“Dai Kamo Magbalos”

15. Ano an dahelan sa dai pagbalos na yaon sa Roma 12:19?

¹⁵ Si Pablo nagtatao nin saro pang mapuersang dahelan kun taano ta dai kita maninigong bumalos; iyan an mapakumbaba na gibohon. Sinabi nia: “Dai kamo magbalos, mga namomotan, kundi magtao nin lugar sa grabeng kaanggotan; huli ta nasusurat: ‘Sako an pagbalos; ako an mabalos, sabi ni Jehova.’” (Roma 12:19) Pangahas an sarong Kristiano na nagmamaigot na makabalos. Hinihingako nia an sarong katongdan na para sa Dios. (Mateo 7:1) Dugang pa, kun sia mismo an mabalos, ipinapaheling nia an kawaran nin pagtubod sa pag-asegurar ni Jehova: “Ako an mabalos.” Sa kabaliktaran, nagtitiwala an tunay na mga Kristiano na “papangyayarihon [ni Jehova] na magibo an hustisya para sa saiyang mga pinili.” (Lucas 18:7, 8; 2 Tesalonica 1:6-8) Mapakumbaba nindang ipinapabaya sa kamot nin Dios an pagbalos sa sala.—Jeremias 30:23, 24; Roma 1:18.

18. Taano ta tama, mamomoton, asin mapakumbaba an dai pagbalos?

¹⁸ Sa halipot na pag-orolay na ini kan Roma kapitulo 12, naheling niato an nagkapirang mahalagang dahelan kun taano ta ‘dai kita minabalos nin maraot sa maraot sa kiisay man.’ Enot, an pagpugol na bumalos iyo an tama na gibohon. Huli sa pagmalasakit na ipinaheling nin Dios sa sato, tama asin rasonable na idolot niato an satong sadiri ki Jehova asin gikan sa boot na kuyogon an saiyang mga togon—kaiba an pagboot na mamotan an satong mga kaiwal. Ikaduwa, an pagsayumang bumalos nin maraot sa maraot iyo an mamomoton na gibohon. Paagi sa dai pagbalos asin sa pakipagkatoninongan, may pagkamoot na linalaoman niato na matabangan dawa an nagkapirang maringis na paratumang na magin mga parasamba ki Jehova. Ikatolo, an pagpugol na bumalos nin maraot iyo an mapakumbaba na gibohon. An pagbalos niato magigin kapangahasan, huli ta si Jehova nagsabi: “Sako an pagbalos.” An Tataramon nin Dios nagpapatanid man: “Nag-abot daw an kapangahasan? Kun siring maabot man an kadaihan nin onra; alagad an kadonongan yaon sa mga hababa an boot.” (Talinhaga 11:2) An madonong na pagpabaya sa kamot nin Dios kan pagbalos sa sala nagpapaheling nin kapakumbabaan niato.