Mga Tawo na “May mga Pakamate na Arog kan sa Sato”
SIA sarong hade asin propeta alagad saro man na mamomoton na ama. An saro sa saiyang mga aking lalaki nagdakulang mapalangkaw asin arogante. Sa sarong determinadong pagprobar na agawon an trono, an aking lalaking ini naglansar nin sarong guerra sibil, na desididong gadanon an saiyang ama. Alagad sa ralaban na suminunod, an aking lalaki an nagadan. Kan maaraman kan ama an pagkagadan kan saiyang aki, sia solong suminakat sa sarong kuarto sa atop asin huminibi: “Aki kong Absalon, aki ko, aki kong Absalon! O manong ako kutana an nagadan, ako mismo, imbes na ika, aki kong Absalon, aki ko!” (2 Samuel 18:33) An ama iyo si Hadeng David. Arog kan ibang mga propeta ni Jehova, sia “sarong tawo na may mga pakamate na arog kan sa sato.”—Santiago 5:17.
Kaidtong mga panahon kan Biblia an mga lalaki asin babae na nagtataram para ki Jehova hale sa manlaenlaen na klase nin pamumuhay asin naheheling sa pan-aroaldaw na mga kamugtakan. Arog sa sato, igwa sinda nin mga problema asin nagdudusa huli sa mga pagkabakong sangkap. Sairisay an nagkapira sa mga propetang ini, asin paanong an saindang mga pakamate arog kan sa sato?
Si Moises Hale sa Pagigin Sobra Kakompiado Pasiring sa Kahoyoan
An sarong prominenteng propeta kan mga panahon bago kan mga Kristiano iyo si Moises. Minsan siring, dawa 40 anyos na, dai pa sia andam na maglingkod bilang parataram ni Jehova. Taano? Mantang an saiyang mga tugang inaapi ni Faraon kan Egipto, si Moises pinadakula sa harong ni Faraon asin “makapangyarihan sa saiyang mga tataramon asin gibo.” An rekord nagsasabi sa sato: “Sia naghohona na an saiyang mga tugang makasasabot na an Dios nagtatao sa sainda nin kaligtasan paagi sa saiyang kamot.” Huling sobra kakompiado, sia may pagkaagresibong huminiro tanganing sorogon an sarong oripon na Hebreo, na ginadan an sarong Egipcio.—Gibo 7:22-25; Exodo 2:11-14.
Ngonyan si Moises napiritan na dumulag, asin ginamit nia an sumunod na apat na dekada bilang pastor sa harayong lugar nin Midian. (Exodo 2:15) Sa katapusan kan panahon na iyan, si Moises, na ngonyan 80 anyos na, sinugo ni Jehova bilang propeta. Alagad si Moises bako nang sobra kakompiado. Sa pagmate nia sia biyong dai kualipikado kaya kinustion nia an pagsugo sa saiya ni Jehova bilang propeta, na naggagamit nin mga pananaram na siring baga kan, “Siisay man ako na ako maninigong magduman ki Faraon?” asin, “Ano an sasabihon ko?” (Exodo 3:11, 13) Paagi sa mamomoton na pagpasarig sa boot asin pagtabang ni Jehova, si Moises nagpadagos sa paggibo kan saiyang asignasyon na may dakulang kapangganahan.
Siring ki Moises, tinogotan na daw nindo an sobrang kompiansa sa sadiri na itulod kamong gibohon o sabihon an mga bagay na bakong madonong? Kun iyo, mapakumbabang akoon an dugang pang pagpapatood. O nakamate na daw kamo na dai kamo kualipikadong gibohon an nagkapirang Kristianong paninimbagan? Imbes na magsayuma, akoon an iinaalok na tabang ni Jehova asin kan saiyang organisasyon. An Saro na nagtabang ki Moises puede man na magtabang sa saindo.
Si Elias Igwang mga Pakamate na Arog kan sa Sato kun Nagdidisiplina
“Si Elias sarong tawo na may mga pakamate na arog kan sa sato, alagad ta sa pamibi hinagad nia na dai umoran; asin dai uminoran sa ibabaw kan daga sa laog nin tolong taon asin anom na bulan.” (Santiago 5:17) An pamibi ni Elias kaoyon sa kabotan ni Jehova na disiplinahon an sarong nasyon na tuminalikod sa Saiya. Alagad ta aram ni Elias na an tigmara na ipinapamibi nia magdadara nin pagsakit sa mga tawo. An Israel sa kadaklan agrikultural; an pagbuhay kan mga tawo minadepende sa ambon asin oran. An padagos na tigmara magdadara nin grabeng pagtios. An mga pananom maaalang; daing aanihon. An mga hayop na ginagamit para sa pagtatrabaho asin kakanon magkakagaradan, asin an nagkapirang pamilya namemeligrong magutom. Siisay an madusa nin grabe? An ordinaryong mga tawo. An sarong balo suminabi ki Elias kan huri na an natatada na sana sa saiya sarong gugom na harina asin kadikit na lana. Sia nakaseseguro na dai mahahaloy sia asin an saiyang aking lalaki magagadan sa gutom. (1 Hade 17:12) Tanganing makapamibi si Elias siring sa ginibo nia, sia kaipuhan na igwa nin masarig na pagtubod na aatamanon ni Jehova an Saiyang mga lingkod—mayaman o dukha—na dai tuminalikod sa tunay na pagsamba. Siring sa ipinaheheling kan rekord, dai nasudya an linalaoman ni Elias.—1 Hade 17:13-16; 18:3-5.
