“Mamuot . . . Paagi sa Gibo Asin Katotoohan”

1. Ano an pinakahalangkaw na klase nin pagkamuot, asin taano? (Hilingon an ritrato sa itaas.)

AN PAGKAMUOT na basado sa tamang mga prinsipyo (a·gaʹpe) regalo hali ki Jehova. Siya an Gikanan kaiyan. (1 Juan 4:7) An pagkamuot na ini an pinakahalangkaw na klase nin pagkamuot. Puwedeng kaiba sa pagkamuot na ini an pagpadangat asin kabuutan, pero panginot na kaiba diyan an bakong makasadiring mga gibo para sa ikakarahay kan iba. Sigun sa sarong reperensiya, an a·gaʹpe “mamimidbid sana paagi sa mga gibong resulta kaiyan.” Kun kita nagpapahiling o pinapahilingan nin bakong makasadiring pagkamuot, nakakatabang iyan na magin mas maugma asin makahulugan an satong buhay.

2, 3. Paano ipinahiling ni Jehova sa mga tawo an saiyang bakong makasadiring pagkamuot?

² Bago pa man lalangon ni Jehova si Adan asin Eva, nagpahiling na Siya nin pagkamuot sa katawuhan. Linalang niya an daga tanganing magin daing sagkod na istaran nin mga tawo, na diyan dai sana sinda basta mabubuhay kundi ikakaugma nin lubos an saindang buhay. Dai ini ginibo ni Jehova para sa sadiri niya. Ginibo niya ini para sa sato. Ipinahiling pa niya an saiyang bakong makasadiring pagkamuot paagi sa pagtao sa saiyang mga aki sa daga kan oportunidad na mabuhay nin daing sagkod sa Paraiso na inandam niya para sa sainda.

³ Pagkatapos kan pagrebelde ni Adan asin Eva, ginibo ni Jehova an saiyang pinakadakulang kapahayagan nin bakong makasadiring pagkamuot. Naggibo siya nin areglo tanganing tubuson an mga magigin gikan kan nagrebeldeng mag-agom, huling sigurado siya na may nagkapira sa sainda na aakuon an Saiyang pagkamuot. (Gen. 3:15; 1 Juan 4:10) Sa katunayan, kaidtong ipinanuga ni Jehova an dapit sa maabot na Paraligtas, para sa Saiya garo man sana naitao na an sakripisyong iyan. Dangan, pakalihis nin mga 4,000 na taon, dawa dakulaon na sakripisyo sa parte ni Jehova, itinao niya an saiyang bugtong na Aki para sa bilog na katawuhan. (Juan 3:16) Nagpapasalamat nanggad kita ki Jehova huli sa saiyang bakong makasadiring pagkamuot!

4. Ano an patunay na kaya kan bakong perpektong mga tawo na magpahiling nin bakong makasadiring pagkamuot?

⁴ Kaya man niyatong magpahiling nin bakong makasadiring pagkamuot huling linalang kita nin Diyos uyon sa saiyang ladawan. Totoo, dipisil para sa sato na magpahiling nin pagkamuot huli sa minana tang kasalan, pero dai kaiyan nahali an kakayahan tang magpahiling nin pagkamuot. Ipinahiling ni Abel an pagkamuot sa Diyos kan daing kaimutan niyang iatang an pinakamarahay na maitatao niya. (Gen. 4:3, 4) Nagpahiling si Noe nin bakong makasadiring pagkamuot sa saiyang kapwa paagi sa paghulit kan mensahe nin Diyos sa laog nin dakul na taon dawa mayong interes an mga tawo. (2 Ped. 2:5) Ipinahiling ni Abraham na mas makusog an pagkamuot niya sa Diyos kisa sa ano pa man na bagay kan ipagbuot sa saiya na iatang an saiyang aking si Isaac. (Sant. 2:21) Arog kan maimbod na mga lalaking idto, gusto man niyatong magpahiling nin pagkamuot sa ibong nin mga kadipisilan.

