“Tinapay nin Buhay” na Puwedeng Makua nin Gabos

“Ako iyo an nabubuhay na tinapay na naghilig hale sa langit; kun an siisay man kumakan sa tinapay na ini sia mabubuhay sagkod lamang; asin, sa katotoohan, an tinapay na sakong itatao iyo an sakong laman manongod sa buhay kan kinaban.”—JUAN 6:51.

1. Anong makamomondong situwasyon an inaatubang ngonyan nin katawohan?

AN KINABAN nin katawohan haloy nang binuhay nin tinapay, an pinakalakop na kakanon sa daga. Tama sana, iyan inapod na pansuportar sa buhay. Alagad ngonyan an pagkagutom sa tinapay nagin makamomondong isyu. An gutom asin kakulangan nin kakanon nakakaapektar ngonyan sa un-kuwarto sa mga nag-eerok sa daga. Bago pa sana, an The Globe and Mail nin Toronto, Canada, nagsabi, “An gutom, arog kan guerra, daing minimidbid na linderos.” Kinotar kan peryodiko an sarong opisyal nin pan-emerhensiang paghiro kan NU sa Aprika na nagpatanid na an Aprika nasa gati nin “saro sa pinakagrabeng trahedya nin tawo, saro sa pinakagrabeng angat sa tawo, na inatubang niato.”

2, 3. (a) An mga kakulangan sa kakanon kabtang nin anong tanda? (b) Paano mareresolberan an mga problema sa kakanon? (c) Ano pa an kaipuhan, asin anong makaoogmang kasegurohan an itinatao kan Isaias 25:8?

² Si Jesus naghula na an kakulangan sa kakanon magigin kabtang kan tanda kan saiyang presensia sa kapangyarihan kan Kahadean. (Mateo 24:3, 7, 32, 33; 25:31, 32; Lucas 21:11) Kanigoan an kaogmahan niato na an saiyang Kahadean nagdadangadang na! Sa dai na mahahaloy, dadaogon kan mamuraway na Hadeng ini an gabos na kaiwal nin katawohan, na hinahale an politikal asin ekonomikong mga inhustisya na nagtao nin siring karingis na kasakitan. Dangan an gabos na tawo makakapag-ogma sa pag-ako kan saindang tinapay sa aroaldaw.—Mateo 6:10, 11; 24:21, 22; Daniel 2:44; Talinhaga 29:2.

³ Sa irarom kan matanos na gobyerno, an satong daga makakapagbunga nin ‘abundang’ kakanon, na igo tanganing basugon an dakol pa ki sa presenteng populasyon nin kinaban. (Salmo 72:12-14, 16, 18) Si Jehova magibo nin “bangkete” nin masisiram na bagay para sa saiyang banwaan. (Isaias 25:6) Alagad igwa nin saro pang kinakaipuhan. Sa pag-agi nin mga taon, an mga tawo daw maghehelang pa man giraray asin magagadan? Makaoogma, an Isaias 25:8 nagsasabi pa manongod ki Jehova: “Hahalonon nia an kagadanan sagkod lamang, asin papahidon kan Soberanong Kagurangnan na si Jehova an mga luha sa gabos na lalauogon.” Paano ini mangyayari?

An Mamomoton na Probisyon ni Jehova

4. Anong mamomoton na probisyon an ginibo ni Jehova sa Egipto?

⁴ Kan si Jose an administrador sa kakanon duman sa Egipto, igwa nin abundang trigo. Ini huli ta si Jose, pakatapos na nombrahan ni Faraon, madonong na nag-andam para sa ihinulang pitong taon nin gutom, asin mamomoton na itinao ni Jehova an saiyang bendisyon. (Genesis 41:49) Igwa nin bastante para sa gabos, asin igwa pa nin sobra. Kan an ama ni Jose na si Jacob, an mga tugang ni Jose, asin an saindang mga pamilya magduman tanganing makaibanan ni Jose sa Egipto, sinda nakinabang na gayo sa ugay na idto nin Dios. Daing duwa-duwa na an mga Israelitas nakatatao man na gayo sa tinapay na gibo sa pinaalsang masa nin harina, ta ini minalataw na naggikan sa Egipto.

