-
Kun Ano an Buot Sabihon nin Pagigin NeutralMabuhay nin Maugma Sagkod Pa Man!—Interactive na Pag-adal sa Bibliya
-
-
LEKSIYON 45
Kun Ano an Buot Sabihon nin Pagigin Neutral
Itinukdo ni Jesus na an mga parasunod niya dapat na “bakong kabtang kan kinaban.” (Juan 15:19) Kaiba diyan an pagigin neutral—an dai pagkampi sa pulitika asin mga giyera. Totoo, bako pirming madali na magin neutral. Dahil diyan tibaad insultuhon kita. Paano kita makakapagdanay na neutral asin padagos na magigin maimbod sa Diyos na Jehova?
1. Paano minamansay kan tunay na mga Kristiyano an mga gobyerno nin tawo?
Iginagalang kan mga Kristiyano an gobyerno. Sinusunod ta an sinabi ni Jesus na “itao nindo ki Cesar an mga bagay na ki Cesar”—buot sabihon, sinusunod ta an mga ley kan nasyon, arog kan pagbayad nin buhis. (Marcos 12:17) Itinutukdo kan Bibliya na namamahala an mga gobyerno nin tawo huli sana ta tinutugutan sinda ni Jehova. (Roma 13:1) Kaya nasasabutan ta na mas halangkaw an awtoridad ni Jehova kisa sa gobyerno nin tawo. Tiwala kita na an satong Diyos asin an saiyang Kahadian sa langit iyo an makakatao nin solusyon sa problema nin katawuhan.
2. Paano ta maipapahiling na neutral kita?
Arog ni Jesus, dai kita nakikilabot sa pulitika. Kan mahiling kan mga tawo an saro sa mga milagrong ginibo ni Jesus, pinurbaran nindang gibuhon siyang hadi, pero dai siya nagtugot. (Juan 6:15) Taano? Huling arog kan sinabi niya paghaloy-haloy, “an sakuyang Kahadian bakong kabtang kan kinaban na ini.” (Juan 18:36) Bilang mga disipulo ni Jesus, ipinapahiling ta sa dakul na paagi na neutral kita. Halimbawa, dai kita nakikigiyera. (Basahon an Mikas 4:3.) Iginagalang ta an mga simbolo kan nasyon—arog kan bandera—pero dai ta iyan sinasamba. (1 Juan 5:21) Dai man kita nagkakampi o nagkokontra sa arin man na partido sa pulitika o sa siisay man na kandidato. Sa mga paaging iyan asin sa iba pa, ipinapahiling ta an satong bilog na suporta asin kaimbudan sa gobyerno nin Diyos—sa saiyang Kahadian.
ARAMON PA
Pag-isipan an mga sitwasyon na diyan puwedeng matesting an pagigin neutral ta, asin aramon kun paano ka makakagibo nin mga desisyon na makakapaugma ki Jehova.
3. Neutral an tunay na mga Kristiyano
Si Jesus asin an saiyang mga parasunod nagpahiling sa sato nin halimbawa. Basahon an Roma 13:1, 5-7 asin 1 Pedro 2:13, 14. Dangan i-play an VIDEO tapos pag-ulayan an mga hapot na ini:
Taano ta dapat tang igalang an mga gobyerno nin tawo?
Ano an nagkapirang paagi na maipapahiling ta na nagpapasakop kita sa sainda?
Pag may giyera, may mga nasyon na nagsasabing neutral sinda. Pero, nagtatao man giraray sinda nin asistensiya sa magkalaban na lado. Ano talaga an buot sabihon nin pagigin neutral? Basahon an Juan 17:16. Dangan i-play an VIDEO tapos pag-ulayan an hapot na ini:
Ano talaga an buot sabihon nin pagigin neutral?
Paano kun may ipinapagibo sa saimo an gobyerno na kontra sa pagbuot nin Diyos? Basahon an Gibo 5:28, 29. Dangan i-play an VIDEO tapos pag-ulayan an mga hapot na ini:
Kun an ley o pagbuot nin tawo kontra sa pagbuot nin Diyos, kiisay na pagbuot an dapat tang sunudon?
May naiisip ka daw na sitwasyon na diyan dai masunod an mga Kristiyano sa gobyerno nin tawo?
4. Magin neutral sa isip asin sa gibo
Basahon an 1 Juan 5:21. Dangan i-play an VIDEO tapos pag-ulayan an mga hapot na ini:
Sa video, taano ta nagdesisyon si Ayenge na dai magbali sa sarong partido sa pulitika o magpartisipar sa nasyonalistikong mga seremonya arog kan pagsaludo sa bandera?
Sa hiling mo, tama daw an desisyon niya?