PAGKAKAIBA KAN TUNAY ASIN BAKONG TUNAY NA PAGKAMUOT

5. Sa anong mga paagi niyato maipapahiling an tunay na pagkamuot?

⁵ Sinasabi kan Bibliya na an tunay na pagkamuot ipinapahiling, “bakong paagi sa tataramon o paagi sa dila, kundi paagi sa gibo asin katotoohan.” (1 Juan 3:18) Buot daw sabihon kaini dai niyato puwedeng ipahiling an satong pagkamuot paagi sa tataramon? Dai man! (1 Tes. 4:18) Imbes, nangangahulugan iyan na bako sanang sa tataramon dapat ipahiling an satong pagkamuot, lalo na sa mga sitwasyon na kaipuhan na may gibuhon kita. Halimbawa, kun an sarong kapagtubod ta mayo nin makakakan o isusulot, bakong igo an basta sana sabihon ta sa saiya na lugod magkaigwa siya kan mga kaipuhan niya. (Sant. 2:15, 16) Kaagid kaiyan, an pagkamuot niyato ki Jehova asin sa satong kapwa mapahiro sa sato na dai sana hagadon sa Diyos ‘na magsugo nin mga trabahador sa pagpaani’ kundi lubos man na makikabtang sa paghuhulit.—Mat. 9:38.

6, 7. (a) Ano an “pagkamuot na mayong pagsagin-sagin”? (b) Magtao nin mga halimbawa nin bakong tunay na pagkamuot.

⁶ Isinurat ni apostol Juan na dapat kitang mamuot “paagi sa gibo asin katotoohan.” Kaya, an satong pagkamuot dapat na “mayo nin pagsagin-sagin.” (Roma 12:9; 2 Cor. 6:6) Nangangahulugan ini na dai kita nakakapahiling nin tunay na pagkamuot kun nagsasagin-sagin sana kita, na garo nagsusulot nin maskara. Tibaad maihapot niyato, ‘Igwa man daw nin pagkamuot na may pagsagin-sagin?’ Mayo. Bako nanggad iyan pagkamuot asin dai iyan nin kamanungdanan.

⁷ Pag-isipan an nagkapirang halimbawa nin bakong tunay na pagkamuot. Kaidto sa hardin nin Eden, nagsagin si Satanas na kapakanan ni Eva an iniisip niya, pero an totoo makasadiri asin mapandaya an intensiyon niya. (Gen. 3:4, 5) Kan panahon ni David, pinatunayan ni Ahitofel na bako siyang tunay na amigo kan hadi. Nagtraydor si Ahitofel kan mahiling niyang makikinabang siya. (2 Sam. 15:31) Sa panahon man niyato ngunyan, an mga apostata asin an iba pa na naggigibo nin pagkabaranga sa kongregasyon naggagamit nin “mahamis na mga tataramon saka pambubuladas” tanganing paluwason na mamumuton sinda, pero an totoo makasadiri an motibo ninda.—Roma 16:17, 18.

8. Ano an dapat niyatong ihapot sa satong sadiri?

⁸ Lalo nang maraot an mapagsagin-sagin na pagkamuot huling pagpalsipikar iyan sa marahayon na kuwalidad na mapagsakripisyong pagkamuot. Puwedeng madaya kan pagsagin-sagin na iyan an mga tawo, pero si Jehova dai. Sa katunayan, sinabi ni Jesus na an mga tawong ibinibilang na parasagin-sagin papadusahan “nin grabe nanggad.” (Mat. 24:51) Siyempre, dai nanggad gugustuhon kan mga lingkod ni Jehova na magpahiling nin mapagsagin-sagin na pagkamuot. Pero, marahay na haputon niyato an satong sadiri, ‘Pirmi daw na tunay an sakong pagkamuot, na mayo nin ano man na pagkamakasadiri o pandadaya?’ Pag-ulayan ta an siyam na paagi na puwede niyatong hinguwahon na magibo tanganing makapahiling nin pagkamuot na “mayong pagsagin-sagin.”