5. (a) Paano si Jehova nagtao nin kakanon sa kapatagan? (b) Siisay an nakihiras sa Israel sa bendisyon na ini, asin taano?

⁵ Kan huri, si Jehova nagtao pa nin dugang na mamomoton na probisyon para sa saiyang banwaan. Ini kaidtong an minilyon na Israelitas maghale sa Egipto tanganing magbaklay sa kapatagan nin Sinai. Paano daw makakakua nin kakanon an dakulang kadaklan na ini sa mapungaw, maringis na disyertong idto? Minsan ngani si Jehova naanggot sa saindang kakulangan nin pagtubod, “binukasan nia an mga tata nin langit. Asin pinaoran nia sa sainda an mana tanganing kakanon, asin itinao nia sa sainda an trigo nin langit.” “Pinakabasog nia sinda nin tinapay hale sa langit” sa laog nin 40 halawig na mga taon. (Salmo 78:22-24; 105:40; Exodo 16:4, 5, 31, 35) Asin dai nindo paglingawan na bako sanang an mga Israelitas an nagkakan kan mana. An “sarong dakulang kadaklan na manlaenlaen” na bakong mga Israelitas nagtubod ki Jehova asin uminiba sa sainda sa pagluwas sa Egipto. An Dios nagtao man sa sainda nin mana.—Exodo 12:38.

6. (a) Ano an mas dakulang pangangaipo nin tawo, asin taano? (b) Ano an idinoon kan mga atang sa Israel, asin ano an ipinanganino kaiyan?

⁶ Minsan siring, poon pa kaidto an katawohan nagkakaipo nin bagay na orog pa ki sa literal na “tinapay hale sa langit.” Minsan an mga nagkakan sa milagroso an pagkataong mana naggurang asin nagadan, huli ta an minanang pagkamakasalan nin tawo ginigibong dai malilikayan an kagadanan, ano man an saiyang kinakakan. (Roma 5:12) An mga atang nin Israel nagtao nin paagi na mapagdanay an marahay na relasyon sa Dios, alagad an mga atang na idto nagdoon man kan pagigin makasalan kan nasyon. An mga idto “dai lubos na nakahale sa mga kasalan.” Dugang pa, an mga dolot na idto nanganino sa “sarong atang” ni Jesus, na nagpapangyari na mahale an mga kasalan “para sa gabos na panahon.” Gikan sa saiyang halangkaw na kamugtakan sa langit, ikinakatao ngonyan ni Jesus an merito kan atang na iyan.—Hebreo 10:1-4, 11-13.

“Tunay na Tinapay Hale sa Langit”

7. (a) An mga tataramon ni Jesus sa Juan kapitulo 6 kaipuhan na saboton sa anong bagong konteksto? (b) Taano ta sinagwe ni Jesus an kadaklan?

⁷ Dumanan niato ngonyan an Juan kapitulo 6. An mga komento ni Jesus digdi bakong pagpapadagos kan nasusurat sa kapitulo 5. An konteksto iba man, huli ta sarong taon na an nakalihis. Ngonyan 32 C.E. na. An pinangyarihan bako nang sa tahaw kan nagpapakangmatanos na mga Judio sa Jerusalem kundi sa tahaw kan ordinaryong mga tawo sa Galilea. Bago pa sanang gibohon ni Jesus an milagro nin pagpakakan sa 5,000 katawo gikan sa limang tinapay na sebada asin duwang saradit na sira. Kan sumunod na aldaw, sinusundan kan kadaklan si Jesus, na naghahalat sa saro na naman na libreng pagkakan. Kaya si Jesus nagsabi sa sainda: “Kamo naghaharanap sako, bakong huli ta kamo nakaheling nin mga tanda, kundi huli ta kamo nagkarakan kan mga tinapay asin nagkabarasog. Magpagal kamo, bakong para sa kakanon na matutunawon, kundi para sa kakanon na nagdadanay sagkod sa buhay na dai nin katapusan.” Si Jesus isinugo kan saiyang Ama tanganing magtao kan siring na kakanon sa gabos na matubod sa saiya. Ini an “tunay na tinapay hale sa langit,” na igwa nin mas nagdadanay na epekto ki sa literal na mana na kinakan kan suanoy na mga Israelitas.—Juan 6:26-32.

