Panggana Laban sa Karatan

“TAANO ta minamaldisyon kan gadan na ayam na ini an kagurangnan kong hade? Pabayae tabi akong magduman asin pugoton an saiyang payo.” Hale ki Abisai an kahagadan na ini, sarong Israelitang namomoon sa hukbo. Iyan an saiyang anggot na reaksion kan madangog nia na an saiyang kagurangnan, si Hadeng David, may pagkaongis na iniinsulto nin sarong Benjamita na an ngaran Simai.—2 Samuel 16:5-9.

Napadadara si Abisai sa sarong pilosopiya na komun na sinusunod ngonyan—an prinsipyo nin pagbalos nin kalayo sa kalayo. Iyo, gusto ni Abisai na papagdusahon si Simai huli sa mga pan-iinsulto nia ki David.

Pero ano an reaksion ni David? Pinogolan ni David si Abisai, na sinasabi: “Pabayae sia.” Minsan ngani inosente sa mga sahot ni Simai, mapakumbabang linabanan ni David an sugot na magbalos. Imbes, ipinabaya nia iyan sa kamot ni Jehova.—2 Samuel 16:10-13.

Kan si David bumalik sa trono pakatapos na dumulag sa dai nagin mapangganang rebelyon kan saiyang aking lalaki, kabilang sa mga enot na nagtaratara sa saiya asin naghagad nin tawad iyo si Simai. Sa giraray, gusto siang gadanon ni Abisai, alagad sa giraray dai iyan tinogotan ni David.—2 Samuel 19:15-23.

Sa pangyayaring ini, si David nagin angay na ladawan ni Jesu-Cristo, na dapit sa saiya si apostol Pedro nagsurat: “Kan sia pinagmumuda, dai sia nagbalos na magmuda . . . kundi padagos na ipinagkatiwala an saiyang sadiri sa saro na naghohokom nin matanos.”—1 Pedro 2:23.

Ngonyan, an mga Kristiano sinasadol na magin “mapakumbaba sa isip, na dai nagbabalos nin maraot sa maraot.” (1 Pedro 3:8, 9) Paagi sa pagsunod sa dalan na itinao ni David asin ni Jesu-Cristo, puede ta man na “padagos na daogon an karatan nin karahayan.”—Roma 12:17-21.