KUN PAANO MAGPAPAHILING NIN PAGKAMUOT “PAAGI SA GIBO ASIN KATOTOOHAN”

9. Papahiruon kita kan tunay na pagkamuot na gibuhon an ano?

⁹ Magin maugma sa paglilingkod dawa dai aram kan iba an ginigibo ta. Dapat na magin andam kitang gumibo nin mamumuton na mga bagay para sa satong mga tugang nin “sekreto” sana, o dai naaaraman kan iba, kun ini posible. (Basahon an Mateo 6:1-4.) Dai iyan nagibo ni Ananias asin Safira. Habo nindang magdonar nin sekreto sana asin hayagan nindang pinaluwas na sobra an itinao ninda sa talagang kantidad kan atang ninda, kaya napahamak sinda huli sa pagsagin-sagin ninda. (Gibo 5:1-10) Sa kabaliktaran, pinapahiro kita kan tunay na pagkamuot na magin maugma sa paglilingkod sa satong mga tugang dawa dai aram kan iba o dawa mayo kitang makuang onra sa ginibo ta. Halimbawa, habo kan mga tugang na nagtatabang sa Namamahalang Grupo sa pagpreparar nin espirituwal na kakanon na mapokus sa sainda an atensiyon kan iba saka dai ninda ipinapaisi kun ano an proyektong ginigibo ninda.

10. Paano kita manginginot sa pagtao nin onra sa iba?

¹⁰ Manginot sa pagtao nin respeto o onra sa iba. (Basahon an Roma 12:10.) Nagtao si Jesus nin arugan sa pagtao nin onra sa iba paagi sa paggibo nin hababang marhay na klase nin trabaho. (Juan 13:3-5, 12-15) Tibaad kaipuhan niyatong maghinguwang marhay tanganing magkaigwa kan kapakumbabaan na kaipuhan para makatao nin onra sa iba sa arog kaining paagi. Dawa an mga apostol, nasabutan sana ninda nin lubos an ginibong iyan ni Jesus kan mag-ako na sinda kan banal na espiritu. (Juan 13:7) Makakapahiling kita nin onra sa iba kun dai magigin sobra an paghiling ta sa sadiri huli sa satong tinapusan, kayamanan, o mga pribilehiyo sa paglilingkod ki Jehova. (Roma 12:3) Asin imbes na mauri sa mga nag-aako nin pag-umaw, nakikiugma kita sa sainda dawa kun pagmati ta maninigo man kita sa parehong onra o dapat man kitang midbidon sa nagin kontribusyon ta.

11. Taano ta dapat na magin sinsero an satong komendasyon?

¹¹ Sinserong komendaran an saimong mga tugang. Dapat niyatong aprobetsaran an mga oportunidad na magtao nin komendasyon sa lambang saro huling “nakakapakusog” an mga tataramon na iyan. (Efe. 4:29) Pero dapat na magin sinsero kita. Ta kun bako, puwedeng pambobola na an ginigibo ta o tibaad linilikayan ta na an paninimbagan na magtao nin kinakaipuhan na sadol. (Tal. 29:5) Kun kinokomendaran ta an saro pero pinapakaraot pag nakatalikod na, pagsagin-sagin na iyan. Linikayan iyan ni apostol Pablo asin nagpahiling siya nin marahayon na halimbawa sa pagpahiling nin tunay na pagkamuot pag kinokomendaran niya an iba. Halimbawa, sinsero niyang kinomendaran an mga Kristiyano sa Corinto dapit sa pirang aspekto kan saindang paggawi. (1 Cor. 11:2) Pero kan an paggawi ninda bako nang maninigong komendaran, mabuot asin malinaw niyang ipinaliwanag sa sainda an dahilan.—1 Cor. 11:20-22.