8. Paano an saro puwedeng magkamit nin buhay na daing katapusan?

⁸ Ipinaliwanag ni Jesus an mga pakinabang na makukua sa “kakanon” na iyan, na nagsasabi sa sainda: “Ako an tinapay nin buhay. An minadolok sa sako dai nanggad magugutom, asin an nagsasagibo nin pagtubod sa sako dai na noarin man mapapaha. . . . Huli ta iyo ini an kabotan kan sakong Ama, na an gabos na nakakaheling sa Aki asin nagsasagibo nin pagtubod sa saiya magkaigwa nin buhay na daing katapusan, asin bubuhayon ko sia liwat sa huring aldaw.”—Juan 6:35-40.

9, 10. (a) Paano an “tinapay nin buhay” napapalaen sa mana? (b) Sono sa Juan 6:42-51, para kiisay itinao ni Jesus an saiyang laman? (c) Paano an mga ini ‘nagkakakan kan saiyang laman’?

⁹ Ginibong isyu kan materyalistikong mga Judio an mga tataramon na ini. An pagheling sana ninda ki Jesus aki ni Jose asin Maria. Pinatanidan sinda ni Jesus: “Dai kamo maggurumudgumod sa saindo man sana. Dai nin nakakadolok sa sako kun dai sia dagkahon kan Ama, na nagsugo sa sako; asin bubuhayon ko sia liwat sa huring aldaw.” Dangan inotro nia: “Ako an tinapay nin buhay. An saindong mga apoon nagkarakan kan mana sa kapatagan asin nagkagaradan. Ini iyo an tinapay na naghihilig hale sa langit, tanganing an siisay man kumakan kaiyan asin dai magadan. Ako iyo an nabubuhay na tinapay na naghilig hale sa langit; kun an siisay man kumakan sa tinapay na ini sia mabubuhay sagkod lamang; asin, sa katotoohan, an tinapay na sakong itatao iyo an sakong laman manongod sa buhay kan kinaban.”—Juan 6:42-51.

¹⁰ Kaya, manongod sa “buhay kan kinaban”—an bilog na kinaban nin matutubos na katawohan—na itinao ni Jesus an saiyang laman. Asin “an siisay man” sa kinaban nin katawohan na simbolikong kumakan sa “tinapay” na iyan, paagi sa pagpaheling nin pagtubod sa nakatutubos na puwersa kan atang ni Jesus, puwedeng lumaog sa dalan pasiring sa buhay na daing katapusan. Digdi, an “dakulang kadaklan na manlaenlaen” na nakiiba sa mga Israelitas sa pagkakan kan mana sa kapatagan nanganino kan dakulang kadaklan kan “ibang karnero” ni Jesus na, kaiba kan linahidan na natatada kan “Israel nin Dios,” nagkakakan ngonyan sa laman ni Jesus sa piguratibong paagi. Ini ginigibo ninda paagi sa pagtubod sa saiyang atang.—Galacia 6:16; Roma 10:9, 10.

11. Ano pang dugang na mga tataramon ni Jesus an nakapakubhan sa mga Judio, asin taano?

¹¹ Duman sa Galilea, dakol sa mga naghihinanyog ki Jesus an nakubhanan sa saiyang isinabi. Kaya mantang nasa tema pa kan saiyang laman, dinagdagan pa nia ini, na sinasabi sa sainda: “Sa katotoohan ako nagsasabi sa saindo, Kun dai kamo magkakan kan laman kan Aki nin tawo asin mag-inom kan saiyang dugo, mayo kamo nin buhay sa saindo man sana. An minakakan kan sakong laman asin minainom kan sakong dugo igwa nin buhay na daing katapusan, asin bubuhayon ko sia liwat sa huring aldaw; huli ta an sakong laman iyo an tunay na kakanon, asin an sakong dugo iyo an tunay na inomon.” (Juan 6:53-55) Nakakakubhan nanggad ini! Bako sana na an ideya nin pagkakan sa kapwa tawo nakakarimarima para sa mga Judiong idto kundi an Pagboot sa Levitico 17:14 tunay na nangangalad nin pagkakan “kan dugo nin ano man na klase nin laman.”

