Mga Hapot Hale sa mga Parabasa

◼ Nagtubod daw an enot na siglong mga Kristiano na an katapusan kan marumpot na sistema maabot sa kapanahonan ninda?

An mga parasunod ni Jesus kan enot na siglo mawot na gayong mag-abot na an katapusan. Siring sa maheheling niato, an nagkapira sainda naghonang harani na an katapusan, na maabot tolos-tolos. Nangaipong ikorehir an saindang punto-de-vista. Alagad bako nanggad maraot para sa mga Kristiano, kaidto asin ngonyan, na sinserong magtubod na an ihinulang katapusan maninigong isipon na harani na asin mamuhay aroaldaw na nakaaaram kaiyan.

Sa pagsimbag sa hapot kan saiyang mga disipulo manongod sa “an tanda” kan saiyang presensia, pinatanidan sinda ni Jesus: “Kaya magpuka kamo, huli ta dai nindo aram kun sa anong aldaw madatong an saindong Kagurangnan.” (Mateo 24:3, 42) An siring na pagigin alisto maninigong makaapektar sa saindang paghiro, huli ta idinugang ni Cristo: “Mag-ingat kamo sa saindo man sana na an saindong mga puso dai manganaan nin kapasloan asin nin kaburatan asin mga paghadit sa buhay, asin sa panale an aldaw na iyan mag-abot sa saindo . . . Kaya magpuka kamo, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari, asin sa pagtindog sa atubang kan Aki nin tawo.”—Lucas 21:34-36.

Mangnohon na itinao ni Jesus an sadol na ini pakatapos sanang sambiton an mga pangyayari na minakompuwesto kan “an tanda.” Kaya pinatanidan an mga apostol manongod sa katunayan na an nagkapirang bagay makasaysayan na mangyayari bago an katapusan. Minsan siring, pirang semana pakatapos, hinapot ninda an binuhay liwat na si Jesus: “Kagurangnan, ibabalik mo ngonyan an kahadean sa Israel?” Nagsimbag sia: “Mayo sa saindo an pakaaram kan mga aldaw o panahon na ibinugtak nin Ama sa saiyang sadiring kapangyarihan.”—Gibo 1:6, 7.

Maheheling niato digdi na an pinakadayupot na mga parasunod ni Jesus maigot na naghahalat na an katapusan mag-abot tolos-tolos kaya nalingawan ninda na dai pa nahaloy sinabihan nia sinda manongod sa pisikal na mga patotoo na maninigong mangyari durante kan saiyang presensia bago an katapusan na iyan.

Manonompongan niato an saro pang patotoo kan saindang pagigin galaga sa mga surat ni apostol Pablo sa mga Kristiano sa Tesalonica. Mga 50 C.E. kan isurat nia: “Kun dapit sa mga panahon asin mga kapanahonan, mga tugang, dai na kamo nangangaipo na suratan pa nin ano man. Huli ta kamo man sana nakaaaram na gayo na an aldaw ni Jehova madatong na kabaing na gayo nin parahabon kun banggi. Kaya dai kita magkatorog arog kan ginigibo kan iba, kundi magpuka kita asin papagdanayon niato an toltol na pag-iisip.” (1 Tesalonica 5:1, 2, 6) An nagkapira kaidtong linahidan nin espiritung mga Kristiano nagpamugtak na nangahulogan iyan na an presensia ni Jesus (sa aldaw ni Jehova para sa paglaglag sa mga marumpot) maabot kaidto mismo, tolos-tolos.

Alagad bakong siring. Sa katunayan, sinuratan sinda ni Pablo sa ikaduwang surat: “Mapadapit sa presensia kan satong Kagurangnan na Jesu-Cristo asin sa pagtipon sa sato sa kaiba nia, pinakikiolayan niamo kamo na dai tolos kamo matanyog sa saindong pangangatanosan ni maribaraw baga man paagi sa ipinasabong na tataramon o paagi sa berbal na mensahe o paagi sa surat na garo baga hale sa samo, na nagsasabi na an aldaw ni Jehova, uya na. Dai kamo magpadaya sa kiisay man sa ano man na paagi, huli ta iyan dai maabot kun dai nguna mangyari an apostasiya asin mahayag an tawo nin katampalasanan.”—2 Tesalonica 2:1-3.

