Magpakalinig sa Isip Asin Hawak

“Idolot nindo an saindong mga hawak na siring sa buhay na atang, banal, maaako nin Dios.”—ROMA 12:1.

1. Oyon ki apostol Pablo, taano ta kinakaipuhan an kalinigan sa isip asin hawak?

AN TAWO na nagmamawot na maglingkod sa banal na Dios na Jehova kaipuhan magin daing digta sa espirituwal asin moral. Makatanosan nanggad, ini nangangahulogan man nin kalinigan sa isip asin hawak. Huli sa kamugtakan kan presenteng sistema nin mga bagay, an mga tawong minaluwas dian tanganing maglingkod ki Jehova kaipuhan na magbago bako sana sa saindang kaisipan kundi sa parate pati sa saindang personal na mga ugale. Si apostol Pablo nagsurat sa mga Kristianong nasa Roma: “Kaya ako nakikimaherak sa saindo huli sa mga pagkaherak nin Dios, mga tugang, na idolot nindo an saindong mga hawak na siring sa buhay na atang, banal, maaako nin Dios, sarong banal na paglilingkod na may kakayahan na mangatanosan. Asin dai kamo maglakaw na arog sa palakaw na ini nin mga bagay, kundi maliwat kamo huli kan pagbago kan saindong pag-isip, tanganing mapatunayan nindo sa saindong sadiri kun ano an marahay asin maaako patin sangkap na kabotan nin Dios.” (Roma 12:1, 2) Ano daw an naiimbuwelto sa kalinigan nin isip asin hawak?

Kalinigan sa Isip

2. Paano daw puwedeng an satong mata asin puso magpahiro sato na makikabtang sa kalaswaan, asin ano an kinakaipuhan tanganing malikayan iyan?

² Maski antes pa itinao an Pagboot, ipinaheling kan maimbod na si Job na an satong mata asin puso puwedeng magpahiro sato na gumibo nin kalaswaan kun dai niato pogolan iyan. Sia nagpahayag: “Nakipagtipan ako kan sakuyang mga mata. Kaya paano ako makapagpapaheling nin atension sa sarong daraga? Kun an sakuyang puso nadara nin sarong babae, . . . iyan malaswang gawe, asin iyan kasalan na dapat tawan nin atension kan mga hokom.” (Job 31:1, 9-11) Kun igwa kita nin palikerong mata asin pabarobagong puso, kaipuhan niato an disiplina sa isip, “an disiplina na nagtatao nin pakamansay.”—Talinhaga 1:3.

3, 4. (a) Ano an ipinaheheling kan halimbawa ni David asin Bat-seba, asin ano an dapat tanganing mabago an salang kaisipan? (b) Taano ta kaipuhan na magin partikularmenteng maingat an Kristianong kamagurangan?

³ Si Hadeng David dinara kan saiyang mga mata sa paggibo nin pagsambay ki Bat-seba. (2 Samuel 11:2, 4) Ipinaheheling kan halimbawang ini na minsan mga lalaki na prominenteng ginamit ni Jehova puwedeng maholog sa kasalan kun dai ninda disiplinahon an saindang isip. Tibaad mangaipo nin matiyagang paghihingoa tanganing mabago an satong kaisipan. An siring na paghihingoa kaipuhan na ibanan nin desididong pamibi para sa tabang ni Jehova. Pagkatapos na magsolsol sa saiyang pagkakasala ki Bat-seba, si David namibi: “Lalangon mo sa sakuya an malinig na puso, O Dios, asin bugtakan mo ako nin bagong espiritu, sarong marigon.”—Salmo 51:10.

⁴ An Kristianong kamagurangan dapat na magin partikularmenteng maingat na dai magsaray nin salang horot na magiya sainda sa seryosong kasalan. (Santiago 1:14, 15) Sa Kristianong magurang na si Timoteo, si Pablo nagsurat: “An katuyohan kan pagboot na ini iyo an pagkamoot na gikan sa malinig na puso asin gikan sa marahay na konsensia patin gikan sa pagtubod na mayo nin pagsaginsagin.” (1 Timoteo 1:5) Magigin pagsaginsagin nanggad para sa sarong magurang na magpasan kan saiyang espirituwal na paninimbagan mantang tinotogotan an pagkapalikero na pukawon sa saiyang puso an mga kaisipan na gumibo nin karamogan.

