Mga Hapot Hale sa mga Parabasa
Kan madangog na an nabilanggong si Pedro yaon sa may pinto, taano ta an sabi kan mga disipulo: “Anghel nia iyan”?—Gibo 12:15.
Tibaad salang hinona kan mga disipulo na sarong mensaherong anghel na representante ni Pedro an nakatindog sa may tata. Estudyare an konteksto kan tekstong ini.
Si Pedro inarestar ni Herodes, na iyong nagpagadan ki Santiago. Kaya may balidong dahelan an mga disipulo na maniwala na gagadanon man si Pedro. Mantang nakakadena, an nakabilanggong si Pedro guardiado nin apat na relyibo nin tig-aapat na soldados. Dangan, sarong banggi sia milagrosong binutasan asin ilinuwas sa bilanggoan nin sarong anghel. Kan sa katapustapusi marealisar ni Pedro an nangyayari, sia nagsabi: “Ngonyan talagang aram ko nang isinugo ni Jehova an saiyang anghel asin kinalda ako sa kamot ni Herodes.”—Gibo 12:1-11.
Si Pedro tolos-tolos na nagduman sa harong ni Maria na ina ni Juan Marcos, kun saen dakol na disipulo an nagkakatiripon. Kan magtuktok sia sa pinto kan tata, sarong surugoon na babae na an ngaran Roda an nagduman sa pagbukas. Kan mabosesan si Pedro, duminalagan sia tanganing sabihon sa iba na dai na ngani napalaog si Pedro! Sa primero, dai makapaniwala an mga disipulo na yaon sa may tata si Pedro. Imbes, sala nindang hinona: “Anghel nia iyan.”—Gibo 12:12-15.
Naniwala daw an mga disipulo na ginadan na si Pedro asin na an saiyang espiritu na nawaran na nin hawak an yaon sa may tata? Dai nanggad puedeng magin siring, ta aram kan mga parasunod ni Jesus an katotoohan sa Kasuratan manongod sa mga gadan—na sinda ‘mayo man lamang nin pakaaram.’ (Eclesiastes 9:5, 10) Ano daw, kun siring, an boot sabihon kan mga disipulo kan sabihon ninda: “Anghel nia iyan”?
Aram kan mga disipulo ni Jesus na sa bilog na kasaysayan, an mga anghel nagtao nin personal na tabang sa banwaan nin Dios. Halimbawa, nasambitan ni Jacob “an anghel na nagkakalda sa sako sa gabos na kapahamakan.” (Genesis 48:16) Asin mapadapit sa sarong aki na nasa kaibanan ninda, sinabihan ni Jesus an saiyang mga parasunod: “Siertohon nindo na dai nindo minemenos an saro sa mga saradit na ini; huli ta sinasabi ko sa saindo na an saindang mga anghel sa langit danay na nagheheling sa lalauogon kan sakong Ama na yaon sa langit.”—Mateo 18:10.
Interesante nanggad, “mensahero” an traduksion kan Young’s Literal Translation of the Holy Bible sa terminong agʹge·los (“anghel”). Minalataw na may paniniwala an nagkapirang Judio na an lambang lingkod nin Dios igwa nin sadiring anghel—garo man sana “anghel de la guardia.” Siempre, an punto de vistang ini dai direktamenteng itinotokdo sa Tataramon nin Dios. Pero, posible pa man giraray na kan sabihon kan mga disipulo na, “Anghel nia iyan,” hinohona ninda na sarong mensaherong anghel na representante ni Pedro an nakatindog sa may tata.