PAGKABUHAY LIWAT PARA SA BUHAY ASIN PAGKABUHAY LIWAT PARA SA PAGHUKOM

13-14. (a) Kaidto, ano an pakasabot ta sa mga tataramon ni Jesus na nasa Juan 5:29? (b) Ano an kaipuhan tang mangnuhon manungod sa mga tataramon na iyan?

¹³ Nagsambit man si Jesus manungod sa mga bubuhayon liwat digdi sa daga. Halimbawa, sinabi niya: “Maabot an oras na an gabos na yaon sa mga lulubngan na girumduman makakadangog kan saiyang boses asin maruluwas, idtong mga naggiribo nin marahay pasiring sa pagkabuhay liwat para sa buhay, asin idtong mga naggiribo nin karatan pasiring sa pagkabuhay liwat para sa paghukom.” (Juan 5:28, 29) Ano an buot sabihon ni Jesus?

¹⁴ Kaidto, an pakasabot ta sa mga tataramon na iyan ni Jesus iyo na nanunungod iyan sa mga gigibuhon kan mga binuhay liwat pagkatapos sindang buhayon liwat; an buot sabihon, may mga mabubuhay dangan magiribo nin marahay na mga bagay mantang an iba mabubuhay dangan magiribo nin karatan. Minsan siring, mangnuhon na mayong sinabi si Jesus na an mga kakaluwas pa lang sa mga lulubngan na girumduman magiribo nin marahay o magiribo nin karatan. An ginamit niyang mga tataramon nasa pormang past tense. Sinambit niya an manungod sa mga “naggiribo nin marahay” saka idtong mga “naggiribo nin karatan.” Ipinaparisa kaini na an mga gibong iyan nangyari bago sinda nagadan. Lohikal nanggad iyan, bako? Tutal, mayo nin siisay man na tutugutan na maggibo nin karatan sa bagong kinaban. Sigurado na an mga karatan na ini ginibo kan mga bakong matanos kaidtong bago sinda nagadan. Kun siring, paano ta dapat sabuton an mga tataramon ni Jesus manungod sa “pagkabuhay liwat para sa buhay” asin “pagkabuhay liwat para sa paghukom”?

15. Sairisay an magkakamit nin “pagkabuhay liwat para sa buhay,” asin taano?

¹⁵ An mga matanos, na naggibo nin marahay bago sinda nagadan, magkakamit nin “pagkabuhay liwat para sa buhay” huling an saindang pangaran nakasurat na sa libro nin buhay. Nangangahulugan ini na an pagkabuhay liwat kan “mga naggiribo nin marahay” na sinambit sa Juan 5:29 kapareho man sana kan pagkabuhay liwat kan “mga matanos” na sinambit sa Gibo 24:15. An pakasabot na ini kauyon kan mga tataramon na nasa Roma 6:7, na an sabi: “An sarong nagadan absuwelto na sa saiyang kasalan.” An mga kasalan na nagibo kan mga matanos na ini pinatawad na ni Jehova kan sinda magadan, pero padagos niyang gigirumdumon an mga ipinahiling nindang kaimbudan kan sinda buhay pa. (Heb. 6:10) Siyempre, kaipuhan kan mga matanos na ini na binuhay liwat na magdanay na maimbod tanganing magdanay sa libro nin buhay an pangaran ninda.

16. Ano an kahulugan kan “pagkabuhay liwat para sa paghukom”?

¹⁶ Paano man an mga naggiribo nin karatan bago sinda nagadan? Maski ngani pinatawad na an saindang mga kasalan kan sinda magadan, dai pa sinda nakakapahiling nin kaimbudan. An pangaran ninda dai nakasurat sa libro nin buhay. Kaya, an pagkabuhay liwat kan “mga naggiribo nin karatan” kapareho man sana kan pagkabuhay liwat kan “mga bakong matanos” na sinambit sa Gibo 24:15. An para sa sainda iyo an “pagkabuhay liwat para sa paghukom.”c An paghukom sa mga bakong matanos nangangahulugan na eebalwaron sinda. (Luc. 22:30) Mangangaipo nin panahon an pagdeterminar kun baga angay na maisurat an pangaran ninda sa libro nin buhay. Saka lang maisusurat diyan an pangaran kan mga bakong matanos kun babayaan ninda an dati nindang maraot na pamumuhay asin idudusay an sadiri ninda ki Jehova.