5. Ano an dapat na likayan tanganing mapagdanay an kalinigan sa isip?

⁵ Bilang mga Kristiano kita gabos kaipuhan na lubos na maghingoa na magin malinig sa isip. Ini nangangahulogan nin paglikay sa ano man na pelikula, programa sa TV, o babasahon na magpaparaot sa satong kaisipan. Kalabot sa kalinigan sa isip an paghihingoa na isipon an mga bagay na “totoo, . . . matanos, . . . malinig.” Si apostol Pablo nagdagdag pa: “Ano man na marahay asin ano man na inoomaw, padagos na horophoropon an mga bagay na ini.”—Filipos 4:8.

Personal na Kalinigan

6. (a) Magtao nin halimbawa gikan sa libro nin Levitico na nagpapaheling na an personal asin pankagabsan na kalinigan sarong kahagadan sa Israel. (b) Ano daw an katuyohan kan mga pagboot na idto?

⁶ Igwa nin sarabihon na “an kalinigan ikaduwa sa pagkadiosnon.” Totoo, an tawong malinig sa moral asin pisikal tibaad bakong diosnon. Alagad an sarong diosnon na tawo dapat, huli ta kaipuhan, na magin malinig sa moral asin pisikal. Nagtao nin depinidong mga instruksion an Mosaikong Pagboot sa paglinig nin mga naramogan na harong asin sa personal na pagkarigos sa laen-laen na kaso nin ramog. (Helingon an Levitico, mga kapitulo 14 asin 15.) Pinagbotan an gabos na Israelitas na patunayan na banal an saindang sadiri. (Levitico 19:2) An publikasyon na Insight on the Scriptures nagsasabi: “An mga pagboot nin Dios na itinao [sa mga Israelitas] manongod sa pagkakan, sanitasyon, asin moral iyo an danay na mga pagirumdom sa sainda kan saindang pagkasiblag asin kabanalan sa Dios.”—Tomo 1, pahina 1128.

7. Ano an katotoohan manongod sa mga Saksi ni Jehova bilang banwaan, alagad ano an irineport nin nagkapirang mga nagbibiyaheng paraataman?

⁷ Mantang an mga Saksi ni Jehova bilang banwaan malinig sa ano man na ramog nin maka-Babilonyang falsong relihiyon asin dai nagtotogot sa moral na karamogan sa tahaw ninda, an mga report hale sa mga nagbibiyaheng paraataman nagpapaheling na an nagkapirang indibiduwal nagpapabaya sa personal na kalinigan asin kahusayan. Paano daw niato maseseguro na malinig kita sa kabtang man na ini? An sarong marahay na modelo para sa gabos na Kristianong mga harong iyo an Bethel, na an boot sabihon kan termino “Harong nin Dios.”

8, 9. (a) Anong sadol an itinatao sa gabos na bagong miembro kan pamilyang Bethel? (b) Anong mga prinsipyo sa Erokang Bethel an dapat maggobyerno sa kada Kristianong pamilya?

⁸ Kun an saro nagigin miembro kan pamilyang Bethel sa opisina prinsipal kan Watch Tower Society o saen man na sanga kaiyan sa bilog na kinaban, sia tinatawan nin sarong pulyeto na inandam kan Namamahalang Grupo. An publikasyon na ini nagpapaliwanag kan linalaoman sa saiya manongod sa ugale sa trabaho asin personal na mga ugale. Sa irarom kan temang “Room Care and Cleanliness,” iyan nagsasabi: “An buhay sa Bethel naghahagad nin pagpadanay nin halangkaw na pisikal, moral asin espirituwal na pamantayan. An lambang saro sa Bethel kaipuhan na magin alisto sa kalinigan kan saiyang sadiri asin kuwarto. Ini nakatatabang sa marahay na salud. Mayong dahelan na magin maati an siisay man. Sarong marahay na ugale na magkarigos aroaldaw. . . . An paghanaw bago magkakan kaipuhan asin linalaoman sa gabos. Bilang konsiderasyon sa saindong kakuwarto asin sa paralinig, an lababo o banyo kaipuhan hugasan pagkatapos gamiton.”

⁹ Sa mga Erokang Bethel, an mga kasilyasan pinagdadanay na malinig nanggad, asin inaandam an gabos na kaipuhan tanganing an minagamit makapaghanaw tolos kan saindang kamot. An mga miembro kan pamilya linalaoman na bayaan an kasilyasan na malinig pagkatapos gamiton, na an boot sabihon seguradohon na malinig an paka-flush kan inodoro. Ini pagpaheling nin konsiderasyon para sa masunod na magamit o para sa paralinig. Bako daw na kaipuhan na an siring karahay, kamamomoton na mga prinsipyo an maggobyerno sa lambang Kristianong harong?

