An Punto-de-Vista kan Biblia

Homoseksuwalidad—Taano ta Dai?

“Sa paghona ko sana an Dios dai man na gayo nakikiaram sa seksuwal na hilig nin saro. An pinakikiaraman nia iyo an satong pamumuhay. Asin an sekso bakong iyo an mahalaga.”—Miembro nin sarong homoseksuwal na grupo sa pag-adal sa Biblia.

AN NAGDADAKOL na tawo inaako an homoseksuwalidad bilang saro sanang ibang estilo nin buhay. Minaoyon daw an Dios?

Mantang an dakol liniwat an saindang punto-de-vista asin an iba man dai makapagdesisyon, an punto-de-vista kan Biblia malinaw nanggad: “Dai ka makidorog sa lalaki siring sa pakikidorog mo sa babae. Ini makababaldeng bagay,” sabi kan Biblia. (Levitico 18:22, The New Jerusalem Bible) Mayo nin mga paghagad nin dispensasyon, mayo nin mga pagtaong konsiderasyon, mayo nin kalibogan—an homoseksuwalidada makababalde sa pagheling nin Dios. Para sa suanoy na mga Israelitas na nabubuhay sakop kan Mosaikong Pagboot, an penalidad kagadanan. (Levitico 20:13) Asin sa pagpoon nin Kristianismo, nagpadagos an pagkondenar nin Dios sa homoseksuwalidad.—1 Corinto 6:9, 10.

Tumang an Dios—Taano?

Alagad taano an Dios ta tumang na gayo dian? An sarong dahelan sinasabi sa Isaias 48:17: “Ako, si Jehova, an saimong Dios, an Saro na nagtotokdo saimo na pakinabangon an saimong sadiri, an Saro na nagpapangyari saimo na maglakaw sa dalan na maninigo mong lakawan.” An mga tataramon na iyan hale sa Autor kan unibersal na mga ley nin naturalesa. Aram nia an satong pisikal, mental, emosyonal, asin espirituwal na kamugtakan. Tumang sia sa homoseksuwalidad ta, kabilang sa ibang bagay, iyan dai nagtatao nin pakinabang sa indibiduwal. Ini pinatutunayan kan pagrepaso sa surat ni apostol Pablo sa mga Kristiano na nag-iistar sa Roma. Sia nagsurat:

“Kaya pinabayaan sinda nin Dios sa makasosopog na seksuwal na mga horot, huli ta rinibayan kan saindang mga babae an natural nindang kagamitan nin bakong natural na kagamitan; asin siring man an mga lalaki nagbaya sa natural na kagamitan kan babae asin nagin malaad sa saindang horot sa lambang saro, lalaki sa lalaki, na naggigibo nin bastos asin nag-aako sa sainda man sana kan bilog na kabayadan, na maninigo para sa saindang kasalan. Asin kun paanong sinda dai nag-oyon na akoon an Dios sa tamang kaaraman, pinabayaan sinda nin Dios sa kaisipan na dai inooyonan, tanganing gumibo kan mga bagay na bakong maninigo.”—Roma 1:26-28.

Mangnoha, an homoseksuwalidad bako sanang inaapod na “makasosopog,” “bastos,” asin “bakong maninigo” kundi siring man “bakong natural.” Manongod sa mga bersikulong ini, an sarong report hale sa Iglesya nin Inglaterra nagsasabi: “An boot sabihon ni Pablo sa ‘bakong natural’ ‘bakong natural’ sa katawohan sa pagkalalang nin Dios. An gabos na homoseksuwal na gibo pagsiblag sa pagkalalang nin Dios.” An antropologong si Weston LaBarre inapod iyan na “pagkabigo kan kaipuhan na biolohikong naturalesa nin saro asin nin iba.” Ini oyon sa kahulogan kan termino sa Griego na ginamit sa Biblia asin isinalin na “natural” o, “sono sa naturalesa.”