12. (a) Ano an idinodoon digdi ni Jesus? (b) Anong mga teksto an nagpapaheling na ini bako sanang para sa kairibang paramana ni Jesus?

¹² Siyempre, idinodoon digdi ni Jesus na an siisay man na magkakamit nin buhay na daing katapusan kaipuhan na gibohon iyan basado sa pagsagibo nin pagtubod sa atang na ginibo ni Jesus sa pagdolot kan saiyang sangkap na hawak bilang tawo asin pagpabolos kan saiyang dugo. (Hebreo 10:5, 10; 1 Pedro 1:18, 19; 2:24) An probisyon na ini bako sanang para sa kairibang paramana ni Jesus. Kaipuhan na kaiba man dian an “dakulang kadaklan,” na makaliligtas sa “dakulang kahorasaan,” huli ta an mga ini “hinugasan an saindang mga gubing asin pinaputi iyan sa dugo kan Kordero.” An pagkaigwa ninda nin pagtubod sa atang ni Jesus, arog kan ipinaheheling man kan saindang pagtao sa Dios nin “banal na paglilingkod,” nagbubunga kan saindang pagkaligtas sa pinakagrabeng kasakitan na aagihan kan daga. Kaagid kaiyan, si Rahab ipinahayag na matanos asin nakaligtas kan laglagon ni Josue an Jerico.—Kapahayagan 7:9, 10, 14, 15; Josue 6:16, 17; Santiago 2:25.

“Buhay sa Saindo Man Sana”

13. (a) Sa pagkokomparar kan Juan 5:26 asin Juan 6:53, ano an maririsa? (b) Anong usong gramatikong porma sa Griego an nakatatabang sato na masabotan an Juan 6:53? (c) Kaya, ano an boot sabihon kan pagkaigwa nin “buhay sa saindo man sana,” asin kiisay minaaplikar an mga tataramon na ini?

¹³ Sa Juan 6:53, 54, ikinokomparar ni Jesus an “buhay na daing katapusan” sa pagkaigwa nin “buhay sa saindo man sana.” Kaya, sa kontekstong ini, an ekspresyon na “buhay sa saindo man sana” minalataw na igwa nin ibang kahulogan sa ginamit ni Jesus sa Juan 5:26. An mga ekspresyon na an gramatikong porma kapareho kan pagkaigwa nin “buhay sa saindo man sana” minalataw man sa ibang parte kan Griegong Kasuratan. Halimbawa: “Magkaigwa kamo nin asin sa saindo man sana” (Marcos 9:50) asin “nag-aako sa sainda man sana kan bilog na kabayadan” (Roma 1:27).a Sa mga halimbawang ini, an frase dai nangangahulogan nin kapangyarihan na magtao nin asin o kabayadan sa iba. Imbes, ipinaririsa an panlaog na pagkakompleto o kalubosan. Kaya, sono sa konteksto kan Juan 6:53, an pagkaigwa nin “buhay sa saindo man sana” mangangahulogan digdi nin paglaog sa katapustapusi sa mismong kalubosan nin buhay. An “sadangoton na aripompon” nin mga paramana sa Kahadean makakaeksperyensia kaini kun sinda buhayon na liwat pasiring sa kalangitan. An “ibang karnero” makakaeksperyensia kaiyan pagkatapos kan sangribong taon, kun sinda baloon na asin ipahayag na matanos para sa buhay na daing katapusan sa Paraisong daga.—1 Juan 3:2; Kapahayagan 20:4, 5.

