Nagigirumdoman daw Nindo?

Naapresyar daw nindo an pagbasa kan dai pa sana nahahaloy na mga luwas kan An Torrengbantayan asin The Watchtower? Bueno, helinga kun masisimbag nindo an minasunod na mga hapot:

• Ano an pundamental sa satong pagresolber sa dai pagkaintindihan sa iba?

Dapat nguna niatong rekonoseron na kita gabos madaling maimpluwensiahan nin salang mga kaisipan asin aktitud. Dangan maninigo niatong isip-isipon nin seryoso kun baga kita an pinaggikanan kan problema imbes na an ibang tawo.—w-BI 8/15, pahina 23.

• Noarin an “mga panahon nin pagbabalik kan gabos na bagay,” na sinambit sa Gibo 3:21?

An pagbabalik madatong sa duwang kabtang. Enot, igwa nin pagbabalik sa sarong espirituwal na paraiso poon kan 1919. An dugang pang pagbabalik madatong kun an satong daga ibalik na sa sarong pisikal na paraiso.—w-BI 9/1, pahina 17, 18.

• Paanong an tanga mayo nin kapitan, na isinurat sa Talinhaga 6:6-8, alagad ta nagtatao nin sarong marahay na halimbawa para sa sato?

Sa kolonya nin mga tanga, igwa nin sarong reyna, alagad sia reyna sana sa sentido na sia an nagsosogok asin an ina kan kolonya. Mahigos an mga tanga, asin maninigo na kita iyo man, na nagmamaigot na paoswagon an satong trabaho, dawa ngani dai binabantayan.—w-E 9/15, pahina 26.

• Eksakto daw an hula ni Hulda, na nakarekord sa 2 Hade 22:20, na si Josias magagadan “sa katoninongan,” mantang sia nalugadan na puedeng ikagadan sa ralaban?

Iyo, sia nagadan sa katoninongan sa sentido na sia nagadan bago an kalamidad kan 609-607 B.C.E., kan salikopan asin laglagon kan mga Babilonyo an Jerusalem.—w-BI 9/15, pahina 30.

• Taano ta pag-omaw para ki Salomon na iladawan an sarong agom na babae bilang “sarong madaling kamotan na usang babae asin kawiliwiling marhay na kanding na bukidnon”? (Talinhaga 5:18, 19)

An layas na babaeng kanding, o kanding na bukidnon, may kalmadong naturalesa asin eleganteng hiro. Sa ibong kaiyan, sia nakakatagal asin nangangaki sa magapo, masakit maabot na mga lugar kun saen an kakanon kakadikit.—w-BI 10/1, pahina 30, 31.

• Siisay si Henry Grew asin George Storrs?

An duwang lalaking ini nabuhay kan mga taon nin 1800 asin alistong mga estudyante sa Biblia kaidto. Nanodan ni Grew na an Trinidad bakong sono sa Kasuratan, siring kan mga doktrinang inmortalidad kan kalag asin kan kalayo sa impierno. Namansayan ni Storrs na may mga magkakamit nin daing katapusan na buhay digdi sa daga. An duwa sinundan ni Charles Taze Russell, na nagpoon kan pagpublikar kan magasin na ini kan 1879.—w-E 10/15, pahina 26-30.

• Paano minamansay kan Mga Saksi ni Jehova an medikal na mga prosedimiento na ginagamit an sadiring dugo nin saro?

Basado sa saindang mga paniniwala sa Biblia, dai ninda isinasaray an sadiri nindang dugo asin sa huri magpaineksion kaiyan. An lambang Kristiano nagdedesisyon para sa saiya man sana kun ano an gigibohon sa sadiri niang dugo durante nin sarong prosedimiento sa operasyon, medikal na pag-eksamin, o pagbolong sa presente. Maninigo niang isip-isipon an sinasabi kan Biblia manongod sa dugo asin girumdomon na sia biyong nagdusay sa Dios.—w-BI 10/15, pahina 30, 31.

• Ihinayag nin sarong surbey na ginibo sa kapinonan kan taon na ini an anong dakulang pangangaipo sa tahaw kan Mga Saksi ni Jehova sa bilog na globo?

Nangangaipo nin labing 11,000 na Kingdom Hall sa nagpoprogreso pa sanang mga nasyon, kun saen limitado an kuarta. An mga donasyon hale sa mga Kristiano sa dakol na nasyon ginagamit sa pagtabang sa pagtogdok nin igong mga lugar na pagtitiriponan.—w-BI 11/1, pahina 30.

• Ano an nagkapira sa orihinal na mga termino na ginamit sa Biblia may koneksion sa pagsamba?

An saro iyo an lei·tour·giʹa, na tinatradusir na “paglilingkod sa publiko.” An saro pa iyo an la·treiʹa, na trinadusir na “sagradong paglilingkod.” (Hebreo 10:11; Lucas 2:36, 37)—w-BI 11/15, pahina 10-13 (w-E 11/15 p. 11, 12)

• Ano an sarong pundamental na leksion na manonodan niato sa pagkasaysay sa Biblia manongod ki Adan asin Eva?

An ano man na pagparisa nin independensia ki Jehova Dios biyong kabalisngagan.—w-E 11/15, pahina 24-7.

• Ano an prueba sa Kasuratan na pinakokosog nin Dios an saiyang mga lingkod?

Si David, Habacuc, asin si apostol Pablo gabos nagtao nin personal na mga patotoo sa katunayan na si Jehova Dios pinakosog sinda. (Salmo 60:12; Habacuc 3:19; Filipos 4:13) Sa siring, makakokompiar kita na an Dios andam asin kayang pakosogon kita.—w-BI 12/1, pahina 10, 11.