• Kun Paano Makakagibo nin Marahay na mga Desisyon
    Mabuhay nin Maugma Sagkod Pa Man!—Interactive na Pag-adal sa Bibliya

    • 5. Irespeto an konsiyensiya kan iba

      An desisyon ta tibaad iba sa desisyon kan iba. Paano ta maipapahiling na rinerespeto ta an konsiyensiya kan iba? Pag-isipan an duwang sitwasyon:

      Sitwasyon 1: Sarong sister na mahilig mag-makeup an nagbalyo sa sarong kongregasyon na dakul na sister an negatibo kun manungod sa paggamit nin makeup.

      Basahon an Roma 15:1 asin 1 Corinto 10:23, 24, dangan pag-ulayan an mga hapot na ini:

      • Base sa mga tekstong iyan, ano an tibaad magin desisyon kan sister? Ano an gigibuhon mo kun may kaiba ka na habong gibuhon an sarong bagay dahil dai iyan kaya kan konsiyensiya niya pero okey lang iyan sa konsiyensiya mo?

      Sitwasyon 2: Aram nin sarong brother na dai ipinagbabawal kan Bibliya an tama sanang pag-inom nin arak, pero nagdesisyon siya na dai mag-inom nin ano man na arak. Naimbitaran siya sa sarong gathering na diyan nahiling niya na may mga brother na nag-iinom nin arak.

      Basahon an Eclesiastes 7:16 asin Roma 14:1, 10, dangan pag-ulayan an mga hapot na ini:

      • Base sa mga tekstong iyan, ano an tibaad magin desisyon kan brother? Ano an gigibuhon mo pag may nahiling kang naggigibo nin sarong bagay dahil okey lang iyan sa konsiyensiya niya pero dai iyan kaya kan konsiyensiya mo?

      Ano an mga dapat gibuhon para makagibo nin marahay na mga desisyon?

      Sarong babayi na namimibi.

      1. Mamibi ki Jehova na tabangan kang makapagdesisyon.—Santiago 1:5.

      Nagre-research siya gamit an Bibliya, mga publikasyon na basado sa Bibliya, saka kompyuter.

      2. Mag-research sa Bibliya saka sa mga babasahon na basado sa Bibliya para maaraman an mga prinsipyo na makakatabang. Puwede ka man maghapot sa eksperyensiyadong mga Kristiyano.

      An iyo man sanang babayi na nag-iisip-isip.

      3. Pag-isipan an puwedeng magin epekto sa konsiyensiya mo asin sa konsiyensiya kan iba kan desisyon na gigibuhon mo.

  • Taano ta Mahalagang Pag-isipan an Satong Pagbado Asin Itsura?
    Mabuhay nin Maugma Sagkod Pa Man!—Interactive na Pag-adal sa Bibliya

    • May kanya-kanya kitang gusto pag-abot sa pagbado asin pag-ayos sa sadiri. Kun susunudon ta an nagkapirang simpleng mga prinsipyo sa Bibliya, dai lang kita makakapili nin gusto tang isulot kundi mapapaugma ta man si Jehova. Pag-ulayan ta an pira sa mga prinsipyong iyan.

      1. Anong mga prinsipyo an makakatabang sa sato manungod sa pagbado asin pag-ayos sa sadiri?

      Dapat na magpili kita nin “angay na bado, na may kabinian asin tultol na isip,” asin pirming magin malinig tanganing mahiling kan iba an satong “debosyon sa Diyos.” (1 Timoteo 2:9, 10) Pag-isipan an apat na prinsipyong ini: (1) Dapat na “angay” an satong bado. Arog kan nahihiling mo sa mga pagtiripon kan kongregasyon, dawa iba-iba an gusto kan mga lingkod ni Jehova sa pagbado asin istilo nin buhok, gabos iyan nagpapahiling nin respeto sa Diyos na satong sinasamba. (2) An pagbado na “may kabinian” nangangahulugan na an satong itsura dapat na dai nakakapukaw nin seksuwal na mga pagmawot, o na nakakakua nin sobrang atensiyon. (3) Naipapahiling ta na igwa kita nin “tultol na isip” pag dai kita basta na sana nagsusunod sa kada usong bado asin pag-ayos sa sadiri. (4) An satong itsura dapat na pirming magpahiling kan satong “debosyon sa Diyos,” para mahiling kan iba na nagsasamba kita sa tunay na Diyos.—1 Corinto 10:31.

      2. Ano an puwedeng magin epekto sa satong mga kapagtubod kan satong itsura?

      Dawa ngani may deretso kita na magpili kun ano an satong isusulot, dapat tang pag-isipan kun ano an puwedeng magin epekto sa iba kan satong itsura. Ginigibo ta an satong pinakamakakaya para dai kita magin dahilan na magluya an pagtubod kan iba. Hinihinguwa tang ‘mapaugma an satong kapwa para sa ikakarahay niya, tanganing maparigon siya.’—Basahon an Roma 15:1, 2.

      3. Paano an satong bado asin pag-ayos sa sadiri puwedeng makapahiro sa iba na mag-adal nin Bibliya?

      Hinihinguwa ta na magsulot nin angay na bado sa gabos na panahon, lalo na pag nag-aatender sa pagtiripon kan kongregasyon asin nagpapartisipar sa ministeryo. Habo tang magkaigwa nin bakong magayon na impresyon an mga tawo sa mensaheng dinadara ta. Imbes, gusto niyato na an satong pagbado asin pag-ayos sa sadiri makadagdag sa gayon kan satong mensahe asin “masamnuhan [ta] an katukduan kan satuyang Paraligtas.”—Tito 2:10.