14. Siisay pa an makikinabang sa “tinapay hale sa langit,” asin paano?

¹⁴ An iba puwede man na makinabang sa “tinapay hale sa langit.” Si Jesus nagsabi manongod sa saro na ‘nagkakan kan saiyang laman asin nag-inom kan saiyang dugo’ alagad nagadan: “Bubuhayon ko sia liwat sa huring aldaw.” Aram niato na an linahidan na mga Kristiano na natotorog sa kagadanan binubuhay liwat sa pagtanog kan “huring trumpeta,” na nangyayari sa panahon kan “kapahayagan” ni Jesu-Cristo sa kamurawayan sa Kahadean. (1 Corinto 15:52; 2 Timoteo 4:1, 8) Alagad ano man an may esperansang “ibang karnero” na napatorog sa kagadanan? An mga tataramon ni Marta kaidtong magadan si Lazaro mahalaga digdi, huli ta kan panahon na idto an matatakton sa Dios na mga Judio mayo nin ibang paglaom kundi daganon na pagkabuhay liwat. An pagtubod ni Marta ipinahayag sa mga tataramon na ini: “Aram ko na sia [si Lazaro] mabubuhay sa pagbuhay liwat sa huring aldaw.” (Juan 11:24) Kaya kita na nabubuhay ngonyan sa presensia ni Cristo makakalaom na an mga maimbod sa “dakulang kadaklan” na napatorog sa kagadanan magkakaigwa nin amay na pagkabuhay liwat digdi sa daga, tangani na sinda makakakan giraray kan “tinapay hale sa langit,” na may paglaom sa buhay na daing katapusan. Kamakangangalas nanggad kan paglaom na iyan, paglaom na ginarantiyahan kan bagay na si Jesus mismo binuhay liwat hale sa mga gadan!—1 Corinto 15:3-8.

“Kasaro ni Cristo”

15. An mga tataramon ni Jesus na “kasaro ni Cristo” minaaplikar kiisay, asin taano ta siring an saindong simbag?

¹⁵ Si Jesus nagpapadagos: “An minakakan kan sakong laman asin minainom kan sakong dugo nagdadanay na kasaro ko, asin ako kasaro nia.” (Juan 6:56) Kaya ini totoo manongod sa “siisay man” na nagsasagibo nin pagtubod sa atang ni Jesus, na may paglaom na magkaigwa nin ‘buhay sa saiya man sana.’ An gabos na magpaheling kan siring na pagtubod puwedeng magin “kasaro” ni Jesus. Siyempre, an “dakulang kadaklan,” na may daganon na paglaom, bakong “kasaro” ni Cristo sa sentido nin pagigin kairibang paramana nia, miembro kan saiyang nobya na mag-aako nin langitnon na pagkabuhay liwat kapareho nia. (Roma 8:1, 10; 1 Corinto 1:2; 2 Corinto 5:17; 11:2; Galacia 3:28, 29; Efeso 1:1, 4, 11; Filipos 3:8-11) Alagad an gabos na may daganon na paglaom puwede, sa katotoohan dapat, na lubos na kaoyon kan Ama asin kan Aki sa pakaaram asin paggibo kan “sangkap na kabotan nin Dios,” kun paanong iyan totoo sa “sadangoton na aripompon.”—Roma 12:2; ikomparar an Juan 17:21.

16. (a) Sa anong mahahalagang paagi na an gabos na nagsasagibo nin pagtubod sa atang ni Cristo “kasaro” ni Jesus? (b) Sa ano naririsa an saindang pagkakasaro sa katuyohan asin paghihingoa?

