Andam daw Kamo na Maghinanyog sa Dios?

KUN binabasa niato an Biblia, madali niatong narerealisar na an kamugtakan kan mga tawo kan enot na siglo kaagid sa kadakol na paagi kan sa sato ngonyan. Igwa nin grabeng inmoralidad asin pagkabakong maimbod, orog na sa tahaw nin marigsok na mga kataraed nin Israel, na para sa sainda an inmoralidad parate nang kabtang kan relihiyon. An buhay dai nin kasegurohan para sa pobreng mga tawo, asin igwa nin dakol na problema sa politika. Kan taon na 66 C.E., an Israel asin an Roma nagkaigwa nin grabeng labanan. Kan mga aldaw na idto, siring man ngonyan, an mga tawo nangangaipo nin tabang.

Sa relihiyon, kadakol an pagkakaagid kan mga aldaw na idto asin kan satong panahon. An Judiong mga lider relihiyoso mga parasaginsagin. (Mateo 23:15; Lucas 20:46, 47) Sa kinaban na bakong Judio, an relihiyosong mga kaisipan magpoon sa pagigin mapagtuya sagkod sa superstisyon asin panatikong relihiyosong init nin boot. (Ikomparar sa Gibo 14:8-13; 19:27, 28.) Minsan ngani sa bago pa sanang Kristianong kongregasyon, an gabos bakong marahay. Sa katapusan kan siglo, nagpatanid si apostol Juan: “Dakol na madaya an nagralaog sa kinaban.” (2 Juan 7) Iyo, kaidto man, kadakol na palsipikadong sadol an iinalok sa tema nin relihiyon. Alagad igwa nin makukuang mapananarigan na tabang.

Nagdangog daw Kaya Kamo ki Jesus?

Si Jesus an saro na nag-alok nin marahay na sadol kan mga aldaw na idto. Idto nakadadagka nanggad kaya mababasa niato ini manongod sa mga epekto kaiyan: “Napangalas an kadaklan sa saiyang paagi nin pagtotokdo.” (Mateo 7:28) Alagad dikit sana sa kadaklan na idto an tunay na naghinanyog sa saiyang sinabi. Naggibo si Jesus nin mga milagro asin nagtao nin marahay na halimbawa sa diosnon na pamumuhay asin paggawe. Alagad, minsan ngani an pinaghohonang orog na edukadong mga lider nagsayuma na maheling an kahalagahan kan saiyang sinabi. Taano?

An dakulang dahelan iyo an daing binabasaran na pagkaanggot. An nagkapira tinatsaran si Jesus huli ta hale sia sa Nazaret. Sinayumahan sia nin iba huli ta dai sia nag-adal sa saro kan saindang mga eskuwelahan asin mayo nin koneksion sa grupong namamahala. (Juan 1:46; 7:12, 15, 47, 48) Kadagdagan pa, dai permi nagtataram si Jesus kan mawot na madangog nin mga tawo. An katotoohan an solamenteng itinaram nia, asin an mga Fariseo, bilang halimbawa, parateng nakokolgan sa saiyang mga tataramon. (Mateo 15:12-14) Sa katotoohan, pakatapos niang maghulit nin tolo may kabangang taon, ipinagadan sia kan Judiong relihiyosong mga lider. (Lucas 23:20-35) Kadakulang oportunidad an nawara ninda, huli ta si Jesus an igwa kan mga “tataramon nin buhay na daing sagkod”!—Juan 6:68.

Kun nabuhay kamo sa Jerusalem kan panahon na idto, sinunod daw nindo an relihiyosong mga lider asin an iba pang kadaklan? O nagin bukas daw an saindong isip tanganing masabotan an kahulogan kan sinasabi ni Jesus? Kun iyo, makakaagid kamo kan pambihirang babae na nanompongan ni Jesus sa saiyang mga pagbiyahe.

Saro na Naghinanyog Nanggad

Nanompongan nia an babaeng ini mantang nagbibiyahe sia sa Samaria. Nagtukaw sia sa kataed nin sarong bobon tanganing magpahingalo, asin uminabot an babae tanganing sumakdo nin tubig mantang yaon sia duman. Dai niato aram an saiyang ngaran, alagad nagtatala an Biblia na si Jesus, sa ibong kan saiyang kapagalan, inaprobetsaran an oportunidad na makaolay sia manongod sa relihiyon.—Juan 4:5-15.