Dai ini nangangahulogan na puwede na sindang dai gayong mahadit manongod sa presensia ni Jesus asin sa katapusan kan sistema. Sa lambang minaaging taon, an patanid ni Jesus nagin orog na nakatataros sa puso: “Kaya magpuka kamo, huli ta dai nindo aram kun sa anong aldaw madatong an saindong Kagurangnan.”

Kaya, mga limang taon pakatapos isurat an Ikaduwang Tesalonica, nagsurat si Pablo: “Oras na para sa saindo na magmata sa pagkatorog, huli ta ngonyan an satong kaligtasan orog na harani ki sa kan kita magturubod. An banggi makakaagi na; an aldaw naghaharani na. Kaya isikwal na niato an mga gibo kan kadikloman asin isolog na niato an mga pangalasag kan kaliwanagan.” (Roma 13:11, 12) Pakalihis nin lima pang taon, sinadol ni Pablo an Hebreong mga Kristiano: “Kaipuhan nindo an pakatagal, tanganing, pakatapos na magibo nindo an kabotan nin Dios, maako man nindo an kaotoban kan panuga. Huli ta ‘sa kadikit pang panahon,’ asin ‘an nagdadangadang madatong asin dai mag-aabala.’ ” (Hebreo 10:36, 37) Dangan, sa ikaduwa sa ultimong bersikulo kan Kapahayagan, si apostol Juan nagsurat: “An nagpapatotoo sa mga bagay na ini nagsabi, ‘Iyo; ako madatong sa madali.’ Amen! Madia, Kagurangnan na Jesus.”—Kapahayagan 22:20.

Mayong duwa-duwa, an sarong Kristiano kaidto dai nagigin bakong rasonable na makamateng an katapusan puwedeng mag-abot sa saiyang kapanahonan. Asin kun paagi sa aksidente o natural na mga paagi, magadan sia bago an katapusan, nakapamuhay sia na igwa nin tamang kaisipan nin kasibotan na pinatalubo ni Jesus asin kan ipinasabong na Kasuratan.

Ini gabos orog na aplikado sa sato, sa huring panahon na kinabubuhayan niato. Sa pagpapakahulogan kan mga tataramon ni Pablo, dai niato mapaiindahan na ‘ngonyan an satong kaligtasan mas harani kisa sa panahon kan an enot na mga Kristiano nagturubod asin minsan kan kita nagturubod. An banggi nakaagi na; an aldaw tunay nanggad na naghaharani na.’

Naheling niato sa kasaysayan na magpoon kan Guerra Mundial I paorog nang paorog an pisikal na ebidensia, ebidensia na nagpapatotoo na uya na kita sa katapusan kan sistema nin mga bagay. Imbes na magin okupado sa pagkarkulo kun noarin maabot an katapusan, maninigo kitang magin okupado sa paghuhulit kan maogmang bareta, na puwedeng magligtas kan satong buhay asin sa buhay nin kadakol pang iba.—1 Timoteo 4:16.

Igwa kita nin igong rason na laoman na an paghuhulit na ini matatapos sa satong panahon. Nangangahulogan daw iyan na bago an katapusan kan bagong bulan, bagong taon, bagong dekada, bagong siglo? Mayong tawong nakakaaram, huli ta sinabi ni Jesus na ‘ni an mga anghel kan kalangitan’ dai nakakaaram kaiyan. (Mateo 24:36) Dugang pa, dai niato kaipuhan na maaraman, mantang padagos niatong ginigibo an ipinagboot kan Kagurangnan na magkonsentrar kitang gibohon. An pinakamahalaga iyo na an kabotan asin gibohon nin Dios maotob asin kita magkaigwa nin pinakalubos na kabtang dian. Kaya kita “puwedeng magin mapanggana sa pagdulag sa gabos na ining bagay na nakatalagang mangyari, asin sa pagtindog sa atubang kan Aki nin tawo.”—Lucas 21:36.