Sa ano pang mga sitwasyon puwedeng matesting an pagigin neutral ta? I-play an VIDEO, dangan pag-ulayan an mga hapot na ini:
Paano ta mapapagdanay an pagigin neutral pag naghihiling kita nin mga sports na an nagraralaban hali sa manlain-lain na nasyon?
Paano ta mapapagdanay an pagigin neutral dawa apektado kita o nakikinabang sa ipinapautob na mga desisyon kan mga pulitiko?
Ano an puwedeng magin epekto kan media saka kan mga kaiba-iba ta sa satong neutralidad?
Sa anong mga sitwasyon dapat na magdanay na neutral an sarong Kristiyano sa isip asin gibo?
TIBAAD MAY MAGHAPOT: “Taano ta dai kamo nagsasaludo sa bandera saka nagkakanta nin pambansang awit?”
Ano an isisimbag mo?
SUMARYO
Sa iniisip, sinasabi, asin ginigibo kan mga Kristiyano, pinagmamaigutan ninda na magin neutral sa pulitika.
Rebyu
Ano an obligasyon ta sa gobyerno?
Taano ta nagdadanay kitang neutral sa pulitika?
Sa anong mga sitwasyon puwedeng matesting an pagigin neutral ta?
HILINGON MAN
Anong mga pagsasakripisyo an tibaad kaipuhan tang gibuhon para magdanay na neutral?
Ano an puwedeng gibuhon kan mga pamilya para patiinot na makapaghanda sa mga sitwasyon na posibleng makatesting sa pagigin neutral ninda?
Taano ta an pagdepensa sa sadiring nasyon bako an pinakaonorableng magigibo nin sarong tawo?
Aramon kun paano magdadanay na bakong kabtang kan kinaban pag nagdedesisyon manungod sa paghanap nin trabaho.
“An Lambang Saro Magpapasan kan Saiyang Sadiring Pasan” (An Torrengbantayan, Marso 15, 2006)
-
-
Kaya Mong Tagalan an PersekusyonMabuhay nin Maugma Sagkod Pa Man!—Interactive na Pag-adal sa Bibliya
-
-
Maabot an panahon na an lambang saro sa sato mapapaatubang sa mga pagkontra asin persekusyon pa ngani. Dapat daw kitang matakot?
1. Taano ta inaasahan ta nang mapapaatubang kita sa persekusyon?
Malinaw na sinasabi kan Bibliya: “An gabos na nagmamawot na mamuhay na may debosyon sa Diyos bilang mga parasunod ni Cristo Jesus pepersegiron man.” (2 Timoteo 3:12) Pinersegir si Jesus huling bako siyang parte kan kinaban ni Satanas. Bako man kitang parte kan kinaban, kaya dai na kita nagngangalas kun persegiron man kita kan mga gobyerno asin kan mga relihiyon.—Juan 15:18, 19.
2. Paano kita makakapaghanda sa persekusyon?
Kaipuhan tang pakusugon na ngunyan an satong pagtitiwala ki Jehova. Magtao nin oras kada aldaw sa pagpamibi sa saiya asin pagbasa kan saiyang Tataramon. Regular na mag-atender sa mga pagtiripon kan kongregasyon. Makakatabang an mga iyan para magkaigwa ka kan kinakaipuhan na kusog nin buot na atubangon an ano man na persekusyon, dawa pa kan mga kapamilya. Si apostol Pablo, na parating nakaeksperyensiya nin mga persekusyon kaidto, nagsurat: “Si Jehova an sakuyang paratabang; dai ako matatakot.”—Hebreo 13:6.
Makakatabang man sa sato na magkaigwa nin kusog nin buot an regular na paghuhulit. Pag naghuhulit kita, nakakanuod kitang magtiwala ki Jehova asin nadadaog ta an ano man na pagkatakot sa tawo. (Talinhaga 29:25) Kun magkakaigwa ka ngunyan nin kusog nin buot na maghulit, magigin handa kang marhay na padagos na maghulit dawa pa ipagbawal kan gobyerno an satong gibuhon.—1 Tesalonica 2:2.
3. Paano kita makikinabang kun magdadanay kitang maimbod ki Jehova dawa pinepersegir?
Siyempre, dai kita nauugmang persegiron. Pero kun tinatagalan ta an persekusyon, lalong nagigin makusog an satong pagtubod. Lalo kitang napaparani ki Jehova huling naeeksperyensiyahan ta an tabang niya sa mga panahon na garo dai ta na kaya. (Basahon an Santiago 1:2-4.) Nakukulgan si Jehova pag nahihiling niya kitang nasasakitan, pero nauugma siya pag nahihiling niya kitang dai minasuko. Sinasabi kan Bibliya: “Kun nagtatagal kamo nin kasakitan dahil sa paggibo nin marahay, ikinakaugma iyan nin Diyos.” (1 Pedro 2:20) Kun magdadanay kitang maimbod, babalusan kita ni Jehova nin buhay na daing katapusan sa bagong kinaban na duman mayo nang makontra sa tunay na pagsamba.—Mateo 24:13.