12. Paano kita makakapahiling nin tunay na pagkamuot pag iniistimar niyato an iba?

¹² Magin mapag-istimar. Ipinagbuot sa sato ni Jehova na magin matinao sa satong mga tugang. (Basahon an 1 Juan 3:17.) Pero dapat na malinig an satong motibo sa paggibo kaiyan, na dai nin ano man na pagkamakasadiri. Puwede niyatong haputon an satong sadiri: ‘Mga dayupot na amigo, mga tugang na midbid sa kongregasyon, asin mga tawong may ikakabalos sana daw an iniistimar ko? O naghahanap daw ako nin mga paagi na magin bukas-palad sa mga tugang na dai ko gayong kamidbid o dai nin ano man na ikakabalos sako?’ (Luc. 14:12-14) O paano kun may kapagtubod kitang nangaipo huli sa bako niyang marahay na pagplano o dai nagpasalamat sa pag-istimar ta? Sa mga sitwasyon na iyan, dapat niyatong iaplikar an sadol na ini: “Magin mapag-istimar sa lambang saro na daing paggumod-gumod.” (1 Ped. 4:9) Kun susunudon mo an sadol na ini, makakamtan mo an kaugmahan sa pagtao nin may tamang motibo.—Gibo 20:35.

13. (a) Nuarin lalo nang dipisil para sa sato na tabangan an mga maluya? (b) Anong praktikal na mga paagi an magigibo niyato tanganing tabangan an mga maluya?

¹³ Tabangan an mga maluya. An pagigin tunay kan satong pagkamuot puwedeng mabalo kan pagbuot kan Bibliya na “tabangan an mga maluya, magin mapasensiya sa gabos.” (1 Tes. 5:14) Dakul na may maluyang pagtubod an nagigin makusog pag-abot nin panahon, pero may iba man na kaipuhan an satong pagpapasensiya asin padagos na pagtabang. Puwedeng kaiba digdi an pag-istorya sa sainda nin nakakapakusog na mga punto sa Kasuratan, pag-imbitar sa sainda na umiba sa sato sa ministeryo, o dawa an pagtao sana nin panahon para magdangog sa sainda. Dugang pa, imbes na pagparaisipon kun baga “makusog” o “maluya” an sarong tugang, dapat niyatong girumdumon na gabos kita may kanya-kanyang kakusugan asin kaluyahan. Inako dawa ni apostol Pablo na may mga kaluyahan siya. (2 Cor. 12:9, 10) Kaya gabos kita puwedeng makinabang sa tabang hali sa satong mga kapwa Kristiyano.

14. Ano an dapat na andam tang gibuhon tanganing mapagdanay an matuninong na relasyon sa satong mga tugang?

¹⁴ Makipagkatuninungan. Ginigibo niyato an gabos tang makakaya tanganing mapagdanay an matuninong na relasyon sa satong mga tugang, dawa kun sa hiling ta namis-interpretar kita o nagin maraot an pagtrato sa sato. (Basahon an Roma 12:17, 18.) Makakatabang an paghagad nin dispensa para mahali an kulog nin buot, pero dapat na sinsero iyan. Halimbawa, imbes na sabihon na, “Pasensiya na ta arog kaiyan an namati mo,” puwede mong akuon na may parte ka man sa nagin problema paagi sa pagsabing, “Pasensiya na ta nakulgan taka sa sinabi ko.” An katuninungan lalo nang kaipuhan kan mga mag-agom. An sarong mag-agom dai dapat na magsagin-sagin na namumutan an kada saro pag nasa publiko, pero kinukulgan an kada saro pag sinda na sanang duwa, arog kan dai paggirungan, pagtaram nin makulog, o pangungulog sa pisikal.

