan pareho tama.

Sa laog nin mga siglo an Pagboot na itinao nin Dios paagi ki Moises naghagad sa Judiong mga parasamba na tumao nin espesipikong mga atang asin dolot, iselebrar an mga aldaw nin kapiestahan, asin kumuyog sa mga kahagadan sa pagkakan asin iba pa. An siring na “mga gibo kan pagboot,” o sa halipot “mga gibo,” dai na kaipuhan pakatapos na itao ni Jesus an sangkap na atang.​—Roma 10:4.

Alagad an katunayan na an mga gibong ini sa irarom kan Mosaikong Pagboot sinalidahan kan labi sa gabos na atang ni Jesus dai nangangahulogan na puede ta nang ignorohon an mga instruksion kan Biblia. Iyan nagsasabi: “Gurano pa daw kaorog an dugo kan Cristo . . . na makalinig kan satong mga konsensia hale sa [dating] gadan na mga gibo tangani kitang makapagtao nin banal na paglingkod sa nabubuhay na Dios?”​—Hebreo 9:14.

Paano kita ‘nagtatao nin banal na paglingkod sa nabubuhay na Dios’? Kabale sa iba pang bagay, sinasabi sato kan Biblia na labanan an mga gibo nin laman, tumangon an inmoralidad kan kinaban, asin likayan an mga siod kaiyan. Iyan nagsasabi: “Makipaglaban ka kan marahay na pakilaban nin pagtubod,” haleon “an kasalan na pasil sanang nakagagapos sa sato,” asin “dumalagan kita na may pakatagal sa paorumbasan na nasa atubangan ta, mantang kita nagheheling nin maingat sa Pangenot na Ahente asin Parasangkap kan satong pagtubod, si Jesus.” Asin dinadagka kita kan Biblia na dai ‘mapagal asin manluya sa satong kalag.’​—1 Timoteo 6:12; Hebreo 12:​1-3; Galacia 5:​19-21.

Dai niato nakukua bilang bayad an kaligtasan paagi sa paggibo kan mga bagay na ini, huli ta mayo nanggad nin tawong makagigibo nin igo tanganing magin maninigong umako kan siring na makangangalas na bendisyon. Pero, kita dai angay na magkamit kan makangangalas na regalong ini kun dai ta ikapaheling an satong pagkamoot asin pagkuyog paagi sa paggibo kan mga bagay na sinasabi kan Biblia na mawot nin Dios asin ni Cristo na gibohon ta. Kun mayo nin mga gibo na mapaheling kan satong pagtubod, an satong paghingako na kita nagsusunod ki Jesus kulang nanggad, huli ta malinaw na ipinahahayag kan Biblia: “An pagtubod, kun dai nin gibo, gadan sa saiya man sana.”​—Santiago 2:17.

[Retrato sa pahina 7]

Adalan an Biblia, asin mamotibar kaiyan