Pakalihis nin tolong taon, kan sinabi ni Jehova na madali na siang magpaoran, an odok na kamawotan ni Elias na maheling na matapos an tigmara maririsa sa saiyang paorootro, seryosong marhay na mga pamibi mantang sia ‘naglulukob sa daga patin ibinubugtak an saiyang lalauogon sa pag-oltanan kan saiyang mga tuhod.’ (1 Hade 18:42) Paorootro niang sinadol an saiyang katabang: “Sumakat ka, tabi. Humeling ka sa dagat” para sa sarong tanda na dinangog ni Jehova an saiyang mga pamibi. (1 Hade 18:43) Kanigoan na kagayagayahan an siertong namatean nia kan sa katapustapusi, bilang simbag sa saiyang mga pamibi, “an langit tuminao nin oran asin an daga puminaluwas kan bunga kaiyan”!—Santiago 5:18.
Kun kamo sarong magurang o magurang sa Kristianong kongregasyon, tibaad kaipuhan nindong labanan an hararom na mga pakamate kun nagtatao nin pagtatanos. Minsan siring, an siring na sa tawong mga emosyon kaipuhan na timbangan kan kombiksion na an disiplina kinakaipuhan kun beses asin na kun iyan itinatao na may pagkamoot, iyan “nagbubunga nin matoninong na bunga, arin na baga, an katanosan.” (Hebreo 12:11) An bunga kan pagsunod sa mga ley ni Jehova pirmeng kawiliwili. Arog ki Elias, kita namimibi nin odok sa puso na iyan logod magibo.
Si Jeremias Nagpaheling nin Kapusoan sa Ibong nin Pagkadesganar
Sa gabos na kagsurat kan Biblia, tibaad si Jeremias an saro na pinakadakol an isinurat manongod sa saiyang personal na mga pakamate. Mantang hoben pa, sia nagduwaduwang akoon an sugo sa saiya. (Jeremias 1:6) Minsan siring mapusong marhay na ibinalangibog nia an tataramon nin Dios, pero napaatubang sia sa maringis na pagtumang kan mga kapwa Israelita—magpoon sa hade sagkod sa ordinaryong mga tawo. An pagtumang na iyan kun beses nagin dahelan kan saiyang kaanggotan asin mga pagluha. (Jeremias 9:3; 18:20-23; 20:7-18) Sa manlaenlaen na okasyon sia pinagsururogan, hinampak, itinakod sa pandog, ikinarsel, hinumang gadanon, asin binayaan tanganing magadan sa laboy sa irarom kan mayong tubig na bobon. Kun beses dawa an mensahe ni Jehova nakapupurisaw, siring sa iiniilustrar kan saiyang mga tataramon: “O an mga bituka ko, an mga bituka ko! Ako nasa grabeng kakologan sa mga patos kan sakong puso.”—Jeremias 4:19.
Sa ibong kaiyan, namomotan nia an tataramon ni Jehova, na nagsasabi: “An saimong tataramon nagin para sa sako kaogmahan asin kagayagayahan kan sakong puso.” (Jeremias 15:16) Kadungan kaiyan, sa pagkadesganar nag-agrangay sia ki Jehova: “Para sa sako ika nagin nanggad siring sa madaya, siring sa katubigan na dai mapagtitiwalaan,” arog sa sarong sapa na madaling maalang. (Jeremias 15:18) Minsan siring, naintindihan ni Jehova an saiyang magkakontrang mga pakamate asin padagos na sinuportaran sia tanganing magibo nia an isinugo sa saiya.—Jeremias 15:20; helingon man an 20:7-9.
Siring ki Jeremias, kamo daw napapaatubang sa pagkadesganar o pagtumang sa paggibo kan saindong ministeryo? Maglaom ki Jehova. Padagos na magsunod sa saiyang paggiya, asin babalosan man ni Jehova an saindong mga paghihingoa.