ARAMON PA
Aramon kun taano ta kaya tang magdanay na maimbod ki Jehova dawa pa persegiron kita asin kun paano niya babalusan an satong kaimbudan.
4. Kaya mong tagalan an pagkontra kan saimong pamilya
Aram na marhay ni Jesus na an iba sa satong kapamilya makontra sa satong desisyon na paglingkudan si Jehova. Basahon an Mateo 10:34-36, dangan pag-ulayan an hapot na ini:
Ano an tibaad sabihon o gibuhon kan mga kapamilya nin saro na nagdesisyon na maglingkod ki Jehova?
Para mahiling an sarong halimbawa, i-play an VIDEO, dangan pag-ulayan an hapot.
Ano an gigibuhon mo kun purbaran nin sarong kapamilya o amigo na papunduhon ka sa paglilingkod ki Jehova?
Basahon an Salmo 27:10 saka Marcos 10:29, 30. Pagkatapos na basahon an kada teskto, pag-ulayan an hapot na ini:
Paano puwedeng makatabang sa saimo an panuga na ini pag napaatubang ka sa pagkontra kan kapamilya o amigo?
5. Padagos na sambahon si Jehova dawa may persekusyon
Kaipuhan nin kusog nin buot para mapaglingkudan si Jehova pag inulang kita kan iba na gibuhon iyan. I-play an VIDEO, dangan pag-ulayan an hapot.
Paano an mga halimbawa sa videong iyan nakatao sa saimo nin kusog nin buot?
Basahon an Gibo 5:27-29 saka Hebreo 10:24, 25. Pagkatapos na basahon an kada teksto, pag-ulayan an hapot na ini:
Taano ta importanteng padagos na sambahon si Jehova dawa pa ipagbawal kan gobyerno an satong paghuhulit asin mga pagtiripon?
6. Tatabangan ka ni Jehova na magtagal
Hoben man o gurang, an mga Saksi ni Jehova sa bilog na kinaban padagos na maimbod na naglilingkod ki Jehova dawa pinepersegir. Para maaraman kun ano an nakatabang sa sainda, i-play an VIDEO. Dangan pag-ulayan an hapot na ini:
Sa video, ano an nakatabang sa mga Saksing idto na magtagal?
Basahon an Roma 8:35, 37-39 saka Filipos 4:13. Pagkatapos na basahon an kada teskto, pag-ulayan an hapot na ini:
Paano sinisigurado sa saimo kan tekstong iyan na kaya mong matagalan an ano man na pagbalo?
Basahon an Mateo 5:10-12, dangan pag-ulayan an hapot na ini:
Taano ta puwede kang magin maugma dawa pinepersegir?
Natagalan kan minilyon na mga Saksi ni Jehova an mga pagkontra. Makakaya mo man iyan!
MAY MGA NAGSASABI: “Dai ko kayang tagalan an persekusyon.”
Anong mga teksto an makakatabang sa saiya na magkaigwa nin kumpiyansa?
SUMARYO
Pinapahalagahan na marhay ni Jehova an satong mga paghihinguwa na paglingkudan siya sa ibong nin mga persekusyon. Sa tabang niya, makakatagal kita!
Rebyu
Taano ta dapat nang asahan kan mga Kristiyano an persekusyon?
Ano an magigibo mo ngunyan para magin handa pag nag-abot an persekusyon?
Ano an makakatabang sa saimo tanganing magkaigwa ka kan kumpiyansa na mapaglilingkudan mo si Jehova sa ibong nin ano man na pagbalo?
HILINGON MAN
Hilingon an sinabi kan sarong hoben na brother kun paano siya tinabangan ni Jehova na makatagal kan ipreso siya huli sa saiyang neutralidad.
Aramon kun ano an nakatabang sa sarong mag-agom na padagos na paglingkudan si Jehova sa laog nin dakul na taon sa ibong nin mga pagkontra.
Aramon kun paano magkakaigwa nin kusog nin buot pag napaatubang sa mga persekusyon.
“Mag-andam Na Ngunyan Para sa Panahon nin Pagpersegir” (An Torrengbantayan, Hulyo 2019)
Ano an dapat na magin pagmansay ta sa pagkontra nin mga kapamilya, asin ano an puwede tang gibuhon para mapagdanay an katuninungan asin magdanay na maimbod ki Jehova?
-