15. Paano ta maipapahiling na tunay an satong pagpapatawad?

¹⁵ Lubos na magpatawad. Nagpapatawad kita paagi sa pagpatawad sa saro na nakakulog sato asin dai paghinanakit sa saiya. Kun “pinagpapasensiyahan [ta] an lambang saro paagi sa pagkamuot, asin maigot na naghihinguwang mapagdanay an pagkasararong itinatao kan espiritu sa irarom nin katuninungan na nagbubugkos” sa sato, lubos tang mapapatawad pati idtong mga dai nag-aaram na nakakulog sinda sa sato. (Efe. 4:2, 3) Para magin tunay an satong pagpapatawad, dapat na kontrulon niyato an satong kaisipan tanganing dai ta ‘bilangon an mga maraot na ginibo sa sato kan iba.’ (1 Cor. 13:4, 5) Kun matanom kita nin raot nin buot o hinanakit, puwedeng permanenteng maraot kaiyan bako sana an satong relasyon sa mga tugang kundi pati an ki Jehova. (Mat. 6:14, 15) Maipapahiling ta man na sinsero an satong pagpapatawad kun ipinapamibi niyato an mga nagkasala sa satuya.—Luc. 6:27, 28.

16. Paano niyato dapat mansayon an satong mga pribilehiyo sa paglilingkod ki Jehova?

¹⁶ Isakripisyo an personal na mga kapakinabangan. Kun tawan kita nin mga pribilehiyo sa paglilingkod ki Jehova, dapat mansayon niyato na mga oportunidad iyan na maipahiling tang tunay an satong pagkamuot paagi sa ‘paghanap bako kan sadiri niyatong kapakinabangan, kundi kan sa ibang tawo.’ (1 Cor. 10:24) Halimbawa, sa satong mga asembleya asin kumbensiyon, naiinot na sa laog an mga attendant bago pa man magralaog an iba. Imbes na ibilang an saindang asignasyon na oportunidad para makakua nin pinakamarahay na matutukawan para sa sainda asin sa saindang pamilya, pinipili kan kadaklan sa mga brother na ini an bakong gayong magayon na matutukawan sa lugar na iinasignar sa sainda. Paagi sa pagsakripisyo kan saindang personal na kapakinabangan sa bagay na ini, nagpapahiling sinda nin pagkamuot na mayo nin ano man na pagkamakasadiri. Paano mo puwedeng arugon an saindang marahay na halimbawa?

17. An sarong tawo na nakagibo nin magabat na kasalan mapapahiro nin tunay na pagkamuot na gibuhon an ano?

¹⁷ Ituga asin ipundo na an itinatagong mga kasalan. May mga Kristiyano na nakagibo nin magabat na kasalan na pinupurbaran na itago iyan tanganing dai sinda mapasupog o dai madisganar sa sainda an iba. (Tal. 28:13) Pero, bakong mamumuton an paggibo kaini, huling makakaraot ini bako sana sa nagkasala kundi pati man sa iba. Puwede kaining maulang an pagbulos kan banal na espiritu asin maisapeligro an katuninungan kan bilog na kongregasyon. (Efe. 4:30) Mapapahiro nin tunay na pagkamuot an mga Kristiyanong nakagibo nin magabat na mga kasalan na makipag-ulay sa mga elder tanganing makatao an mga ini nin kinakaipuhan na tabang.—Sant. 5:14, 15.

18. Gurano kaimportante an tunay na pagkamuot?

¹⁸ An pagkamuot an pinakanangungurog sa gabos na kuwalidad. (1 Cor. 13:13) Paagi kaiyan, kita namimidbid bilang mga parasunod ni Jesus asin mga paraarog ni Jehova, an Gikanan nin pagkamuot. (Efe. 5:1, 2) Si Pablo nagsabi: “Kun . . . mayo akong pagkamuot, dai akong serbi.” (1 Cor. 13:2) Lugod na padagos niyatong ipahiling an satong pagkamuot bako sanang “paagi sa tataramon” kundi pati man “sa gibo asin katotoohan.”