10. (a) Taano an sarong maluhong banyo ta dai kaipuhan tanganing papagdanayon an pansadiring kalinigan asin kan mga aki? (b) Anong mga pagboot sa Israel an nakatatabang sa marahay na salud, asin anong leksion gikan dian an manonodan ngonyan kan banwaan ni Jehova?

¹⁰ Naturalmente, an mga kamugtakan magkalaenlaen sa mga nasyon. Sa ibang lugar, an mga harong mayo nin bathtub o maski shower. Sa kagabsan, minsan siring, an Kristianong mga lalaki asin babae puwedeng magkaigwa nin igong sabon asin tubig tanganing linigan an saindang mga hawak asin seguradohon na an saindang mga aki malinig.a Kadakol na mga harong sa bilog na kinaban an dai konektado sa mga imburnal. Alagad an ati puwedeng maingat na iapon paagi sa pagtahob sa kalot, siring sa kahagadan sa mga Israelitas maski yaon sa kampo militar. (Deuteronomio 23:12, 13) Apuwera kaini, an mga pagboot ni Jehova na sinusunod sa buhay sa kampo nagboboot nin parateng paglaba nin bado asin pagkarigos, nin marikas na pagheling asin pagbolong sa helang, nin tamang pag-asikaso kan mga bangkay, asin nin pagpadanay sa malinig na suplay nin tubig asin pagkakan. An gabos na pagboot na ini nakatabang sa salud kan bilog na nasyon. Maninigo daw na an banwaan ni Jehova ngonyan magin bakong gayong mapagmangno sa kalinigan sa salud sa saindang personal na paggawe?—Roma 15:4.

Malinig na mga Harong asin Lulunadan

11. (a) Ano an maninigo maski sa pinakasimpleng Kristianong harong? (b) Anong kooperasyon an kahagadan sa gabos na miembro kan pamilyang Bethel?

¹¹ An satong mga harong, gurano man iyan kasimple, puwedeng magin areglado asin malinig, pero nangangaipo ini nin marahay na organisasyon sa laog nin pamilya. An Kristianong ina magmamawot na gumamit nin pinakadakol na oras na mapupuwede sa espirituwal na mga bagay, kaiba an paghuhulit, kaya dai sia maninigong gumastos nin oras aroaldaw sa pag-asikaso sa lambang bado, libro, mga papel, magasin, asin iba pa na bararag na binayaan kan mga miembro nin pamilya. Sa Bethel, maski ngani igwa nin paralinig na nag-aasikaso kan kalinigan, an lambang miembro kan pamilya linalaoman na husayon an saiyang kama asin bayaan an saiyang kuwarto na areglado kun aga. Inaapresyar niato gabos an satong areglado asin malinig na mga Kingdom Hall asin Assembly Hall. Logod an satong harong magpatunay man na kita kabtang kan malinig asin banal na banwaan ni Jehova!

12, 13. (a) Anong sadol an itinao manongod sa mga lulunadan na ginagamit sa paglilingkod ki Jehova, asin taano ta dai kaipuhan na ini magin makipanahon? (b) Ano an espirituwal na dahelan sa pagpadanay nin pisikal na kalinigan asin nin aregladong harong asin kotse?

¹² Dakol sa mga lingkod ni Jehova ngonyan an naggagamit nin lulunadan bilang transportasyon pasiring sa pagtiripon asin paglilingkod sa langtad. Sa nagkapirang nasyon an kotse nagin instrumento na kaipuhan nanggad sa paglilingkod ki Jehova. Kun arog kaiyan, dapat iyan na papagdanayon na areglado asin malinig, kun paano an satong harong. Tunay nanggad, an mga Kristiano dai magastos nin sobrang panahon sa pag-asikaso sa saindang kotse siring sa ibang tawo nin kinaban. Alagad dai man minaarog sa pagpalabilabing iyan, an mga lingkod ni Jehova maninigong maghingoa na rasonableng papagdanayon na malinig an saindang lulunadan asin nasa marahay na kondisyon. Sa ibang nasyon an paghugas nin kotse sa gasolinahan bako man na magastos o makipanahon. Kun manongod sa laog kan lulunadan, an sampulong minuto na paglinig asin pag-areglar nagkakaigwa nin makangangalas na resulta. Partikularmente an kamagurangan asin ministeryal na mga lingkod kaipuhan na maghingoa na magin halimbawa sa bagay na ini, mantang parateng ginagamit ninda an saindang mga kotse sa paghatod nin mga parahayag sa paglilingkod sa langtad. Kun an sarong parahayag minahapit sa sarong interesado tanganing darahon sa pagtiripon, siertong bakong marahay na patotoo kun an saiyang kotse maati asin disareglado.