Bakong makangangalas na ano man na “pagsiblag sa pagkalalang nin Dios” nag-aani nin maraot na mga resulta (arog kan ipinaheheling kan miserableng rekord nin tawo sa palibot). An mga homoseksuwal “nag-aako sa sainda man sana kan bilog na kabayadan, na maninigo para sa saindang kasalan.” Sa ibang pagtaram, an buhay ninda nagigin buhay nin bakong natural na seksuwal na pagrayo sa tamang dalan; kun siring, buhay na mayo kan pag-oyon nin Dios. Dugang pa, tibaad sinda madanyaran sa pisikal huli sa saindang salang paggamit sa sekso.b

Maraot na Bunga

Si Pablo nagsasabi man na an mga homoseksuwal magigin “malaad [sa literal, masosolo] sa saindang horot sa lambang saro.” Mantang an salang kaisipan puwedeng magpalaad sa salang mga horot minsan sa relasyon nin lalaki asin babae, minalataw na sa pag-antisipar sa bikong seksuwal na pagdodorog, an daing kontrol na horot mas malaad pa. “A Perilous Double Love Life,” sarong artikulo na ipinublikar sa magasin na Newsweek, nagsabi: “An mga lalaki asin babae na nakikidorog kapwa sa kasekso asin sa bakong kasekso parateng nagtataram manongod sa ‘makosogon’ na pagkapukaw kan saindang boot, sa ‘laen na enerhiya’ na naeeksperyensiahan ninda sa saindang kasekso. Nagigirumdoman iyan ni James na ‘garo sky diving. Idto nakabuburat, garo pagkaburat sa droga.’” Huling naglalaad an horot, an dakol na homoseksuwal kadakol kan kapadis (an iba may ginatos), asin para sa iba an horot ninda nagtutulod sainda na makidorog nin dakol na beses sa sarong aldaw, pati sa mga dai kamidbid. An pakikidorog na ini minsan kiisay bako sanang nagbubunga nin nakaoolakit na mga helang, arog baga kan hepatitis, kundi nagpapaorog sa pag-imon, kadaihan nin katiwasayan, asin kamondoan, arog kan ibinubunga kaiyan sa pakikidorog minsan kiisay nin lalaki sa babae.

Oras na an saro padara sa “maaraon na horot sa sekso,” puwede siang maoripon. (1 Tesalonica 4:5) Sagkod sa anong punto? Mapadapit sa AIDS, an sarong homoseksuwal nag-admitir: “Minsan napapaatubang sa miserable, makatatakot na kagadanan, an horot sa sekso makosog na horot.” Ipinagigirumdom kaini an patanid sa Biblia: “Dai nindo togotan an kasalan na padagos na maghade sa saindong hawak na magagadanon tangani na kuyogon nindo an mga horot kaiyan.”—Roma 6:12.

Mantang an seksuwal na inmoralidad sa kadaklan basado sa pagpanigo sa sadiri, iyan parateng nagdadara sa mas marigsok na mga gibo. Asin huli sa pagigin makasalan nin tawo, oras na an sarong gibo ordinaryo na sana, minaluya na an siram na itinatao kaiyan. Kaya, an ibang homoseksuwal naholog na sa sadomasochism asin iba pang marigsok na mga gibo.c An sarong komentaryo sa Biblia nagsasabi na “an epekto nin siring na marigsok asin bakong natural na mga horot . . . may tendensia na pababaon an isip; darahon an tawo sa grado na mas hababa sa hayop; raoton an pagmate.” An homoseksuwalidad ibinilang nin sarong iskolar sa Biblia sa “mga krimen, na biyong dai oyon sa rason, naturalesa, asin sa kapakanan kan sadiri ninda asin kan lambang saro.”

An mga Pamantayan kan Biblia Nagtatao nin Katoninongan

Makapagpapasalamat kita na dai liniliwat nin Dios an saiyang mga pamantayan tangani sanang panigoan an temporaryong mga hilig o maraot na mga horot nin tawo. Kun paanong dai nia inooyonan an pag-ati sa daga o an pagputik huli sana ta mas dakol na tawo an gustong gumibo kaiyan, dai man nia kinokonsinte an homoseksuwalidad minsan pa iyan maigot na sinusuportaran nin dakol. Ano man na dalan an pinalalakop nin tawo, boot ni Jehova na kita gumalang sa saiya asin pakinabangon an satong sadiri.

Salamat sana, an iba isinikwal an siring na mga gibo asin iinoyon an saindang buhay sa “marahay na katokdoan” na yaon sa Tataramon nin Dios. (1 Timoteo 1:10; 1 Corinto 6:9-11) Arog kan sabi nin sarong dating homoseksuwal: “An nagtatao sako nin kaogmahan iyo na ngonyan ako may malinig nang konsensia, asin aram ko na an sakong pamumuhay ikinaoogma kan Makakamhan sa gabos na Dios.”

[Mga Nota sa Ibaba]