Si Jesus May mga Pakamate na Arog kan sa Sato
An pinakadakulang propeta sa gabos na panahon iyo an mismong Aki nin Dios, si Jesu-Cristo. Minsan ngani sia sarong sangkap na tawo, dai nia pinogolan an saiyang emosyon. Parate niatong nababasa an manongod sa saiyang panlaog na pakamate, na siertong naheheling sa saiyang lalauogon asin sa saiyang reaksion sa iba. Si Jesus sa parate “napahiro nin pagkaherak,” asin ginamit nia an kaparehong frase sa paglaladawan sa mga personahe sa saiyang mga ilustrasyon.—Marcos 1:41; 6:34; Lucas 10:33.
Seguradong naglangkaw an boses nia kan pahaleon nia an mga negosyante asin hayop sa templo paagi sa mga tataramon na: “Halea nindo digdi an mga bagay na ini!” (Juan 2:14-16) An suhestion ni Pedro na, “Maherak ka sa saimong sadiri, Kagurangnan,” nagin dahelan nin mapuersang simbag na, “Padian ka sa hudian ko, Satanas!”—Mateo 16:22, 23.
Si Jesus igwa nin espesyal na kapadangatan para sa nagkapira na espesyalmenteng dayupot sa saiya. Si apostol Juan ilinadawan bilang an “disipulo na namotan ni Jesus.” (Juan 21:7, 20) Asin mababasa niato: “Ngonyan namomotan ni Jesus si Marta asin an saiyang tugang patin si Lazaro.”—Juan 11:5.
Si Jesus puede man na makologan an boot. Namamatean an mamondong pangyayari sa pagkagadan ni Lazaro, “si Jesus naghibi.” (Juan 11:32-36) Ipinaririsa an kakologan sa puso huli sa pagpasaloib sa saiya ni Judas Iscariote, si Jesus nagkotar nin sarong nakatataros sa pusong pananaram hale sa Salmo: “Sia na dating nagkakakan kan sakong tinapay nag-iitaas kan saiyang bool tumang sa sako.”—Juan 13:18; Salmo 41:9.
Dawa kan nag-aagi nin makuring kolog sa hariging pasakitan, ipinaheling ni Jesus an saiyang hararom na pakamate. Mamomoton na ipinagkatiwala nia an saiyang ina sa “disipulo na namomotan nia.” (Juan 19:26, 27) Kan maheling nia an prueba nin pagsolsol kan saro sa mga paragibo nin maraot na napapako sa kataed nia, madinamayon na nagsabi si Jesus: “Ika makakaibahan ko sa Paraiso.” (Lucas 23:43) Mamamatean ta an grabeng emosyon sa saiyang kagsing: “Dios ko, Dios ko, tadaw ta pinabayaan mo ako?” (Mateo 27:46) Asin an saiyang mga tataramon kan naghihingagdan na sia nagpapaheling nin odok sa pusong pagkamoot asin pagtitiwala: “Ama, sa saimong mga kamot ipinagkakatiwala ko an sakong espiritu.”—Lucas 23:46.
Kanigoan na pag-asegurar an itinatao sa sato kan gabos na ini! “Huli ta an satong halangkaw na saserdote, bakong saro na dai makakapakidamay sa satong mga kaluyahan, kundi saro [si Jesus] na nabalo na sa gabos na bagay arog sa sato, alagad dai nin kasalan.”—Hebreo 4:15.
An Pagkompiar ni Jehova
Nungkang pinagbasolan ni Jehova an pinili niang mga parataram. Aram nia an saindang kaimbodan sa saiya, asin may pagkamadinamayon na pinalihis nia an mga kaluyahan kan mga bakong sangkap. Pero linaoman nia na ootobon ninda an isinugo sa sainda. Sa tabang nia nakaya nindang gibohon iyan.
Mapasensia tang ipaheling an kompiansa sa satong maimbod na mga tugang na lalaki asin babae. Sinda magigin pirmeng bakong sangkap sa palakaw na ini nin mga bagay, arog ta man. Pero, maninigo na nungka niatong husgaran an satong mga tugang bilang dai maninigo sa satong pagkamoot asin atension. Si Pablo nagsurat: “Kaya, kitang mga makosog maninigong magpasan kan mga kaluyahan kaidtong mga bakong makosog, asin bakong magpaoyon sa sato man sana.”—Roma 15:1; Colosas 3:13, 14.
Naeksperyensiahan kan mga propeta ni Jehova an gabos na emosyon na naeeksperyensiahan ta. Minsan siring, sinda nagsarig ki Jehova, asin si Jehova nagsustenir sa sainda. Labi pa dian, si Jehova nagtao sainda nin mga rason para sa kagayagayahan—marahay na konsensia, pagkamit kan saiyang pabor, maimbod na mga kaibaiba na nagsustenir sa sainda, asin an garantiya nin sarong maogmang ngapit. (Hebreo 12:1-3) Mangapot man kita ki Jehova na igwa nin bilog na pagsarig mantang inaarog niato an pagtubod kan mga propeta kan suanoy, mga tawo na “may mga pakamate na arog kan sa sato.”