¹³ Kaya, paagi sa satong paghihingoa na magin malinig sa pisikal asin magkaigwa nin malinig patin aregladong mga harong asin mga lulunadan, iginagalang niato si Jehova bilang mga miembro kan saiyang malinig na organisasyon.

Kalinigan kun Nagdodolot nin Espirituwal na mga Atang

14. Anong mga pagboot an guminiya sa seremonyal na kalinigan sa Israel, asin ano an ipinaheheling kan mga pagboot na ini?

¹⁴ An seremonyal na kalinigan manongod sa pagsamba ipinagboot sa Israel, sa irarom nin penalidad na kagadanan. Sinabihan ni Jehova si Moises asin Aaron: “Isuhay nindo an mga aki ni Israel sa saindang mga karigsokan, tanganing dai sinda magkagaradan sa saindang karigsokan huli sa saindang pagdigta sa sakuyang tabernakulo, na yaon sa tahaw ninda.” (Levitico 15:31) Sa Aldaw nin Pagtubos, an halangkaw na saserdote makaduwang paparigosan an saiyang laman nin tubig. (Levitico 16:4, 23, 24) An plangganang tanso sa tabernakulo, asin dangan an dakulang dagat na tanso sa templo, nagtao nin tubig sa mga saserdote tanganing maghanaw antes magdolot nin mga atang ki Jehova. (Exodo 30:17-21; 2 Cronica 4:6) Kumusta an kadaklan na mga Israelitas? Kun sinda nagin seremonyal na maati sa ano man na dahelan, dai sinda tinotogotan na makikabtang sa pagsamba sagkod na dai ninda otobon an mga kahagadan sa paglilinig. (Bilang 19:11-22) An gabos na ini nagdodoon na an pisikal na kalinigan kaipuhan sa nagsasamba sa banal na Dios na Jehova.

15. Taano ta dai na kaipuhan an mga atang na hayop, alagad anong mga hapot an minalataw?

¹⁵ Totoo, an banwaan ni Jehova ngonyan dai hinahagadan na magdolot nin mga hayop na atang sa daganon na templo. An mga atang sa irarom kan Pagboot sinalidahan na “kan pagdolot kan hawak ni Jesu-Cristo nin makasaro para sa gabos na panahon.” (Hebreo 10:8-10) Kita “nagsasamba sa Ama sa espiritu asin katotoohan.” (Juan 4:23, 24) Alagad an boot sabihon daw kaini mayo na kita nin atang na idodolot sa satong banal na Dios na Jehova? Asin an kalinigan daw bako na gayong kahagadan para sa sato kisa kaidto sa mga Israelitas?

16. Paano naotob an hula sa Malaquias 3:3, 4 sa linahidan na mga Kristiano poon 1918, asin anong inaakong mga atang an saindang ikadodolot ki Jehova?

¹⁶ An hula sa Malaquias nagpapaheling na an linahidan na mga Kristiano sa daga sa panahon kan katapusan dadalisayon, o lilinigan, para sa paglilingkod sa templo. Ipinaheheling nin kasaysayan na an pagdalisay nagpoon kan 1918. Poon 1919 an linahidan na natada nagin nanggad “para ki Jehova banwaan na nagdodolot nin dolot na may katanosan,” asin an saindang dolot “nagpapaogma ki Jehova.” (Malaquias 3:3, 4) Kaya, sinda nakakahimong “magdolot nin espirituwal na mga atang na inaako nin Dios paagi ki Jesu-Kristo.” (1 Pedro 2:5) Si apostol Pablo nagsurat: “Paagi sa saiya danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.”—Hebreo 13:15.

17. Minsan ngani an “dakulang kadaklan” bakong kabtang kan makahadeng pagkasaserdote, taano ta dapat sindang magin malinig sa pisikal, mental, moral, asin espirituwal?

¹⁷ Minsan ngani an “dakulang kadaklan” dai inapod sa makasaserdoteng paglilingkod sa templo arog kan linahidan na natada, sinda “nagtatao [ki Jehova] . . . nin banal na paglilingkod aldaw asin banggi” sa daganon na patyo kan saiyang espirituwal na templo. (Kapahayagan 7:9, 10, 15) Kaipuhan girumdomon na an bakong makasaserdoteng mga Israelitas kaipuhan na magin seremonyal na malinig tanganing makikabtang sa pagsamba sa tabernakulo o, sa huri, sa templo. Siring man, an dakulang kadaklan nin ibang karnero kaipuhan na magin malinig sa pisikal, mental, moral, asin espirituwal kun boot nindang maglingkod sa templo asin makikabtang sa natada sa ‘pagdolot sa Dios nin mga atang nin pag-omaw’ paagi sa ‘pagpahayag sa publiko kan saiyang ngaran.’