¹⁶ Kaya, an halaga bilang atang kan laman asin dugo ni Cristo makukua kan gabos ngonyan na nagsasagibo nin pagtubod, asin an gabos na mag-aprobetsar dian puwede, sa mahahalagang paagi, na magin “kasaro” ni Jesus. An gabos magigin kabtang kan pan-unibersong pamilya ni Jehova Dios. Sa delikadong “huring mga aldaw” na ini, sinda nagkakamit nin pagkasararo sa pagtubod, katuyohan asin aktibidad na lakop sa kinaban. Nagsasagibo nin pagtubod ki Jesus, sinda nakakagibo nin “mga gibo na orog pa” sa hiwas ki sa ginibo ni Jesus digdi sa daga. Asin mangnohon na an minilyon na “dakulang kadaklan” ngonyan 99.7 porsiento kan mga nag-ootob sa gibohon ni Jehova sa panahon na ini. (Juan 14:12; Roma 10:18) An pagkakasarong ini sa katuyohan asin paghihingoa maririsa sa mahiwas na pagpatotoo sa bilog na globo asin boluntad na pagsuportar sa mga programa sa pagtotogdok kan Watch Tower Society. (Salmo 110:3) Dai aram kun pira pa sa kinaban nin katawohan an matubod asin malaog sa napakahalagang pagkasararong ini. An bago pa sanang report nagpapaheling nin 3,024,131 aktibong Saksi.

17. Anong mga punto an maninigong masabotan kan gabos na minaatender sa Memorial?

¹⁷ Linalaoman na an dakol na interesado makakadagdag sa kabilangan kan mga maatender sa selebrasyon nin Memorial sa 1987. Minilyon na “ibang karnero” an magigin presente, kaiba an nagdidikit na rinibo sa “sadangoton na aripompon”—na gabos may hararom na pag-apresyar sa mamomoton na probisyon ni Jehova paagi ki Cristo, na minimidbid kun gurano kahalaga kan laman asin dugo ni Cristo. Minsan siring, an gabos maninigong malinaw na makamansay kun ano an saindang kamugtakan. An pakikikabtang sa mga emblema sa Memorial dai nagtatao nin buhay na daing katapusan. An mga ini simbolo kan atang ni Jesus, na enot na minaaplikar may koneksion sa “bagong tipan.” An mga linahidan na pinalaog sa tipan na iyan, asin sinda sana, an tamang makikabtang sa mga emblema. An saro magsalang nasa laog kan bagong tipan na iyan o bako. (1 Corinto 11:20, 23-26) An mga mayo sa laog kan bagong tipan asin dai pinalaog ni Jesus sa sarong tipan para sa kahadean dai nakikikabtang sa mga emblema kan Memorial, alagad sinda maninigo pa man giraray na magmidbid kun gurano kahalaga para sa sainda kan iinatang na laman asin dugo ni Jesus. (Lucas 22:14-20, 28-30) An atang na ini iyo an paagi na sinda makapagkamit nin buhay na daing katapusan sa daga.

18. Anong kaogmahan an ibinubunga kan malinaw na pakamansay sa gabos na kahulogan kan atang ni Jesus?

¹⁸ Kaya kita logod dumolok sa okasyon nin Memorial na may malinaw na pakamansay sa gabos na kahulogan kan atang ni Jesus para sa katawohan. Mahalon logod kan mga kabilang sa “sadangoton na aripompon” an pagkaapod sa sainda, asin an nagdadakol logod na kadaklan kan “ibang karnero” mag-ogma sa paglaom na magkaigwa nin sangkap na daganon na ‘buhay sa sainda man sana,’ mantang pinahahalagahan na gayo ninda an saindang pagigin kasaro, ngonyan mismo, kan Ama, kan Aki, asin kan nagdidikit na kabilangan kan linahidan na natatada na yaon pa sa daga. Kanigoan nanggad an satong kaogmahan na “an tinapay nin buhay” puwedeng makua nin gabos ngonyan!

[Mga Nota sa Ibaba]

Mga Hapot sa Pagrepaso

◻ Kan 32 C.E., si Jesus nagtaram manongod sa anong duwang klase nin mana, na itinao para kiisay?

◻ Siisay an inaagda ni Jesus na ‘kumakan kan saiyang laman asin uminom kan saiyang dugo,’ asin paano ninda ini ginigibo?

◻ Ano an boot sabihon kan pagkaigwa nin “buhay sa saindo man sana,” asin paano saka noarin ini makakamtan?

◻ Anong kaogmahan an puwedeng kamtan kan gabos ngonyan kun dapit sa “tinapay nin buhay”?