Ngonyan, igwa nin dakol na rason kun taano ta tibaad dai pag-intindihon kan babaeng ini an pagdolok ni Jesus. Igwa sia nin ibang relihiyon—an Samaritanong paagi nin pagsamba iba kan sa mga Judio. Siring man, minimenus kan mga Judio an mga Samaritano asin habong makiiba sa sainda. Dangan, siring man, an mga lalaking Judio dai permi nakikiolay sa mga babae na estranghero sa sainda. (Juan 4:9, 27) Orog pa, an Samaritana igwa nin inmoral na buhay, asin tibaad ginigirabohan sia sa posibilidad na tatsaran o mahayag an saiyang mga kasalan.—Juan 4:18.

Alagad, bakong arog kaiyan an nagin reaksion nia. Imbes, naghapot sia nin rasonableng mga hapot bilang simbag sa mataktika, nakapupukaw nin interes na pagdolok ni Jesus. Mantang nagpapadagos an pag-oolay, nagprobar siang buksan an sarong masakit na tema, na nanabihan an relihiyosong pagkasiriblag na nag-eeksister sa pag-oltanan kan mga Judio asin mga Samaritano. Nagsimbag si Jesus nin maboot alagad prangka, na nagsasabi sa babae: “Kamo nagsasamba kaidtong dai nindo namimidbid; kami nagsasamba kaidtong samong namimidbid.” (Juan 4:19-22) Alagad dai sia naanggot. An saiyang bukas na kaisipan andam na magdangog nin orog pa.

Kaya nagpadagos si Jesus sa mahalagang deklarasyon: “Minsan siring, an oras madatong, asin ngonyan iyo na, na an tunay na mga parasamba masamba sa Ama sa espiritu asin katotoohan, huli ta, sa katunayan, hinahanap kan Ama an mga siring na magsamba sa saiya. An Dios Espiritu, asin idtong nagsasamba saiya kaipuhan na magsamba saiya sa espiritu asin sa katotoohan.” (Juan 4:23, 24) Pakatapos, an may bukas na kaisipan na babaeng ini nagpaheling nin pagpahalaga paagi sa maigot na pagsasabi sa saiyang mga kataraed manongod sa saiyang mga nanodan. Sinda man nagmawot nin dugang na impormasyon paagi sa paghinanyog sa mga tataramon ni Jesus.—Juan 4:39-42.

Ano an manonodan niato hale digdi? Bueno, kun namumuhay kita sa sarong lugar kun saen igwa nin makosog na dai nin binabasaran na pagkaanggot sa rasa, nasyon o sa relihiyon, ano an reaksion niato kun an saro na may ibang rasa, nasyon, o relihiyon minadolok sa sato? Dai daw kita minagirong kun an mga bagay na ipinakikipag-olay sa sato tibaad magpaheling na sala kita? O kita daw, kaagid kan Samaritana, minsan paano gustong makipag-olay?

Nagdangog daw Kaya Kamo ki Pablo?

An saro pang nag-alok nin marahay na sadol durante kan enot na siglo iyo si apostol Pablo. Sa sarong panahon si Pablo man nagkaigwa nin sirradong kaisipan. Inako nia: “Ako kaidto paralanghad asin paralamag patin parapakaraot. Minsan siring, ako naherakan, huli ta ako daing pakaaram asin naghiro sa kakulangan nin pagtubod.” (1 Timoteo 1:13) Alagad, inako nia an katotoohan manongod ki Jesu-Cristo asin hinale an saiyang daing binabasaran na pagkaanggot. An saiyang halimbawa nagpapaheling na an katotoohan kan Biblia makatatabang sa ‘pagtumba sa mga bagay na marigonon an pundasyon’ sa puso kun an siring na mga bagay makararaot sa satong kapakanan.—2 Corinto 10:4.

Kan sia magin nang Kristiano, mapusong nagbalangibog si Pablo kan maogmang bareta na saiyang nanodan. Asin siring kan malalaoman, nakanompong sia nin pagkasirrado nin kaisipan na siring kan saiya dati—alagad bakong sa gabos na kamugtakan. Sa Berea, sa norteng Grecia, nanompongan nia an nagkapirang mahoyo an pusong mga tawo na marahay na halimbawa kun paano an pagdangog sa sadol. Namidbid kan mga ini an tanog kan katotoohan sa mga tataramon ni Pablo. Kaya, “inako ninda an tataramon na igwa nin dakulang pagkagalaga sa isip.” Alagad bukas an saindang kaisipan, bakong madaling maloko. Saindang ‘maingat na siniyasat an Kasuratan aroaldaw kun baga an mga bagay na ini iyo man nanggad.’ (Gibo 17:11) Gusto ninda an saindang nadangog, minsan pa siniyasat ninda an katamaan kaiyan sa Biblia bago ninda iyan biyong akoon.