      ARAMON PA

      Aramon kun paano ta masisigurado na an satong pagbado asin pag-ayos sa sadiri angay sa sato bilang mga Kristiyano.

      Duwang lalaki na nakatindog sa atubangan nin sarong huwes. An sarong lalaki nakaamerikana, mantang an sulot kan saro may mga gisi asin sobra kakaswal saka nakakopya.

      Puwedeng mahiling sa satong itsura kun baga igwa kitang respeto sa mga tawo na may awtoridad. Dawa ngani nahihiling ni Jehova kun ano an nasa puso ta, dapat na mahiling man giraray sa satong itsura na irinerespeto ta siya

      4. An marahay na pag-ayos sa sadiri nagpapahiling nin respeto ki Jehova

      Ano an pinakaimportanteng dahilan kaya sinisigurado tang pakarhay an satong itsura? Basahon an Salmo 47:2, dangan pag-ulayan an mga hapot na ini:

      • Huling an satong pagbado may epekto sa kun ano an iisipon kan mga tawo manungod ki Jehova, ano an dapat na magin epekto kaiyan sa pagpili ta nin bado?

      • Sa hiling mo, importante daw talaga na pag-isipan ta an satong pagbado asin pag-ayos sa sadiri pag nag-aatender sa mga pagtiripon asin nagpapartisipar sa ministeryo? Taano?

      5. Kun paano makakagibo nin marahay na mga desisyon sa pagbado asin pag-ayos sa sadiri

      I-play an VIDEO.

      VIDEO: “Gibuhon Nindo an Gabos na Bagay sa Ikakamuraway nin Diyos” (10:18)

      Mamahalon man o babaratuhon lang an sulot tang bado, dapat na malinig iyan asin angay sa sitwasyon. Basahon an 1 Corinto 10:24 asin 1 Timoteo 2:9, 10. Dangan pag-ulayan kun taano ta lilikayan tang magsulot nin bado na . . .

      • maati asin bakong pakarhay o sobra kakaswal.

      • yapit, o mapang-akit.

      Dawa ngani an mga Kristiyano bako nang sakop kan Katugunan ni Moises, dakul kitang manunudan diyan mapadapit sa kaisipan ni Jehova. Basahon an Deuteronomio 22:5, dangan pag-ulayan an hapot na ini:

      • Taano ta dapat tang likayan an pagbado asin pag-ayos sa sadiri na diyan an lalaki nagigin garo na babayi, o an babayi nagigin garo na lalaki?

      Basahon an 1 Corinto 10:32, 33 asin 1 Juan 2:15, 16, dangan pag-ulayan an mga hapot na ini:

      • Taano ta dapat tang isipon kun baga an satong pagbado o pag-ayos sa sadiri magkakaigwa nin negatibong impresyon sa kongregasyon o sa mga tawo kun sain kita nakaistar?

      • Anong istilo nin bado o pag-ayos sa sadiri an komun sa lugar nindo?

      • May nagkapirang istilo daw diyan na sa hiling mo bakong angay para sa sarong Kristiyano? Taano?

      Kadakul kitang mapagpipilian na istilo nin bado asin pag-ayos sa sadiri na makakapaugma sa sato pati man ki Jehova

      Mga lalaki saka babayi na manlain-lain an edad, rasa, saka nasyonalidad. Iba-iba an istilo kan saindang buhok saka pagbado pero gabos iyan angay para sa mga Kristiyano.

      MAY MGA NAGSASABI: “Bahala man ako kun ano an gusto kong isulot.”

      • Uyon ka daw diyan? Taano?

      SUMARYO

      Pag naggigibo kita nin marahay na mga desisyon mapadapit sa satong pagbado asin pag-ayos sa sadiri, ipinapahiling ta na rinerespeto ta si Jehova asin an iba.

      Rebyu

      • Taano ta importante ki Jehova an satong pagbado asin pag-ayos sa sadiri?

      • Ano an nagkapirang prinsipyo na dapat na maggiya sa sato kun manungod sa satong pagbado asin pag-ayos sa sadiri?

      • Ano an puwedeng magin epekto kan satong pagbado asin pag-ayos sa sadiri sa magigin impresyon kan iba sa tunay na pagsamba?

      Gibuhon Ini

      HILINGON MAN

      Aramon kun ano an puwedeng isipon kan iba kun manungod sa saimong pagbado.

      “Kumusta an Itsura Ko?” (Artikulo sa jw.org/bcl)

      Aramon kun taano ta dapat mong seryosong pag-isipan nguna an mga konsekwensiya bago magpatatu.

      “Ano an Sinasabi kan Bibliya Manungod sa Tatu?” (Artikulo sa jw.org/bcl)

      Pag-isipan an iba pang mga prinsipyo sa Bibliya na makakatabang sa sato sa pagdedesisyon.

      “Nagpapamuraway Daw sa Diyos an Saimong Istilo nin Pagbado?” (An Torrengbantayan, Setyembre 2016)

      Paano nanudan nin sarong sinserong babayi na igalang an desisyon kan iba kun manungod sa pagbado?

      “Ang Pananamit at Pag-aayos ang Naging Katitisuran Ko” (Gumising!, Disyembre 22, 2003)