Malinig asin Husay Para sa Paglilingkod sa Langtad Asin mga Pagtiripon

18. Kun nakikikabtang sa pampublikong pagpatotoo asin pag-atender sa pagtiripon, ano an dapat na tawan niato nin atension manongod sa personal na kalinigan, paggubing, asin pansulot sa bitis?

¹⁸ Ano an boot sabihon kaini sa praktikal na kahulogan? Iyan nangangahulogan na bakong maninigo asin dai paggalang ki Jehova na irepresentar sia sa pagharongharong, sa mga tinampo, o sa harong nin iba kun sa pisikal bako kitang malinig asin tama an bolos. Kaya, dai niato maninigong paglimanlimanan an siring na mga bagay. Tawan niato sinda nin maingat na atension, tanganing makahiro kita nin maninigo bilang mga ministro na nagdadara kan ngaran ni Jehova. Dai kaipuhan na magin mamahalon an satong gubing, alagad dapat na iyan malinig, disente, asin mabini. An satong gamit sa bitis kaipuhan na bakong raot asin malinig an hitsura. Siring man sana, sa gabos na pagtiripon, kaiba an Pag-adal sa Libro kan Kongregasyon, dapat na malinig an satong mga hawak, asin magin husay asin angay an satong bolos.

19. Anong espirituwal na mga pakinabang an ibinubunga kan satong malinig asin husay na hitsura bilang Kristianong mga ministro?

¹⁹ An satong malinig asin husay na hitsura mantang nagpapatotoo asin yaon sa satong pagtiripon sarong paagi nin “pagsamno kan katokdoan kan satong Paraligtas, an Dios.” (Tito 2:10) Iyan patotoo na mismo. Kadakol na tawo an napahanga sa satong kalinigan asin pagkaareglado, asin nagpahiro ini sainda na maghinanyog sa satong mensahe manongod sa makangangalas na mga katuyohan ni Jehova para sa matanos na bagong mga langit asin sarong lininig na bagong daga.—2 Pedro 3:13.

20. Ano pang marahay na bunga an minagikan sa pagigin malinig niato sa isip asin hawak?

²⁰ Mantang harani na an malinig na bagong palakaw ni Jehova, kita gabos kaipuhan na siyasaton an satong sadiri asin helingon kun kaipuhan an nagkapirang pagbabago sa satong kaisipan o sa satong personal na mga ugale. Si Pablo nagsurat: “Ako nagtataram siring sa tawo huli kan kaluyahan kan saindong laman: huli ta siring na kamo nagdolot kan mga kabtang kan saindong hawak na magin mga oripon nin karigsokan asin katampalasanan na may katuyohan sa katampalasanan, kaya ngonyan idolot nindo an mga kabtang kan saindong hawak bilang mga oripon sa katanosan na may katuyohan sa pagpakangbanal.” (Roma 6:19) An espirituwal na kalinigan asin pisikal na kalinigan nagbubunga nin marahay minsan ngonyan, bunga “sa porma nin kabanalan, asin an katapusan [magigin] daing sagkod na buhay.” (Roma 6:22) Kun siring, magpakalinig logod kita, sa isip asin hawak mantang ‘idinodolot niato an satong hawak na siring sa buhay na atang, banal, maaako nin Dios.’—Roma 12:1.

[Nota sa Ibaba]

◻ Paano puwedeng magpahiro sa sato an satong mga mata asin puso na gumibo nin kalaswaan?

◻ Anong mga pakinabang an inako kan mga Israelitas kan sinunod ninda an mga pagboot ni Jehova sa pankagabsan asin indibiduwal na kalinigan?

◻ Anong mga prinsipyo na sinusunod sa mga Erokang Bethel an dapat maggobyerno sa kada Kristianong pamilya?

◻ Noarin, espesyalmente, kita maninigong magin maingat manongod sa satong hitsura?

◻ Ano an espirituwal na mga dahelan kan mga lingkod ni Jehova sa pagpapadanay na malinig asin husay kan saindang harong asin kotse?

[Ritrato sa pahina 21]

“An buhay sa Bethel naghahagad nin pagpadanay nin halangkaw na pisikal, moral asin espirituwal na pamantayan”

[Ritrato sa pahina 22]

Dapat daw gumastos nin ekstrang panahon an sarong ina kada aldaw sa pagsaray sa mga warak nin dai nag-aasikasong mga miembro nin pamilya?

[Ritrato sa pahina 23]

Sa laog nin sampulong minuto, kadakol na kan mahahaman sa paglinig sa laog nin sarong kotse