“Siertohon an Gabos na Bagay”

Sa satong aldaw, an mga Saksi ni Jehova minagamit nin kadakol na panahon sa pagmamaigot na ihiras an maogmang bareta kan Kahadean sa saindang mga kataraed na kabtang nin ibang relihiyon. Anong reaksion an nakakamtan kan mga Saksi? Kadakol na makiamigong mga tawo an maogmang minaako sainda. Alagad an iba minasayuma, asin an iba pa ngani naaanggot huli ta nagsongko an mga Saksi.

Makamomondo ini, huli ta an mawot na ipakipag-olay kan mga Saksi ni Jehova inaapod na “maogmang bareta” kan Biblia. (Mateo 24:14) Orog pa, pinakokosog ninda an kaisipan ni apostol Pablo, na nagsabi: “Siertohon an gabos na bagay; mangapot sa marahay.” (1 Tesalonica 5:21) Minsan pa kun an saro igwa nin marigon na mga opinyon, tunay nanggad na, kaagid kan mga taga-Berea asin kan Samaritana, an sarong iyan kaipuhan na magin bukas an kaisipan tanganing makipag-olay sa iba manongod sa Dios.

Taano ta Maninigong Magin Bukas an Kaisipan?

Makaoogma, ginatos na ribong mga tawo taon-taon an minagibo kaiyan. Kadakol kan nakanood na mamidbid an kadonongan na linalaman kan Biblia, asin an resulta tunay, nagdadanay na mga pagbago sa saindang buhay. An iba kaagid ni Janet kan dati, sarong hoben na babae na may halawig na kasaysayan nin pag-abuso sa droga asin sa alkohol na sa katapusan nagmawot na maghugot. Ngonyan, si Janet saro nang maogmang Kristiano. An pag-adal nia sa Biblia nakatabang saiya na magkaigwa nin kosog na sunodon an sadol ni Pablo: “Magpakalinig kita sa lambang ramog nin laman asin espiritu.”—2 Corinto 7:1.

Si Vernon sarong alkoholiko, asin namemeligrong magkasuhay sinda mag-agom. Alagad an pagsunod sa sadol kan Biblia nakatabang saiya na mapangganahan an saiyang bisyo asin makihusay sa saiyang agom. (1 Corinto 6:11) Si Debra igwa nin makosog na daing binabasaran na pagkaanggot sa ibang rasa. Alagad an pag-adal sa Biblia asin an pakikiiba sa mga tawong Kristiano nakatabang saiya na bagohon an saiyang kaisipan. (Gibo 10:34, 35) Asin siisay daw an matubod sa mga pagbabago na mangyayari sa buhay nin sarong hoben na patotot sa Netherlands kan, sarong aldaw, ominoyon sia na mag-adal nin Biblia sa mga Saksi ni Jehova? Dai naghaloy, nagin bautisadong Kristiano sia na igwa nin malinig na buhay asin responsableng nag-aataman kan saiyang mga aki.

An siring na mga eksperyensia naootro nin kadakol na beses mantang an mga tawo naghihinanyog sa kun ano an sinasabi kan Biblia. Nag-oswag an saindang buhay sa mga paagi na an dakol sainda dai man lamang naghonahona na mangyari. Orog na mahalaga, nagkaigwa sinda nin relasyon sa Dios, kaya ngani nakakapamibi na sinda saiya nin odok bilang “Ama niamo na nasa langit.” (Mateo 6:9) Asin nagkakaigwa sinda nin sierto, dai mababaring paglaom sa ngapit mantang naeeksperyensiahan ninda an katotoohan kan mga tataramon ni Jesus: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.”—Juan 17:3.

Ini an klase nin impormasyon na mawot kan mga Saksi ni Jehova na ipakipag-olay kun nagpapadagos sinda sa saindang ministeryo asin dinadalaw an saindang mga kataraed. Posible, dai na mahahaloy madalaw liwat sinda saindo. Magigin bukas daw an kaisipan nindo tanganing magdangog sa sainda?

[Ritrato sa pahina 7]

Dai tinogotan kan Samaritana an dai nin binabasaran na pagkaanggot na makaolang saiya sa paghinanyog ki Jesus. Kamo daw siring man na bukas an kaisipan?